PHOWEBI 3 - ASII LAKDAP Bible (BSI)

Kanan Mung Na Maiqmung Ahin Atiichongki Thun

¹ Krai mren, Tatiwe raq Israilnok Kanan mung maq rekhat riihum wan mak shaqti thun kra tsantsii maitai miitu maiqmung wiijam ka jobaiq mak dea tiichong baiqto.

² Apaiq raq ara klotaq arka, akhek pinthum ka Israilnok maiq pat tek anye dong wan tlaq, chiq are khat sapmakti kriima rekhat shrinke wan miitu tiichong baiqto.

³ Riita kra mung na tiichong kitaq maiqmung thun ka Philistainnok chela biingi, Kanannok phan tlotli, Sidonnok, kiimaq Lebanon pum thun na siti Baal Harmnon Pum maq phawan raüta Hamath Kinchit na saüli siwanti thun ka riito.

⁴ Tsangshiqnok thun arka Tatiwe Mosheq lümaq tsangtitiim maq aming kuqtaq thun kra Israilnok raq milang wan shea lang wan mak wa riijiiq thote ma nguta tiichong baiqto.

⁵ Krai mren, ngohea dea Israilnok ka Kanannok rai, Hitaiqnok rai, Amoraiqnok rai, Perijaiqnok rai, Hiwaiqnok rai, kiimaq Jebusaiqnok rai, riishot riishaq she adam na siwanto.

⁶ Israilnok ka arnok thun rai sikhe sirüshe riija wanto. Raüta tsangshiqnok phra thun kriishe shomnoqto.

Othniel

⁷ Israilnok raq tsangshiq Tatiwe tsangshiq Shiikeawe ka laqbaiqto. Tsangshiq raq apaiq man na ngarai tangto. Raüta Baal sumla thun nai Ashera sumla thun ka shomnoqto.

⁸ Kriikha na Tatiwe ka tsangshiq ma atsankhiq riito kriikha na Tatiwe raq Mesapotamia Hokhamwe Kushan Rishathaim ma tsangshiq ka tiikhat raüta tiitangto. Raüta apaiq ma Israilnok ka tiipeng wanto.

⁹ Kiijiishe Israilnok ka Tatiwe man na hoqsii trangto. Krai mren, apaiq raq maiq weshi tiikito. Raüta apaiq raq tsangshiq ka dokda wanto. Kriika Kelib ma anowe Kenaj se Othniel riito.

¹⁰ Tatiwe wenyi ka apaiq khum na kito, krai mren apaiq ka Israilnok khuthaq na wela ma jato. Othniel ka rekhatkai kito. Kiimaq Tatiwe raq apaiq ma Mesapotamia hokhamwe ka khat raüta tiitang kuqto.

¹¹ Krai mren, Israilnok mung na rawii roqblai mung atsing maq sito. Kiimaq Othniel ka tsaito.

Ehud

¹² Israilnok raq Tatiwe man na ngarai hali tang nongto. Kriikha na Tatiwe raq Mob mung Hokhamwe Eglon ka Israilnok thaq na phung achaq miishe tiija baiqto.

¹³ Kiimaq Eglon ka Ammoraiqnok nai Amalakaiqnok rai she pong wanto. Raüta tsangshiq raq Israilnok ka khatto raüta tangto. Raüta taitsi chongro chela, Jeriko ka jiiwanto.

¹⁴ Israilnok ka Eglon wokhong na wiiroqshi ri wiitiichat sito.

¹⁵ Kiijiishe Israilnok ka Tatiwe man na hoqsii trangto. Krai mren apaiq raq tsangshiq dokdakai maiq weshi tiikito. Apaiq mang ka Ehud. Apaiq ka jaqphawe. Apaiq ka Gera se, Benjamin phan. Israilnok raq Ehud ka Mob mung hokhamwe Eglon phana kongphiq tiikekai tiikito.

¹⁶ Ehud raq jasai ashi alu nü na 50 sentimitar tinkhan kra minhap ri na wiiniq sihea tiiq raüta wihoto. Apaiq raq ajasai ka ajaq jaqtsi nü siim na samtongjong kaü samtlaq kra mong na phataq chhüshat maq kito.

¹⁷ Kiijiishe apaiq raq kongphiq thun kra Eglon phaniishe lam wanto. Apaiq ka tumtin jongheawe riito.

