PHOWEBI 7 - ASII LAKDAP Bible (BSI)

Gideon Raq Midiannok Khat Raüta Tangto

¹ Ranaiqshi ranap chu maq Gideon nai asengi sreabi ka wawan raüta Harod Khamraise tho na tsangshiq piitiip teito. Kiimaq Midiannok piitiip ka tsangshiq piitiip maq shekhu nü na hiqthung tan na More kinse tho na teito.

² Kiijiishe Tatiwe raq Gideon ma akha chongto, “Ngi raq Midiannok tiitangke miika, ümniirai phenlabi ka pahea. Tsangshiq raq rekhat ka tsangshiq maiqmii ningkun maq tangkai nguta mongo miraq. Raüta tsangshiq raq ngi ka wea mak miraq.

³ Arningkhan nokwe ma akha riimlaq, “Juwa ahai riitlan, kriiti ka jam niili mijang wanlaq. Naishiq abiti thun ka ara Gilead pum na piitiip tei laitli misihai.” Krai mren, maiq ka hingroqnai ri hingnai jam na jang wanto. Shatmaq kiijiika maiq hingroqshi khingkito.

⁴ Kiijaq hali, Tatiwe raq Gideon ma chong nongto, “Ümniirai maiq ka ümchaü min pahea shaqli. Tsangshiq ka khamrai kiina sheaho laq. Kiijaq ümnaq miitu ngi raq tsangshiq mitsea kuq kang. Ngi raq kriiwe ka ümniirai wadam chang nguta nguhala, apaiq ka waratlo. Kiimaq ngi raq kriiwe ka ümniirai wadam maimak nguhala, kriiwe ka wadam maimak.”

⁵ Krai mren, Gideon raq maiq thun ka, jürai na sheahoto. Kiimaq Tatiwe raq apaiq ma thaüto, “Jurwa kham ka kuku raq nyangtlaq ikha atili maq mehihi nyangtlaq, kriiti thun ka alakü maq nga raüta kham chum na bumtlii raüta nyangtlaq, kriiti phong wa pong na raibaiq laq.”

⁶ Riita maiqmii jaqphi na kham ka khusaqsaq raüta tsoqhihi nyangti thun ka maiq shitsam riito. Kiiwa chantlaq maiq abiti thun tlotli riika tsang lakü maq ngasaq raüta khamchum kiina bumtlii maq nyangto.

⁷ Kiijiishe Tatiwe raq Gideon ma chongto, “Ngi raq ümniika mitiiwong kuqha kiimaq ara maiq shitsam, kham ka tsangshiq jaqphi na tsoq raüta nyangti thun kra liimiili, ngi raq ümniima Midiannok ka mitiitang kang. Maiq ahinti thun ka wiita jam na jang wan ronglaq nguta chongkuq laq.”

⁸ Krai mren, Gideon raq Israilnok ka jam na tiiwabaiqto. Kra shitsam tiichongtaq kra riilishe tumsea lamsii thun nai lerong thun ka riichom raüta thüto. Midiannok piitiip ka, tsangshiq piitiip takiq na hiqthung tan na riito.

⁹ Kra rawa Tatiwe raq Gideon ma akha aming kuqto, “Tiido laq. Laüta Midiannok piitiip ka khatkikiq. Ngi raq kra ümjaqkhon mong na kiinong kuqkang she.

¹⁰ Shatmaq ümniika kra khatkai ma haisi jiila, ümjaqshise Pura kra sheaho laüta, piitiip kiina kilaq.

¹¹ Laüta tsangshiq liipan na jamlai bom wa riichong tlaq kra tailaq. Kra taihaüla, tsangshiq khatkai ma ümhai simak she miraq.” Krai mren, Gideon nai ajaqshi se Pura ka rewe piitiip kiijaq saüli kihoto.

¹² Raüta Midiannok, Amalakaiqnok, kiimaq kumtsaiphii wang na sitinok maiqphan thun ka kra tan mong kiijaq, tsangshiqnok piitiip ka kupchi longtlaq ikha, ra ma hiq ma tan ka wiita mato. Kiimaq kra tsangshiqnok kumtsong kong ka khamjongkii na kumtsai riiphongtlaq ikha riito.

¹³ Gideon ka kiijaq saüki raüta, maiq weshi raq akongtiwe ma apaiq rawama kra chongrea taihoto. Kriiwe raq akongtiwe ma akha chongto, “Ima maq, jaili winsii thop ashi ka nashiqnok piitiip mong na küwanto, raüta tombutiip ashi tiibunlak hiq na tiiphintsiip tiiqbaiqto nguta makang.”

