Philippians 2 - ASII LAKDAP Bible (BSI)

Aranse Ma Ja Raüta Mungtan Na Nga

¹ Namshiq ka ümchaü sanha Khristo nyam mong na, phintsaq tsaqhea she sitlan. Kiimaq apaiq mangchan wokhong na, tsailam jilam sitlan. Namshiq ka Asii Wenyi rai rintii ashi maq sitlan. Kiimaq, namshiq liipan na riilung riiwii, kiimaq riimang riichan miishe sitlan.

² Krai mren, ija, ümchaü sanha, namshiq ka tiima tsantsii ashi, lungwii tsantsii ashi, kiimaq tsaiji ashi, wenyi na ashi si lanta, ngi arshe tiichochi kuq rong liina.

³ Ümchaü sanha, maiqmii mang jong tiima lanta, jamlai phan min naq kiimung rongkiq she. Kiimaq maiqmii kiidea ajong ala nguta tiima lanta, jamlai phan min naq sham rongkiq she. Shatmaq, maiqmii ka aranse ma ja lanta, nanok ka maiqmii ma maiqla lin, asap atsin lin nguta, tiima lanta si ronglaq.

⁴ Lanta, kongti ma jamlai phan wa ahea miraq, kra miitu si ronglaq, maiqmii miituse lamlam li ka naq klo rongkiq.

⁵ Khristo Jesuq tsantsii jamkho thütaq, kiikhiisii, namshiq tsantsii kiimin thü chang: Jesuq tsantsii ka akha thüto.

⁶ Apaiq ka Shiikeawe pumsongti we. Li jiimin Shiikeawe rai chaü ngachang na nga wan, apaiq raq dadü mak.

⁷ Shatmaq apaiq raq maiqmii tsii maq, apaiq arang, khushü, amang jong, wiita baiq thüto. Raüta jaqshise ashi ma pokito. Raüta maiqse ma jakito. Kiimaq maiqse khum na pokito.

⁸ Apaiq ka aranse ma jaraüta siwanto. Phaqchii nichii maq Shiikeawe bom tai raüta, pumsongkham na tsaito.

⁹ Arkha maq, Shiikeawe raq apaiq ka wiitarü thaq na, ajong pinthum ma shongto. Kiimaq apaiq mang ka wiitarü thaq na, ajong pinthum mangto.

¹⁰ Arkha miitiina, ramungtan na siti, mangjong hiq na siti, kiimaq wulum mung na siti wiitarü raq, apaiq dea ajong pinthum nguta, kaütsrong na bum raüta minoq wan laq.

¹¹ Kiimaq wiitarü raq tantan maq, Jesuq Khristo dea Tatiwe nguta mishom noq wan. Raüta, Awejong Shiikeawe khushü ka mitiijong wan.

Walüli Ikha Mangjong Hiq Na Liliim Ronglaq

¹² Riita, ija, ara chongkuq tiipha arai mren, lungwii phunainotiim lei, man na ngi, namshiq rai adam siji na, namshiq raq jamkho, i bom chong ka phaqchii nichii maq tai lan, kra nam miimin, namshiq raq ümchaü i bom chong ara tai wan ka akhek lin she. Namshiq raq tiichhii wan rilung lap wan kra, awon awu ma tiija wan miitu, Shiikeawe lamphan na, pinthum shiikut chaq lanta sironglaq.

¹³ Ara jamkhano chongtiikang ngukla, Shiikeawe raq namshiq ma apaiq bomchong ka, phaqchii nichii maq lang wan miitu, namshiq tsan tiichhii kuqtlo. Kiimaq, namshiq raq apaiq jaqsham miitu, ningkun kuq tlo.

¹⁴ Arkha maq ümchaü sanha, phanrap jaqsham kaiwa ümchuwa sham tlan, jaqsham lam maq, naq bot tsaü rongkiq. Kiimaq jaqsham lam maq naq riikhii riilea rongkiq she.

¹⁵ Akha sihan jiitiq, namshiq ka jamlai shutphit min ahü, siirairai awongsii Shiikeawe setiim ma mija wan lot han. Namshiq ka ara boqtham chum ikha, mangjong ngarai maiqse phong na sitlan. Namshiq ka tsangshiq phong na, ra na raiqsaiq chhainyii liliim tlaq kiikha, achhai anyii maq si rong laq.

