Philippians 3 - ASII LAKDAP Bible (BSI)

Shiikeawe Raq Akuq Kechu Rilung

¹ Riita phunainotiim lei, bomshat ho ma ngi raq, namshiq ma ara bomtsi ara chongke rotiikang. Tatiwe wokhong na, chojong chise maq si ronglaq. Ngi raq kongkhu na jamlai wa waiqkang, kra bliiq kiki waiq nong miika, jam bimak. Kra riiwe ka, namshiq ma honkamshat maq sima ahea miraq.

² Ara abi jaqshamtibi, hi kong, athohan tri ka lang raa dongdii nguta shiichuttibi, maklii wa hon kamshat sirong laq.

³ Nashiq ahata, riikhaqli maq athohan tri langti. Tsangshiq ka riimak. Nashiq riika, Asii Wenyi lümaq Shiikeawe shomnoq wantiikai. Kiimaq Jesuq Khristo wokhong na si laita, kai chochi tiikai. Nashiq riika rakhütsi ri thunglai lang tri poi kriimiika kam mai.

⁴ Ngi ahata, man na akhnok thunglai ma kam wanti we akaü ashi nguta siwan kang. Ashi ra raq, apaiq ka ara chongtiikai rakhütsiri na thunglai lang poi kriima mikam lot ha nguta, tiima tlaq jiila, ngi raq tiina apa mitiishomra lot ha wa.

⁵ Ngi ka rawüchhi jai maq chepat shi ngo niili, i tho ka hanto. Ngi arka, i nyung pukdong Hibrunok phan dongdii. I weraü mang ka Benjamin weraü. Ngi ka chiisan Jehudinok lai. Thungtri lang wan lam na akaü ashi, Phorisi phan wa.

⁶ Nanyungwe Thungtri lang wan lamphan na, tri raü sham wanti, akaü ashi. Kriikha maq, phungtuti ka pinthum tiichamchao wan kang. Thungtri lang raüta kechu maiqse ma jawan chang lam asi dea ngo chang jiika, ngi ka thungtri aming tingting maq lang wanti, kechu maiqse ashi nguta asi wan ha wa.

⁷ Ngi raq arthun arka aliip jonghea asi nguta tiima lata siwan kang wa. Shatmaq, ümchaü sanha, Khristo mang na, ara chongtiikang thun arka, ngi ma jamlai liip dong chang min ahü she. Arthun arka hiqtili miili she jakito.

⁸ Arthun arli lamlam ka riimak: Ngi raq Tati Khristo Jesuq rai mang riisap thü tsinhea, kra miitu phanrap ka, thiihü hiqtili miili she tiijabaiq kang. Apaiq miitu, ngi raq phanrap phanrii hiq maq hutse raübaiq kang she. Ngi raq ara phanrap thun ara sinchiitsap ikhli she tsuqbaiq kang. Kriika, ngi raq Khristo ka lap wan miitu tsuqbaiq kang.

⁹ Kiimaq klang maq, apaiq rai tiipum tlii maq siwan miitu tsuqbaiq kang. Thungtri lang lata alap wan kechu rilung ka, i khum na ahü she. I khum na, ümchaü sitlaq kechu rilung arka, Khristo ma kamtsantsii thü kangta akuq kechu rilung kriili she sitlo. Arka kamtsantsii khuthaq na seng raüta, Shiikeawe raq akuq.

¹⁰ Ümchaü sanha, ngi raq Khristo ka atsaü maq sap wan rotiikang kriili she. Kiimaq, apaiq ka amaa wa tiidong wantaq ningkun raq, i khum na jaqsham tlaq kra, sap wan rotiikang kli she. Lata, apaiq chamchao wantaq homa kriimin riisha howan dam lata, apaiq tsaitaq kiikha, atsai chamchao kra, i khum na sap wan rotiikang.

¹¹ Arka ngi raq, i khum armin amaa wa, Shiikeawe raq mitiidong wan nong nguta, kriima ran tsantsii rüm tiikang kra khuthaq na seng lata sitiikang.

