PHOWEBI 6 - ASII LAKDAP Bible (BSI)

Midiannok Raq Israilnok Jamshato

¹ Jangshi ri hali Israilnok raq Tatiwe man na ngarai tangto. Kriikha niishe Tatiwe raq Israilnok ka Midiannok jaqkhon mong na wiimiishi thübaiqto.

² Midiannok ka Israilnok thaq na ahong ala, srea nola riito. Kriikha niishe Israilnok ka Midiannok ma hai ma longshabok thun na nai ku akin binjü kiina tiipaüto.

³ Israilnok raq wak na tü atsam lai wanki raüla, Midiannok ka Amalakaiqnok nai kumtsaiphii binjü na shongtinok maiq thun kra sheaho raüta Israilnok ka longkilili riitlo.

⁴ Tsangshiq ka Israilnok mung kiina kilili raüta, piitiip teitlii maq, wak ram wa tü atsam kra shemai nü wang na Gaja chela binjü kiina saüli tiithen baiqtlo. Raüta tsangshiq raq skukong, chhechhi minsaü kong, kumtoq kong thun ka wiita hutjokjok tsuq wantlo. Raüta Israilnok miitu ka aphaq asea chang jamlai phan min tiichong mak nyea wan lili riitlo.

⁵ Tsangshiq ka tsangshiq jam nyamsekong nai tombutiip haichang tombu thun ka horaq chhaq maq kupriikong longtlaq ikha ranyaq tangtang kilili riitlo. Tsangshiqnok nok kiimaq tsangshiq kumtsong kong ka pahea awealot chang riimak. Tsangshiq ka kiraüta Israilnok mung ka tiithenbaiq kitlo.

⁶ Krai mren, Israilnok ka ümkha ijasiq she, tsangshiq raq notshotshot jamshato.

⁷ Kiijiishe Israilnok ka Tatiwe man na Midiannok jaqkhon mong wa tiichhiikuq laq nguta khrum jaü jaü hoqsii trangto.

⁸ Kra riikiitiishe, Tatiwe raq tsangshiq phana shammi weshi tiikito. Apaiq raq tsangshiq ma Tatiwe, Israilnok Shiikeawe tsütsa ka akha lamhoto: “Ngi raq namshiq ka Ejip mung na maiqdikong asi han wa tsuq wan kang.

⁹ Ngi raq namshiq ka Ejip mungti jaqkhon mong wa kiimaq ara Kanan mung na sitinok raq namshiq khattlaq kiiwa tiichhii kuqkang. Namshiq raq jamkho Kanan mungti khat wan lan, kra phan phan ngi raq tsangshiq ka jobaiqkang lata tsang mung ka namshiq ma kuqkang.

¹⁰ Ngi raq namshiq ma Ngi ka namshiq Tatiwe, namshiq Shiikeawe nguta chongkuq kang. Arkha na namshiq raq, ümchaü namshiq riishe jiiwan lan arjaq siti, Amoraiqnok phra thun ka shomnoq maimak nguta chongkuq kang. Shatmaq namshiq raq ibom taiman tlea lan.”

Tatiwe Raq Gideon Ka Phowe Ma Shongto

¹¹ Kra akhing na Tatiwe rase ka Ophra hiqshong na kito. Raüta Abiejar weraü wa, maiq weshi amang Joash ngutlaq kriiwe hiq na ok chongji na ngato. Ase Gideon ka Midiannok raq apaiq chhijiiq nguta, ahukse maq Bunwong khaolüm ka spiqtsitsai tiikit chang longtham na tiikit rea riito.

¹² Tatiwe rase ka kiijaq apaiq khaki na dongkito. Raüta akha nguto, “Tatiwe ka ümniirai, srea nola jongwe lei!”

¹³ Gideon raq apaiq ma nguto, “Shiilangwe lei, ümniima bom poshi wai pha. Riita Tatiwe ka naishiq rai asi jiika, naishiq ma atinkhan mra ka jamkho pintla? Tatiwe raq awang chang pahea jaq shamkuqto nguta naiwetiim raq phankuqtaq kriiha apaiq raq tsangshiq ka Ejip mung wa tsuq wanto nguta phantlaq kriiha ümchaü ümbano? Tatiwe naishiq ka miimbaiqto she raüta Midiannok jaqkhon mong niishe kuqbaiqto.”

