PHOWEBI 11 - ASII LAKDAP Bible (BSI)

Jephtha Manphan

¹ Jephtha ka Gilead wang na siti nolajongwe. Anyung ka mephe-nyung. Awe Gilead ka

² achak tsangnai setiim maiqwe sere ahin min asi riito. Kiimaq tsangshiq ka lawan raütiishe, tsangshiq raq Jephtha ka jam wa ajo she riibaiqto. Tsangshiq raq apaiq ma akha nguto, “Ümniiraq naiwe tachong hupsam ka jamlai min laplot maü; ümniika pong nyung se.”

³ Kriikha na, Jephtha ka aphutiim phawa juhoto. Raüta Tob chela niishe sikito. Kiijaq apaiq raq akongtibi pontiiwa na haiseati kongshi apaiq rai triitamto. Kiimaq tsangshiq kiimin apaiq rai pong wanto.

⁴ Kra jai maq ashaqpuq sijai na Ammonaiqnok ka Israilnok khatkai kito.

⁵ Kra redong wan kiitiishe, Gilead wangti welabi ka Jephtha ka Tob chela wa tiijang sheakai she kihoto.

⁶ Tsangshiq raq apaiq ma akha nguto, “Ümniika naishiq phana wara. Laüta naishiq ara shunshea laq. Kra riihaila nashiq raq Ammonaiqnok ka mikhat lot rong i.”

⁷ Shatmaq Jephtha raq treto, “Namshiq raq ngi ka pinthum ngeng lanta, iwe jam wa jobaiq lan ihata. Ümchaü namshiq ma chamchao saüwa kiiphan tiitiq shea ngi pha kitlan?”

⁸ Tsangshiq raq Jephtha ma nguto, “Ümchaü naishiq ümpha na kikai arka, ümniika naishiq rai adam kilaita Ammonaiqnok ka khatki rong i, kiimaq Gilead wangti mungmaiqse ka ümniiraq shea laq nguta kikai.”

⁹ Jephtha raq tsangshiq ma akha nguto, “Namshiq raq ngi ka Ammonaiqnok khatkai miitu jam na tiijang shea wan hanla, kiimaq Tatiwe raq ngi ma Ammonaiqnok ka tiitangkuq haüla, ngi ka namshiq pengti tuwe miishe mijaha.”

¹⁰ Kiijiishe tsangshiq raq treto, “Tengto. Naishiq riimin kriidea ngutiikai. Tatiwe ka naishiq saqse.”

¹¹ Krai mren, Jephtha ka Gilead wangti welabi rai she wawan damto. Kiimaq mungmaiqse raq apaiq ka mung pengti ma kiimaq mungtuwe miishe shongto. Kiimaq Jephtha riimin Mijpa chela maq Tatiwe man na, apaiq wela jawan jaqsham kra khuthaq na tri ka shat thüto.

¹² Kra raütiishe, Jephtha raq Ammon mung hokhamwe ma kiimwebi tiiki raüta tsütsa ka akhiishe tiichonghoto, “Ümniika naishiq rai jamlai khano riitso tlaü? Ümniiraq imung ka jamlai nguto khattlaü?”

¹³ Kiijiishe Ammon mung hokhamwe raq Jephtha kiimwebi ma bom ka akhiishe treto, “Man na Israilnok ka Ejip mung maq laü wantaq akhing na, tsangshiq raq ihiq shong ka, Arnon Rai maq pha wan raüta, Jabbok Rai na saüli, kiimaq riita Jordan Rai na saüli ihiq ka nyea wanto. Kra thun ka ümchaü ümniiraq kaishakshak maq ngi ma jangke nong ratlo.”

¹⁴ Kiijiishe Jephtha raq kiimwebi ka Ammon mung hokhamwe phana tiijangki nong raüta,

¹⁵ bom ka akhiishe hali tiichongho nongto: “Israilnok raq Mob mungti hiqshong min nyea wan mak dea kiimaq Ammonnok hiqshong min nyea wan mak dea. Kriika arot nyan tlaü.

