Matthew 9 - ASII LAKDAP Bible (BSI)

Jesuq Raq Ahan Ama Arkiwe Tiiheato

¹ Jesuq ka lai na ngawato. Raüta konü thamreko na apaiq sichang chela na jang wan nongto.

² Kiijaq maiq wiijamti raq akhum ama arki we ka changdü na tiiweshat maq Jesuq phana pi wanto. Jesuq raq tsangshiq kamtsantsii ka chhi raüta atsiti we nangnga, “I se loi, ümtsaiji ka tiijong laq! Ümngarai ka diikuqto she,” nguta bomdamto.

³ Kra tairaüta, Thungtri shrinketi shrabi wiijamti raq tsangshiq liipan na, “Arwe raq ara Shiikeawe khü maq tiihong raüta riikhiq ashut bomtlo!” nguta riibomto.

⁴ Kiijiishe Jesuq raq tsangshiq tsan na jamlai wa tiima tlaq kra thohe raütiishe, “Namshiq tsan mong na akha abi ashut ka jaram wa tiima tlan?

⁵ Riita, ‘Ümngarai diikuqto she’ nguta ngo sha aje, sha, ‘Tiidolaq, chaplaq, laüta khumlaq’ nguta thaü kriiwa aje?

⁶ Ikhiijiila, ngi raq namshiq ma, Maiq Se riika, mangjong hiq na ngarai diike wan miitu arang ho tlo nguta tiichhikuq pha,” ngutiishe tsangshiq ma chongto. Kra chongtaq krai mren, apaiq raq ahan ama arki we ka, “Tiidolaq, chap laq, laüta ümdamsii ka kom laq, laüta ümjam niishe wawan laq!” nguta thaüto.

⁷ Krai mren, kriiwe ka tiidopot riito. Raüta ajam na kokkok wawanto.

⁸ Nokmaiqse raq kra jaqsham ka chhi raüta ahai riito. Kiimaq maiqse ma atinkhan arang kewan kra chhiraüta Shiikeawe ka tiitsam kamto.

Jesuq Raq Mothiq Ka Hea Wanto

⁹ Jesuq ka kra ba maq ahin nü niishe tiido wanto. Apaiq ka lam na akhum rai lam maq phunta hiti we Mothiq ka phunta hichang jam na phunta hirea chhi wanto. Apaiq ka chhi raüta, Jesuq raq apaiq ma, “Ümniika i jai she phan laq,” nguta heato. Krai mren, Mothiq ka tiidopot raüta, apaiq jai phan wanto.

¹⁰ Jesuq ka Mothiq jam na dungsea anga. Kiijaq adam na Jesuq nai ajaqshisetiim rai dungsea nga damti ka phunta hitinok kiimaq nokwe raq ashleq arbaiq ngarai maiqsetiim min pahea asi.

¹¹ Phorisinok wa maiq wiijamti raq kra chhi raüta, Jesuq jaqshisetiim ma, “Namshiq ma shrinketi we raq ara jam nguto akhnok ashe anun phan maiqsetiim rai riishot riishaq nga raüta phaqsiq dam tla?” nguta waito.

¹² Jesuq raq tsangshiq bom ka tai raüta akha treto, “Phintsaqtsaq maq siti miika taktot ka ra mak; atsiti miili ra tlo.

¹³ Asii bomtsi na, ‘Ngi miika mangchan tsii li ra tlo, honglu ngamrea thop ka riimak!’ nguta chongtlaq arka jamlai ngo wa, kra namshiq raq samhea phat rong laq. Lanta kra liichum ka takwan han jaq ahea miraq. Ngi ka chiisan maiqsetiim heakai akiha riimak; ashleq arbaiqti thun kra triichom sheakai kikang.”

Amang Maq Achu Jaü

¹⁴ Kiitiikaq Khamlamketi we Johan jaqshisetiim ka Jesuq phana waraüta, “Naishiq nai Phorisinok jaqshisetiim ka akhing khing na amang maq silaita Shiikeawe shomnoq tiikai. Shatmaq ümjaqshisetiim riika jam nguto amang maq siraüta Shiikeawe ka shomnoq mak?” nguta waito.

