PHOWEBI 4 - ASII LAKDAP Bible (BSI)

Debora Nai Barak

¹ Ehud tsaikai jai maq Israilnok raq Tatiwe man na ngarai hali tang nongto.

² Kriikha na Tatiwe raq Israilnok ka Kanannok hokhamwe Hajor chela pengti Jabin ma tiikhat raüta tiitangto. Apaiq phentiip pengti phentuwe mang ka Sisera. Apaiq ka pongnok phan hiqshong Harosheth chela na siti riito.

³ Jabin jaq niika jin kumrang leng shitiikaü asi. Kiimaq apaiq raq Israilnok ka ji maq nishishi kiimaq jasam piqsii maq wiiroqnai jamshato. Kiijiishe Israilnok ka Tatiwe man na pinthum hoqsii trang raüta khrum kuq liidea nguta achu jaüto.

⁴ Riita kra akhing na Lappidoth tanyung Debora, apaiq ka shammi nyung, kriika Israilnok pengti phonyung riito.

⁵ Apaiq raq mung peng jaqsham ka ku akin tonglong Ephraim wang na Rama chela nai Bethel chela liipan na Sirichong ashi asi kra chongtong na nga raüta mung ka peng wanto. Kiimaq Israilnok ka tsangshiq ma mrong mra dong raüla apaiq phana kiraüta riiphokitlo.

⁶ Ranaiqshi apaiq raq Abinoam se Barak, Naphtali wang na Kedesh chela na sitiwe ka apaiq phana tiiheakito. Raüta apaiq raq Barak ma akha chongto, “Tatiwe, Israilnok Shiikeawe raq ümniima ara aming kuqto, ‘Naphtali phan nai Jebulun phan wa rewe hingroqshi sheaho laüta, Tabor Pum kiina walaq.

⁷ Ngi raq Jabin sengi phentu jongwe Sisera ka phenlabi thun shea raüta, ümniirai riikhat kai Kishon Rai khü kiijaq misheaho kang. Apaiq jaq niika kumrang leng thun nai asengi phenlabi thun asi miraq. Shatmaq ngi raq apaiq ka ümjaq khon mong na mikiinong kuqbaiq kang. Apaiq ka ümniiraq mitang haü.’”

⁸ Kiijiishe Barak raq treto, “Ümniika ngi rai kidam haüla mikhat kiha. Shatmaq ümnaq ngi rai kidam maü jiila, ngi min kimang.”

⁹ Kiijiishe kriinyung raq treto, “Ahea jam raamak, ngi min ümniirai mikidam kang. Shatmaq ara rekhat tang miitu ümmang ka dongmak she miraq. Jamto ngukla, Tatiwe raq Sisera ka jechak nyung ashi jaq niishe mikuq baiq.” Krai mren, Debora ka Barak rai rekhatkai Kedesh chela na kiho damto.

¹⁰ Barak riimin, Naphtali phan nai Jebulun phan wa maiq ka Kedesh chela na tiiheato. Krai mren sreabi maiq hingroqshi ka apaiq jaiphan kihoto. Kiimaq Debora kiimin apaiq rai kihodamto.

¹¹ Kiimaq kra akhing na Kenaiq phan wa Hebar raq, apaiq tombutiip ka Kedesh chela tho na ok pechong ji na Jananim binjü na atei wan wishe riito. Apaiq ka Kenaiq phan nanok ahin, Mosheq ma anangwe Hobab saüse phan phong wa pong niishe trai wanto.

¹² Riita Sisera raq Barak ka Tabo Pum niishe wawanto nguta tsütsa ka taito.

¹³ Krai mren, apaiq riimin asengi jin kumrang leng shitiikaü kra riichom heato, kiimaq asengi tlotli kra riichomto, raüta pongnok phan hiqshong Harosheth chela maq Kishon Rai khü kiina tiiwato.

¹⁴ Kiijiishe Debora raq Barak ma chongto, “Walaq! Tatiwe ka ümniima sinkhu na lamshea wali tlo! Ümchaü ranaiq Tatiwe raq Sisera ka ümjaq khon na kiinong kuq baiqto she.” Krai mren, Barak ka asengi sreabi maiq hingroqshi kra shea raüta Tabor Pumji kiiniishe rekhat kai sat wanto.

¹⁵ Riita ümtiikiiwa Barak raq asenginok rai re ka khat wantaq, Tatiwe raq Sisera ka akumrang leng thun nai asengi phenlabi thun rai nong maq, apaiq sung atsii min tlam lapmak she, tiimok mobaiqto. Kiimaq Sisera ka apaiq kumrang leng wa satki saq raüta hoksii miishe juto.

¹⁶ Barak raq kumrang leng thun nai phenlabi thun ka pongnok phan hiqshong Harosheth chela kiina saüli jowanto. Raüta Sisera sengi phenlabi thun ka wiita tiithumpak jiipbaiqto. Maiq ka weshi dongdii min tiichong mak jiipbaiqto.

¹⁷ Kiimaq Sisera ka Kenaiq phan wa Hebar tanyung Jael tahii tombutiip kiina juto. Jamkhano ngukla Hajor chela hokhamwe Jabin ka Kenaiq phan Habar weraü rai wehea riito.

¹⁸ Jael ka kinphai na dongki raüta Sisera ka awarai wa akha taokito, “Shiilangwe lei, wara. Itiip mong na wara. Naqhaikiq.” Krai mren, apaiq ka tiip mong na nyap wato. Kiimaq krii nyung riimin kheachan tiiwong na paübaiqto.

¹⁹ Apaiq raq kriinyung nangnga, “Ngi khamnyangtsi hea. Kham kuqlaq,” nguta jaüto. Apaiq raq ngamkhü tsabum chü ka lin raüta, nyamse nyakpü ka apaiq ma tsümkuqto. Raüta, apaiq ka khea chan tlaq kra tiiwong na hali paü nongto.

²⁰ Kiimaq apaiq raq kra nyung nangnga, “Ümniika tombutiip kilamchong na chap laüta khelaq. Kiimaq maiq weshi ra wa raüta, ümniima, maiq weshi raq asi shea nguta wai raüla, ahü nguta chonglaq.”

²¹ Sisera ka aniitsi makaiq kha maq, kaiqshak akon she riilaq kito. Kra chhi raüta. Jael raq ajaq na sintu ashi kiimaq tombutiip tiikha chan chang tson ashi ajaq na sham raüta, apaiq phana atsise maq wato, Raüta tsonkii kriimaq Sisera khupo nisiinü ba kiijaq sintu maq hiq na tlatchhat tiikhiqlaq tiipha tiibaiqto.

²² Riita ümtiikiiwa Barak ka Sisera jowan saüwataq, Jael ka kinphai na kiraüta apaiq rai riihumkito. Raüta apaiq ma akha nguto, “Wara ana! Ümniiraq rit tlaüwe ka tiichhikuq pha.” Krai mren, apaiq ka kriinyung rai tombutiip na nyap wa raüta liikiita, Sisera ka amaa hiq na bumraü, akhupo na tombutiip tiikha chan chang tsonkii maq tlatchhat hiq na tiiphataq atübaiq kra chhito.

²³ Kra ranaiq Shiikeawe raq Israilnok ma Kanannok hokhamwe Jabin ka tiitang kuqto.

²⁴ Israilnok raq Kanannok hokhamwe Jabin ka tiikot mrot jo raüta, apaiq ka klang maq tiimiqchup shiithen baiqto.