PHOWEBI 12 - ASII LAKDAP Bible (BSI)

Jephtha Nai Ephraimnok Liipan Na Tatso

¹ Ephraim phan raq arkhat miitu re shunto. Tsangshiq raq Jordan rai ka jin raüta Japhon chela na wato. Raüta Jephtha ma akha nguto, “Ümniiraq Ammon mung khatkai ma hiq rai ka jam nguto jinho laü, naishiq ka ümniirai heaho maü maq? Naishiq raq jam thun ka wa maq michaq baiq hai, kra kha ka ümkhupo na miraq!”

² Shatmaq Jephtha raq tsangshiq ma akha treto, “Isenginok nai ngi ka Ammonnok rai henghea ta riitsokai. Ngi raq namshiq ka hea kang shatmaq namshiq raq ngi tsangshiq jaqkhon mong wa tiichhiiki man dea riilan.

³ Riita, namshiq raq khrum kuq man kra chhilatiishe, ngi raq i miisaq ka ijaqphi na chiim lata, hiq rai ka jinho lata tsangshiq ka khatki kang. Krai mren, Tatiwe riimin ngi ma tsangshiq ka tiitang kuqto. Riita, ümchaü namshiq ka ngi rai jam nguta riikhat wa tan tlan?”

⁴ Kiijiishe Jephtha raq asengi Gilead wangti ka adam niishe triitamto, raüta Ephraimnok ka khatto. Raüta tsangshiq ka tangto. (Ephraimnok raq akha nguto, “Namshiq Gilead wang na siti Ephraim phan nai Manase phan ka, Ephraim phan wa pong na adongkihan wa!”)

⁵ Ephraimnok ka juho jiiq nguta Gileadnok raq Jordan rai khü na jüjin chang ba thun kra jiiwan raüta khehoto. Raüta ümtiikiiwa Ephraimnok wa maiq ashi raq ajuho ma, jürai jin wan miitu aming jaü raüla, Gilead wangti raq bom ka akha waitlo, “Ümniika Ephraimnok shea?” nguta waitlo. Apaiq raq, “Riimak,” nguta tre raüla,

⁶ tsangshiq raq, ikhla, “Shibboleth,” ngulaq nguta thaütlo. Shatmaq apaiq riika, “Sibboleth,” nguta ngutlo. Jamkhano ngukla, apaiq raq riikhaqli bomtsü mak. Raüla tsangshiq raq apaiq ka lapho raüta, Jordan rai jin chang ba kiijaq tsatbaiqtlo. Kra akhing na Ephraimnok hingroqblai ri hingnai tsatbaiqto.

⁷ Jephtha raq Israil mung ka wiitrok pengto. Kra jai maq apaiq ka tsaito. Kiimaq ama ka apaiq sichang chela na lapto.

Ibjan, Elon Kiimaq Abdon

⁸ Jephtha tsai jai, Bethlehem chelati Ibjan raq Israil mung ka langto.

⁹ Asetiim maiqwesere ka roqtsam kiimaq jechaksere min roqtsam riito. Apaiq raq asetiim jechaksere ka pongta kaüwa weraü ma siisaq tiiwato. Kiimaq asetiim maiqwesere miimin, anamnyungtiim ka, pongta kaüwa weraü wa siisaq lamkuqto. Ibjan raq Israil mung ka wiimiishi pengto.

¹⁰ Raüta apaiq ka tsaito. Kiimaq ama ka Bethlehem chela na lapto.

¹¹ Ibjan jai maq, Jebulun phan, Elon raq Israil mung ka wiiroqshi pengto.

¹² Raüta apaiq ka tsaito. Kiimaq ama ka Jebulun wang na Aijalon chela na lapto.

¹³ Elon tsai jai miishe, Pirat chela, Hillel se Abdon raq Israil mung ka langto.

¹⁴ Asetiim ka maiqwesere kong roqblai riito. Kiimaq asaütiim ka roqtsam riito. Tsangshiq ka kumtoq kaü roqmiishi thaq na chao raüta mung peng damto. Abdon raq Israil mung ka wiitiichat rümto.

¹⁵ Raüta apaiq ka tsaito. Kiimaq ama ka ku akin tong long Amalakaiqnok wang na, Ephraim phan rii hiqshong Pirathon chela na lapto.