Matthew 22 - ASII LAKDAP Bible (BSI)

Kherüsea Poi

¹ Jesuq raq thongshi ri hali apaiq arang shipoqti nok ma ara manphan maq hali shiiton chongkuq nongto.

² “Shiikeawe mungtan ngutlaq ka akha. Akhing ashi na hokham we raq ase ma maiqlamke kherüsea poi tiihongto.

³ Apaiq raq ajaqshisetiim ma wanhea raüpot pheake wanje tibi kra kherüsea poi na warong riishe nguta tiihea kito. Shatmaq tsangshiq raq kherüsea poi ka lomwa mak dea shipoq baiqto.

⁴ Kriikha miishe apaiq raq ajaqshisetiim ahinti kra hali tiiki nong raüta, wanwe ka akha tiichong kinongto: ‘Shamhea shamjü kumchipo ikha alüsea chang minsaü pong we thun min atawi she. Tashong ka ümchaü jato she. Kherüsea poi lomwa dam warong riishe!’

⁵ Shatmaq wanhea raüpot lapjetinok thun riika poi lom wa dam ka shümü mak shipoq baiqto. Tsangshiq ka maiqmii jaqsham mintsa kiijiili she mochii kito. Maiq wiijamti ka tsangshiq wak na kihoto; kiimaq maiq wiijamti ka tsangshiq kat tangkai khoti kiho wito.

⁶ Kiimaq maiq wiijamti riika apaiq raq atiiki ajaqshisetiim kra laphoto. Raüta tsangshiq ka ninta khoti tsatto. Kiimaq tsangshiq ka atsea khoti riibaiqto.

⁷ Kriikha miishe, hokham we ka pinthum walüwa ikhiishe khiqto. Kiimaq apaiq raq phenlanok tiiki raüta, matwe jawanti kong kra tiitsat baiqto. Raüta tsangshiq chela thun kra wa miishe tiichaq baiqto.

⁸ Kra jai miishe, apaiq raq ajaqshisetiim ahinti she hali hea nong raüta, ‘Ngi raq kherüsea poi ka atiije kun she. Shatmaq wanwe ümchuwa tiihea kang kong kra thun raq, ara poi ara lom dam ka thek mak.

⁹ Riita ümchaü min namshiq ka chela mong na munglam jong riihum chang lamhum ba ba thun kiina kironglaq. Lanta kherüsea poi ara lomwa dam miitu maiq ahumhum ka ana heaki rongkiq,’ nguta tsangshiq ka thaüto.

¹⁰ Krai mren, ajaqshisetiim ka munglam jong lamhum ba ba thun kiina kiraüta tsangshiq raq ahumhum, maiqhea maiqbi wiita shea wanto. Krai mren, kherüsea poi ngachang khok ka wanwe raq mali riito.”

¹¹ “Shamtaq, Hokham we ka wanwe liiwa nguta khok mong na wa kiita, kiijaq wanwe ashi ka kherüsea poi na samchang rohun miirii sam mak dea maq waraüta, kiijaq nga raü chhi wato.

¹² Kra chhi raüta, ‘Phuno we ümniika ajaq kherüsea poi na samchang rohun miirii sam maü miika, ajaq jamkho nyap wa laü?’ nguta hokham we raq apaiq ma bom waito. Shatmaq kriiwe ka kaiqshak, jam bom min trelot mak she riito.

¹³ Kiijiishe hokham we raq, ‘Arwe ara ahok ajaq ka wiita raü maq kha lanta kinphai na ranyaq nyang mong na hitthü baiqki rong- kiq. Kiijaq apaiq ka aho asii, arong awi kra tiichit wa liishetiq mihoq phaq wan laq!’” nguta ajaqshamtibi ka thaüto.

¹⁴ Kiimaq Jesuq raq abom ka akha shatto, “Shiikeawe raq maiq ka pahea asengi ma tiija wan miitu hea wan tlo. Shatmaq apaiq raq maiq ka atsapko li tsea wantlo.”

Phuntake Miitu Bomwai

¹⁵ Kra jai miishe, Phorisinok wiijamti ka nga raüta, Jesuq ka tsangshiq thiikho na tiithap haijaq nguta bom riichongto.

¹⁶ Raütiishe tsangshiq raq tsangshiq jaqshisetiim wiijamti ka Herod sengibi rai adam maq, Jesuq phana tiiwato. Raüta tsangshiq raq Jesuq ma bom ka akha waito, “Shrinketiwe naishiq raq asap hai, ümniika tingting maiqse. Shiikeawe bomtsi lang raüta maiqse loweatek ka Shiikeawe wokhong na jamkhii shongnga chang wa kra bomtsi ka kholam kholiiq khaqkhaq chongkuq tlaü. Maiqse raq jamlai wa tiima tlaq kra thaq na seng laütiika chong maü. Kiimaq maiq ka asham na lii laüta tiikhothiq maü phan.

¹⁷ Riita ikhiijiila ümchaü naishiq ma chong liita, ümniiraq jamkho tiima tlaü? Nashiq raq Roman Hokham ma phunta kuq tiikai arka nashiq Thungtri maq ajiq sha alam wa?”

