Matthew 5 - ASII LAKDAP Bible (BSI)

¹ Jesuq raq maiqphong ka chhi raüta, apaiq ka hiqlam ashi na wawanto. Raüta kiijaq ngawato. Kiimaq, ajaqshisetiim ka apaiq tro na riitam ngato.

² Kiimaq apaiq raq tsangshiq ma akhiishe phanchan kuq phahoto:

Riikhaqli Kechu

³ “Jurwa tsangshiq ka wenyi na miitsan nguta tumtlaq, kriiti ka chochi; Ramuntan ka tsangshiq rii!”

⁴ “Juwa aho ajü sitlaq kriiti ma chochi; Shiikeawe raq tsangshiq miboq pum!”

⁵ “Juwa saksi minmi sitlaq kriiti ma chochi; Shiikeawe kiqkham ka tsangshiq raq milap!”

⁶ “Jurwa Shiikeawe raq thapthi tlaq kra sham tsan tiitsitlaq kriiti ma chochi; Shiikeawe raq tsangshiq ma, tsan tiiheali mikuq!”

⁷ “Jurwa nanok ma tiihang mangchan tiichhi tlaq kriiti ma chochi; Shiikeawe raq tsangshiq ma tiihang mangchan mitiichhikuq!”

⁸ “Juwa tsantsii asii kriiti ma chochi; tsangshiq raq Shiikeawe michhi!”

⁹ “Jurwa mungtsing miitu jaqshamtlaq kriiti chochi; Shiikeawe raq tsangshiq ka asetiim mingu!”

¹⁰ “Juwa Shiikaewe raq thimitlaqq kra shamlam khana maiqse raq tiichamchaotlaq, kriiti ma chochi; Ramungtan ka tsangshiq rii!”

¹¹ “Namshiq ka isenginok ngo kha maq, maiqse raq namshiq ka shummii raüla, kiimaq tiichamchao raüla, kiimaq namshiq khuthaq phanrap phanrii abi arot akiq nyan raüla, chochi ronglaq.

¹² Namshiq ka khoqriiq shishiiq miili sironglaq. Jamkhano ngukla namshiq miitu ramungtan na poksi jonghea thütlo. Namshiq ma kongkhu pat wa shammibi min la akhiisii dea tiichamchao wanto.”

Shum Sum Nai Rawü Li

¹³ “Namshiq ka maiqse ngusaq kun li ma shum sitlan. Shatmaq shum ka asum she khoiki raü ka, ja she wa miraq? Kriika jamkha she wa mitiisum nong? Kriika thiihü she. Kriika araü baiq chang li she. Raüta maiq raq hok miili she mini baiq.”

¹⁴ “Namshiq ka mangjong maiqse kun li ma rawü li sitlan. Chela ashi hiqlam thaq na ate wan kriika tiipaüki lot mak.

¹⁵ Jurmin lemtem ka tiinyai raüta taükok maq hong baiq mak. Kra rii na khoti lemtem ka atochang na mito. Krai mren, jam mong na maiq ümchu wa sitlaq kriima walüli asi miraq.

¹⁶ Akhiisii hali, namshiq walü li kiimin, mangjong maiqse man na liliim ra tlo. Akha liliim wan han jiitiq, namshiq raq jaqsham ahea shamtlan thun kra tsangshiq raq michhi. Kiimaq tsangshiq raq nam We ramungtan na sitiwe kra mitiitsam kam.”

Jesuq Raq Tri Lamphan Chongtlo

¹⁷ “Ngi ka Mosheq Thungtri aming raütu thun nai shammibi bom chong aming raütu thun kra runbaiq kai akiha nguta naq tiima rongkiq. Ngi ka tri raütu thun kra runbaiq kai akiha riimak. Shatmaq, tsangshiq raq ashrinkuq wan tri raütu thun kra shiiku pikai nguta kikang.

¹⁸ Ngi raq chongtiikang arka tengteng. Ra nai hiq ara siruq wiiwii, Thungtri raütu wa ralangse bomno bomni se dongdii min poiki mak phan miraq. Tri raütu wa bomtsi awea ka wiita kunkun miku wan.

¹⁹ Arkha maq, jurwa Thungtri aming raütu thun kiiwa, bomno bomni se jin wan tlaq, kiimaq nanok miimin kiikhiisii hali ralangse ka jin wan mimai nguta tlang kuq wan tlaq, kriiti ka Shiikeawe sengi liipan na aran pinthum miraq. Shatmaq, jurwa Thungtri raütu ka lang wan tlaq, kiimaq nanok ahinti miimin kiikhiisii hali tlang kuq wan tlaq, kriiti ka Shiikeawe sengi liipan na ajong pinthum miraq.

