PHOWEBI 5 - ASII LAKDAP Bible (BSI)

Debora Nai Barak Shomshi

¹ Kra ranaiq Debora nai Abinoam se Barak raq ara shito:

² Tatiwe tiitsam laq! Israilnok ka re khatkai, shairang chapto; mungmaiqse kiimchii maq, tiido rang rang chapto.

³ Hokhambi lei tai ronglaq! mungtu shiilangbi lei, samhea tiitsang tai ronglaq! Ngi raq Israilnok Shiikeawe Tatiwe ma, shomshi mishingeha, phanrap tsüngii lata mishi ngeha.

⁴ Tatiwe lei ümnaq Seir pum maq, sat wan laü akhing na, ümnaq Edom mung maq dong wan laü akhing na, hiq ka atiikhai banban riito, kiimaq ra wa rajun düthaü raüto. Tengto, phum mong wa kham raüto.

⁵ Sinai pum Tatiwe man na, pum thun atiikhai ban ban riito, Tatiwe Israilnok Shiikeawe man na, tiikhai ban ban riito.

⁶ Anath se Shamgar pat na, jael pat na, nyamse laopan lengthun Israil mung lam maq, khum lot mak riito, kiimaq wanhiq khumti raq, shiiplam thun kiimiili khumto.

⁷ Israil mung wa chela thun ka, hiqmiq changkhü ikha riito, Debora lei; ümnaq misaüho shaq na, ümniika Israilnok ma anyung ikha, misaüho haü shaq na.

⁸ Kiitiika mung na re dongto, kiitiikaq Israil raq phrakong anye tseato, Israil mung wa rewe hingroqblai raq, weshi ra raq liiq riimakla, piq lamho tiishea?

⁹ Imongjii ka Israilnok phentubi rai, kiimaq mungmaiqse kiimchii riichii maq, rekhat chap wanti rai sitlo, Tatiwe li tiitsam!

¹⁰ Chong ronglaq, kumtoq kong thaq na chaotibi lei, ngachang diim na ngati lei, kiimaq ümriiba na kihan jiimin, hok maq khumtibi lei.

¹¹ Taironglaq! Khappong tro na, maiq arii ariiq tsantrang tlaq kra, tsangshiq raq Tatiwe raq rekhat tangtaq kra, riichongtlo, Israilnok raq rekhat tangtaq thun kra riichongtlo! raütiishe Tatiwe senginok ka, tsangshiq chela thun maq, rekhatkai sat wanto.

¹² Shunshea laq, Debora lei shealaq! shea laq! Ashi ashi shilaq! Laüta shea laq!, Sinkhu na, Ahinoam se Barak lei, shumwikong tsuq laüta, sinkhu lamshea wala!

¹³ Kiijiishe tsapkapkap maq sitibi ka, tsangwelabi phana saükito, Tatiwe senginok ka apaiq phana, rekhat kai shairang kito.

¹⁴ Tsangshiq ka Ephraim wang wa, tanthung na satkito, Benjamin phan raq shunshea tlaq kra jai na, kiimaq tsangshiqnok jai na kito. Sreajongbi asheati thun Machir saüse phan wa, phentubi ka Jebulun phan wa.

¹⁵ Isakar phan sreabi ka, Debora rai adam kito, tengto, Isakar min kito, kiimaq Barak min kito, kiimaq tsangshiq raq apaiq jai na, hiqthung tan na saüli kito. Shatmaq Reuben phan ka tsannai riito; rekhat kaichang shea kimai chang wea nguta nguto.

¹⁶ Tsangshiq jamto skukong rümli? sku rümti raq heatlaq kra tai ma ngutiisha? Tengto, Reuben phan ka tiima anai dea, tsangshiq ka akai chang shea kimai wa, nguta khaiqkhamto.

¹⁷ Gad phan ka Jordan rai maq shedong nü na shongto. Kiimaq Dan phan ka sangpholai na minshiiqto. Ashar phan ka khamjongkii na shongto; tsangshiq ka khamjongkii na chamtraq, shongto.

¹⁸ Shatmaq Jebulun phan nai Naphtali phan raq, miisaq tan raüta re na kito.

¹⁹ Tanakh hiq maq Megiddo tho na tsiimserai maq, hokhambi ka kiraüta khatto; Kanannok hokhambi raq khatto, shatmaq tsangshiq raq kampho ka, lap wan lot mak riito.

²⁰ Raiqsaiq thun raq ra maq khatto; ra na akhum lam maq khatto, tsangshiq raq Sisera khatto.

²¹ Kishon rai chhang raq tsangshiq, wiita che wanto, Amok dungdung Kishon Rai chhangto. Ngi ka rekhat wan, wawan ruq mirha, ningkun shoqwiishoq maq, khat wan ruq mirha!

²² Kiijiishe kumrang kong ka, adoqhaha saü wanto, tsangshiq hok maq, hühap hiqhap kito.

²³ “Meroj chelati khuthaq na manson laq,” nguta Tatiwe rase raq ngutlo, “Sonlaq, manson laq! Meroj chela na siti ma. Tsangshiq ka Tatiwe khrumkai kimak riito, phenlabi ma jaraüta apaiq miitu, rekhat kai kimak dea riito.”

²⁴ Jechakre phong na pinthum, akiim asi nyung ka Jael, Hebar tanyung Kenaiq phan wa, Tombutiip na siti jechakre phong wa, pinthum kopan jonghea nyung riito.

²⁵ Sisera raq apaiq jaq wa kham jaüto, shatmaq apaiq raq minsaü pü kuqto, kriinyung raq apaiq ma, minsaü pü wa krim ka, pinthum tsomhea pintamcho na kuqto.

²⁶ Apaiq raq jaqko na tombutiip tiikha chang chang, tsonkii shamto; jaqko nü na sintupo shamshat riito. Apaiq raq Sisera akhupo tiibunlak shukto, apaiq akhupo na tlatchhat tübaiqto.

²⁷ Apaiq ka alakü na riidungtsok riito, raüta kriinyung jichong na tiikaiqshak riwanto, Kriinyung jichong na tiikhiqlaq riwanto, apaiq ka hiq amaashe riwanto.

²⁸ Sisera nyung ka ase saüwa khe, maklii khamthii riito. Tsangjam kitanpu maq ase; saüwa kheto. Apaiq raq kitanpu chiiq maq liito. Raüta, “Apaiq kumrang leng ka, asaü min saümak, ümbano haikita?” nguta anyung raq waito. “Akumrang kong ka jam na, ajang min jang wan mak, ümbano tiihit kita?”

²⁹ Asengi taksu nyungre raq treto, kiimaq apaiq riimin bliiq kiki akha tiingoto,

³⁰ “Tsangshiq ka sepat lopi riichom raüta, riiphea phaq na mochii kito, phenla weshi ma jechak se ka achhuq chhuq, riimakla anainai chhaq riiphea motlo, Sisera miika khea ahea pinthum kra, hokhamnyung dang na kai ma, khea na awaiq angon asi kra rittlo.”

³¹ Riita ümjaqtinok thun ka, kiikha siisaq mitsai laq, O Tatiwe lei, shatmaq ümkhi ümlubi thun ka, rashekaü dong wan tlaq ikha, ali aliim michhai wan laq! Kiimaq mung na wiiroqblai mung atsing maq sito.