Matthew 25 - ASII LAKDAP Bible (BSI)

Junrii Nyungroqshi Manphan

¹ “Kra akhing na Ramungtan ngutlaq ka akha miraq. Kriika ara shiiton manphan chong tiikai akha miraq: Akhing ashi na junrii nyungroqshi ka maiqmii lemtem doraq maq rohunti we kra humkai nguta kito.

² Nyung biingi ka maiqkhü. Kiimaq nyung biingi ka maiqshaq.

³ Tsiihü nyungtiim riika tsangshiq lemtem ka lamhoto. Shatmaq wanii kham achan ka lamho mak dea miili kihoto.

⁴ Shatmaq maiqshaq nyungtiim riika tsangshiq lemtem krai hamlii tsabum setiim na wanii kham olip tsai ka achan amachhaq lamho raüta kihoto.

⁵ Junlamti we ka alo saü mak tingrai wanto. Kriikha maq, junrii nyungtiim thun ka akontsi riishe tiinguk miiliiq she kon wan wito.”

⁶ “Rawa wathung wakham niishe- tiq, ‘Junlamti we saü wantlo she lii! Kirong ra humki rongkiq she!’ nguta maiq raq riimto.

⁷ Kra tairaüta, junrii nyungroqshi ka akon wa tiidorang riito. Raüta maiqmii lemtem ka tiiheato. Raüta wanii ka atiijong riito.

⁸ Kiijiishe tsiihü nyung biingi raq maiqshaq nyung biingi jaq wa, ‘Nanyino nyungtiim loi, namtsam wanii kham wa naitsam miiri kran kuq ronglaq. Naitsam wanii arka alu kham mak she miraq. Amat she mirki,’ nguta jaüto.

⁹ ‘Ahü, nashiq tarü miika loq mak miraq. Namshiq ka kat wa riki rongkiq’ nguta treto.

¹⁰ Krai mren tsiihü nyungtiim ka wanii kham rikai ngutiishe kihoto. Kiimaq tsangshiq tatimii shon liipan na junlamti we kriishe saü wato. Krai mren, tiijeshat maq kheti maiqshaq nyung biingi ka junlamti we rai junlam poi lomwa dam she jam mong na wawan damto. Kiimaq kilü ka ashaq she riibaiqto.”

¹¹ “Nokwe wawan jai she tsiihü nyung biingi ka saü wanto. Raüta, ‘Shiilang we, shiilang we! Naishiq ri waphai. Kilü ka dikuq laq!’ nguta siitrangto.

¹² Kiijiishe, ‘Namshiq ka juwa ngi raq asap min sap mang!’ nguta junlamti we raq treto.”

¹³ Raüta Jesuq raq abom chong ka akha shatto, “Arkha maq, namshiq ka honlam shatmaq sironglaq. Ara jamkhano chongtiikang ngukla Maiq Se ka ranaiq niisha rawa niiwa saüki tlaq riila, kriika namshiq raq sap man.

Jaqshisetiim Wetsam Manphan

¹⁴ “Kra akhing na Ramungtan ngutlaq ka akha miraq. Akhing ashi na maiq weshi ka wanhiq na kaiho she riito. Apaiq raq ajaqshisetiim ka hea raüta apaiq hukchong samchong kra tiikhe thüto.

¹⁵ Apaiq raq atsiiq ka tsangtsam ma maiqmii hü tiithithi maq pheakuq thüto. Weshi miika chaq kampho kamsii hing biingi kuq thüto. Kiimaq weshi miika hingnai kiimaq weshi miika hingshi kuq thüto. Raüta apaiq ka wanhiq na kihoto.

¹⁶ Ajaqshi se chaq kampho hingbiingi lapti we ka jaqlo miili piikii raüta, hingbiingi aliip hali tiidong nongto.

¹⁷ Kiikhiisii hali ajaqshi se chaq kampho hingnai lapti we riimin hingnai tliip lapto.

¹⁸ Shatmaq kampho hingshi lapti we jaqshise riika, apaiq ka wak na kiraüta hiqkho bok thuto. Raüta kra hiqkho mong na atijong we raq akuq thü kampho kra paü thü kito.”

