Matthew 26 - ASII LAKDAP Bible (BSI)

Jesuq Tsea Mat Tanto

¹ Jesuq raq arthun ara chongkuq lot raütiishe apaiq raq ajaqshisetiim ma chongto,

² “Namshiq raq asap han ranaiqnai jai maq Tiichhii Wan Poi miraq. Kiimaq Maiq Se ka pumsongkham na tü baiq miitu lap raüta maiqjaq khon mong niishe mikuq baiq.”

³ Kra akhing na ramwe jongbi nai welabi thun ka Ramwe Ajong Pinthum we Kaiaphas jam na ngongthun ngato.

⁴ Raüta tsangshiq raq Jesuq ka ahukse maq lap raüta tsea baiq chang nguta kiq rito.

⁵ Shatmaq, tsangshiq liipan na, “Nashiq raq apaiq ka Poi bala lap chang ka riimak. Mungmaiqse liipan na makjaq kharong khoti miraq,” nguta bom ka riichongto.

Bethani Maq Jesuq Han Na Homseng Nyatto

⁶ Kra bala liipan na Jesuq ka Bethani hiq shong na kihoto. Apaiq ka Simon, thabi tsi raq chamchao rai tiiwe jam na riito.

⁷ Kiijaq Jesuq ka dungsea anga riito. Kra liipan na maiqnyung ashi ka longnin phan alabastar ngutlaq kriimaq alo tsabum na athü tsinhea ahomwiq phan homseng kra thii raüta, Jesuq khupo na jutkuqto.

⁸ Shatmaq, ajaqshisetiim raq kra chhi raüta akhiq lam maq tsangshiq liipan na akha tiibotto, “Ara ahomwiq phan homseng arka akha jaram tiiwii wa nya?

⁹ Arka kampho pahea pha sha raüta miitsan maiqse khrum kewan chang shatmaq!”

¹⁰ Kiijiishe, Jesuq raq tsangshiq botnyan kra tai raüta treto, “Namtsam raq arnyung jaqsham arka jaram wa tiibanbi tlan? Apaiq raq ngi ma pinthum athuk atsom jaqsham ashi shamkuq wantlo kra chhi man sha.

¹¹ Miitsan maiqse ka namshiq rai siruq misi. Shatmaq namshiq raq ngi shiili lii miitu akhing hum ruq ka hum man mirhan.

¹² Arnyung raq ara homseng maq i khum na nyat kuq taq arka i ma arka alap ma nguta tiije thütlo.

¹³ Ngi raq chongtiikang arka tengteng. Maiqse raq ara Tsütsa Ahea arka mangjong hiq na ümriibano trahokuq wantlaq kiijaq, ümchaü ranaiq arnyung raq ngi miitu jaqsham ahea shamkuqtaq armin, apaiq mang ka laq mak maq michong kuq dam.”

Judas Raq Jesuq Shaphaqto

¹⁴ Kra jai maq, ajaqshisetiim roq- shi ri wenai phong wa weshi, Judas Iskariot ngutlaq kriiwe ka ramwe jongbi phana kito.

¹⁵ Raüta apaiq raq tsangshiq ma akha waito, “Ngi raq Jesuq ka namshiq ma lapkuq hajaq, namshiq raq ngi ma jamlai wa mikuq han?” Kra tai raüta tsangshiq raq kampho kamsii roqtsam kra wea raüta apaiq ma ajaq na tiisham kuqto.

¹⁶ Kra akhing miiphat she, Judas raq Jesuq ka tsangshiq ma lapke miitu akhing ahea kra kheshat she riito.

Ajaqshisetiim Rai Tiichhii Wan Poi Dung Siqto

¹⁷ Pi Maq Shohü Winsii Phaq Poi pha wan ranaiq na ajaqshisetiim ka Jesuq phana waraüta, “Ümniima Tiichhii Wan Poi dung ka ümbano michung hai?” nguta apaiq ma waito.

¹⁸ Kiijiishe Jesuq raq tsangshiq ka akha thaüto, “Namshiq ka Jerusalem na kironglaq. Lanta kiijaq maiq weshi asi miraq. Apaiq ma, ‘Shrinketi we nga apaiq ma rahiq ka hong wato she ngu wa; apaiq raq ajaqshisetiim rai Tiichhii Wan Poi dung ka ümjam na klo raüta phaq sia chang miraq,’” nguta ümniima tiichong kito nguta chongki rongkiq.