¹⁴ Kiijiishe Tatiwe raq apaiq ma akha aming kuqto, “Walaq. Ümningkun ajong maq walaq. Laüta Israilnok ka Midiannok jaqkhon mong wa tiichhii laq. Ngi Tatiwe raq ümniika thaü tiikang.”

¹⁵ Kiijiishe Gideon raq treto, “Riita Tatiwe ngi raq Israilnok ka jamkho mitiichhii kuqha? Naita ka Manase phan phong na, taranse pinthum. Kiimaq ngi arka ijamtitiim iphu inotiim phong na manghü rahü jehin.”

¹⁶ Kiijiishe Tatiwe raq treto, “Ümniiraq milot haü. Jamkhano ngukla ngi raq ümnaq mikhrum kang. Ümniiraq Midiannok ka jeriiriiq hea, weshi laqlaqse ikha notshotshot li mitang haü.”

¹⁷ Gideon raq treto, “Ümniika ngi ma khoqriiq tlaü dea jiila, ümniika Tatiwe dea nguta phanshi ra saqse tiichhi kuq laq.

¹⁸ Ngi raq ümniima phanshi ra aphaq asea chang honglu lamkuq wan pha. Ümniika arjaq heashi kheli laq.” Kiijiishe apaiq raq treto, “Ümnaq mijangki haü shaq wiiwii ngi ka kheshat mirkang.”

¹⁹ Krai mren, Gideon ka ajam na wawanto. Raüta chhechhise arese ashi ka ta raüta ngam ka lumto. Kiimaq tokroqshi bunwong win maq winsii ka pi maq shohü maq lumto. Raüta apaiq raq ngam ja ka taükok ashi thiito. Kiimaq ngamtai thakotkot ka takpo ashi na thii raüta Tatiwe rase okchong tong na nga tlaq kiijaq lamkuq hoto.

²⁰ Kiijiishe rase raq apaiq ma aming kuqto, “Ngam ja nai winsii thun ka ara longkaü thaq na phong laq. Laüta ngamtai thakotkot ka kriithaq na nyuklaq.” Krai mren, Gideon riimin kra phanphan kloto.

²¹ Kiijiishe Tatiwe rase raq ajaq na shamtlaq nyeakii kra tsii maq ngamja phong nai winsii phong kiijaq thansaq thanto. Krai mren, longkaü kiiwa wa ka riidung phok saq lüwanto. Raüta ngamja phong nai winsii phong ka wiita khiim baiqto. Raüta rase ka kiiwa mokisaqli she mokito.

²² Kiijiishe Gideon raq apaiq raq chhitaq kriika Tatiwe rase khanea nguta takto. Kiimaq apaiq ahaisi akiinyii lam maq, “Ajong Thaq Na Ajong Tatiwe le! Ngi raq ümrase rai mantut na sham riichhikang!”

²³ Shatmaq Tatiwe raq apaiq ma nguto, “Hansang maq silaq! Naq haikiq. Ümniika tsai maü.”

²⁴ Gideon raq kriiba kiijaq Tatiwe ma berong-wacha ashi haito. Raüta kriika, “Tatiwe ka Hansang,” nguta mangto. (Kra berong-wacha ka ümchaü min Abiejar weraü phan hiqshong Ophra hiq na tiishong shatli sitlo.)

²⁵ Kra rawa Tatiwe raq Gideon ma akha chongto, “Ümwe minsaü pongwe kra rai minsaü pongwe ashi hali arawii wiimiishi saüpongwe kriiri lamholaq. Laüta ümwe raq Baal ma ahaikuq berong-wacha ka runbaiq laq. Laüta Ashera phra nyung berong Baal sumla tiinap na ashong kriimin chumbaiq laq.

²⁶ Laüta ara hiqlamse thaq na samheawiq Tatiwe üm Shiikeawe ma berong-wacha ashi hailaq. Kra hailaüta minsaü pongwe ashiti ka ta laq. Laüta ümniiraq Ashera berong adaqbaiq haü wa chin kra lam laüta, minsaü maa ka wiipumtam maq wa na chaq laüta honglu kuq laq.”

²⁷ Krai mren Gideon raq ajaqshisetiim weroqshi shea raüta, Tatiwe raq apaiq ma chongtaq kra phan phan kloto. Apaiq ka kra klo ma ajamtitiim nai chelati nokmaiqse ma ahai sihea riito. Kriikha maq apaiq raq kra jaqsham ka rawa mong na kloto.