¹⁹ “Rawii luhea siwan jai she, tsangtijong we ka wanhiq maq saü wato. Raüta ajaqshisetiim jaq wa kampho ka aliip apha ümchuwa tiidong wantaq kriishe weawea raüpot she jaüto.

²⁰ Ajaqshi se kampho hingbiingi kuqthütiiti we ka atijong we phana wa raüta, ‘Tijong we ümniiraq ngi ma hingbiingi kuq thü laü irwa, ngi raq hingbiingi hali tliip nong kang,’ nguta atijong we ma kampho ka amak apha adam na kuqto.

²¹ Kiijiishe, ‘Riikhaqli, ong laü. Ümniika maiqshaq ashi. Kiimaq tsapsaü kapse jaqshi se!’ nguta atijong we raq ajaqshi se bom ka treto. ‘Ümniiraq tsiiq ka atsapse li jiimin, asho awo tliip pha laü. Arkha maq, ümchaü sanha ngi raq ümjaq na tsiiq ka apa she sham miitu arang mikuq kang. Wara, ümchaü min, ümniika ngi rai chojong chise maq poi arshe lom dam laq!’

²² “Kra jai na ajaqshi se kampho hingnai kuq thütiiti we kriishe waraüta, ‘Tijong we, ümniiraq ngi ma kampho hingnai kuqthü laü irmaq, ngi raq hingnai hali tliip nong kang. Liilaq ahata!’ nguta atijong we ma kampho ka amak apha adam na kuq wanto.

²³ Kiijiishe, ‘Riikhaqli, ong laü. Ümniiraq tsiiq ka atsapse li jiimin, asho awo tliip pha wan laü. Arkha maq, ümchaü sanha ngi raq ümjaq na tsiiq apa sham wan miitu arang mikuq kang. Wara, ümchaü min, ümniika ngi rai chojong chise maq poi arshe lom dam laq!’ ” nguta chongto.

²⁴ “Kra jai niishe ajaqshi se kampho hingshi kuq thütiiti we kriishe waraüta, ‘Tijong we ngi asap ha. Ümniika lapphaq lusiqti. Ümniika ümjaq maq shamki maü kra wiimin, shamki kang nguta ngoti we. Ümniiraq tsam jangki maü kriiwiimin, tsam jangki kang nguta tsamjut seati we.

²⁵ Ngi ka ümkampho ara tiimomiq rat jiiq la nguta haikhiq li siwan kang. Kriikha maq ngi ka wak na hiqkho ashi thu lata lapki kang. Lata paü thükang. Liilaq! Ümchaü min ara ümkampho, ümniiraq ngi ma kuqthü laü ira jaü thülaq!’ nguta atijong we ma kampho ka kuqto.”

²⁶ “Kiijiishe, ‘Ümnaq ara riinin. Laibi lati jaqshi se!’ nguta atijong we raq apaiq ka sonto. ‘Ümniiraq ngi asap haü riimak sha? Ngi ka i jaq maq wak shamki mang kriiwa, shamki kang nguta ngoti we; tsam ka jangki mang wa, jangki kang nguta jutsea wanti we?

²⁷ Riikhaqli. Ikhiijiika ümniiraq i kampho ka beng na thühaü chang. Kiiwa ngi wanhiq maq saü tiikang akhing na aliip apha she lap ha chang wa.

²⁸ Kra ngu raütiishe atijong we raq akoli ahinti kiima, ümchaü min apaiq jaq wa kampho ka nyea lanta, kampho hingroqshi rümti we kiima kuq ronglaq nguta thaüto.

²⁹ Ara jamkhano chongtiikang ngukla, maiq khumtek ma jurwa ashaq lin rümtlaq, kriiti miika kra thaq na atiitsuq mirkuq nong. Apaiq miika apa thaq niimin achan lin she mikuq. Shatmaq ümriiti jaq niiwa ralangse asi, kriimin apaiq jaq wa anyea she mirwan.

³⁰ Kiimaq ara thiihü jaqshise arka, ümchaü sanha i na kinphai ranyaq nyang mong kiiniishe hitbaiqki rongkiq. Kiijaq apaiq ka arong awi tiichitwa trang liishe mihoq phaq wan laq.’

