Matthew 24 - ASII LAKDAP Bible (BSI)

Jesuq Raq Shomjam Tiithenbaiq Chongto

¹ Jesuq ka Shomjam maq tiido wan raüta ahin nü na awa wan she riito. Kiijaq ajaqshisetiim ka apaiq phana waraüta apaiq ma Shomjam tsomwa kra tiichhito.

² Kiijiishe, “Üm,” nguta apaiq raq treto. “Namshiq raq ara Shomjam kaü tsomwa arli liisiq tlan nya. Ngi raq chongtiikang arka tengteng: Arjam kaü ümchaü namshiq raq liisiq tlan arka, ranaiqshi akhing na namjaqti raq hiq maq barot raüta, wiita tiisii rai she mishthen baiq. Ara jam thun chhi wan tlan arka wiita mirun baiq.”

Mungbrak Nai Chamchao Akhing

³ Jesuq ka Olip Pero Hiqlam na anga riito. Kiijaq ajaqshisetiim ka apaiq phana waraüta tsangshiq hon honse bala na, “Naishiq ma chongkuq liita, ara chongtlaü Shomjam tiithen baiq akhing arka ümtincho wa misaü wan? Kiimaq ümnaq saükai akhing she saüto nguta kiimaq phangthum wan akhing ka saüto she dea nguta akhing sap chang miitu ka jamlai phan she wa mitiiji shi wan!” nguta bom ka apaiq ma waito.

⁴ Kiijiishe Jesuq raq treto, “Namshiq ka tsii lamshat maq siwan lili rong laq. Maiq ma naq tlaophaq rongkiq.

⁵ Maiq pahea raq ngi mang chong raüta namshiq phana misaü wan. Raüta tsangshiq raq, ‘Ngi ahata Messia!’ nguta misaü wan. Raüta tsangshiq raq maiq pahea ka lamjiq nü na mishon ronho.

⁶ Namshiq raq matdong tsadong reriikhat trang kra namshiq phai apha tho niili trang kongcha mitai han. Kiimaq pongbin wiiq na reriikhat wanto nguta tsütsa ka pahea mitai han. Shatmaq kra thun tsütsa kra tai lanta, namshiq ka naq chhang hang rongkiq. Arka Shiikeawe raq athi kun she. Shatmaq kra thun matdong tsadong mungbrak shaq tlaq kriika phangthum akhing mra pin ka riimak.

⁷ Maiq mung ashiti raq mungshiti kra mikhat. Kiimaq hokham weshi raq hokham weshi rai mirkhat. Mangjong hiq barap se na ram midong. Kiimaq hiqjong mimu.

⁸ Riita ara chong tiikai thun mra pin tlaq arka, maiqnyung ashi ma nowüchhi tsi akhing phaho tlaq ikha maiqpat anye saü wan ma nowüchhi tsi phaho she.”

⁹ “Kra akhing she saü wan raüla, maiqse raq namshiq ka alap mirwan. Raüta namshiq ka mitiichamchao kiimaq atsea mirbaiq. Namshiq ka i sengi ma jawan tlan kriikha maq maiqphan angu wiita raq namshiq ka ashu ashe mirwan.

¹⁰ Kra akhing na ngi ma kamwanti maiqse pahea raq tsangshiq kamtsantsii ka athaq mirbaiq. Tsangshiq liipan na riingeng riiseng she mirwan. Kiimaq weshi raq weshi ka mung welabi ma mitiishaü kuq wan.

¹¹ Kra akhing na arot shammibi pahea mipu wan. Kiimaq tsangshiq raq maiqse pahea lamjiq nü na mishon ronho.

¹² Abi thawe jaqsham ka barap se na minyam. Kra tsamku wa akhing na maiqse liipan na mangchan tsü ka wiita akaiq mirwan.

¹³ Shatmaq jurwa atiisup na saüli ngi ma kamwan tlaq, kriiti kli mitiichhii wan lot.

¹⁴ Kiimaq ara Mungtan Tsütsa Ahea arka mangjong hiq hamli niishe michong kuq. Krai mren maiqse angu wiita raq kamwan miitu ara tsütsa ahea ara mitiitai kuq wan. Kra lot jai shetiq, maiqpat thum wan akhing rahiq kriishe misaü wan.”

Phiiptsi Chang Matdong

¹⁵ “Daniel shammi we raq, ‘Riiqkhiq Ashe Sumla Ka Shomjam Na Miraq,’ nguta chongthütaq bomtsi kra kupi wan ka namshiq riishe michhi han. Kriika Shomjam mong na Asii khok kiijaq chap raü michhi han.” (Aphat wanti raq ara liichum arka samhea maq tak rong laq!)

¹⁶ Kriishe chhi han jiila, Judia wangti ka ku akin mong kiina chiimjin apin wan kap she riichang.

