Matthew 6 - ASII LAKDAP Bible (BSI)

Chamchao Maiqse Khrumke

¹ “Namshiq raq nokwe ma tiichhi ma nguta, ‘mitting jaq sham’ ka naqsham rongkiq. Namshiq raq akha nokwe makki na tiichan ne lanta sham han jiila, ramungtan na siti nam We jaq wa poksi lap chang ka ahü she miraq”

² “Arkha maq ümtiikiiwa ümnii- raq chamchao maiqse ma khrum jaqmiiq kuq tlaü akhing na mongnam nok raq chiiriim raüta sinagok maq nai chiiheawea maq nokwe raq michhi laq nguta kuqtlaq ikha naq kuqkiq. Tsangshiq raq akha klotlaq arka maiq raq tsangshiq ka mishom ra laq nguta klotlo. Ngi raq namshiq ma riikhaqli chongpha, tsangshiq raq Shiikeawe jaq wa poksi lap chang ka ahü she.

³ Shatmaq ümtiikiiwa ümniiraq chamchao maiqse ma khrum jaqmiiq kuqtlaü na, ju miimin naq tiisapkiq.

⁴ Akha klo haütiq kra jaqmiiq kene ka pumsii jaqmiiq ma mija. Kiimaq pumsii jaqsham chhiti üm We riishetiq ümniima poksi mikuq.”

Achu Jaü Shrinke

⁵ “Namshiq raq ümtiikiiwa achu jaü tlan akhing na, mongnam nok raq jaü tlaq ikhiika, naq jaü rongkiq! Tsangshiq riika sinagok maq nai lamkii na chap raü raüta, maiq raq michhi laq nguta achu jaü tlo. Namshiq ma riikhaqli chongpha, tsangshiq raq Shiikeawe jaq wa poksi lap chang ka ahü she.

⁶ Shatmaq ümtiikiiwa ümniiraq achu jaü tlaü, kra akhing na, ümniika ümtap mong na walaq, laüta kilü maq tiishaq laq. Laüta üm We maiqse raq makhia maq chhilot mak we jaq wa achu ka jaü laq. Raüla pumsii jaqsham chhiti üm We raq ümniima poksi ka mikuq.”

⁷ “Namshiq raq ümtiikiiwa achu jaü tlan akhing na, thatsang maiqse raq jaü tlaq ikha pahea naq banbok rongkiq. Tsangshiq riika apa achu jaü raütiq Shiikeawe raq mitre nguta tiimatlo.

⁸ Tsangshiq raq jaü tlaq kiikha naq jaü rongkiq. Nam We Shiikeawe raq namshiq ma jamlai wa ra tlaq kriika namshiq raq mijaü shaq niili, apaiq raq asap wishe dongdii.

⁹ Namshiq raq achu jaü ka akhli jaü wan lili ronglaq: ‘Ramungtan na siti na We: Ümmang asii kli mishreng laq;

¹⁰ ümmungtan kli misaülaq; Ramungtan na ümniiraq athithi shamtlaq kiikha mangjong hiq niimin mishamlaq.

¹¹ Ümchaü ranaiq miitu naishiq ma, dung kuq laq;

¹² Naishiq ma ashut klotibi mra thun diikuqkai, kiikhiisii naishiq mra thun kiimin diikuqlaq.

¹³ Naishiq ma tsinhea maitai naq tiisaükiq, shatmaq naishiq ka Abi We maklii wa tiiwongshat riilaq.’

¹⁴ “Namshiq ma shutphittibi mra thun ka namshiq raq diikuq han jiila, ramungtan na siti nam We riimin namshiq mra thun ka midii kuq.

¹⁵ Shatmaq namshiq raq maiq mra ka diikuq man riihan jiila, nam We Shiikeawe riimin namshiq mra thun ka diikuq mak miraq.”

Amang Maq Achu Jaü

¹⁶ “Kiimaq namshiq raq amang maq achu jaü tlan akhing na, mongnam nok raq maiq ma tiichhi ma nguta tiichan miine jaü tlaq ikha, munjuk mijuk miika naq jaü rongkiq. Ngi raq chongtiikang arka tengteng. Tsangshiq raq Shiikeawe jaq wa poksi lap wan chang ka ahü she.

