Matthew 27 - ASII LAKDAP Bible (BSI)

Jesuq Ka Pilat Rung Na Tiichapto

¹ Ranap chu miili she ramwe jongbi nai welabi raq Jesuq ka atsea baiq chang nguta kha ka tanto.

² Tsangshiq raq apaiq ka ajaq ka raü maq kha raüta Roman Wanghupti we Pilat rung na hithoto.

Judas Iskariot Ka Ashak Riito

³ Ngongwebi raq Jesuq ka atsea baiq chang dea nguta mat kha tan wantaq kriishe chhi raüta, matwe Judas raq matkii ka apaiq dü niishe dea wato nguta takto. Kiimaq apaiq ka pinthum tiishu daqto. Kiimaq kampho kamsii roqtsam thop kra lamho raüta, ramwe jongbi nai welabi miishe jang kuqto.

⁴ Apaiq ka tsangshiq phana kiraüta, “Ngi raq chiisan maiqse ashi tiitsea baiq ngarai tang kang!” nguta chongto. Kiijiishe, “Kriika naishiq ma chong wa chang sha? Kriika ümniiraq khata!” nguta tsangshiq raq apaiq bom ka treto.

⁵ Kra tai raütiishe, Judas raq kampho thop ka kiijaq Shomjam na riiwak baiqthü raütiishe, apaiq ka juhoto. Kiimaq kiho raüta, apaiq ka ajaqlii maq tiihai shakto.

⁶ Ramwe jongbi raq kampho thop ka tsunto. Raüta bom ka akha riichongto, “Arka mattsiiq. Shomjam kampho tek na thü miika ashe. Arka nashiq Thungtri na angmak.”

⁷ Tsangshiq liipan na bom ka rilot raütiishe, tsangshiq raq kra kampho maq Hamtak Tiiqti Wak hiq ba kriishe rito. Kriika pongmung maiqse atsai kra ma lapchiim ma nguta thüto.

⁸ Kriikha maq tiina ümchaü niitaq kra hiq ba ka “Tiijai Maq Ari Hiqphu” nguta ngutlo.

⁹ Ara tsangshiq raq hiq phu ri thü wantaq arjiishe shammi we Jeremia raq achongthü bomtsi kriishe kuwato. Apaiq raq akha chongthüto: “Tsangshiq raq kampho kamsii roqtsam jaüto. Kriika Israilnok wiijamti raq apaiq ri ma nguta athü miitang je maq athü wan.

¹⁰ Kra kampho maq ngi ma Tatiwe raq chongtaq kra phan phan tsangshiq raq hamtak tiiqti wak ba phushi rito.”

Pilat Raq Jesuq Kha Photo

¹¹ Jesuq ka Roman Wanghupti we rung na tiichapto. Pilat raq Jesuq ma, “Ümniika Jehudinok Hokham we dea sha?” nguta waito. Kiijiishe, “Ümniiraq ngutlaü kata,” nguta Jesuq raq apaiq bom ka treto.

¹² Shatmaq Jesuq raq Ramwe jongbi nai welabi raq apaiq dü na kha pahea asi nguta ümchuwa nyantaq kriithun bom ka poshi min tre mak riito.

¹³ Kiijiishe Pilat raq apaiq ma waito, “Tsangshiq raq ümniima abi ati kha pahea nyan tlo. Arthun kha nyan tlaq arka ümniiraq tai maü sha?”

¹⁴ Shatmaq Jesuq raq tsangshiq bom ka poshi min tre mak riito. Kra chhi raüta Wanghupti we ka kai awang riito.

Pilat Raq Jesuq Tsea Baiq Kha Tanto

¹⁵ Roman Wanghupti we ka Tiichhii Wan Poi akhing tek na phaqtek mong na siti shumwi phong kiiwa mungmaiqse raq ümriiti wa tiidong kuq laq nguta jaü tlaq, kriiti ka tiidongke jaqsham ka angam acham she.

¹⁶ Kra akhing na, khübi khati tang wanti we, apaiq mang chong tsa ka barap binrii na aphoi wan wishe shumwi we, Jesuq Barabas ngutlaq kriika phaqtek mong na asi riito.

¹⁷ Krai mren, Pilat raq, “Riita ara shumwi wenai arwa, namshiq ma ümriiti wa mitiidong kuq ha? Jesuq Barabas arsha mitiidong kuq ha, sha namshiq raq Messia nguta tsaki tlan we, Jesuq kriiwa mitiidongkuq ha?” nguta mungmaiqse thungtlaq kriima bom ka wai nongto.