¹⁹ Krai mren, Jesuq raq jamkho chongkuqtaq kra phan phan, ajaqshisetiim raq Tiichhii Wan Poi dung kra tiijehoto.

²⁰ Kra raji niishe Jesuq ka ajaqshisetiim roqshi ri wenai rai dungsea adam na ngato.

²¹ Dungsea lam maq Jesuq raq akha tiithaito, “Ngi raq chongtiikang arka tengteng. Namtsam phong wa weshi raq ngi ka maiq ma mishaphaq han.”

²² Kra tai raüta ajaqshisetiim ka pinthum tsan bito. Kiimaq tsangshiq raq weshi shi maq, “Tatiwe, ümniiraq ngi nang ngo ka riimak ahiq na?” nguta apaiq ma bom ka waito.

²³ Kiijiishe Jesuq raq treto, “Ümriiti riiwa apaiq winsii phu ka ngamtai winpin na ngi rai adam tsam raüta phaq tlaq, kriiwe raq ngi ka mishaphaq.

²⁴ Maiq Se riiwe kla Asii lakdap na apaiq ka jamkha tsai chang nguto waiq wantaq kra phan phan mitsai. Shatmaq Maiq Se shaphaq wanti we ma pinthum phiiptsi chang jonghea asi! Apaiq ka ara mangjong hiq arjaq rawii chhiki mak dongdii ngu raü jiiwe khoti ahea riichang!”

²⁵ Kiijiishe matwe Judas Iskariot raq, “Shrinketi we ümniiraq ara ngi nang ngo ka riimak ahiq na?” nguta Jesuq ma waito. Kiijiishe, “Ümniiraq ümnü maq ngu tlaü,” nguta Jesuq raq apaiq bom ka treto.

Tatiwe Phaqsea

²⁶ Tsangshiq ka phaqsea rea na, Jesuq raq winsii phushi ajaq na tsunto. Raüta kechutum achu jaüto. Raüta kra tiiphanto. Kiimaq kra ajaqshisetiim ma kuqto, “Ara jaü ronglaq, lanta phaq ronglaq,” nguta apaiq raq nguto. “Arka i ngamphu.”

²⁷ Kiimahali apaiq raq kok ashi ka doto. Raüta Shiikeawe ma kechutum. Kiimaq kok ka tsangshiq ma ake lam maq, “Ara nyang ronglaq, namshiq tarü raq nyang ronglaq,” nguta nguto.

²⁸ “Arka i tiijai, Shiikeawe Tongshong kra nei chang. Maiqse pahea ngarai thun diike miitu araübaiq.

²⁹ Ngi chongpha, i We Mungtan maq spiqtai anye kra namshiq rai minyang nongha shaq wiiwii, ngi raq ara spiqtai arka ümtiikiimin nyangnong mang she,”

³⁰ Raütiishe tsangshiq raq miikhon ashi shito. Raüta Olip Pero Hiqlam niishe wawanto.

Petar Raq Jesuq Tiishaü Tiithaito

³¹ Tsangshiq ka Olip Pero Hiqlam kiiniishe saüwa raüta, Jesuq raq tsangshiq ma chongto, “Athi rawa li namshiq tarü raq ngi ka tiishaü baiqthü lanta pongpin riipin mipin han. Ara jamkhano chongtiikang ngukla, Asii bomtsi na, ‘Shiikeawe raq sku rümti we ka mitsat. Kiimaq skuse kong ka wiita mitiipin baiq,’ nguta chongtlo.

³² Shatmaq ngi ka ama wa dong wan jai she, namshiq ma sinkhu na Gelili wang na miwa wanli kang.”

³³ Shatmaq kra tai raüta Petar raq, “Nanok tarü raq ümniika tiishaü baiq raü jiimin, ngi raq ümniika ümtiikaq jiimin tiishaü baiq mang!” nguta Jesuq bom ka treto.

³⁴ Kiijiishe, Jesuq raq, “Ngi raq chongtiikang arka tengteng. Athi rawa wu miwa shaq liipan niili, ümniiraq ngi ka juwa sapmang nguta, jangtsam mitiishaü haü,” nguta Petar ma chongto.