¹⁷ Ümtiikiiwa ümniiraq amang maq achu jaü tlaü, kra akhing na khuthai thea mai laüta achu ka jaü lili riilaq.

¹⁸ Akha jaü haü jiitiq, maiq raq ümniika amang maq achu jaü sitlo nguta sapmak miraq. Ümniika maiq raq mak maq chhilot mai üm We riili michhi. Kiimaq pumsii maq achu jaü chhiti üm We raq ümniima poksi mikuq.”

Ramungtan Na Tsiiqtum

¹⁹ “Namshiq miitu tsiiq nai nyam tum ka mangjong hiq na naqto rongkiq. Arwiika sap nai chhii raq miphaq. Kiimaq thiimeaq raq mitek. Kiimaq ahuk raq mihuk ho.

²⁰ Ara rii na, namshiq miitu tsiiq nai nyam tum ka ramungtan na thü wan lili rong laq. Kiiwa ka sap nai chhii raq phaq lot mak she. Kiimaq thiimeaq riimin tek lot mak she. Kiimaq ahuk riimin huk wa lot mak she.

²¹ Ara jamkhano ngukla, ümbano ümtsiiq tum totlaü, kiijaq üm tsantsii kiimin mithü haü. Jamkhano ngukla ümtsiiq tum ümbano thütlaü kiijaq ümtsantsii kiimin wranaiqshe asi miraq.”

Maiqkhum Miitu Lem

²² “Mak ka khum miitu lem. Ümmak ahea jiika ümkhum na walü lishat miraq.

²³ Shatmaq ümkhum na walü ka ranyaq miishe jakitaq jiika, ümkhum na ranyaq jonghea she!”

Tijong Wenai Rümlot Maü

²⁴ “Jurmin tijong wenai rümlot mak. Apaiq raq weshi ka alungwii miraq. Kiimaq weshi ka ashummii miraq. Apaiq raq weshi ka ashreng miraq. Kiimaq weshi ka asaisi miraq. Ümniiraq Shiikeawe nai tsiiq tum ka adam na shomnoq wan lot maü.”

²⁵ “Arkha maq tiina ngi raq namshiq ma chongtiikang. Atra maq si ma tiipao wan miitu nai khum tiikhe miitu khu akhea rong ratlaq kra miitu naq chapa rongkiq. Rilung ka dung jada thaq na ara. Kiimaq khum ka khea sam wan tiikai arthaq na ara.

²⁶ Rum na siti peshap wushi thun ka liimanta. Tsangshiq raq minshiiq wan mak. Shatmaq nam We ramungtan na siti raq tsangshiq ka dunghiq tlo. Namshiq rilung ka wushi rilung nam ma ara.

²⁷ Jurmin achapa wan lam maq rilung ka alu siwan lot mak.

²⁸ “Khu akhea miitu ka jaram chapa wa? Rum na lili pepü sitlaq kra tsomhea. Kra liimanta. Pepü ro raq kheataq sam ma nguta chhi arai min sham mak.

²⁹ Shatmaq ngi chongpha. Chiithe pinthum Hokham we Solomon miirii dongdii min, ara pepü tsom rai tlaq arkhan ka tsom mak.

³⁰ Shiikeawe raq mangjong hiq raikhü ka atinkhan tsomhea pepü wiihii maq tiimiikhiiq tlo. Arka jaqlose miitu li. Ümchaü asi anap ka ashin she mirki. Ikha jiika, ümniima Shiikeawe raq khu akhea ka kuq sam mak shea miraq? Üm kamtsantsii ka jaro ran rai tla!

³¹ “Arkha maq: phaqsea khamnyang ka jamwo milap i, kiimaq khu akhea ka jambawo mihum sam rong i nguta naq chapa rongkiq.

³² (Thatsang maiqse tiina arthun ara miitu chapa wan tlo.) Namshiq ma arthun arka ra tlo nguta nam We ramungtan na siti raq asap.

³³ Ara rii na, Shiikeawe mungtan nai kechu maiqse ma jawan riiwe kli rit rong laq. Raüla, arthun arka mikuq wan dongdii.

³⁴ Arkha maq anap miitu ka naq chapa rongkiq. Anap miitu ka anaptiq tiima wan chang. Aranaiq holai jamlai wa sitlaq, kriili howan lili ronglaq.”