Philippians 4 - ASII LAKDAP Bible (BSI)

Kamtsantsii Apha Maq Sironglaq

¹ Ara chong tiikang arai mren, lungwii phunainotiim lei, namshiq ka ngi ma lakshiitum alak ha ikha sitlan! Ngi ka namshiq sham chhiro raq ahaü sitiikang! Namshiq raq ngi ka kai tiichochi tlan. Krai mren, ngi ka namshiq miitu, ra na dü ma phipii tiisomrasiq tiikang. Ija, akha riimak i jiita. Ümchaü sanha namshiq raq, Tatiwe ma pharang rang maq kam tlan kata. Akha kamwan ruq maq sirong laq.

² I nyino nyungnai, Eudia nai Sintiki lei. Ngi raq namnai ma tiipaiqnea tiikang ara tai ronglaq. Tatiwe wokhong na, sinyino nguta, kaütak rishi miidea singa wan han jaq ahea miraq.

³ Kiimaq ngi rai kongshi maq jaqshamti we, kongti we lei, ümniiriimin la, ara nanyino nyungnai ara kiqram wan miitu, khrum kuq haü jaq ahea miraq. Tsangnai ka ngi rai, Tsütsa Ahea ara chongke jaqsham kra tiijong wan miitu, Klemen nai nanok phunobi ahinti kongtibi rai, reraüshi maq chap wan damti, kongti nyungnai jo. Ara chongtiikai, Shiikeawe jaqshamtibi mang ka, Shiikeawe raq atrati thun mang waiq chang, lakdam thü tlaq kiijaq asi.

⁴ Tatiwe wokhong na wranaiqshe chojong chise miili sirong laq. Tiithongshi ri chongpha: chochi ronglaq!

⁵ Nanok wiitarü rai, sobsob bombom maq sironglaq. Tatiwe ka saüho tlo she.

⁶ Jamphan miitu min naq chapa rongkiq she. Namshiq ma jamlai phan wa raa tlaq, kra Shiikeawe ma, achu jaü maq chong ronglaq. Wranaiqshe, apaiq ma kechutum lanta, achu jaü ronglaq.

⁷ Krai mren, Shiikeawe raq namshiq ma akuq, tsan awok sanglili rilung, maiqse raq sap lot mak phan wenyi rilung raq, Khristo Jesuq wokhong maq, namshiq ka hansang ma mirüm wan.

⁸ Phunainotiim le, bomshat wan ma chongkuq nong pha. Namkhu tsai ka ara ariq phan hupsam maq tiima lanta, thü ronglaq. Tarü raq tiitsam kamli chang phan maq tiima lanta thü ronglaq: tengtlaq phan, athuk atsom phan, riikhaqli, asii, maiqlung ngamwii, shreng sea chang phan hupsam maq tiima lanta thü ronglaq.

⁹ I jaq tho wa namshiq raq jamlai phan wa tsinhon wan lan, kiimaq jamlai phanwa lap wan lan kra thun kra, lang lanta si rong laq. I bomchong wa kiimaq i jaq sham wa, jamlai wa tsin wan lan kra lang ronglaq. Nashiq ara khusang maq rümti Shiikeawe ka namshiq rai adam misi laq.

Kongphiq Miitu Kechutum

¹⁰ Ngi ka Tatiwe wokhong na, rilung luhea she siwan jai hali, namshiq raq ngi ka lungwii tlan dea nguta, tiichhike akhing lap nonglan, kra chhi lata, ngi ka kai khoqriiq tiikang. Riita, ara ngutiikang arka, namshiq raq ngi ka khrum man she tsaqki lan nguta ngo nang kla riimak. Shatmaq, namshiq raq ngi khrumke miitu, akhing riiwe lap man dea riilan nguta ngo nangnga bom tiikang.

¹¹ Riita, ngi raq ara bomtiikang arka, namshiq raq ngi shiili lii man, nguta ngo ka riimak. Ngi riika i jaq na chonkhi laqli se sitlaq, kriimaq tiipaü wan lata, chochi khiq maq siwan ka angam kaiwi she.

¹² Ngi ma Khristo raq akuq ningkun maq, ngi riika ümchaü, phanrap akhing wiita tang wan ruq lot tiikang.

¹³ Khristo raq ngi ma ningkun kuq tlaq kriimaq, ngi raq phanrap akhing saü wan tlaq kra nin lot tiikang.

¹⁴ Li jiimin la, namshiq tsii hea kha maq, ngi chamchao bala, namshiq raq ngi khrum kuq lan kriika ahea pinthum.

¹⁵ Namshiq Philipiati riika ahea wiq asap han. Man na Tsütsa Ahea chongke wa, jaqsham apha wanji na, ngi ka Mesidonia wang maq tiido wan jai, namshiq Philipia phungtuti riili, ngi khrum kuq lan ihata. Ngi rai aliip apha ranaiq min, kiimaq asum arum ranaiq min, pong wan damruq maq jaqsham damti ka namshiq li riilan.

¹⁶ Ngi Thesalonia na sishon na, ngi ma akhek raa tlaq bala min, lakshi laknai, namshiq raq ngi ma khrum jaqmiiq tiiso lan ihata.

¹⁷ Ara chongtiikang arka, ngi raq namshiq jaq wa kongphiq jaqmiiq siika, akhing khing na, lapphaqsiq wan ruq riiha jaq nguta ngo nang ka riimak. Ngi riika namshiq ma aliip apha riiwe ka apapa, liip pha wan raü jaq nguta tiima lalata chongtiikang.

¹⁸ Lo ta, arjaq arshe namshiq kongphiq bomtre tiijang kuq tiikang ara. Namshiq raq ngi ma phanrap ümchu wa tiiho wan lan, irka wiita lap kang she. Arka ngi ma, ahong thaq niimin achan ana, asho awo she! Namshiq raq Epaphroditas jaq na, tiiho wan lan kongphiq irka, ahong thaq niimin achan ana she ngo li kha. Namshiq raq kongphiq ümchu wa, kuq lan thun kriika, Shiikeawe ma ahomwiq phan honglu ngamrea akuq ikha. Ara honglu kuq lan arka, Shiikeawe man na athuk atsom, kiimaq apaiq tiichochi chang honglu.

¹⁹ Arai mren, Khristo Jesuq lümaq, ngi raq shomnoq tiikang, i Shiikeawe raq, apaiq tsiiqchong nyamchong ümchuwa, atum atum maq to raüta rüm tlaq kriiwa, namshiq ma phanrap ümchuwa rong ra tlaq kra, apaiq raq chomkuq wan ruq miraq.

²⁰ Nashiq tarü raq, Shiikeawe, Nawejong kli she pattup pat-sa shomnoq rong i! Amen.

Bomshat Salam

²¹ Shiikeawe sengi, Khristo Jesuq puk na siti, loweatek ma salam. Phunainotiim arjaq, ngi rai sitibi raq namshiq ma salam tiitai wan tlo.

²² Arjaq siti, Shiikeawe sengi tarü raq, akhek ka Hokham we jam na sitibi raq salam tiitai wan tlo.

²³ Tati Jesuq Khristo kaphap ka namshiq tarü rai misilaq.