¹⁸ Pilat raq ara bom waiwantaq arka, Jehudinok welabi raq, tsangshiq makshu tsi ninlot mak kha maq, Jesuq ka lap raüta apaiq rung na shokto nguta asap. Kriikha maq, apaiq raq tsangshiq ma ara bomtsi waito.

¹⁹ Pilat ka Rung na khapho ngashat liipan na, tsang-nyung raq apaiq ma bom poshi, “Apaiq ka chiisan maiqse. Jam shutmak we. Ümniika kiq naq shut kiq liijo. Apaiq ara tingkhu na ngi ümwa rawa minru rawa ma maq pinthum chamchao kang,” nguta bom ka tiichong kito.

²⁰ Kra liipan bala, ramwe jongbi nai welabi raq mungmaiqse ma Pilat jaq wa Barabas ka tiidongke ra. Kiimaq Jesuq ka atsea riibaiq ra, nguta jaü ronglaq nguta, raikao ka atat wishe riito.

²¹ Shatmaq Pilat raq mungmaiqse ma, “Riita ara tsangnai wenai arwa, namshiq ma ümriiti wa mitiidong ha?” nguta waito. Kiijiishe, “Barabas ka tiidong kuq laq!” nguta tsangshiq raq treto.

²² “Riita namshiq raq Messia nguta tsaki tlan we, Jesuq kra ngi raq jamkhiishe wa mirha?” nguta Pilat raq tsangshiq ma wainongto. “Apaiq ka tübaiq rong laq!” nguta tsangshiq tarü raq treto.

²³ Shatmaq Pilat raq hali wainongto, “Riita apaiq raq jamlai kha wa tangta?” Kiijiishe mungmaiqse ka tsangshiq rotpo tiipanki nam nam miishe, “Apaiq ka tübaiq tlo rong laq!” nguta gitrang wanto.

²⁴ Kiijiishe Pilat raq mungmaiqse tsankhiq sru wan kra chhito. Kiimaq tsangshiq ka tri na ri wan damti ka riimak nguta sapto. Athi makjaq kharong khoti miraq ngutiishe, apaiq raq takto. Krai mren she, apaiq khum tiihe wan mungmaiqse makki na ajaq ka khampin na hewan lam maq, “Arwe miisaq tan tlan ara mat kha ka ngi raq sap mang! Arka namshiq mat kha!” ngutiishe apaiq raq kha ka tanto.

²⁵ Kiijiishe mungmaiqse raq, “Apaiq tsaitlaq mat kha ka naishiq khuthaq na nai naisaü naisetiim khuthaq na mirlaq!” nguta treto.

²⁶ Kra raütiishe, Pilat raq tsangshiq ma Barabas ka tiidong kuqto. Kiimaq Jesuq ka chunpo-nyam chongwai maq bunlak tiitsatto. Raütiishe pumsongkham na tübaiq kai miitu phenlanok jaq niishe kiinong kuq baiqto.

Roman Phenlanok Raq Jesuq Slailiito

²⁷ Kiijiishe Pilat sengi phenlanok raq, Jesuq ka Wanghupti we jam mong na hit wanto. Kiimaq phenlanok sekson shi ka apaiq tro na riitam chapto.

²⁸ Raüta, tsangshiq raq adü wa khea ka panthitthit chhut baiqto. Raüta, hokham raq samchang phan kheashii samtong jong kriishe apaiq ma tiisam kuqto.

²⁹ Raütiishe, tsangshiq raq, kiida raü ikha, shuk raü ka wiishuktam maq lam raüta, hokham khuphok nguta ashi haito. Raüta, kra Jesuq khu na hong raüta thang saqsaq tiiphok kuqto. Kiimahali, ajaq jaqtsi nü kiijaq, hokham chongwaikii la na nguta, nyeakii ashi kra tiikhon kuqto. Raütiishe, tsangshiq ka apaiq khaki na lakü maq bumhihi raütiishe, “Jehudinok Hokham we le, rilung alu maq silaq!” nguta tsangshummiitsi ma slaislii haihii noqsiqto.

³⁰ Kra raütiishe hali, tsangshiq raq apaiq theaphi na, tho ariiq maq phong tsoktsok she thosiqto. Raüta, ajaq wa nyeakii kra nyea raütiishe akhupo kiijaq hot-hot she hali bukto.

³¹ Tsangshiq raq apaiq ka atinkhan, haihii lot raütiishe, adü wa kheashii samtong ka achhut riibaiqto. Raütiishe hali, apaiq khea kra tiisam kuq nongto. Raütiishe, tsangshiq raq apaiq ka pumsongkham na tübaiq kai sheahoto.