²⁰ Arningkhan ngi chongpha. Namshiq ka Phorisinok nai Thungtri shrinketibi thaq na achan linlin miishe, Shiikeawe aming ka tsapkapkap maq lang wan han jiitiq, awongsii Shiikeawe sengi ma mija wan lot han.”

Akhiq Abi Thaq Na Tsiichong

²¹ “Richü we ma achongkuq wan bomtsi arka namshiq raq taiwan lan she, ‘Ümniiraq maiq naq tsatkiq. Ju wa matwe jatlaq, kriiti ka rung na mitiichap wan.’

²² Shatmaq, ümchaü ngi raq namshiq ma chongpha: Jurwa phunaino ma khiq riq tlaq, kriiti ka rung na mitiichap. Kiimaq jurwa phunaino ma, ‘Ümnaq ara thiihü pinthum!’ nguta sontlaq, kriiti ka Rung na mitiichap. Kiimaq jurwa phunaino ma, ‘Ümnaq ara ralang bangbang li’ nguta sontlaq, kriiti ka wamungtan na dea wan nam nam she ikha miraq.

²³ Arkha maq, ümniika aluchiim na, Shiikeawe ma honglu keho she na, ümtsan mong na, ümphu ümno ashi ra raq, ümniirai tsan riibi asi nguta sap haü jiila,

²⁴ ümhonglu ka aluchiim niili tiiwethü laüta, ümphuno we krai kongkhu kiq ramwa kiq. Kra lot jai shetiq, Shiikeawe ma honglu kra kuq wa kiq.

²⁵ “Kiimaq, maiq ashi ra raq, ümniima kha nyan raüta, rung na shokki raü la, rung na misaü hoshaq liipan niili, ümniima kha nyanti we rai, ümniika aram riilaq. Rung niishe saüho laü miiphat she ka, apaiq raq ümniika phowebi jaq na mikuq baiq. Kiimaq phowebi riika hokra miishe mikuq baiq. Kiimaq ümniika phaqtek mong niishe mishaq baiq.

²⁶ Ngi raq chongtiikang arka tengteng, ümniiraq ümkha tham ka poisa shii se niitaq saüli siirai dok maü wiiwii, phaqtek mong niili she misi wan haü.”

Sipeja Ngarai

²⁷ “Namshiq raq ara chongkuq wantaq arka tai wan lan she, ‘Ümniika maiqchak rai naq srakiq.’

²⁸ Shatmaq, ümchaü ngi raq namshiq ma chongpha: jurwa maiqnyung ashi sham na lii raüta, süram wan tlaq, kriiti raq sipeja ngarai ka atsan mong na atang wishe.

²⁹ Arkha maq, ümmak mak tsi nü raq ümniika ngarai na tiidea kiiphaü jiila, ümmak po ka alatli riibaiq laq! Wiipumtam maq wamungtan na dea wan nam miika, makko ma miili jiimin, atra si wan riiwe ka ahea.

³⁰ Kiimaq ümjaq jaqtsi nü raq ümniika ngarai na tiidea kiiphaü jiila, ümjaq ka achum li riibaiq laq! Wiipumtam maq wamungtan na dea wan nam miika, jaqko ma miili jiimin, atra siwan riiwe ka ahea.”

Armiim Tri Tsiichong

³¹ “Kiimaq armin chongkuq wanto, ‘Jurwa tsang-nyung ka miimtlaq, apaiq raq tsang-nyung ma amiim lak waiqke ra tlo.’

³² Shatmaq ümchaü ngi raq namshiq ma chongpha: Jurwa tsang-nyung ka maiq rai sra mak shatmaq, laihin khü akha ka nyan raüta miimbaiq tlaq, kiimaq apaiq raq miimbaiq jai she, tsang-nyung ka maiq wenye miishe wawan raü la, tsangwe wechüwe raq tsang-nyung ma maiqwe rai sra ngarai kra tiitang wan ma mija. Kiimaq tsangwe wenye we riimin, maiq-nyung rai sra ngarai tang ma mija.”