¹⁴ Kiijiishe akongtiwe raq treto, “Arka Israilnok nepjasai. Joash se Gideon kra malaü! Shiikeawe raq apaiq ma nashiq Midiannok nai phenlabi ka wiita tiitang kuqto she!”

¹⁵ Gideon raq kriiwe rawa ma bom nai kra liichum ka tairaüta, apaiq ka alakü maq hiq na bumsaq raüta Tatiwe shomnoqto. Raüta apaiq ka Israilnok piitiip kiina hali jangwan nongto. Kiimaq akha nguto, “Tiido ronglaq! Tatiwe raq namshiq ma Midiannok phenlabi ka tiitang kuqto she!”

¹⁶ Raüta apaiq raq asengi shitsam ka kongtsam na triipheato. Raüta maiq khumtek ma lerong ka achhuqchhuq kuqto. Kiimaq hamlii tsabum mong na waniitu kra tiinyaije achhuqchhuq kuqto.

¹⁷ Raüta apaiq raq tsangshiq ma akha chongkuqto, “Liirong laq! Ngi ka piitiip tho kiijaq saüho tiikang na, ngi raq jamlai wa riitiikang, kra phanphan klo rongliijo.

¹⁸ Ümtiikiiwa ngi nai ikongtitiim raq naishiq lerong ka tsütrang haila, namshiq riimin namshiq lerong ka piitiip trotam maq tsütrang rongliijo. Lanta, ‘Tatiwe miitu kiimaq Gideon miitu,’ nguta gitrang rong laq.”

¹⁹ Krai mren, Gideon nai asengi maiq shishi ka rawa wathung wakham saü wan namnam she angu na, kintsongti ka klailot ri Midiannok piitiip tiinap kiijaq kito. Raüta tsangshiq jaq na lerong shamtlaq kra tsütrangto. Kiimaq tsangshiq jaq na hamlii tsabum shamtlaq thun kra tiibunbaiqto.

²⁰ Kiimaq ahinti kongnai kra riimin kiikhiisii riito. Tsangshiq tarü raq jaq pha nü na waniitu ka doraq chhaq riito, kiimaq jaqtsi nü na lerong kra doraq chhaq riito. Raüta tiihong raüta, “Tatiwe miitu nepjasai kiimaq Gideon miitu nepjasai!” nguta gitrangto.

²¹ Maiq loweatek ka maiqmii chapchang ba na piitiip tro na chapraq chhaq chapkito. Krai mren, rekong ka agi asiiwa trang la pintrangto.

²² Gideon nai asengi raq lerong kra tsütrang wanto, kiimaq Tatiwe raq rethun ka, maiqmii nepjasai chat raütiishe, maiqmii liipan na triijiip wanto. Tsangshiq ka Jarethan chela lam kriimaq riita Beth Shitta chela kiina, kiimaq riita Tabbath chela tho na Abel Mehola chela kiina jutrangto.

²³ Kiijiishe, Naphtali phan, Ashar phan, kiimaq Manase phan ka wangnai wiita wa tiihea wato. Krai mren, tsangshiq raq Midiannok ka johoto.

²⁴ Kiimaq Gideon raq kiimwebi thun ka ku akin tonglong Ephraim phan wang kiina tiiwa raüta akha tiichong wato, “Kirong ra ana. Lanta Midiannok ka khat ronglaq! Jordan raikhü kiimaq kheli lanta khat ronglaq. Kiimaq Bethbara khamrai tsiim wii binjü kiimaq kheho li ronglaq. Midiannok ma khamrai thun kra naq tiijin rongkiq maq khat ronglaq.” Krai mren, Ephraim phan maiq ka adam na riichom heato. Raüta tsangshiq raq Jordan Rai maq kheto kiimaq khamraisetiim khü thun ka Bethbara na saüli ajinhowa kheto.

²⁵ Krai mren, tsangshiq raq Midiannok wela ajong wenai Oreb nai Jeeb ka lapto. Tsangshiq raq Oreb ka Oreb Longkaü hiq ba kiijaq tsatbaiqto. Kiimaq Jeeb ka Jeeb Spiqtsitsai tiikitchang longtham ba kiijaq tsatbaiqto. Tsangshiq raq Midiannok ka tiikot mrot jowanto. Kiimaq Oreb nai Jeeb khupo ka Gideon phana lam wanto. Kiitiikaq Gideon ka Jordan rai maq shedong nü wang binjü niishe riito.