Jesuq Ka Pumsongkham Na Tübaiqto

³² Tsangshiq ka chela mong maq dongho ri li, Sairini chelati maiq weshi Simon nguta kra rai she riihumto. Raüta phenlanok raq apaiq ma Jesuq tübaiq chang pumsongkham tipi kriishe ningkun miishe tiipi hoto.

³³ Tsangshiq ka Golgotha nguta hiq bashi asi, kra liichum ka, “Maiq khurii ba,” nguta kiijiishe saükito.

³⁴ Kiijaq tsangshiq raq Jesuq ma che ka akhap wiq lai phan gall ngutlaq kriimaq shot raüta kuqto. Shatmaq Jesuq raq kra che ka ate raüta nyang mak dea.

³⁵ Kra raütiishe, tsangshiq raq apaiq ka pumsongkham niishe tübaiqto. Kiimaq kra lot raütiishe, tsangshiq liipan na lang lii raüta, apaiq khea kriishe riiphea phaqto.

³⁶ Kra lot jai she, tsangshiq ka kiijaq tii raüta apaiq ka kheto.

³⁷ Tsangshiq raq apaiq khu thaq kiijaq, apaiq tsaitaq kha matkii bomtsi kra, “Ahata Jesuq, Jehudinok Hokham we,” nguta waiq thüto.

³⁸ Kra lot raütiishe, tsangshiq raq thiimeaq wenai kiimin Jesuq rai, apaiq ma jaqtsi na ashi kiimaq jaq pha nü na ashi tübaiqto.

³⁹ Kiimaq, maiq kra lam maq lea wanti raq, Jesuq ka chhi raüta, tsangshiq raq apaiq ka thophi riiqphi, tokbai laqbaiq raüta slailiisiqto.

⁴⁰ “Ümniika Shomjam tiithen laüta ranaiq tsam liipan niili mihaiha ngoti we! Ümniika Shiikeawe Se dea jiika ümchaü min ümkhum ka tiichhii liina! Laüta pumsongkham kiiwa satkikiq!” nguta slai lii siqto.

⁴¹ Kra niq riri sii hali, ramwe jongbi nai Thungtri shrinketibi kiimaq welabi riimin apaiq ka akha slailiisiqto:

⁴² “Apaiq raq nanok ka chhii kuqto. Shatmaq maiqmii khum ka tiichhii phaq tsii mak! Apaiq ka ngohea shaqshaq Israilnok Hokham we dea jiika, apaiq ka ümchaü pumsongkham kiiwa satkai chang! Kra ngu raü jiitiq nashiq raq apaiq ka Messia dea nguta mikam rong i!

⁴³ Apaiq raq Shiikeawe ma kamtlo. Kiimaq apaiq ka Shiikeawe Se nguta tiichong tlo. Ahea kata. Ikhiijiika, ümchaü Shiikeawe raq apaiq ka mitiichhii kuq sha, tiichhii kuq mak wa riijiiq, kra lii rong i shaq!” nguta slailiisiqto.

⁴⁴ Kiimaq thiimeaq wenai apaiq rai tübaiq damtaq kra riimin apaiq ka kiikhiisii hali slailiito.

Jesuq Langpit

⁴⁵ Ranaiq shethung shekham akhing na, mangjong tlotli na nari tsam na saüli ranyaq kito.

⁴⁶ Raji nari tsam tin khan niishe Jesuq ka tiihong raüta, “Eli, Eli lema sabakthani?” nguta gito. Kra liichum ka, “I Shiikeawe lei, i Shiikeawe lei, ümniiraq ngi ka jam nguto tiishaü baiq laü?” nguta ngo riito.

⁴⁷ Kiijaq chapti maiq wiijamti raq apaiq siitaq kra tai raüta, “Apaiq raq shammi we Elija hea tlo!” nguta riibomto.

⁴⁸ Kiimaq phenlanok phong wa weshi ka tlat chhat ju raüta, kham shup chang naitan phu ka ahaiwiq phan chekhap kiijaq tsamto. Raüta pekü na tsom raüta Jesuq ma tiinyang la nguta manto.

⁴⁹ Shatmaq maiq wiijamti riika, “Lü rong i shaq. Elija ka apaiq chhii kai kitlaq sha kimak wa!” nguta nguto.

⁵⁰ Kiimaq Jesuq raq thongshi ri hali tiihong raüta ginongto, raüta alang ka tiipitto.

