PHOWEBI 8 - ASII LAKDAP Bible (BSI)

Gideon Raq Midiannok Tiithumpak Khatto

¹ Kra akhing na Ephraim phan raq Gideon ma, “Ümniiraq Midiannok khatkai kilaüta naishiq ma jamto chongmaü? Ümniiraq naishiq ka jam nguto roilaü?” nguta tsangshiq raq Gideon ma kai akhiq ariq tiibottaq trangto.

² Kiijiishe apaiq raq treto, “Ngi raq jamlai wa shamkang kriika namshiq raq jaq sham lan kriirai tiimren chang ka riimak. Namshiq Ephraim phan raq ralangse li sham lan kra dongdii min, naita raq ümtinkhan wa shamkai kra tlotli rom raüta thapthi raüla, namshiq raq sham lan kriika ajong pinthum.

³ Jamkhano ngukla, Shiikeawe ningkun maq namshiq raq Midiannok hokham wenai Oreb nai Jeeb ka tsat lan. Kra jaqsham jonghea sham lan kriimaq thi miika, ngi raq shamkang arka athap thi chang min ahü?” Apaiq raq ara ngukiitiishe tsangshiq ka khiq mak she tsaqkito.

⁴ Kra akhing na, Gideon nai asenginok shitsam ka Jordan rai na asaüwi she riito. Raüta Jordan rai kiimin ajin wan wishe riito. Tsangshiq ka rejai jotsi raq anü makaiq she riito. Shatmaq tsangshiq raq rethun ka jowan ruqli jowanto.

⁵ Ümtiikiiwa tsangshiq ka Sakkoth chela niishe saütaq, apaiq raq kra chelati ma akha nguto, “Mangchan lanta isengi sreabi ma winsii phanshi ra kuq ronglaq. Tsangshiq anü makaiq she. Kiimaq ngi ara Midiannok hokhamwenai Jeba nai Jalmunna joho kitiikang.”

⁶ Shatmaq Sakkoth chelati welabi raq, “Naishiq raq ümsengi phenlabi ma jamlai nguto phaqsea ka mikuq hai? Ümniiraq ümchaü niitaq Jeba nai Jalmunna ka lap laüta kharü maq mikha haüshaq dea kata?”

⁷ Kiijiishe Gideon raq, “Ahea na, kiikha ngutlan jiika!. Ümtiikiiwa Tatiwe raq Jeba nai Jalmunna ka ijaq khon mong na kuqjiiq, kra akhing niitiq, kumtsaiphii binjü wa shuk hii miishetiq namshiq ka mitsat kang!” nguta nguto.

⁸ Kiimahali Gideon nai asengi thun ka Penuel chela niishe wawanto. Raüta Penuel chelati jaq wiimin kiikhiisii tiipaiqneato. Shatmaq Penuel chelati riimin Sakkoth chelati bom kiikhiisii hali bombi khoti kuqnongto.

⁹ Kra ningkhan apaiq raq tsangshiq ma akha nguto, “Ngi ka khusang rakhang maq mijang wanha. Kra saüwan tiikang akhing niishetiq, namhiqshong wa kongmong chong ka tiibunlak mitiiq baiq kang!”

¹⁰ Riita Jeba nai Jalmunna ka tsangsengi phenlabi rai Karkor chela na riito. Kumtsaiphii wang binjü na siti maiqphan thun phenlabi phong wa, 15,000 lishe abung tiichongto. Phenlabi 120,000 ka re jaq na tsaito.

¹¹ Kiimaq Gideon ka kumtsaiphii wang binjü kinjiji rai kiimaq wawan raüta, Noba chela nai Jogbeha chela maq shedong nü nü thithi kriimaq wawanto. Raüta Gideon raq re ka tiihanghiiq miilishe khatto.

¹² Kra Midiannok hokhamwe nai Jeba nai Jalmunna ka aju riito. Shatmaq apaiq raq tsangnai ka tiikot mrot johoto. Raüta lapto. Raüta tsangshiqnok phenlabi tlotli tiimokchaq, sung atsii min tlam lam mak khatto.

¹³ Gideon ka rekhat lot raüta jaijang wan Heres kinchit lam miishe awarai riito.

¹⁴ Apaiq raq jerowe ashi Sakkoth chelati ka lapto. Raüta apaiq bom ka waito. Krai mren, kra jerowe raq Sakkoth chelati welabi maiq roqmiishi ri wemiishi mang ka waiq raüta Gideon ma kuqto.

¹⁵ Kiijiishe, Gideon ka Sakkoth chelati welabi phana wato raüta akha waito, “Namshiq raq ngi khrumkuq man dea ira tsan na asi khata? Namshiq raq isenginok phenlabi anii makaiq kriima tü adung kuq lot man jamkhano ngukla kra akhing na ngi raq Jeba nai Jalmunna ka milap hashaq li nguta ngulan ihata. Ahea, tsangnai ka ahata!”

¹⁶ Kra ngu raütiishe, apaiq raq kumtsaiphii binjü wa shuk hii akü atsin wiq phan kriimaq Sakkoth chelati welabi kra khülü khüshii she tsatsiqto.

¹⁷ Kiimaq apaiq raq Penuel chela wa kongmong chong kra tiiqbaiqto kiimaq kra chelati maiq ka jiipbaiqto.

