Matthew 28 - ASII LAKDAP Bible (BSI)

Jesuq Ka Amaa Wa Dong Wanto

¹ Asii Niitiitsak ranaiq jai maq, chepat ranap chu maq Makdala hiqti nyung Meriq nai Meriq nyungshiti ka makho kra liikai kito.

² Kra liipan na tiihanghiiq miili, henghea langlang hiqjong muto. Kiimaq maklii liipan niili, Tatiwe rase ashi ka ra wa satki saq saükito. Raüta, apaiq ka longsha makho kiina kokkok wato. Raüta longsha kilü longkaü kra linhok tiiküsaq linbaiqto. Raütiishe apaiq ka kra longkaü thaq kiijaq ngasaq ngakito.

³ Apaiq sham ka rachhai ralüp watrang ikha achhai anyii riito. Kiimaq apaiq dü na asam apaiq miirii khu akhea thun kiimin tsakhiiq lüwa ikha, lüdiidii hea achhai anyii riito.

⁴ Kra chhi raüta makho kheti phenlanok ka atiikhai rokshrok, phiip raq tsaito. Kiimaq tsangshiq ka hiq na bum rang ama ikhiishe bumki wito.

⁵ Rase raq jechakre ma chongto, “Namnai ka ahai raamak. Ngi raq asap ha. Namnai ka pumsongkham na tübaiq raüta tsattaq Jesuq kra liikai nguta aki han.

⁶ Apaiq ka arjaq ahü she. Apaiq raq namshiq ma kongkhu ji maq jamkho chongkuqtaq krai mren, Shiikeawe raq apaiq ka ama wa tiidong wanto she. Ana warong ra. Lanta apaiq wechang na liiwa manta. Apaiq ka ajaq ahü.

⁷ Lanta namnai ka ümchaü jaqlo witwit warong laq. Lanta ajaqshisetiim ma, ‘Apaiq ka ama wa dong wanto she. Kiimaq ümchaü apaiq ka namshiq ma sinkhu na Gelili wang na wawanli tlo. Namshiq raq apaiq ka kiijaq mirhum han!’ nguta chongwa rongkiq. Namnai tsan na samhea tiitsang ronglaq, ngi raq jamlai bom wa chong kuq pha ara,” nguta rase raq tsangnai ma chongkuqto.

⁸ Krai mren, tsangnai ka makho maq taülaükhiq li she wawanto. Kiimaq tsangnai ka tsanko miika ahai kiimaq tsanko miika achochi riito. Raüta tsangnai ka ajaqshisetiim ma tsütsa kra chongwa aju lam maq witwit wawanto.

⁹ Shatmaq, tiidong chhaq miili, Jesuq ka tsangnai rai riihumto. Raüta tsangnai ma, “Namnai ma khu asang mirlaq,” nguta bomdamto. Kiimaq tsangnai riimin apaiq phana tiisot saq, raüta ahokpe na sham rang raütiishe apaiq ka shomnoqto.

¹⁰ Kiijiishe, “Namnai ka ahaisong chang jam min ahü,” nguta Jesuq raq tsangnai ma chongkuqto. “Warong laq. Lanta i notiim kiima Gelili wang nü na wali ronglaq. Kiimaq kiijaq tsangshiq ka ngi rai mirhum laq nguta chong kuq wa rongkiq,” nguta Jesuq raq tsangnai ma chongto.

Phenlanok Tsasoq Bomchong

¹¹ Jechakre ka ajaqshisetiim phana wawan jai she, makho kheti phenlanok wiijamti ka chela mong na waraüta, ramwe jongbi ma rase raq makho na jamlai phan jaq wa sham wantaq, kriishe chongkuq wato.

¹² Kra tai raütiishe ramwe jongbi nai welabi thun ka adam na ngato. Raüta lamlu ashi she phoqto. Raüta tsangshiq raq phenlanok kiima tsiiqlap kampho apawiq kuqto.

¹³ Raütiishe tsangshiq ma, “Namshiq ka rawa na akonshon, apaiq jaqshisetiim ka kiraüta apaiq ma kra huk wanto nguta nanok ma chong ronglaq.

¹⁴ Kiimaq ara tsütsa arka ümkhii miiwa Wanghupti we ni niishe saü wa raü jiila, naishiq raq apaiq ma namshiq ka jam shut ahü nguta namshiq lop na michong kuqkai. Krai mren, namshiq haisong chang ka jam min ahü miraq,” nguta phenlanok kiima bomhuk kra tlang chongkuqto.

¹⁵ Krai mren, phenlanok raq kra tsiiqlap kra siqto. Raüta tsangshiq ma jamkhiiwa bomhuk chongkuqtaq, kra phan phan she klo wanto. Kiimaq krai mren Jesuq ma ka apaiq jaqshisetiim raq huk wanto nguta shapshaü bom arka Jehudinok liipan na ümchaü niitaq panchan wan ruqli sitlo.

Jesuq Ka Ajaqshisetiim Phana Kito

¹⁶ Ajaqshisetiim roqshi ri weshi ka Jesuq raq tsangshiq ma jamkho chongkuqtaq, kra phan phan, Gelili wang na hiqlam ashi kiina wawanto.

¹⁷ Kiijaq tsangshiq raq Jesuq ka chhito. Raüta tsangshiq tsan mong niika apaiq ka Jesuq dea sham nguta kamto chhaq ka kam mak dea li jiimin, tsangshiq raq apaiq ka shomnoq wanto.

¹⁸ Kiijiishe, Jesuq ka tsangshiq tiinap niishe tiisotto. Raüta tsangshiq ma akhiishe chongkuqto, “Ramungtan nai mangjong hiq ara lang miitu arang ka ngi ma thumli ake kun she.

¹⁹ Arkha maq, mangjong hiq na maiqphan ümchu wa sitlaq, kiijaq barap se na kirong laq. Lanta tsangshiq ka i jaqshisetiim ma tiija rong laq. Tsangshiq ma Awe mang na, Ase mang na kiimaq Asii Wenyi mang na kham lamkuq rong laq.

²⁰ Kiimaq ngi raq namshiq ma aming ümchuwa kuq kang kra tsangshiq raq lang raüta si miitu wiita shrin kuq rong laq. Kiimaq ngi ka namshiq rai wranaiqshe, ara mangjong hiq ara thum ranaiq na saüli adam na siruq misi kang!”