¹⁷ Kiimaq maiq juwa ajam wukhu na angawa bala cha jiiq, kriiti ka jam mong wa hupsam lam wan latiitiq mijuha nguta jam mong na nyap wa nong ka ra mak.

¹⁸ Kiimaq kra akhing na maiq juwa awak na jaqthiq rü na jaqsham charai jiiq, kriiti riimin ajam wa akheathum kra lamsam kai nguta jai na jangkai nong ka ra mak.

¹⁹ Kra mra pin akhing bala jechakre wiihü wiihanti nai noshii nyungre miika pinthum phiiptsi chang jonghea miraq!

²⁰ Kra matdong akhing ka namshiq ma diwin ji na rathaiq rahai bala nai Niitiitsak ranaiq bala charai mak chang miitu Shiikeawe jaq wa achu jaü lanta siwan lili rong laq.

²¹ Kra akhing bala maiqse chamchao tlaq kra khan ka rapha hiqwa maq pha raüta ümchaü niitaq saüli akha langlang ka riingaü mak. Kiimaq ara chamchao arkhan ka jai na akhing niimin dong mak she miraq.

²² Shatmaq Shiikeawe raq kra chamchao thawa ranaiq akhing ka atiitoq baiq wishe. Apaiq raq kra tiitoq baiq mak ngu raü jiika maiqse angu jumin lun lot mak miraq. Shatmaq Shiikeawe raq apaiq raq atsea wan asengi thun kra miitu chamchao rahiq akhing ka atiitoq mirbaiq.

²³ “Kra akhing na maiq ashi ra raq namshiq ma, ‘Liilaq, Messia ka arshe saükito!’ nguta michong, lo ‘Liimanta, Messia ka kriishe saükito!’ nguta michong. Kra bom tlaqti ma namshiq ka naqkam rongkiq.

²⁴ Ara jamkhano chongtiikang ngukla kra akhing na, arot Messiabi kiimaq arot shammibi maiq ka pahea mipo wan. Tsangshiq riika amao chang nai awang chang jaqsham pahea misham. Raüta, mairaü jiila tsangshiq raq Shiikeawe sengi phong kriiwa min shonron hohai jaq nguta mishchaq.

²⁵ Taironglaq! Ngi raq namshiq ma akhing misaü shaq na chongkuq tiipha ara tsan na samhea tiitsang rong laq.”

²⁶ “Kiimahali, maiq raq namshiq ma, ‘Liirong laq, apaiq ka u na, kumtsaiphii binjü niishe saükito!’ nguta mingu. Kra chong kiiphan la namshiq ka kra kumtsaiphii binjü na apaiq liikai nguta naqki dam rongkiq. Kiimahali, tsangshiq raq namshiq nangnga, ‘Liimanta, apaiq ka arjaq jam mong na tiipaü ngakito!’ nguta michong kiiphan. Kra tsangshiq raq chongtlaq kra bom miimin namshiq ka naq kam rongkiq.

²⁷ Ara jamkhano chongkuq tiipha ngukla, Maiq Se saükai akhing kriika ra rachhai ralüp wan tlaq akhing na shedong maq riita shenyap chong na saüli maklii liipan niili chhai rai tlaq ikha tiihanghiiq miili misaüki.”

²⁸ “Ümriibano ama wetlaq, kiijiika langtang kong mirtam.

Phangthum Wan Na Mra Jonghea Mipin

²⁹ “Kra tha wa chamchao rahiq akhing kra lea wan jai tiijo rotli she, rashe ka anyaq mirki; jipi kiimin li mak she miraq. Raiqsaiq thun ka ra wa adea mirwan. Kiimaq ra mong nyang na siti ningkun thun kriimin tsangshiq khumchang lam kiiwa naüshaü shaü she minaü baiq.

³⁰ Kiijiishetiq Maiq Se saükai akhing ka saüto she dea nguta rawang win na phanrap ka mitiiji shi. Kiimaq kra tiiji shi tlaq kriishe mangjong maiqse wiita raq michhi. Kiimaq mangjong maiqse kunli raq rawang win na Maiq Se ka phumda mong na Shiikeawe ningkun ajong kra ho raüta kiimaq achhai anyii khushü liliim kra horaüta apaiq saüho kra michhi. Kra chhi raüta, mangjong maiqse kra maaho manyi she mihoqsii trang.

³¹ Rase raq lerong ka ramok rachhai watrang ikha mitsii. Kiimaq apaiq raq arasetiim ka mangjong hiq trotam na mitiiki. Kiimaq tsangshiq raq Shiikeawe sengi thun ka mangjong hiq hamli wa wiita hutjok adam na mirchom wan.”