Apaiq Rai Powan

¹² Ngi raq, arthun chongtiikang arka, ümchaü sanha, ong kang she ngutiika ngu mang. Lo, ngi ka Shiikeawe man na, minhap she jawan kang nguta ka ngu mang. Shatmaq, Khristo raq ngi arka, apaiq rii li she nguta tsea wanto. Kra liichum ka ngi raq, i rilung na sap wantlo hajiilei nguta kai shiikutchaq wan tiikang.

¹³ Phunainotiim lei, ngohea shaq shaq chongtiikang. Ngi raq arthun arka, ongkang she dea ngutiika tiima mang. Ngi raq man na lea wan kang akhing na, jamlai wa lap kang thun kriika, ümchaü ngi raq broriiki mang she. Shatmaq, ngi ma sinkhu na, jamlai wa alap wan chang asi, kra lap wan tlo hajiilei nguta, lamtsii nü na maklii tiinyi shat maq, ajuli shiichaq tiikang.

¹⁴ Krai mren, ngi ka, ngi raq asii rilung poksi ka lap wa miitu, rusan na juwan ruq li ju tiikang. Kra poksi ka, Shiikeawe raq Khristo Jesuq lümaq, ramungtan na siwa chang rilung ngi miitu, tiihong raüta athü. Kra lapwa miituli jutiikang.

¹⁵ Nashiq phong na, juju wa wenyi na, maiqla she nguta sitiikaiti thun tarü raq, akhiisii tiima laita si chang. Shatmiitiina, namshiq phong na, maiq wiijamti raq, tiima tsantsii ka pong linlin la thü tlan jiila, kriiti miimin, Shiikeawe raq khangriri hea maq, atiichhi mirkuq.

¹⁶ Ümkhiimiiwa, kiikha tiima wanti li siraü jiimin, nashiq tarü raq, ümchaü ranaiq na saüli jamkho siwan kai, kra tri raü ka sham laita, sinkhu na wawan ruq wawan rong i.

¹⁷ I phu i notiim lei, namshiq ka i jai phanphan warong ra. Naishiq jaqtho asapti raq, jamkho naishiq jai phanphan riikhaqli watlaq, kriiti thun jai ka phan lanta wawan lili rong laq.

¹⁸ Namshiq ma ngi raq ara, man niimin jang pahea chongkuq wan kang ihata. Kiimaq ümchaü min, makphai trok lata, namshiq ma bliiq biishi chongkuq nong tiipha ara. Khristo pumsongkham na tsaitaq kra liichum shiithen baiqti maiq pahea asi. Tsangshiq rilung kra lii raüla, Khristo pumsongkham na tsaitaq liichum kra runbaiq miituli sitlo.

¹⁹ Tsangshiq ka wamungtan na mide wan. Ara jamkhano chongtiikang ngukla, tsangshiq shiikeawe ka tsangshiq han-ngam ramho. Tsangshiq ma shiikeawe ka, han-ngam ramho dunghiqtlaq kriili. Tsangshiq raq jamlai wa kiimung tlaq kra miitu, tsangshiq ka jeasi raq tsai chang riiwe khoti, tsangshiq ka kra ajiq jaqsham wantlaq kra miitu, tiishom mra lishe, srarai hotaq ahata. Kiimaq tsangshiq riika, phiija wa raq jamlai phan wa rotlaq, kriili shamtlo.

²⁰ Nashiq riiwe kla, ramungtan maiqsetiim nguta sitiikai. Krai mren, nashiq Chhiiti we Tati Jesuq Khristo ka, ramungtan wa ümtincho wa saüho tla nguta, maklii khamthii maq, apaiq saükai kra khe laita sitiikai.

²¹ Apaiq raq, ümchaü nashiq khum jam ningkun ahü, arümkai chang arka, apaiq achhai anyii khum kiikha miklai kuq wan. Arka, apaiq raq phanrap awokhong na tiishang wan miitu, ningkun ho tlaq kra maq, miklai kuq wan.