Kongphiq Kha Tri Tsiichong

³³ “Kiimahali richü we ma akha achongkuq wan arman namshiq raq tai wan lan she, ‘Ümniiraq arot kongphiq naq khakiq. Shatmaq Tati ma jamlai kongphiq wa khawan laü, kriika kewan chang dongdii.’

³⁴ Shatmaq ümchaü ngi raq namshiq ma chong pha: Shiikeawe mang chong laüta min kongphiq naq kha kiq. Ramungtan mang chong laütiimin kiq naq khamkiq. Arka Shiikeawe ngachang ngacho.

³⁵ Kiimahali, mangjong hiq mang chong laütiimin naq tiitumtakiq. Arka apaiq hok tiida chang. Kiimaq Jerusalem mang chong laütiimin naq tiitumtakiq. Arka Ajong Hokham we, Shiikeawe chela.

³⁶ Kiimaq ümkhupo na sham laütiimin naq tiitumtakiq. Ümniiraq ümkhubin loshi se kra dongdii min, anyaq miimin tiija lot maü kiimaq alü miimin tiija lot maü.

³⁷ Arkha maq, namshiq raq jamlai wa misham han kriika, ‘Üm misham ha,’ ngulaq, kiimaq sham maü chang jiika, ‘Naq sham mang,’ ngutli bom lili ronglaq. Kriiwa chan raütiishe bom tlan kriika, Abi Thawe nübok wa dong tlo ngushat.”

Phuklam Tri Tsiichong

³⁸ “Namshiq raq ara chongkuq wantaq arka tai wan lanshe, ‘Mak ka mak maq song ra. Wi ka wi maq song ra.’

³⁹ Shatmaq, ümchaü ngi raq namshiq ma chongpha: Jurwa namshiq ma shuttlaq, kra phuk ka naq lam rongkiq. Ashi ra raq namthea theatsi nü na riisiiq tsat raüla, theako nü kri chiim kuq ronglaq.

⁴⁰ Kiimaq ashi ra raq namsamtong kra apaiq raq lapho kham ma, rung na sheaho kiiphan jiila, nam kheathum kiimin apaiq miili chhutkuq ronglaq.

⁴¹ Kiimaq namtijong nok phenlabi wa weshi raq namshiq ka apaiq thongkhiiq kra mengshi hoke ra nguta shiichut kiiphan jiila, mengnai hokuq ronglaq.

⁴² Kiimaq ashi ra raq namjaq wa phanshi ra jaü kiiphan la, kuq ronglaq. Kiimaq ashi ra raq namjaq wa phanshi ra nam haü jiila kra tiinam kuq wan ronglaq.

Jaqti Ma Mangchan

⁴³ “Namshiq raq ara chongkuq wantaq arka tai lanshe, ‘Maiqmii kongtibi ka lungwii ronglaq. Namjaqti thun ka angeng ronglaq.’

⁴⁴ Shatmaq ümchaü ngi raq namshiq ma chongpha: Namjaqti thun ka lungwii ronglaq. Kiimaq namshiq tiichamchaoti ma achu jaükuq ronglaq.

⁴⁵ Namshiq ka akha siwan han jiila, namshiq ka ramung- tan na siti nam We Shiikeawe setiim dea nguta maiqse raq misap. Ara jamkhano chongtiikai ngukla, apaiq raq maiqhea maiqbi tarü ma rashe tiikü kuq tlo. Kiimaq abi jaqsham klo wanti miimin, kiimaq ahea jaqsham klo wanti miimin, mren mra chhaq maq ra ka tiijun kuqtlo.

⁴⁶ Namshiq raq namshiq lungwiiti thun kli lungwii wan han jiika, Shiikeawe raq namshiq ma poksi ka jamlai tham miishe wa mikuq? Maiqmii nok siphaqti Roman hokham ma phunta hiketi thun kra riimin la, kiikhiisii li dea klotlaq!

⁴⁷ Kiimaq namshiq raq maiqmii nok phungshiti kriili, ‘Khusang rakhang khata,’ nguta tao lili riihan jiika, nanok ahinti thaq na achan jamlai wa sham lan? Thatsang maiqse riimin kiikhiisii li dea riibom nai wan tlo kata!

⁴⁸ Ramungtan na siti nam We Shiikeawe raq namshiq ka jamkho adang na lakshiipo lak tlaq ikha lungwii tlaq, kiikhiisii hali, namshiq riimin Shiikeawe wokhong na siwan lanta apaiq bom ka poshi min tlea man maq tai lili ronglaq!”