⁵¹ Liirong laq, kiijiishe Shomjam mong na achan kheathum kaü ka, ra nü maq riita hiq na saüli khonai ma tiikholiiq tiichai kito. Kiimaq hiqjong muwa trang liishe riito. Kiimaq longkaü thun kiimin kholam kholiiq wiita tiibun baiqto.

⁵² Kiimaq maiq makho thun ka tlin miihok she tlin kito. Kiimaq Shiikeawe raq atsea arwan asengi maiqse thun kriika, atsai arki makho mong wa atra she tiidong wan nongto.

⁵³ Kiimaq tsangshiq ka makho mong wa dong wan raüta, ahin niishe wawanto. Kra jai maq, Jesuq ka ama wa dong wan jai she, tsangshiq ka Asii Chela Jerusalem kiina wawanto. Kiijaq maiq pahea raq tsangshiq ka chhito.

⁵⁴ Kiijaq Jesuq kheti phenlabi siihiipwe nai asengi phenlabi raq, kra hiqjong muraitaq nai phanrap awang chang mra pin wantaq thun kra chhi raütiishe, tsangshiq ka pinthum phiipraq tsaito. Raüta, “Apaiq arka Shiikeawe Se dea riito!” nguta tsangshiq liipan na riibomto.

⁵⁵ Kiijaq maiq jechakre min apawiq asi riito. Tsangshiq ka Jesuq rai Gelili wang miiphü kongshi akidam riito. Tsangshiq ka apaiq shiililii jaqsham na khrumtibi riito. Tsangshiq ka alu maq chap raüta kra mra jonghea pinjin wantaq thun kra wiita shri ra liito.

⁵⁶ Tsangshiq liipan niika Makdalen hiqti nyung Meriq, kiimaq Jakob nai Joseph ma anyung Meriq, kiimaq Jebedi tanyung kri, tsangtsam nyungtsam asi riito.

Jesuq Maalap

⁵⁷ Rajiko niishe Arimithia chelati maiq chiithe we ashi saükito. Apaiq mang ka Joseph. Apaiq ka min Jesuq jaqshise riito.

⁵⁸ Apaiq ka Pilat phana wa raüta, Jesuq ma ka kuq laq nguta jaü wato. Pilat raq Jesuq ma ka Joseph ma lamke miitu aming kuqto.

⁵⁹ Joseph raq Jesuq ma ka lamhoto. Raüta raihi-nairai kheathum anye maq jobto.

⁶⁰ Raüta apaiq raq amakho miitu nguta longkhok anye ashi awatthü kra mong kiijaq Jesuq ma ka saiqsam thüto. Raüta apaiq raq longkaü ajong wiq ashi maq longsha kilü kra shaq thüto. Raüta apaiq ka jam niishe wawanto.

⁶¹ Makdala hiqti nyung Meriq nai Meriq nyungshiti ka kra makho maq khare nü na nga raqraq li chhithüto.

Makho Kheti Phenlabi Thüto

⁶² Kiimaq napjai ranaiq ka Niitiitsak ranaiq riito. Kra ranaiq ramwe jongbi nai Phorisinok ka Pilat phana riihum wato.

⁶³ Raüta apaiq ma akha chongto, “Mungtu we le, naishiq tsan na ümchaü man tiitsangshat. Kra arot we kaü kriiraq, apaiq ka atra sicho ji na, ‘Ngi ka ranaiq tsam jai maq ama wa atiidong mirwan nong’ nguta chongto.

⁶⁴ Riita ümchaü min ajong we le, amakho ka ranaiq tsam na saüli, phenlabi ma samheawiq maq tep tiikhe wan miitu aming kuqlaq. Kra riimaü haü la, apaiq jaqshisetiim ka makho kiijaq kiraüta, ama ka ahuk mirwan. Raüta apaiq ka ama wa dong wanto she lii nguta nokwe ma arot akiq shapshaü she mitiipa wan. Riita ara atiisup wan shap shaü arshe tiidong pan wan raü jiika, apha lak wa shapshaü pan wantaq kra nam miimin, abi pinthum she miraq.”

⁶⁵ “Namshiq raq thi na; phenlabi ka kongshi sheaho lanta, namshiq raq makho ka jamkhii thep tiikhe wan wa ro tlan, kiikha tiikhe wan rong liina,” nguta Pilat raq tsangshiq bom ka treto.

⁶⁶ Krai mren she, tsangshiq ka kiraüta makho longsha kilü ka thep tiisan shaqto. Raüta kilü thaq na tsangshiq raq sil maq lo raüta thüto. Raüta phenlanok ma tiikhe thüto.