Matthew 8 - ASII LAKDAP Bible (BSI)

Jesuq Raq Atsi We Tiiheato

¹ Jesuq ka hiqlam miishe satki kiita, maiqkong thun pahea raq apaiq jai ka phan wanto.

² Kiitiikaq maiq weshi, thabi tsi raq chamchao rai tlaq we ka, apaiq phana dongchhaq waraüta, kaütsrong na bumsaq riito. Raüta, “Shiilang we le, ümniiraq ngi ara mangchan haü jiila, i thatsi ara mitiihea kuq lot haü,” nguta tiipaiqneato.

³ Kiijiishe, Jesuq raq ajaq maq atsiti we dü na ashamho lam maq, “Ngi raq ümniika chhiijiike rotiikang! Ümchaü li heakikiq,” nguta apaiq bom ka treto. Krai mren, apaiq thatsi ka heakisaq li heakito.

⁴ Jesuq raq apaiq ma tsii ka akha chongkuqto, “Tailaq! Maiq ahin ma jumiimin naq chongkiq. Shatmaq ramwe we phana lealea walaüta, ümkhum ka siikito she nguta tiichhi wakiq. Apaiq raq ümkhum ka milii laq. Kra tlii lot jai shetiq ümkhum ka siito she dea nguta, nokwe man na hakhi kewan Mosheq raq akuqthü aming kra phanphan honglu kuq wakiq.”

Jesuq Raq Luqkhapse Tsi Tiiheato

⁵ Kriimaq Jesuq ka Kaparniam chela niishe saühoto. Apaiq ka kiijaq saükai ri li she, Roman phenlabi siihiip we ka apaiq rai riihumto. Raüta Jesuq man na akha tiipaiqneato,

⁶ “Shiilang we, i luqkhapse ka naijam na atsi, tsihea atiimeshi min lot mak chamchao rai tlo.”

⁷ Kiijiishe Jesuq raq treto, “Ngi miwa kang. Lata atsi ka mitiihea kuqkang.”

⁸ Kiijiishe siihiip we raq treto, “O shiilang we, ümniika i jam na wali ka thek mak. Ngi ka ümniima aran. Ümniiraq üm nü maq amingli tat laq. Kra riihaü jiili i lukhapse tsi ka mihiaki.

⁹ Ngi armin la, ngi ma ajong alabi jaq takiq na siti. Kiimaq i jaq takiq niimin la phenlabi asi. Ngi raq weshi ma, ‘Kiina kilaq’ nguta thaüha jiila, kriiwe ka miki. Kiimaq weshi ma, ‘Ümniika ana wara’ nguta hea ha jiila kriiwe ka ngi pha na miwa. Kiimaq i dise nangnga, ‘Ara shamlaq’ nguta thaüha jiila, apaiq raq jaq ka misham.”

¹⁰ Jesuq raq apaiq bom ka tairaüta, awang riito. Kiimaq apaiq tro na mungmaiqse ajai phan wantibi thun kriima akha nguta chongkuqto, “Ngi raq chongtiikang arka tengteng! Ngi raq Israil mung na arwe kamasham akha ümchaü niitaq weshi ra min hum mang shaqli.

¹¹ Ngi chongpha. Maiq pahea shedong mung wa nai shenyap mung wa waraüta Abraham, Isak, kiimaq Jakob rai Phangthum Poi Ranaiq Ramungtan na minga wan dam.

¹² Shatmaq maiq pahea Ramungtan na ngawa chang wiika, ranyaq nyang mong na mitiidea baiq wan. Kiijaq tsangshiq ka aho asii, arong awi tiichit wa trang liishe micham chao wan.”

¹³ Kra ngu raütiishe Jesuq raq siihiip we kra nangnga nguto, “Walaq, tsan asang miishe ümjam na walaq. Ümniiraq jamkho kamtlaü kiikha miklo kuq.” Krai mren, siihiip we lukhapse tsi ka kra akhing liipan niili she heakito.

Jesuq Raq Maiq Atsiti Pahea Tiiheato

¹⁴ Kiimaq Jesuq ka Petar jam niishe wawanto. Kiijaq Petar nyaichhi ka atsidong makaiq changdü na abum chhi wanto.

¹⁵ Jesuq raq ajaq maq adü na shamto; kiimaq atsidong ka heakisaq li she heakito. Krai mren apaiq ka Jesuq ma phaq asea tiihong thake she, apaiq shiililiike she honghoto.

¹⁶ Rajiko niishe mungmaiqse raq maiq ka tsak amii raq arom wan, atsi asitibi thun pahea kra Jesuq phaniishe shea wanto. Jesuq raq apaiq bom tsishi miili, tsak amii tha thun wiita chhiijii kuqto. Kiimaq atsiti ümchuwa apaiq phana kirai witaq thun ka wiita tiihea kuqto.