¹⁶ Riikhaqli manphan ka akha: Israilnok raq Ejip mung ka baiqthü raüta, tsangshiq ka kumtsaiphii mung lam maq wawanto. Raüta Akaba khamjong rai nong binjü lam maq wawanto. Raüta Kadesh wang na saüto.

¹⁷ Kiitiikaq tsangshiq raq Edom hokhamwe ma, apaiq mungtan hiq lam maq wawan phai nguta lamlea wan miitu aming jaüwa kiimwebi tiiwato. Shatmaq Edom mung hokhamwe raq tsangshiq ka tiiwa mak riito. Kiimiishe tsangshiq raq Mob mung hokhamwe jaq wiimin aming ka jaüto. Shatmaq apaiq riimin amung lam maq Israilnok ka tiiwa mak riito. Kriikha niishe, Israilnok ka Kadesh wang niili sito.

¹⁸ Kra ningkhan she Israilnok ka kumtsaiphii mung lam kra phanphan she laü wanto. Raüta Edom mung nai Mob mung kra ashüp riiwan raüta, lamtiikon lam miishe wawanto. Raüta Mob mung maq shedong nünü wang binjü lam miishe laü wanto. Raüta Arnon Rai maq konü jüreko lam nünü kiiniishe laü wanto. Raüta tsangshiq raq kiijaq piitiip tei wanto. Shatmaq tsangshiq raq Arnon Rai ka jin mak dea riito. Jamkhano ngukla kriika Mob mung hiqrai binjü ba riito.

¹⁹ Kiitiikaq Israilnok raq Heshbon chela na siti Amoraiqnok hokhamwe Sihon phana, ahiq lam maq tsang mung na laü wan phai nguta aming jaüwa kiimwebi tiiwato.

²⁰ Shatmaq Sihon raq Israilnok ka tiiwa mak ningtang baiqto. Raüta apaiq raq asengi phenlabi tlotli kra sheaho raüta, Jahaj chela na phentiip teito. Raüta Israilnok ka khatto.

²¹ Shatmaq Israilnok Tatiwe Israilnok Shiikeawe raq Sihon hokhamwe nai asenginok ka Israilnok jaqkhon mong na kiinong kuqbaiqto. Raüta Israilnok raq rekhat ka tangto. Krai mren she, Israilnok raq Ammoraiqnok mung wa maiq hiqshong thun ka wiita kunkun jiiwanto.

²² Israilnok raq Ammoraiqnok mung ka tlotli, shemai nü na Arnon Rai maq raipha wan raüta, shekhu nü wang na Jabbok Rai kriimaq rai wanto. Kiimaq shedong nünü wang hiqrai ka kumtsaiphii mung binjü kiimaq rai wan raüta, shenyap nü wang miika Jordan Rai maq raiwanto.

²³ Riita, krai mren, Ammoraiqnok jobaiq wanti ka, Tatiwe Israilnok Shiikeawe raq, asengi Israilnok kra tiisi wan miitu jobaiq wanto.

²⁴ Riita, ümniiriika hiqshong thun ka nyeahola ngutiisha tankhan tlaü? Ümphra kaü Kemosh raq ümniima ümtinkhan wa hiq kuqtaq kriili thü liina. Shatmaq naishiq riika, Tatiwe naishiq Shiikeawe raq hiqshong rahai ümchuwa kuqtaq kra wiita kunkun mithühai.

²⁵ Riita ümniika Mob mung hokhamwe Jippor se Balak thaq niimin ajong lin ngutiisha tiima tlaü? Apaiq raq Israilnok ka khat kila nguta dan mak dea. Shea dantiiwa?

²⁶ Israilnok ka Heshbon chela nai Aroar chela na, kiimaq kra tro binjü na, chelaransetiim thun kra, kiimaq Arnon Rai kii wiilü wiilü na chela thun sitlaq na, rawii shi-tsam she shongtlo. Riita rawii atinkhan lea wantaq liipan na ümniiraq jamto jiiwan nong maü riilaü?