³⁵ Kiijaq Petar raq hali, “Ngi ka ümniirai adam na tsai chang li jiimin, ngi raq ümniika tiishaü mang!” nguta tre nongto. Kiimaq ajaqshisetiim ahinti riimin kiikhiisii hali tre damto.

Gethsemane Na Jesuq Achu Jaü

³⁶ Kra miishe, Jesuq ka ajaqshisetiim rai Gethsemane nguta sonruk ashi kiijiishe wawanto. Kiimaq apaiq raq tsangshiq ma, “Namshiq ka arjaq nga ronglaq. Ngi ka i niikiijaq achu jaü wa pha,” nguta chongto.

³⁷ Kiimaq apaiq rai Petar nai Jebedi se nai kra shea raüta wawanto. Ajü amii holai raq pat raüta, atsan among po ka bunki nam nam ikhiishe tsito.

³⁸ Kiimaq apaiq raq tsangtsam ma, “I tsan na chapa tsi arka heng biti hengtlo. Ngi ara tsaija chhunja she pat wanto. Namtsam ka arjaq nga lanta ngi rai achu jaü lam maq kheshat ngali rong laq,” nguta chongkuqto.

³⁹ Kra ngu raütiishe, apaiq ka phanshi kongkhu linlin na wa raüta, hiq na bumtlii maq akha achu jaüto, “I We le, mai tlaq jiila ara chamchao kok arka i khum arwa alam riibaiq laq! Shatmaq arka ngi raq tiima tiikang kra thaq na seng raüta riimak. Shatmaq ümniiraq jamkho tiima tlaü kra thaq na seng laüta tiihong laq.”

⁴⁰ Kra achu jaü raüta, apaiq ka ajaqshisetiim wetsam phana hali jangwa nongto. Shatmaq apaiq raq tsangtsam ka akon makaiq chhiwato. Kriikha maq apaiq raq Petar nangnga, “Namtsam ka ngi rai nari shi se dongdii min achu jaü lam maq khelot man nya?” nguta bomto.

⁴¹ “Namtsam ka honkamshat nai achu jaüshat maq kherong liijo. Maitai ma tiitang jiiq. Tsan mong niika achu jaüro. Shatmaq ngarai han-ngam riika tang mak.”

⁴² Kiimahali Jesuq ka thongshi ri hali kiho nongto. Raüta akha achu jaüto, “I We le, ara chamchao kok arka i khum wa lambaiq wan maimak, ngi raq nyang chang dongdii she rakitaq jiika, ümniiraq jamkho tiima tlaü, kra thaq na seng laütli tiihong laq.”

⁴³ Kiimahali apaiq ka achu jaülot nong raüta, ajaqshisetiim wetsam phana hali jang wan nongto. Shatmaq tsangtsam ka akon makaiq hali chhiwa nongto. Tsangtsam ka lam raq hali bok wan nongto.

⁴⁴ Kriikha miishe, Jesuq ka thongshi ri hali tsangtsam ka baiqthü nong raüta, kongkhu lak na kiikha hali tiithongtsam she achu jaüki nongto.

⁴⁵ Kiimaq apaiq ka achu jaülot nong raütiishe hali, ajaqshisetiim phana jangwa nongto. Kiimaq tsangtsam ka akha sonto, “Namtsam ka ümchaü niitaq akonsea nai niitiitsak seali riishatshat nya? Liirong laq! Ümchaü Maiq Se ka ngarai maiqse jaqkhon mong na kebaiq wan ningthoi akhing she saü wato.

⁴⁶ Tiido rong. Khum rongphiishe. Liimanta! Ngi shaphaqti we ka arjaq saü wato she!”

Jesuq Lapto

⁴⁷ Jesuq ka abom miiqshmiiq liipan niili, ajaqshisetiim roqshi ri wenai phong wa Judas ka saü wato. Apaiq rai maiq ka kongnyung kaüshi, tsangshiq ka nepja hi wiraq kiimaq klata piraq chhaq maq saü wato. Tsangshiq ka ramwe jongbi nai welabi raq atiiwa.

⁴⁸ Matwe raq tsangshiq ma, “Ngi raq juwe theaphi niiwa lungwii riimei tiichhi mishup kang, kriiwe ka namshiq raq rit tlan we kra ngushat. Apaiq ka lap lanta khaho ronglaq!” nguta bomhuk ka tlü na achongkewi she riito.

