PHOWEBI 10 - ASII LAKDAP Bible (BSI)

Tola

¹ Abimelekh tsai jai maq, Pua se Tola, Dodo ma asaü raq Israilnok ka chiqse rewe jaq khon mong wa tiichhiike wanti wela dongto. Apaiq ka Isakar phan wa. Kiimaq ku akin tonglong Ephraim wang na Shamir chela na sitiwe riito.

² Apaiq raq Israilnok ka wiiroqnai ri wiitsam pengto. Raüta apaiq ka tsaito. Apaiq ma ka Shamir chela na lapto.

Jair

³ Tola jai maq Gilead wangtiwe Jair she tuwe jong jato. Apaiq raq Israil mung ka wiiroqnai ri wiinai pengto.

⁴ Asetiim kong ka roqtsam riito. Tsangshiq raq kumtoq kaüroqtsam thaq na ngaraq chhaq maq mung ka peng wan damto. Tsangshiq raq atei wan Gilead wang na chela roqtsam riito. Kriithun ka ümchaü niitaq Jair raq atei wan hiqshong nguta ngutlo.

⁵ Jair ka tsaito. Raüta ama ka Kamon chela na lapto.

Jephtha

⁶ Israilnok raq thongshi ri hali Tatiwe man na ngarai ka tangto. Tsangshiq raq Baal phra thun nai Astartes phra thun, kiimaq Siria mungti phra thun, Sidon wangti phra thun, Mob mungti phra thun, Ammon mungti phra thun, kiimaq Philistain mungti phra thun shomnoq nongto. Tsangshiq raq Tatiwe ka miimbaiqto, raüta apaiq ka shomnoq mak she riito.

⁷ Kra ningkhan Tatiwe ka Israilnok ma atsankhiq riito. Kra kha niishe tsangshiq ka Philistainnok nai Ammonnok ma tlong raüta tiitangto.

⁸ Kiimaq tsangshiq raq Jordan rai maq shedong nü na Gilead wang na Amoraiqnok mung na siti Israilnok ka wiiroqshi ri wiitiichat jamshato. Raüta kai tiichamchao siqto.

⁹ Amonaiqnok riika Jordan rai kra jin raüta, Juda phan, Benjamin phan, kiimaq Ephraim phan thun kiimin khatto. Israilnok ka pinthum tsaija chhunja chamchao mong na sito.

¹⁰ Kiijiishe Israilnok ka Tatiwe man na aho asii hoqtrangto. Kiimaq akha achu jaüto, “Naishiq raq ümman na ngarai tangkai. Jamkhano ngukla naishiq raq ümnaq, naishiq Shiikeawe ka miimbaiq kai. Laita Baal phra thun ka shomnoq kai.”

¹¹ Kiijiishe Tatiwe raq tsangshiq bom ka akha treto, “Ejipnok raq, Amoraiqnok raq, Ammonaiqnok raq, Philistainnok raq,

¹² Sidonnok raq, Amalakaiqnok raq, kiimaq Maonaiqnok raq, namshiq ka man na jamsha raüta tiichamchao wanto. Kiimaq namshiq ka I man na hoqsii trang wan lan. Riita ngi raq namshiq ka tsangshiq jaqkhon mong wa tiikhup wongkuq wan mang shea riikang?

¹³ Ngi raq namshiq ka tiichhii kuq wan kang taü miimin, namshiq raq ngi ka miimbaiq thü nong lan. Lanta laihin phra thun kriishe shomnoqho nong lan. Kriikha na ngi raq ümchaü namshiq ka tiichhiikuq nong mangshe.

¹⁴ Namshiq raq tsea wan lan phra thun phana kilanta hoqsiiki rongkiq. Namshiq chamchao tlan akhing na tsangshiq riishetiq midok dakuq laq.”

¹⁵ Shatmaq Israilnok raq Tatiwe ma akhiishe tiipaiqneato. “Naishiq raq ngarai tangkai dea. Ümniiraq naishiq ka jamkhii tsat-son rowa kra ümniiraq thi. Shatmaq ümchaü ranaiq naishiq ka tiichhii kuqlaq.”

¹⁶ Krai mren she, tsangshiq raq pongmung phra thun ka wiitashe miimbaiqto. Raüta Tatiwe ka shomnoqto. Kiimaq apaiq kiimin Israilnok chamchao kra chhi raüta, kaishak miili ka liilot mak she riito.

¹⁷ Kiijiishe Ammonaiqnok ka Israilnok khatkai miitu chiqchap rechap she süriito. Raüta Gilead wang na tsangshiq phentiip ka teito. Kiimahali Israilnok ka, Gilead wang na Mijpa chela na tsangshiq piitiip ka teito.

¹⁸ Kiijaq Israilnok mungmaiqse nai maiqphantek wa welabi thun raq, tsangshiq liipan na bom ka akhiishe riiwaito. “Amonaiqnok ara khatkai ma lamsheati ka juwa miraq? Jurwa lamshea jiiq, kriiwe ka Gilead wang na tuwejong miishe mija wan.”