PHOWEBI 2 - ASII LAKDAP Bible (BSI)

Tatiwe Rase Ka Israilnok Rai Bochim Na Riihumkito

¹ Tatiwe rase ka Gilgal chela maq Bochim chela na wawanto. Raüta Israilnok ma nguto, “Ngi raq namshiq ka Ejip mung wa tsuq wan kang. Lata ngi raq namtitiim ma mung ashi mikuq kang nguta kiq khamkuq kang mung na shea wan kang. Ngi raq ngukang, ‘Ngi raq namshiq rai tongshong tri khakuq kang kra ümtiikii jiimin diibaiq mang she.

² Krai mren, namshiq raq armung na sitinok rai tongshong wan maimak. Namshiq raq tsangshiq berong-wacha thun ka wiita shiithen baiq wan ratlo.’ Shatmaq ngi raq namshiq ma jamlai bom wa chongkang kra namshiq raq klowan man dea riilan. Namshiq raq jaqsham ka angan nü na khoti sham wan lan!

³ Arkha na ngi raq ümchaü namshiq ma chongtiikang, namshiq ka tsangshiq khat wan tlan kra phan phan, ngi tsangshiq ka jobaiq mang she. Tsangshiqnok ka namshiq ma wesang miraq. Kiimaq namshiq ka tsangshiqnok sumla phra thun shomnoq tlaq thiikho bok niishe midea han.”

⁴ Rase raq ara ngukiita, Israilnok ka aho asii trang wali she hoq trang wanto.

⁵ Kriikha na tiina, kra chela mang ka Bochim nguta ngutlo. Kiijaq tsangshiq raq Tatiwe honglu thun takuqto.

Joshua Tsaito

⁶ Joshua raq Israilnok ka tsangshiq hiq na tiiwa baiqto. Kiimaq, maiq loweatek ka apaiq rii hiqshong achumkuq kiijaq shong wa she wawanto.

⁷ Joshua atra sishat wiiwii ka Israilnok raq Tatiwe ka shiililii raüta siwanto. Kiimaq apaiq tsaijai niimin, Israilnok ma phukhu welabi juju riiwa Tatiwe raq Israilnok miitu, amao chang pahea sham wantaq kriithun ka maiqmii mak maq chhi wantibi pat ka atra sishat wiiwii, tsangshiq raq Tatiwe ka shomnoq wan ruq riito.

⁸ Riita Nun se, Tatiwe jaqshise se Joshua ka apaiq rawii wiiroqshishi ri wiiroqshi niishe tsaito.

⁹ Apaiq maa ka, apaiq rii achumkuq hiqshong Timnath Sera chela na lapto. Kra hiqshong ka Ephraim wang na Gash Pum maq shekhu nü na riito.

¹⁰ Kriipat wa maiq thun ka wiita thumthum she tsaito. Kiimaq jai wa maiqpat senye raq Tatiwe ka alaqshe riibaiqto kiimaq apaiq raq Israilnok miitu jaq shamkuqtaq thun kiimin laqbaiqto.

Israilnok Raq Tatiwe Shomnoq Thaqbaiqto

¹¹ Kiitiikaq Israilnok raq Tatiwe man na ngarai tangto. Kiimaq tsangshiq raq Baal phra thun kriishe shomnoq hoto.

¹² Tsangshiq raq Tatiwe, tsangtitiim Shiikeawe, tsangtitiim ka Ejip mung wa tsuq wan raüta shunshea wanti Shiikeawe shomnoq ka athaq she riibaiqto. Raüta tsangshiq raq phra ahin thun kriishe shomnoq wanto. Tsangshiq tro na sitinok phrakong kriishe shomnoq hoto. Tsangshiq ka kra phrakong khaki niishe bum wanto. Raüta Tatiwe tsan ka tiikhiqto.

¹³ Tsangshiq raq Tatiwe shomnoq ka athaq she riibaiqto. Raüta Baal phra thun puk niishe nyap wanto. Raüta Baal phra thun nai Ashtaroth phra thun kriishe shomnoq wanto.

¹⁴ Kriikha na Israilnok khuthaq na Tatiwe tsankhiq she saüwanto. Kra ningkhan apaiq raq tsangshiq ka rehuk jati chiqse rewebi tiiki raüta tlongliiq wanto. Raüta rewebi ma tsangshiq tsiiq anyam thun ka wiita trunbaiq wanto. Apaiq raq tsangshiq ka trotam maq re ma tlongliiq wanto. Raüta tsangshiq ka re ma tiitang wanto. Kra ningkhan Israilnok raq tsangshiq maiqmii khum kriimin tiichhii phaq lot mak she riito.

¹⁵ Tsangshiq ka rekhat kai kitlaqtek na, Tatiwe ka tsangshiq ma wesang jakitlo. Kriika apaiq raq man na tsangshiq mingengha nguta chongtaq kra phan phan she klohoto. Tsangshiq ka pinthum tsaija chhunja she riito.

¹⁶ Kiijiishe, Tatiwe raq Israilnok ma mungtubi she shongkuqto. Raüta tsangshiq raq Israilnok ka rehuk pahea dongtlaq kriiwa tiiwong kuqto.

¹⁷ Shatmaq Israilnok raq tsangwelabi bom ka taimak riito. Israilnok raq Tatiwe ka tsapkap mak shisheto. Kiimaq laihin phrakong khoti shomnoqhoto. Tsangwetiim riikaq Tatiwe aming thun lang wanto. Shatmaq ara senye pat raq kra lamphan ka jaqloli athaq she riibaiqto.

¹⁸ Ümtiikiiwa Tatiwe raq Israilnok ma wela ashi shongkuq tlaq, Tatiwe raq apaiq kra khrumkuq tlo. Raüta apaiq atra sishat wiiwii mungmaiqse ka chiqse rewe jaqkhon mong wa tiiwong kuqtlo. Tatiwe raq chiqse rewe jaqkhon mong na tsangshiq chamchao kaidi hansii trang nai aho trang kra tairaüta, tsangshiq ma tiihang wan mangchan kuqtlo.

¹⁹ Shatmaq tsangwelawe kriishe tsaiki raüla, tsangshiq ka achü rilung lamphan kiinahali jangki nong tlo. Raüta tsangshiq ma kongkhu pat na leawantaq kra thaq niimin naolaq she ngarai klotlo. Raüta tsangshiq raq laihin phra kong kriishe shiililiiho tlo kiimaq shomnoqhotlo. Kiimaq tsangshiq raq abi rilung lamphan ka thaqbaiq mak phan she riitlo.

²⁰ Kiijiishe, Tatiwe ka Israilnok ma pinthum atsan khiqtlo kiimaq akha ngutlo, “Armungti raq, ngi raq tsangtitiim ma tongshong kiqkham ka thürong laq nguta aming akuqha kra, wiita she jin wanto. Jamkhano ngukla tsangshiq raq ibomchong ka taimak tleatlo.

²¹ Arkha na, Joshua tsaijai maq armung na pongnok phan maiqmung ümtinkhan wa abung tiichongkitaq, kriithun ka ümchaü ngi raq jokuq mang she.

²² Ngi raq arnok thun ara lumaq, Israilnok raq, tsangtitiim pat na ilam phan raüta shong wantaq kiikha misi wan shea siwan mak wa kra michechiip wanha.”

²³ Kra ningkhan, Tatiwe raq kra maiq phan thun ka kra mung niili tiisito. Apaiq raq Joshua miimin tsangshiqnok ka tiitang kuq mak dea riito. Kiimaq Joshua tsaikai jaimin, apaiq raq tsangshiqnok ka jobaiq mak dea riito.