Phangthum Khapho

³¹ “Ümra akhing niiwa Maiq Se ka Hokham ma jaraüta rasetiim rai she saüho tlaq, raüta apaiq ka ahokham ngachang ngacho kiijaq minga,

³² kra akhing na mangjong maiqse angu kunli kra triichom raüta, apaiq man niishe mitiinga. Kra akhing na apaiq raq mangjong maiqse ka sku rümti we raq skukong ka chhechhi kong phong mong wa pong na triiphea tsea tlaq ikha phea nai na mitiikho baiq.

³³ Raüta apaiq raq asii maiqse thun kriika apaiq ma jaqtsi nü kiina mitiinga. Kiimaq ngarai maiqse thun kriika apaiq ma jaq pha nü kiina mitiinga.

³⁴ Kra tiingalot raütiishe, Hokham we raq apaiq ma jaqtsi nü na ngati maiqse kiima akhiishe mingu, ‘I We raq akap-hap wanti tiim le! Warong ra. Warong ra, i We raq rapha hiqwa miiphü namshiq miitu atiije kra apaiq wokhong na silanta, apaiq achu shiiman kriishe lap lanta sironglaq.

³⁵ Namshiq raq ngi ramtsi na dung tiisiq wan lan; khamnyang tsi na kham tiinyang lan; wanmo sikang na, ngi ka namshiq jam na tiichap nga lan.

³⁶ Kheahü chamchao kang na khea tiisam kuq lan; atsi asi chamchao kang na namshiq raq shiili lii lan; phaqtek mong na sikang na namshiq raq ngi liikuq lan.’ ”

³⁷ “Kiijiishe kechu maiqsetiim raq mitre, ‘Tatiwe, naishiq raq ümniika ümtiiko ramtsi chhi laita dung tiisiq kai, lo khamnyang tsi chhilaita kham tiinyang kai?

³⁸ Ümniika ümtiiko wanmo chhi laita jam na shea wan kai, lo kheahü chhi laita khea tiisam kuq kai?

³⁹ Naishiq raq ümtiiko ümniika atsi, lo riimak la phaqtek mong na chhi laita riihum kikai?’

⁴⁰ Kiijiishe Hokham we raq mitre, ‘Ngi chongpha, namshiq raq ümtiikiiwa ara i phu i notiim phong wa juwa wepuq pinthum kra liikuq lan, kriika ngi liike taitlo!’ ”

⁴¹ “Kra chongkuq lot raütiishe, apaiq raq apaiq ma jaqpha nü na ngati mungmaiqse kra miishe akha nguta mison, ‘Namshiq ka Shiikeawe manson hotibi ara ngi tho arwa tiibin tlo ronglaq! Khiim wan tlo ronglaq Thawe nai apaiq rasetiim miitu atiihong pattup pat-sa thumki mak phan wamungtan mong kiijaq!

⁴² Ngi ramtsi chamchao kang na, namshiq raq dung kuqsiq man dea; khamnyang tsi chamchao kang na kham tiinyang man;

⁴³ ngi wanmo sikang na, namshiq jam na shea wan man; kheahü sikang na, khea tiisam kuq man; ngi atsi chamchao kang na nai phaqtek mong na sikang na, namshiq raq shiili lii man riilan.’ ”

⁴⁴ “Kiijiishe tsangshiq raq mitre, ‘Tatiwe, naishiq raq ümniika ümtiiko amang lo khamnyang tsi lo, wanmo lo, kheahü lo, atsi lo, phaqtek mong na lo chhi wan laita shiili lii wan mai dea riikai?’

⁴⁵ Kiijiishe, Hokham we raq tsangshiq bom ka mitre, ‘Ngi chongpha, namshiq raq ümtiikiiwa ara wepuq wese phong arwa weshi ma khrum kuq man riilan, kriika ngi ma khrum kuq man riilan.’

⁴⁶ Riita ümchaü sanha arthun arka pattup pat-sa thum mak miq mak chamchao wamungtan kiiniishe mitiidea baiq wan. Shatmaq, kechu maiqse thun arka pattup pat-sa rilung lap wan raütiishe misi wan.”