¹⁸ Raütiishe Gideon raq Jeba nai Jalmunna ma waito, “Namnai raq Tabor chela maq tsatbaiq lan maiq thun ira jamkhiiwa chhilan?” Tsangshiq raq treto, “Tsangshiq kiimin ümsham ümri kiikhiisii riito. Tsangshiq ka loweatek hokhamwe setiim ikha siisaq riito.”

¹⁹ Kiijiishe Gideon raq nguto, “Tsangshiq ka iphu inotiim, ichhüthiq nyungshi setiim siisaq. Ngi raq atiitum lata ngutiikang, namshiq raq tsangshiq tsat man nguraü ka ngi raq namshiq kiimin tsat mang mirha wa.”

²⁰ Kiijiishe apaiq raq ase chhikhuwe Jethar ka thaüto, “Kriq, tsangnai ka sebaiqtlo laq!” Shatmaq no riika anep jasai chat mak dea riito. Apaiq ka anang nam riito. Jamkhano ngukla apaiq ka nose hea, khumak riito.

²¹ Kiijiishe Jeba nai Jalmunna raq Gideon ma nguto, “Warea. Ümjaq maq nainai ara tsatbaiq laq. Wela ka wela jaq niitiq tsaichang.” Krai mren, Gideon raq kriiwenai ka tsatbaiqto. Raüta tsangshiq Kumtsong nyamse kong dangkong wa laktum thun ka wiita lamto.

Gideon Raq Sumla Noq Ngarai Tangto

²² Kriijai maq, Israilnok raq Gideon ma akha nguto, “Ümniika naishiq pengti ma jalaq. Ümnaq tsaijai min ümsaü ümsetiim raq mung ka milang laq. Ümniiraq naishiq ka Midiannok jaqkhon wa dokda kuq laü.”

²³ Kiijiishe Gideon raq treto, “Ngi ka namshiq pengti ma jamang, kiimaq ise kiimin jamak. Tatiwe kli namshiq pengti miraq.”

²⁴ Shatmaq apaiq raq akha hali ngunongto, “Ikhiijiika, ngi raq namshiq ma bom poshi chong pha. Namshiq khumtek raq sepat lopi tsiiq niti thun lam wan lan riiwe kli ana ijaq na kuq rong laq.” (Kumtsaiphii wang na shongtinok thun riika chaq niti laktum laktlo).

²⁵ Kiijiishe nokwe raq treto, “Naishiq raq kriika chochikhiq maq mikuq hai.” Krai mren, tsangshiq raq kheathum kaü ashi hiq na phiito. Raüta maiq loweatek raq maiqmii jaq wa niti thun ka phongtsoktsok kuqto.

²⁶ Krai mren, Gideon raq chaq niti laptaq thun kra shin kiita, kilo roqnai tin khan saüto. Riita arka laihin mii akhiiq ni na ti chang, jaq na pachang, kiimaq dang na lakchang thun kiimaq Midiannok hokhambi raq samchang miirii khu akhea mintiitii phan, kiimaq kumtsong kong dang na tlakchang phan laktum miirii thun kriika weahü riito.

²⁷ Kriithun chaq maq Gideon raq sumla phra ashi loto. Raüta apaiq sichang Orphra chela na kra sumla ka thüto. Krai mren, Israilnok tlotli raq Shiikeawe ka amiimshe riibaiqto. Raüta sumla phra kra shomnoq kaishe riidunghoto. Riita arka Gideon nai ajamtitiim ma tsangshiq dea wa chang thiikho miishe jakito.

²⁸ Krai mren, Israilnok raq Midiannok ka khatto. Raüta tangto. Kra ningkhan Midiannok ma haisong chang ka ahü she riito. Krai mren, Israil mung ka Gideon mitsai shaq wiiwii, wiiroqblai mung atsing maq sito.

Gideon Tsaito

²⁹ Gideon ka ahiqshong niishe wawanto. Raüta kiijiishe siwato.

³⁰ Asetiim ka weroq miishi, jamkhano ngukla achaktiim ka apawiq riito.

³¹ Kiimaq achak chakliip nyungshi riito. Kriinyung ka Shekhem chela na riito. Kriinyung tsangnai se ka maiqwese ashi riito. Apaiq mang ka Abimelekh.

³² Joash se Gideon ka tikii kiikaiq niishetiq tsaito. Riita apaiq ma ka awe Joa lapchang machiim kiijaq adam na lapto. Kra maraükhu ka tsangti Abiejar weraü phan siwan chang hiqshong Orphra chela kiijaq riito.

³³ Gideon tsaijai maq Israilnok raq Shiikeawe lamphan ka alaq she riibaiq nongto. Raüta tsangshiq raq Baal phra thun ka shomnoqho nongto. Tsangshiq raq Tongshong Baal phra ka tsangshiq phrakaü ma tiija raüta shomnoqto.

³⁴ Krai mren tsangshiq raq Tatiwe tsangshiq Shiikeawe, tsangshiq tro na siti tsang jaqtinok jaqkhon wa tiikhup wongke wantiwe ka amiim she riibaiq nongto.

³⁵ Kiimaq tsangshiq ka Gideon raq Israilnok miitu ümchuwa jaqsham ahea shamkuqtaq kra miitu ajamti asetiim ma kechu tumkuq maq she riito.