⁴⁹ Krai mren, Judas ka lealea Jesuq phana wato. Raüta, “Shrinketi we le, khu asang maq silaq,” nguta bomto. Kiimaq Jesuq theaphi na shupto.

⁵⁰ Kiijiishe, Jesuq raq treto, “Phuno we ümniiraq jamlai phan klo chang wa kra jaqlo klo tlo laq!” Kiijiishe tsangshiq raq Jesuq ka ranghoto. Kiimaq raü maq tep khato.

⁵¹ Kiijiishe, Jesuq jaqshisetiim phong wa weshi raq anepja kra chathit raüta, Ramwe Ajong Pinthum we dise nilok kra tiidearok witse baiqto.

⁵² Kra chhi raüta, Jesuq raq apaiq ka akha siato, “Üm jasai ka ahi mong na rei tlo laq. Jurwa jasai sham tlaq, kriiti ka jasai maq mitsai.

⁵³ Ümniiraq sapmaü sha, ngi raq ra tlo nguta i We jaq wa jaüha jaq, apaiq raq ngi ma maklii liipan niili, rasetiim ahing amun mitiikilot?

⁵⁴ Shatmaq Shiikeawe raq ngi tiichhii wan miitu rasetiim she tiiki raüka, Asii bomtsi na akha hong wa chang dongdii nguta achong thü bomtsi ka jamkhii she wa mishku wan?”

⁵⁵ Kra bomlot raütiishe, Jesuq raq maiqphong kiima nguto, “Namshiq ka ngi lap wa nguta wiija wiipiq kiimaq klata pi raq maq thiimeaq daku we lapwa ikha warai man sha ra rai ta? Ngi ka wranaiqshe Shomjam na nga lata namshiq ma tra hokuq wan kang ihata. Riita namshiq raq ngi ka kiiwa jamto lap man riilan.

⁵⁶ Shatmaq ümchaü arthun hongtha rai wantaq arka, Asii bomtsi na shammibi raq ngi miitu awaiq thü bomtsi kra riikhaqli tiikupi miitu she hongtha wanto.” Kiijiishe ajaqshisetiim raq Jesuq ka miimbaiq thü raütiishe, pongpin riipin she pintrangto.

Jesuq Jehudinok Rung Jong Na Tiichapto

⁵⁷ Jesuq lap wati raq Jesuq ka Ramwe Ajong Pinthum we Kaiaphas jam na sheahoto. Kiijaq Thungtri shrinketibi nai welabi thun ka adam na thung raüta kheshat she riito.

⁵⁸ Petar riika jailu maq trü phan hoto. Raüta Ramwe Ajong Pinthum we jam rukmong kiina saüli wangmong na nyap wan damto. Apaiq ka jam rukmong kiina wawan dam raüta, phenlanok rai ngawa damto. Raüta tsangshiq raq apaiq ka jamkhiishe wa riijiiq, si liila nguta ngato.

⁵⁹ Ramwe jongbi nai Jehudinok Rung wa ajong alabi raq Jesuq ka tsea baiq miitu, Jesuq ma arot akiq kha nyanti arot hakhi kewanti maiq ritto.

⁶⁰ Krai mren, maiq pahea raq Jesuq tiishut miitu arot bom pahea nyanto. Shatmaq Jesuq tiishut lam ka hum mak dea riito. Atiisup niishe hakhi wenai she chapto.

⁶¹ Raüta tsangnai raq, “Arwe kaü ariiraq Shiikeawe Shomjam ka tiithen baiq raüta, ranaiqtsam jai maq hali mihailot nong ha nguta chongto,” nguta kha ka nyanto.

⁶² Kiijiishe Ramwe Ajong Pinthum we ka chap hiiq raütiishe, Jesuq ma waito, “Riita ara hakhi wenai raq ümdü na kha nyan tlaq arka tai tlaü khata. Riita ümkiq khii chang ka asi sha?”

⁶³ Shatmaq Jesuq ka kaiqshakli riito. Kiijiishe Ramwe Ajong Pinthum we raq jangshi ri hali, tumkhamkok ka toraütiishe, Jesuq ma hali akha ngutiishe bom ka tiitsa wai nongto, “Ümchaü ngi raq ümniima atra Shiikeawe mang na tumkham kok tolata bom waipha: riikhaqli chong laq. Ümniika Messia dea sha? Ümniika Shiikeawe Se dea sha?”