Gideon Raq Baal Noq Chang Berongwacha Runbaiqto

²⁸ Anap ranaiq na ranapchu maq kra chelati ka akon maq tiido raüta liikiita, Baal berong-wacha nai Ashera berong ka adaqbaiq wishe chhito. Kiimaq minsaü pongwe anai ngojati ka kiijaq berong-wacha ashi haitaq kiijaq honglu na achaq baiq wishe.

²⁹ Kra ningkhan tsangshiq liipan na, “Ara juro riita?” nguta bom ka riiwaito. Raüta tsangshiq raq kra konchonto. Raüta, Joash se Gideon raq shiithento nguta sapto.

³⁰ Kiijiishe tsangshiq raq Joash ma akha nguto, “Ümse ka ana sheaho laq. Naishiq raq apaiq ka atseabaiq chang! Apaiq raq Baal berong-wacha ka daqbaiqto kiimaq kra tiinap wa Ashera berong kiimin daqbaiqto.”

³¹ Shatmaq Joash raq apaiq shiitepti nokwe thun kiima, “Riita namshiq ka Baal rai shea pongtlan? Namshiq riika apaiq kiishea tiiwong tlan? Jurwa apaiq rai pongtlaq kriiti ka ranap ra miwü shaq na mitsat baiq. Baal ka shiikea dea jiika apaiq maiqmii mitiichhii liina. Apaiq berong-wacha shiithen baiqtaq kata.”

³² Kra akhing miiphat she Gideon mang ka Jerubbaal nguta mangto. Jamkhano ngukla Joash raq, “Baal raq maiqmii mitiichhiiphaq liina. Apaiq berong-wacha shiithen baiqtaq kata.”

³³ Kiijiishe tlotli Midiannok, Amalakaiqnok, kiimaq kumtsaiphii wang na siti maiqphan thun kra adam na riitamto. Raüta Jordan rai ka jinto. Raüta Jejreel tan na thungto.

³⁴ Kiitiika Tatiwe wenyi raq Gideon ka kunli rom wanto. Krai mren, apaiq raq rekhat kai miitu Abiejar weraü phan maiq thun ka apaiq jai phan kirong ra nguta tsangshiq hea boli tsüto.

³⁵ Kiimaq apaiq raq reshun kiimwebi ka Manase phan noknai ri hiqshong thun kiina rekhatkai apaiq jaiphan kirong ra nguta tiiheato. Kiimaq apaiq raq kiimwebi thun ka Ashar phan, Jebulun phan, kiimaq Naphtali phan thun kra tiihea wa tiiwato. Krai mren tsangshiq thun kiimin apaiq pong kai dam kito.

Skubin Nai Bangkham Maitai

³⁶ Kiijiishe Gideon raq Shiikeawe ma nguto, “Ümniiraq ngi lümaq Israilnok ka tiichhiike miitu bom ka thapthi wan laü she ngutlaü.

³⁷ Ahea ikhla, ngi raq unirai wiijam ka bunwong bukchang hiqsii ba kiijaq phongthü tiikang. Riita, anap ranap na, bangkham ka ara unirai phong thaq niili, hiq thung kiijaq ahü nguraü la, ümniiraq ngi lümaq Israilnok ka mitiichhii kuq haü dea nguta misapha.”

³⁸ Kra phan phan dea hongto. Gideon ka anap ranap na akon maq tiido raüta, unirai wit thun ka sorija winpin jongkaü na sokiita, kiimaq unirai wit thun ajaq maq sokiita, sorija pin ka bangkham raq mali riito.

³⁹ Kiijiishe hali Gideon raq thongshi ri Shiikeawe ma nguto, “Ngi ma naqkhiqkiq. Ngi raq ümniima bom poshise ri chong nongpha. Ara unirai wit maq jangshi ri hali maitai nongpha. Riita ümchaü lak niika, unirai wit thun ka shinriiqriiq mirlaq. Kiimaq hiqsii thung ba ka bangkham raq jobaibai mipiim laq.”

⁴⁰ Krai mren, kra chongtaq kra phan phan Shiikeawe raq kloto. Kriimaq napjai ranap na liikiita unirai wit thun ka shinriiqriiq riito. Shatmaq hiqsii thung ba ka bangkham raq jobaibai riito.