¹⁸ Riita Ehud raq kongphiq thun ka apaiq jaq na kuqlot raütiishe, apaiq raq kongphiq hohotibi maiq thun ka jam na wa rong laq nguta tiiwa baiqto.

¹⁹ Shatmaq Ehud apaiq riiwe ka Gilgal chela tho na longkaü na sumla awat raüta awaiq ba kiimaq, jai na jangki nong raüta, Eglon hokhamwe phana jangki nongto. Raüta, “Chao lei, ngi raq ümniima bomhuk tsütsa chongke chang asi,” nguta nguto. Krai mren, hokhamwe raq asengi ma, “Nainai laqlaqli ngaphai!” nguta aming kuqto. Krai mren, tsangshiq wiita kinphai na kihoto.

²⁰ Kiijiishe hokhamwe ka wukhu na apaiq khok rahai ahu kiijaq apaiq laq laqseli ngaraü riito. Riita Ehud ka apaiq phana tiinapsaq wato, raüta akha nguto, “Ngi raq Shiikeawe tsütsa ümniima chong chang asi.” Kiijiishe hokhamwe kiimin tiidopot chapsaq riito.

²¹ Kiijiishe Ehud raq ajaq jaq phanü maq jasai ka jaqtsi nü siim kiiwa chat raüta hokhamwe wokpo na tlat chhat shukto.

²² Jasai ka wiilütam maq, aphak kiimin wiita tüsaiq shukbaiqto. Kiimaq apü da raq jasai mi kriimin tiitangtlii suk baiqto. Ehud raq jasai ka hokhamwe wokpo mong kiiwiika chatbaiq makdea riito. Jasai ka araikhü nü na tlatchhat ahok wiinai heawea na tleali riito.

²³ Kra lot raütiishe Ehud ka khokmong maq kinphai na donghoto. Raüta kilü thun ka ashaq riito. Raüta ala riibaiq thüto.

²⁴ Raüta apaiq ka wawanto. Kiijiishe ajaqshisetiim ka kiraüta liikito. Riikiita kilü thun ka atiishaq siisaq chhito. Shatmaq tsangshiq raq tiima ka hokhamwe ka tapmong na niitiitsak akon sham ngutli tiimato.

²⁵ Krai mren, tsangshiq raq ümtinkhan akhing na saüli khechang wa kra kheto. Shatmaq chanhea she apaiq raq kilü ka dimak she riikiita, tsangshiq raq sapi ka lam raüta, kilü ka dito. Raüta liikiita sanha, tsangtijongwe ka wiithung na amaa weraü chhito.

²⁶ Tsangshiq raq apaiq kheshon bala Ehud ka juhoto. Apaiq ka longkaü na awat raüta sumla awaiq ba kra leaphok she wawanto. Raüta apaiq ka Seira chela kiiniishe tiipaü juhoto.

²⁷ Raüta apaiq ka ku akin tonglong hiq Ephraim wang kiiniishe saüto. Raüta apaiq raq reshun Israilnok hea lerong tsüto. Raüta apaiq raq tsangshiq ka kin thun kiimaq lamhong nü kiiniishe sheahoto.

²⁸ Apaiq raq nguto, “Namshiq ka ijai phan phan kirong ra! Tatiwe raq nam jaqtinok Moabaiqnok ka tiitang kuqto she.” Krai mren tsangshiq riimin Ehud jai ka lamhong nü kiina phanhoto. Raüta Moabnok raq Jordan rai jin wan chang ba hiqshong ka khat raüta jiito. Tsangshiq raq rewebi ka weshi ma dongdii min jü ka tiijin mak riito.

²⁹ Kra ranaiq tsangshiq raq Moabnok phenlabi srea nolabi jongbi ahea pinthum hingroqshitin jiipbaiqto. Weshi ra dongdii min tiiju lapmak riito.

³⁰ Kra ranaiq Israilnok raq Moabnok ka tiinamtok jiipbaiqto. Krai mren, Israilnok mung na wiiroq tiichat mung atsing maq sito.

Shamgar

³¹ Kra jai wa welawe dongtaq kriika Anath se Shamgar riito. Apaiq riimin Israilnok ka rewe jaq wa tiichhii kuqto. Apaiq riika minsaü pongwe jochang piqkhu maq Philistainnok ka shitrok tsatbaiq raüta khupwong kuqto.