⁶⁴ Kiijiishe Jesuq raq, “Ümniiraq ümnü maq ngu tlaü kata. Shatmaq ngi raq chongtiikang arka tengteng: Ümchaü armiiphat she namshiq raq Maiq Se ka Ningkun Ajong Pinthumwe ma jaqtsi nü na nga raü michhi han. Kiimaq apaiq ka phumkhu thaq nga raüta mangjong hiq na satkai akai rai she michhi han!”

⁶⁵ Kra tai raütiishe Ramwe Ajong Pinthum we raq adü na asam samtong jong kaü kra chaihea raüta nguto, “Riiqkhiq pinthum kiqshut! Nashiq ma hakhi ahin rit min ra mak she! Singmung le, namshiq raq maiqmii ni maq apaiq ka Shiikeawe rai mren arang hoti we nguta riiqkhiq apii pinthum kiqshut bomtaq kra tai lan she kata!

⁶⁶ Namshiq raq kha ka jamkhii she wa mitan han?” Kiijiishe tsangshiq mung welabi raq, “Apaiq ka shutto dea. Kriikha maq apaiq ka atsai chang she,” nguta bom ka treto.

⁶⁷ Kiijiishe maiq wiijamti raq Jesuq ka atheaphi na tho ariiq maq phong tsoktsok she thosiq wanto. Kiimaq wiijamti riika apaiq ka hot-hot she buk hoto. Kiimaq maiq wiijamti riika, jaq phi maq apaiq ka siiqsiiq she tsat hoto.

⁶⁸ Raüta, “Ümniika Messia ngori nya. Ümniika shammi. Ümchaü ümdü na jaqmiiqti ka juwa, kra naishiq ma riisham bom maq chongkuq liina!” ngutiishe slailiisiq wanto.

Petar Raq Jesuq Tiishaüto

⁶⁹ Kra liipan bala Petar ka jamruk mong na rinkea na nga raü riito. Kiijaq Ramwe Ajong Pinthum we jaqshisetiim phong wa jechakse ashi ka apaiq tho na kito. Raüta apaiq nangnga, “Ümniimin la Gelili wangti Jesuq sengi sii kata,” nguta bom ka nyanto.

⁷⁰ Shatmaq, “Ümniiraq jamlai ngo wa ngutlaü ngi raq sap mang,” nguta apaiq ka tsangshiq tarü man niishe tiidam kito.

⁷¹ Kiimaq apaiq ka kra ngu thü raüta, jamtro ruk kilam chong tho kiiniishe kihoto. Kiijaq hali jaqshise nyungshi raq apaiq ka chhito. Raüta kiijaq nanok maiq chaptlaq kriiti ma, “Notsam arwe armin la, Najareth hiqti Jesuq rai siti sii ahata,” nguta chongto.

⁷² Kiijiishe, Petar raq thongshi ri hali, “Ngi raq Shiikeawe man na atiitum lata chongtiikang, ngi raq apaiq ka juwa akhiisiimin sap mang dongdii!” nguta hali tiidam kinongto.

⁷³ Kiimaq heashise sijai na hali, kiijaq maiq thun tiibo tlaq kra phong wa wiijamti ka Petar phana kiraüta, “Ümniika ümkhriita jiimin apaiq sengi phong wa. Ümkiq hang ka Gelili wangti kiq hang. Ümkiq hang miishe tiisap kitlo!” ngutiishe bom ka tiitsa hoto.

⁷⁴ Kiijiishe Petar raq, “Shiikeawe raq asap! Ngi raq tengteng chongtiikang! Ngi raq apaiq ka juwa asap man sap mang!” ngutiishe khiilataq tiidamkito. Apaiq raq kra bomtre tlaq liipan niili she, wuwa riigoli riito.

⁷⁵ Kiimaq kiijiishe Petar tsan mong na, “Wu miwa shaq liipan niili ümniiraq ngi ka juwa sap mang nguta, jangtsam mitiishaü baiq haü,” nguta Jesuq raq apaiq ma bom achongkuq bomtsi kriishe apaiq tsan mong na tiidosaq riito. Kriikha maq, apaiq ka jam sonruk mong wa kinphai na juho raütiishe, atsan amongpo ka tiipanki nam nam she shetang hoqsiqto.