¹⁵ Kiijiishe Jesuq raq treto, “Kherüsea poi lomdamti wanwe ka songtsi ramtsi miili siwan chang ngutiisha tiima tlan? Riimak! Tsangshiq ka junlamti we rai polokhiq maq phaqsea wan chang. Shatmaq ranaiq shi akhing she tsangshiq phong wa junlamti we ka ahin niishe mishea wan. Kra akhing niishe ka tsangshiq min amang maq achu jaü chang she miraq.”

¹⁶ “Jurmin kheathum chü pu thaq niika, khea nye phu maq tiidiim chhang mak. Kiikha chhang raü jiika, khea nye phu maq atiidiim phu ka achon riiki raüta, khea pu kra atiijong chaibaiq rea khoti miraq.

¹⁷ Kiimahali maiq jurmin che anye mija shaq li kriika ngamkhü chü tsabum mong niika thü mak. Kiikha thü raü jiika, ngamkhü chü tsabum kriika awürai raüta, aphok khoti mirki. Raüta tsabum kiimin mitiikho baiq. Raüta che thun kiimin wiita mitraüki. Shatmaq che anye ka tsabum min anye mong na thü chang. Krai mren, tsabum kiimin then mak miraq kiimaq che kiimin wiihiiki mak ahea miraq.”

Jairas Se Nai Atsi Nyung

¹⁸ Jesuq ka ara bom chongke rea liipan kiijiiniili, sinagok liiwanti we maiqla weshi ka apaiq phana kito. Raüta Jesuq khaki na kaütsrong na ngasaq raüta, “I se ka ümchaü linlintiq pitkito. Shatmaq ümniika walaüta ümjaq maq apaiq dü na sham wa haü jiila, apaiq ka achhun mirwan nong,” nguta tiipaiqneato.

¹⁹ Krai mren, Jesuq ka tiidopot raüta apaiq jai phanphan wawan damto. Kiimaq apaiq rai ajaqshisetiim kiimin nong shiinong wawan damto.

²⁰ Maiq nyung ashi ka akhing khing na tiijai dong tsi raq chamchao raitlo. Apaiq ka akha wiiroqshi ri wiinai she chamchaoto. Kra nyung ka Jesuq jai nü maq dongchhaq raüta, Jesuq raq samtlaq samtong jong kaü kiijaq ajaq ma shamsaq shamto.

²¹ Apaiq raq, “Ngi raq apaiq samtong jong kaü arjaq thansaq shamlap hajiili dongdii min, i thatsi arka mihiaki dongdii,” nguta atsan mong na riiwea shat maq shamto.

²² Jesuq raq ajai nü na liisaq raüta, “I se loi ümtsaiji ka tiijong laq! Ümkam tsantsii thütlaü kra lümaq heaki laüshe,” nguta apaiq rai bomdamto. Krai mren apaiq thatsi kiimin tiidoqra heasaq heakito.

²³ Kra raütiishe Jesuq ka maiqla we jam kiiniishe saü wanto. Apaiq raq kiijaq majo kaitibi maiq wiijam ka ma lapkai tiijeme paimin toro tsüti nai kiijaq nokmaiqse thungtii rai tlaq thun ka achhang ahang trang she lowanto.

²⁴ Kra chhi raüta, “Namshiq wiitarü ka arwa tiibin tlo ronglaq! Kinphai na dongho tlo rong! No ka tsai mak. Kriika miinan akon ja tiina!” nguta apaiq raq nokwe kra kinphai na jobaiqto. Kra tairaüta tsangshiq tarü raq Jesuq ka ashummii reali riito.

²⁵ Shatmaq nokwe ka kinphai na tiibinho jai she, Jesuq ka no jechakse khok kiiniishe wato. Raüta ajaq maq no jaq na shamto. Krai mren, no ka tiidopot she chap hiiq ama wa sam wanto.