¹⁶ Namshiq raq tsangshiq ma, rilung tsitsü bomtsi kra chongke wan lam maq, akha achhai anyii lam maq, si ronglaq. Namshiq raq akha minshiiq wan han jiika, Khristo Saükai Ranaiq na, Shiikeawe man na, ngi ka namshiq miitu, kai tiishomra lata, michochi ha. Kriika ngi raq namshiq ma Shiikeawe jaqsham kuq kang kra, atu na wiiki mak dea, atsi pahea tsi wanto nguta hakhi miraq.

¹⁷ Jursap, namshiq raq Shiikeawe ma kamtsantsii rüm tlan kha maq, honglu kuq tlan kiikha, ngi riimin Shiikeawe ma, i rilung ara honglu na akuq nyamse takuq tlaq ikha, tabaiq wan chang wa saü jiiq riila. Riita, kra ngohea dea li hongtha wan raü jiimin, ngi kla chochikhiq li. Kiimaq namshiq min, ngi rai adam chochi chang li.

¹⁸ Krai mren, namshiq min ngi rai chochi wan dam chang li. Kiimaq namshiq chochi kiimin ngi ma riisha kewan dam chang li.

Timothi Nai Epaphroditas Philipia Na Miwa

¹⁹ Tatiwe raq lamdikuq raüla, ngi raq Timothi ka namshiq rai triihum wa, jaqlo liipan niili mitiiwa sham nguta tiima tiikang. Krai mren, namshiq hansang sitlo nguta, tsütsa taiha jiila, ngi ma tsaiji kongtam puq shi she mirnong.

²⁰ Namshiq tiichhan chhi wan miitu, tiima tsantsii ashi maq, ngi rai hekiilai howan damti ka apaiq sitlaq arli.

²¹ Wiitarü ka, maiqmii ma amet dong chang lam kra tiima raüta, siti siisaqli. Jesuq jaqsham ka, jamkhii raüta tiijong chang wa, kra tiima makti maiq pahea asi.

²² Kiimaq namshiq raq apaiq jaqsham kaiwa thü kriika asap han she. Apaiq ka i se shaq ma jaraüta, i jaq tiihap ma, ngi rai Tsütsa Ahea chongke jaqsham tiijong damti.

²³ Krai mren, ngi miitu phanrap ka jamkho maiwan jiiq, kra lii lata, jaqlo miili apaiq ka namshiq phana mitiiwa ha nguta tiima tiikang.

²⁴ Ngi ka jaqlo miili she namshiq phana saü wan miitu, Tatiwe raq lam midi kuq nguta, kam tiikang.

²⁵ Li jiimin, ngi raq naphu nowe Epaphroditas, ngi rai kongshi maq jaqsham damti we, kiimaq rekhat damti we, kiimaq ngi ma namshiq tsasoq wanti we, raüta ngi ka khrum keti we kra, namshiq phana tiiwa chang akhek nguta, tiima wan nong kang.

²⁶ Apaiq ka ümchaü, namshiq tarü rai sham riichhitlo hajaq, nguta atsan tsihea maq sitlo. Kiimaq, namshiq raq, apaiq ka atsi nguta tsütsa tai lanta, namshiq chaparai holan sham, nguta atsan tiichhii raüta, namshiq phana saü wan tlo hajaq, nguta kai chapa tlo.

²⁷ Ngohea dea, apaiq ka tsijong makaiq bumto. Raüta lumwiishe jang wanto. Shiikeawe raq apaiq ma kai mangchanto. Apaiq miili min riimak, ngi miimin mangchanto. Raüta, ngi ka aho ajii jonghea riihum wan chang wa, tiihang kuqto.

²⁸ Riita, ara ningkhan tiina, jam tisorii wa nguta, apaiq ka namshiq phana tiiwa tiikang. Krai mren, namshiq ka chapa jonghea maq sitlan kra, namshiq miimin tsan asang she miraq. Kiimaq, ngi min chapa mang she mirha.

²⁹ Apaiq ka Tatiwe pum na phuno nguta chojong chise maq tao ronglaq. Apaiq akha jaqsham wanti tarü ma shreng ronglaq.

³⁰ Jamkhano ngukla apaiq raq amiisaq tanli riito kiimaq Khristo miitu tsainam riito. Kriika namshiq maiqmii raq ngi khrumke miitu kongphiq kra ngi ma sokeho nguta aki, chamchaoto.