PHOWEBI 21 - ASII LAKDAP Bible (BSI)

Benjamin Phan Ma Chak-humke Lamlu

¹ Ümtiikiiwa Israilnok ka Mijpa chela na ngongthun ngataq, kiitiikaq tsangshiq raq Tatiwe man na, sinkiitiq kiqkham ashi akha shatthüto: “Nashiq liipan wa juwe riimin nase jechakse ka Benjamin phan ma tiiwa maimak.”

² Kra raüta Israilnok ka Bethel chela na wawanto. Raüta tsangshiq ka kiijaq Shiikeawe man na ratiijili ngato. Raüta maaho manyi tiihong raüta tsan tsihea maq akha hoqtrangto:

³ “Israilnok Tatiwe Shiikeawe lei, naishiq ma akha mra jamkho pinta? Israilnok liipan wa Benjamin phan arka chongthum ma jaram tiija baiq wa?”

⁴ Kriimaq napjai ranaiq ka ranapchu maq mungmaiqse raq kiijaq berong-wacha ashi haito. Raüta rintii honglu thun takuqto kiimaq wiipumtam maq wa na chaqtlii honglu thun takuqto.

⁵ Raüta tsangshiq raq akha waito, “Riita Israilnok maiqphan ümchuwa sitlaq kiiwa, Tatiwe man na, Mijpa na ngongthun ngakai kiijaq lomwa dam makti maiq phan asi shea?” (Jamkhano ngukla, tsangshiq raq juwa Mijpa chela na achu jaü na lomdam mak, kriiti ka atsea baiq chang nguta sinkham tri shatthüto).

⁶ Israilnok ka tsang phunonok Benjamin phan miitu pinthum mangchan tsito. Kiimaq tsangshiq raq akha nguto, “Ümchaü ranaiq Israilnok raq maiqphan ashi ka atiimo she riibaiqto.

⁷ Riita Benjamin phan wa maiq abung tiichongtlaq kra miitu chak ka jamba wiishe wa milam kuq rong i? Nashiq raq Tatiwe man na, tsangshiq ma nasetiim jechaksere ka tiiwamai nguta sinkham wankai she kata.”

⁸ Ümtiikiiwa tsangshiq raq, Mijpa chela na Israilnok mungmaiqse ngongthuntaq kiijaq maiq phan nokshi ra lomki dammak dea asi shea nguta, bom konchon kiita, tsangshiq raq Gilead wangti wa Jabesh chelati ka lomki dammak dea nguta sapto.

⁹ Phenlabi manghea wantaq akhing na, Jabesh chelati maiq ka ahü riito.

¹⁰ Kriikha na mungmaiqse thungtlaq krii raq srea nolabi maiq hingroqshi ri hingnai tsea raüta aming akha kuq raüta tiikito, “Jabesh chela na kirong laq. Lanta maiq angu wiita, jechakre kiimaq nosere tsatbaiq ronglaq.

¹¹ Maiqwere thun wiita, kiimaq jechakre junsang riimakti thun ka wiita tsatbaiq ronglaq.”

¹² Riita tsangshiq raq Jabesh chela wa jechak sere junsang kong shiblai humto. Tsangshiq raq kra junsang kong ka Kanan mung na Shilo piitiip kiijaq shea wanto.

¹³ Kiijiishe mungmaiqse thungtlaq kriiraq, Bemjaminnok Rimmon Longraq khong na siti kiima riikhat maishe nguta tsütsa ka tiichongkito.

¹⁴ Krai mren, Benjaminnok ka jang wanto. Kiimaq Israilnok nokhinti thun raq, Jabesh chela wa tsangshiq raq tsatmak maq atra shea wantaq jechaksere thun ka tsangshiq ma kuqto. Shatmaq kra kuqtaq jechaksere kong ka tsangshiq ma khammak dea riito.

¹⁵ Mungmaiqse raq Benjamin phan miitu kai mangchan tsito. Jamkhano ngukla Tatiwe raq Israilnok liipan na rintii ashi mangchan tsantsii ka atiimo she riibaiqto.

¹⁶ Kriikha na mungthungtlaq welabi raq akha nguto, “Benjaminnok liipan na jechakre ka ahü she. Maiqwere abung tiichongkitaq kriima achak ka jambawo milamkuq rong i?

¹⁷ Israilnok raq maiqphan phanroqshi ri phannai kiiwa, phanshi ka tiimobaiq maimak. Nashiq raq Benjaminnok ka laimiq jaki mak chang miitu lamlu ka rit ratlo.

¹⁸ Shatmaq nashiq riika tsangshiq ma nasetiim jechaksere ka tiiwa kuqlot mai she. Jamkhano ngukla, nashiq liipan wa jurwa ase jechakse ka Benjamin phan ma tiiwajiiq, kriiwe miika, manson minilaq nguta sinkham baiqkai she.”

¹⁹ Kiijiishe tsangshiq raq tiimato, “Rawiitek Tatiwe poi Shilo chela na klo tiikai ira akhing ka saü wan tlo she.” (Shilo chela ka Bethel chela maq shekhu nü na. Lebna chela miika shemai nü na. Kiimaq Bethel chela nai Shekhem chela liipan na lam khumtlaq kriimiika, shedong nü nü na.)

²⁰ Tsangshiq raq Benjaminnok ma nguto, “Namshiq ka kilanta spiqro mong na tiipaü ronglaq.

²¹ Lanta kherong laq. Ümtiikiiwa Shilo chelati jechaksere ka poi akhing na awiinum kai kitlaq, namshiq ka spiqro mong kiiwa dongchhaq dongki rongkiq. Lanta namshiq maiqwere loweatek raq namchak ma, jechaksere phong kiiwa jaqla maq lapho ronglaq. Lanta namshiq Benjaminnok hiqshong kiina maiqmii rai adam na shea wan ronglaq.

²² Kiimaq tsangshiq ma awetiim riimakla aphu anotiim ka namshiq phana kiraüta longliiqho raüla, namshiq raq akha ngurong laq, “Namshiq man na tiipaiqnea laita bomtiikai, tsangshiq ka naishiq miituli thüphai, jamningkhanno ngukla, namshiq rai reriikhat laita, naishiq raq naichaktiim ma nguta ashea hohai ri riimak. Kiimaq tsangshiq ka namshiq raq naishiq ma akuq han ri riimak, kra ningkhan namshiq raq sinkham tri ka jin mangdea, namshiq ka sepii.’”

²³ Benjaminnok raq akhiidea kloto. Tsangshiq loweatek raq, achak ma jechaksere ka Shilo na awiinumkai kitlaq kiiwa nyungchhuq chhuq tsea raüta tsangshiq hiq na shea wanto. Raüta, tsangshiq wang kiina wawanto, raüta maiqmii sichang chela thun kra tiihea haihun wanto. Raüta shongnga wanto.

²⁴ Kiimaq Israilnok maiqphan ahinti thun kiimin kiiwa wawanto. Raüta maiqmii ma ata awii weraü phan sitlaq kra phanü niishe jang wan raüta, maiqmii hiqshong na shong wanto.

²⁵ Kra akhing na Israil mung na hokham ka ahü. Kriikha na loweatek raq, maiqmii tsanroro klo raütli sito.