¹⁷ Apaiq raq ara chhintsii kuq wan taq thun arka, Isaia shammi we raq, “Apaiq raq nashiq thatsi thun nai thup atha thun ka wiita howanto,” nguta waiqthü taq bomkham kra tiikupi wan miitu she chhiijii kuq wanto.

Jesuq Jaiphan Wan Danti

¹⁸ Jesuq raq apaiq tro na maiqkong ka riitam rai wan kra chhi raüta, ajaqshisetiim ma konü tham reko niishe warong pha ngutiishe thaüto.

¹⁹ Kiijaq Thungtri shrinketi we ashi ka apaiq phana waraüta, “Shrinketi we ngi min ümjai miphan ha. Ümnaq ümbano mikihaü, ümjai phanphan mikhum damha” nguta apaiq ma chongto.

²⁰ Kiijiishe, Jesuq raq treto, “Miikakoi kong thun miika tsangshiq bum chang asha asi. Kiimaq wushi kong miimin achü asi. Shatmaq Maiq Se miika, asi anga chang jam awak min ahü.”

²¹ Kiimahali, maiq weshi, apaiq ka Jesuq jaiphanti kriiwe raq Jesuq ma chongto, “O shiilang we, ngi ka jam na kongkhu jangki pha shaq. Lata i we ma ka saiqsamki pha shaq.”

²² Kiijiishe Jesuq raq treto, “Ümniiriika i jai li phan laq. Ama ka amati riitiq tiina misaiq sam.”

Jesuq Raq Rathaiq Tiisangto

²³ Jesuq ka lai na ngawato. Kiimaq ajaqshisetiim kiimin apaiq rai adam na wawanto.

²⁴ Tiihanghiiq miili she henghea rathaiq rahai wanto. Raüta thamchum ka wiita brakshaq baiq wanto. Krai mren lai ka jü mong na sang wan nam nam ikhiishe riito. Shatmaq Jesuq ka akon makaiq.

²⁵ Kriikha maq, ajaqshisetiim raq apaiq ka, “Tatiwe, nashiq jü na thap wan kai, tiichhii kuq tlo laq!” nguta tiisamto.

²⁶ Jesuq raq tsangshiq ka sonto, “Namtsam ka kiitinkhan jaram kiinyii rai wa? Namshiq kamtsantsii ka ranhea!” Kra ngu raütiishe apaiq ka tiidopot raüta, rathaiq hengwa nai khamtso blun hengwa kriima, “Tsaq ronglaq” nguta aming tatto. Krai mren, rathaiq nai khamtso brak watrang kriika sangsaq li she, kaiqshak sanglili she sangkito.

²⁷ Kra chhi raütiishe, tsangshiq wiitarü ka, “Rathaiq watrang nai khamtso blun watrang riimin apaiq aming tailili arka jamkhiinok maiq wiinya?” nguta awang rai lam maq riibomto.

Jesuq Raq Tha Raq Arom Wan Wenai Tiiheato

²⁸ Jesuq ka thamchum konü reko niishe, Gedara chela hong na saü wan ri li she, kiijaq malapkho longsha mong wa adongki tsak raq arom wan maiq wenai rai riihumto. Kra we nai ka pinthum abi. Tsangnai ma hai ma nokmaiqse ka kra lam maq jumin khumlot mak riito.

²⁹ Tsangnai raq Jesuq chhi raüta, tiihang hiiq miili she, “O Shiikeawe Se loi, ümniiraq naishiq ka jamkhiiriiho she wa dan tlaü? Naishiq ningthoi akhing misaü shaq niili, ümniiraq naishiq ka tiichamchao kai she sha saüki laü?” nguta siitrangto.

³⁰ Kriimaq aje niili, atsam phaq waqkong kongnyung kaüshi asi.

³¹ Kriikha maq tha raq Jesuq jaq wa aming jaü, “Ümniiraq naishiq ka ajo baiq she dea jiika, waqkong hai tlaq kra khum niishe sam wan phai,” nguta tiipaiqneato.

³² “Kirong laq” nguta Jesuq raq tsangshiq ka thaüto. Krai mren thakong ka waqkong khum na sam wanto. Krai mren, waqkong ka wiikongtam miishe longraq kam nü kiina pintrang raütiishe, thamchum mong na thap wanto.

³³ Waqkong rümtibi raq kra chhi raüta, chela kiina pintrangto. Raüta tsangshiq raq jamlai wa chhitaq, kiimaq tha raq arom wan maiq wenai kra jamkho heakitaq, kra tsütsa kriishe nokmaiqse ma tiitaito.

³⁴ Krai mren kra chela na siti nokmaiqse ka nyungwe nose tarü Jesuq sham liiwa wato. Kiimaq tsangshiq ka apaiq rai riihum raütiishe, apaiq ka tsangshiq hong kiiwa ahin na kiho raüjaq ahea miraq nguta tiipaiqneato.