Phupmup Chong Wa Tsiilam Chang

³² “Phupmup chong wa namshiq raq tsii lam chang asi. Namshiq raq phupmup chong na akü ako thun kiijaq ajaq dongho ma amakpot setiim she dong raüta, ajaq ka dongnin setiim ashun anye she nüm phaho haü jiila, raju she saü tlo nguta sap tlan.

³³ Kiikhiisii hali ümchaü ngi raq namshiq ma chongkuq kang thun arshe hongtha wan chhi han jiila, akhing ka saü wanto she dea nguta misap han.

³⁴ Ngi raq chongtiikang arka tengteng. Ara ümchaü pat wa maiq sitlaq ara wiita mitsai shaq liipan niili, ara chong kang thun mra ara mipin.

³⁵ Ra nai hiq ka athum mirki. Shatmaq i bomchong arka poimak phan.”

Maiq Se Saükai Akhing Jurmin Sapmak

³⁶ “Shatmaq kra ranaiq saükai ka jurmin sapmak. Rasetiim riilo, Ase riilo min sapmak. Kriika Awe riili saptlo.

³⁷ Maiq Se saükai ranaiq akhing ka Nowaq pat na rathup jüjang wan raq mangjong maiqse ka jamkho tiithen baiq wantaq kiikha miraq.

³⁸ Rathup jüjang wan akhing misaü wan shaq na, mangjong maiqse ka che nyang dungsea chamtraq li polo siwanto. Khesea rüja chamtraq ümtum ümmai li siwanto. Nowaq ka lai na dü wan ranaiq akhing na saüli, mangjong maiqse ka peokhiq li siwanto.

³⁹ Kiimaq tsangshiq riika jamtho jampha min hemak shonli, rathup jüjang wan raüta, mangjong maiqse kunli kham raq lam wan raüta laimiq tiithum baiq wanto. Ikiikhiisii hali Maiq Se saükai akhing ranaiq niimin misaü.

⁴⁰ Kra akhing ranaiq na, maiq wenai ka wak na jaqsham rea cha raüla, kiiwa weshi ka Maiq Se raq apaiq rai ashea mirwan; kiimaq weshi ka abaiq mirthü.

⁴¹ Kiimahali, maiq nyung anai ka tsamthaü rea cha raüla, kiiwa nyungshi ka Maiq Se raq apaiq rai ashea mirwan; kiimaq nyungshi ka abaiq mirthü.”

⁴² “Ara chongtiikang arkha maq, namshiq ka pinthum honkam shatmaq shongnga ronglaq. Ara jamkhano chongtiikang ngukla namshiq raq Tatiwe saükai ranaiq akhing ka sap man.

⁴³ Namshiq raq ara bomtsi ara tak chang. Maiq jam ashi wa jamtati we raq ajam na ahuk miwa nguta akhing asap ngu raü jiika, apaiq ka rawa konhü maq, ajam ka akhe miraq. Krai mren, ahuk raq kriiwe hupsam ka hukho lot mak miraq.

⁴⁴ Krai mren namshiq kiimin Maiq Se saükai kra khewan wranaiqshe tiijeshat maq sichang. Ara jamkhano chongtiikang ngukla Maiq Se ka namshiq raq misaüki sham nguta tiima ra wan man bala apaiq ka tiidong chhaq miili misaüki.”

Maiqshaq Nai Maiqkhü Jaqshi

⁴⁵ “Riita ikhiijiika juwa atsii asi kiimaq maiqshaq jaqshi se ka? Apaiq ma atijong we raq, apaiq ka wanhiq na kaiho ma, ajamkun kra mitiikhe thü. Kiimaq ajaqshisetiim ahinti sitlaq kriima akhing khaq khaq na tü adung tiiphaq siq lili riiliijo nguta apaiq ma arang mikuq thü.

⁴⁶ Kechu jonghea miraq ara jaqshise ma, atijong we raq apaiq jaqsham rea loho haü jaq!

⁴⁷ Ngi chongpha. Atijong we raq atsiiq anyam chong thun ka ara jaqshise arang niishe mithü wan.

⁴⁸ Shatmaq apaiq ka maiqjiqti jiika atsan mong na atijong we ka alo saüho mak nguta mitiima.

⁴⁹ Kiimaq akongtitiim ka atsea ata mihaihii. Kiimaq cherop tsampiiti rai mirshonron.

⁵⁰ Akha ümtum ümmai haisea bala liipan na atijong we ka tiidong chhaq miili she misaüki.

⁵¹ Krai mren, atijong we raq apaiq ka bunlak buncha michum baiq. Raüta mongnam nok rai khoshi na mitübaiq. Kiijaq apaiq ka aho anyi wa la kiimaq arong awi tiichitwa trang liishe mongnam nok rai mihoq phaq dam.”