NAHUM 1 - ASII LAKDAP Bible (BSI)

¹ Arka Ninewi chela miitu Elkosh hiqti shammiwe Nahum ma atiichhi kuq riisham bomchong.

Ninewi Khuthaq Na Tatiwe Tsankhiq

² Tati Shiikeawe raq apaiq rai riilong liiqti ka, akhiismin nin lot mak jaq mitiijang, tsangshiq ma atsankhiq tsi ma, tsangshiq mitsa.

³ Tatiwe ka mokhiq khiqmak phan, shatmaq apaiq ka ningkun jonghea rümti, Krai mren ashut aphit we ka, apaiq raq ümtiikii min tiijoq mak phan. Tatiwe ümbano khum tlaq, kiijaq rathaiq saü tlo. Ra na phum pong wan tlaq kra, apaiq jini chong wa, botkhulai akhuk!

⁴ Apaiq raq khamjong chum ma aming kuqtlo. Apaiq raq jürai thun trü baiqtlo! Hiqpo hiqwin Bashan tan kiimin, ashin riikitlo, Karmel pum kiimin, ajung she riikito, kiimaq Lebanon pepü kiimin, jukkito.

⁵ Tatiwe man na pum thun ka, tiikhai banban she riitlo, Ku-akin thun ka, ajam riiwan tlo. Tatiwe chhi raüta, mangjong hiqdiim tiikhai tlo, kriithaq na siti maiqse kunli hanghun wanto.

⁶ Apaiq tsankhiq mokwan raüjaq, juwa michap lot? Atsankhiq wa kewan raüjaq, juwa atra misilot? Apaiq atsankhiq walü raübaiq raüla, longkaü thun akhaki na bunlak mikü wan.

⁷ Tatiwe ka ahea; Apaiq raq asengi, chamchao mong wa, tiiwong kuqtlo; Apaiq wokhong na nyap wanti, apaiq raq shiilitlo.

⁸ Apaiq raq ajaqti thun ka, jüchhang wa ikha, wiita tiithum tsat baiqtlo; Apaiq raq apaiq ngengti, maakhobok na tiidea baiqtlo.

⁹ Namshiq riika Tatiwe tiidea miitu, hiqbikho shea thu tlan? Apaiq raq namshiq, tiimiqchup mishthen baiq. Apaiq rai thongnai riingeng lot mak she.

¹⁰ Shukrü tamsetiim nai tsamkü shin phong ikha, namshiq cherop kong ka, wiita wa maq michaq baiq!

¹¹ Ninewi lei, ümpha wa, Tatiwe ngeng ma, abi phaqchi toqti weshi dongto.

Juda Mung Miitu Tsütsa Ahea

¹² Tatiwe raq asengi Israilnok ma chongtlo: “Asirianok ka srea nola, maiq pahea li jiimin, tsangshiq ka wiita mitsatbaiq, raüta tsangshiq ka athenshe mirki. Isenginok lei ngi raq namshiq, tiichamchao kang, jai na tiichamchao mang she.

¹³ Ngi raq ümchaü, Asirianok shumraü kharü, namshiq khachang kriishe, michumbaiq ha,” nguta Tatiwe raq chongtlo.

¹⁴ Tatiwe raq Asirianok miitu tri tu kuqto she, “Tsangshiq mangchongti alai min ahü she miraq, Tsangshiq phra jam mong na sumla thun ka, tiisiirai she mishthen baiq ha. Ngi raq tsangshiq Asirianok lap ma, maakho she tiije tiikang. Tsangshiq atra si thekmak!” nguta Tatiwe raq aming kuqto.

¹⁵ Liirong laq! Pum na ahea tsasoqtiwe watlo. Apaiq ka tangkai she nguta tsütsa tiitai kai kitlo! Juda mungti lei poi she klo rong laq! Namshiq raq Tatiwe ma, sinkham bomtsi khakuq lan kriishe, kuq rong laq. Ümchaü san maiq abi mungti raq, nammung ka jai na longliiq wa mak she miraq. Tsangshiq ka laimiq tiithen baiqto she.