²⁷ Maimak. Ngi raq ümniima jamlai min ashut klo mang. Ümniiraq ngi khatkai nguta matsü tsasü riitlaü ka ajiq bintang klo tlaü. Tatiwe ka phowe. Apaiq raq ümchaü ranaiq arjiili Israilnok nai Ammonaiqnok liipan na kha ka mipho kuq.”

²⁸ Shatmaq Ammon mung hokhamwe raq Jephtha raq bom tiichonghotaq kriika akhiismin weamak riito.

Jephtha Tumkham Bomtsi

²⁹ Kiijiishe Tatiwe wenyi raq Jephtha ka rom wanto. Krai mren, apaiq ka Gilead wang hamli na kiimaq Manase wang hamli na wawanto. Raüta apaiq ka Gilead wang na Mijpa chela na jangkito. Raüta Ammon mung khatkai she kihoto.

³⁰ Jephtha raq Tatiwe ma bom akha khamkuqto: “Ümniiraq ngi ma Ammonnok ka tiitangkuq haüla,

³¹ ngi ka rekhat tang lata, ijam na saü wan tiikang akhing na, ijam mong wa ümriitiwa kongkhu dongki raüta ngi ka tao jiiq, kriiti ka ngi raq, ümniima wa maq chaq lata honglu na mikuqha. Ngi raq kriiti ka ümniima honglu na mikuqha.”

³² Krai mren, Jephtha raq jürai ka jinto. Raüta Ammonnok ka khatto. Kiimaq Tatiwe raq apaiq ma rekhat ka tiitang kuqto.

³³ Apaiq raq tsangshiq ka Aroar chela maq riita Minnith chela tro binjü na saüli, tlotli chela roqnai ri anai khatto. Kiimaq Abel Keramin chela kiina tiisaüli khatto. Alei jako michong rewe ka pahea jiipbaiqto. Krai mren, Ammon mungti ka Israilnok raq tangto.

Jephtha Se Jechakse

³⁴ Riita Jephtha ka jam na Mijpa chela na jang wanto. Apaiq jam na saü wan kiita, ase jechakse ka laktum süpseng kra tsü raüta, wiinum shewa awe taokai jam mong maq dongkito. Apaiq ka jechakse seshi laqlaqse riito.

³⁵ Apaiq raq ase ka chhi raüta, ahositsi nai atsanbitsi ma, adü na asam akheatong ka chaihea hea she riito. Raüta akha nguto, “O, ise loi! Ümniiraq itsan she tiibun baiq laü! Ümniiraq lala imongjii ka jamkho tiibun baiqho laü? Ngi raq Tatiwe ma sinkham kuq kang she, kriika diibaiq lot mangshe!”

³⁶ Kiijiishe apaiq raq awe ma nguto, “Ümniiraq Tatiwe ma kiqkham kuq laü jiila, ümniiraq ngi ka jamkhii mirha ngutiiwa ngulaü kra klolaq, jamkhano ngukla Tatiwe raq ümjaqtinok Ammonnok phuk ka lamkuqto.”

³⁷ Shatmaq apaiq raq awe ma akha nguto, “Ümniiraq ngi ma phanshi klo laq. Ngi ma jipi lünai akhing kuqlaq. Lata ngi ka ikongtibi shea lata pum thun kiina wawan lata, irilung ka junsang miili she tiisung chang nguta ajii amii khum wapha.”

³⁸ Krai mren, apaiq raq ase ka jipi lünai miitu tiiwabaiqto. Kiimaq apaiq rai akongtitiim shea wan raüta, apaiq ka pum thun kiina jümii shiri wato. Jamkhano ngukla apaiq ka maiq ma wahü maq kiimaq sehü miishe tsai chang miraq.

³⁹ Jipi lünai jai miishe apaiq ka awe phana jangki nongto. Krai mren, apaiq riimin Tatiwe ma jamlai kiq wa khamkuqtaq kra kloto. Kiimaq apaiq ka rilung tiisungli jelan siraüta tsaito. Riita Israilnok mung na manphan ka armaq phahoto.

⁴⁰ Kriikha na, junriisetiim ka wiishi na jangshi rablai akhing lam raüta, Gilead wangti Jephtha se miitu, rum na kiho raüta, ajü amii jümii watlo.