²⁶ Ara tsütsa arka nokmaiqse raq kra hong binjü barap se niishe rinra wan raüta tiinyam wanto.

Jesuq Raq Makchuk Wenai Tiiheato

²⁷ Jesuq ka kiimaq tiido wan raüta, lam na khumshkhum awa rai she riito. Kiijiishe maiq makchuk wenai raq apaiq jai ka phanshphan maq phan wanto. Tsangnai raq, “Dawit Se le, nainai ara mangchan kuq wan phiidea!” nguta agitrang lam maq apaiq jai ka phan wanto.

²⁸ Jesuq ka tapmong na nyap wa jai she, kra wenai kiimin tapmong na phan wanto. Kiijiishe Jesuq raq, “Ngi raq namnai thatsi ka mitiihea kuq lot ha ngutiidea sha kam tlan?” nguta tsangnai ma bom ka waito. Kiijiishe, “Shiilang we lei, mitiihea kuq lot haü ngutiidea kamtiikai!” nguta tsangnai raq apaiq bom ka treto.

²⁹ Kiijiishe, Jesuq raq tsangnai mak na ajaq maq sham raüta, “Namnai raq jamkho kamwantlan kra phan phan mihiaki laq!” nguta nguto.

³⁰ Krai mren, tsangnai mak ka tiidoqra li heakisaq heakito. Kiimaq Jesuq raq tsangnai ma bom thang tsii chongke, “Ara tsütsa ara maiq ahinti ju miimin tiitai wan ra mak!” nguta chongkuqto.

³¹ Shatmaq tsangnai ka kriiba kiiwa tiido wan raüta, Jesuq tsaki kra hong barap se niishe rinra wanto.

Jesuq Raq Nütang We Tsi Tiiheato

³² Jesuq raq tsangnai mak tiipiiq kuqtaq wenai kriika ka atiido wan awa wan she riito. Kra liipan niili, maiq wiijamti raq kiijaq maiq weshi ka nütang tha raq arom wan we kra, Jesuq phana shea wanto.

³³ Shatmaq Jesuq raq kra nütang tha ka jobaiq ri li she, kriiwe thatsi ka tiidoqra heakisaq li she, heakito. Raüta apaiq ka abom asa wahea liishe phintsaq she heakito. Kra chhi raütiishe nokmaiqse tarü ka kai awang li she riito. Krai mren, “Nashiq raq atinkhan awang chang jaqsham kaiwa arka Israil mung na chhi mai shaq jo!” ngutiishe tsangshiq ka wangto.

³⁴ Shatmaq Phorisinok riika, “Apaiq riika Thawe Lüwa We ningkun maq ara thup atha thun ara jobaiq wan tlo!” nguta khoti piilii bomto.

Jesuq Raq Mungmaiqse Mangchanto

³⁵ Jesuq ka chela rap nai hiqshong rap thun na kunkun khum wanto. Raüta, sinagok thun na kiraüta, Ramungtan Tsütsa Ahea kra chongkuq wanto. Kiimaq phanrap phanrii thuptsi thatsi raq chamchao tlaqti thun kra wiita chhintsii kuq wanto.

³⁶ Apaiq raq mungnyung mungse riiphong rong rai wantlaq kra thun ka chhi wan raüta, tsangshiq miitu atsan mong na kai tsi wanto. Tsangshiq ka achapa riili tsai wan raüta siwan tlaq kra chhi raüta kiimaq tsangshiq ka tsangshiq rümkom wanti ahü, skuse kong mangrang mra mangmii rai wan tlaq ikha, chamchao rai wan kra chhi wan raüta, apaiq tsan ka kai tsi wanto.

³⁷ Kriikha maq apaiq raq, “Tsam man rü wak ka jonghea asi. Shatmaq tsamjutti maiq ka atsapse li.

³⁸ Wakchongti we jaq wa achu li jaü wan lili rong laq, apaiq raq tsamjutti maiq ka apapa she tiq mitiiki laq,” nguta ajaqshisetiim ma chongkuqto.