¹⁸ Shatmaq Jesuq raq tsangshiq tsan na anyaq sitlaq kra asap. Kriikha miishe apaiq raq tsangshiq bom ka akha treto, “Mongnam nok! Namtsam raq ngi ka namshiq thiikho na jaram tiidea wa tan tlan?

¹⁹ Phunta kechang kampho sii kra lii i na!” Kiijiishe, tsangshiq raq kampho sii ashi kra lamki raüta, Jesuq ma kuqto.

²⁰ Jesuq raq tsangshiq ma waito, “Riita ara kampho sii na sumla nai amang waiq thütaq arka ju mang wa?”

²¹ Kiijiishe, “Hokham we mang,” nguta tsangshiq raq treto. Kiijiishe, “Riita ikhiijiika Hokham we rii ka Hokham we ma kuq rong liina. Kiimaq Shiikeawe rii ka Shiikeawe ma kuq rong liina,” nguta Jesuq raq tsangshiq bom ka treto.

²² Tsangshiq raq ara apaiq bomtre ara taiwi raüta, tsangshiq ka pinthum amao raili she riito. Kiimaq Jesuq tho wa ahin niishe tiidorang wawanto.

Amaa Wa Dong Wan

²³ Sadusinok ka Jehudinok phong wa pong phungti ashi riito. Tsangshiq raq maiq ka ama wa midong wan nguta kamasham bomtsi chongtlaq kra miika kamwan mak. Phorisinok raq Jesuq ka tsangshiq thiikho na tiithap lai nguta tantaq, kra ranaiq sii hali, Sadusinok phong wa maiq wiijamti ka Jesuq phana wato.

²⁴ Raüta, tsangshiq raq Jesuq ma bom ka akha waito, “Shrinketi we, Mosheq raq maiq ashi laihü maq tsaiki raüla, tsang-nyung ka wulum we ma kiima aphu ano raq rom wan chang miraq nguta chongtlo. Kiimaq tsangnai setiim ka wulum we ma kra lai miishe mija wan nguta chongtlo.

²⁵ Riita akhing ashi na maiq siphu wemiishi sito. Aphu jong ka tsangnyung lamje riito. Shatmaq laihü miili apaiq ka tsaikito. Apaiq tsaikai jai she tsang- nyung ka anowe riishe romto.

²⁶ Aphu jong kiikhiisii hali anowe kiimin laihü miili tsaikito. Kiimaq nojam wetsam ngoja kiimin, kiimaq atiisup na nobung we wemiishi ngoja kiimin kiikhiisii saq laihü lahü miili tsaikito.

²⁷ Atiisup niishe ka tsang- nyung kriishe tsaikito.

²⁸ Riita, tsangshiq siphu wemiishi raq tsang- nyi-chhi-nyung ka romto. Ikhiijiila maiqse ka ama wa dong wan tlaq akhing ranaiq na, arnyung arka ümriiti we tanyung miishe wa mija wan? Jamkhano ngukla, tsangtsam siphu tarü raq apaiq ka rom wanto.”

²⁹ Kiijiishe, Jesuq raq tsangshiq bom ka treto, “Namshiq raq maiq ka ama wa dong wan mak she ngutlan ka ajiq, bintang kata! Namshiq raq Asii Bomtsi kiimin sap man. Kiimaq Shiikeawe ningkun kiimin sap man.

³⁰ Ümtiikiiwa maiqse ka ama wiishe dong wan tlaq, tsangshiq ka ramungtan na siti rasetiim ikhiili she misi wan. Kiimaq arlam nai arwa ngutiimin ahü she.

³¹ Kiimaq maiqse ka ama wa dong wan lam ka Shiikeawe raq namshiq ma jamlai wa chongtlaq kra jangshi min phat man sha riilan? Apaiq raq chongto,

³² ‘Ngi ka Abraham Shiikeawe, Isak Shiikeawe kiimaq Jakob Shiikeawe.’ Krai mren, Apaiq ka maiqse amati sitlaq kra Shiikeawe ka riimak. Maiq atrati siwan tlaq kra Shiikeawe.”

³³ Apaiq traho bomchong ka mungmaiqse raq tai raüta, tsangshiq ka pinthum amaoli she riiwanto.

Aming Ajong Pinthum

³⁴ Jesuq raq Sadusinok ka tii- kaiqshak tiingiito nguta Phorisinok raq tai raüta, tsangshiq ka adam na ngato. Raüta Jesuq phana adam maq wato.

³⁵ Kiimaq tsangshiq phong wa weshi, Thungtri shrinketi we raq Jesuq ka athiikho na tiithap hajaq nguta manto.

³⁶ Kriikha maq apaiq raq Jesuq ma, “Shrinketi we, Thungtri na aming ajong pinthum ka ümriiti wa?” nguta waito.

³⁷ Kiijiishe, Jesuq raq treto, “‘Ümniiraq Tati Shiikeawe ka tsan nai mongjii, tsaiji kiimaq khutsai kunli kuq laüta lungwii laq.’

³⁸ Arka wiitarü thaq na ajong kiimaq akhek pinthum aming.

³⁹ Kiimaq akhek aming anai ngoja ka ara: ‘Ümniiraq üm jamthoti ka ümkhum jamkho lungwii tlaü kiikhiisii hali lungwiilaq.’

⁴⁰ Ara aming anai arka tri raütu rangchong. Mosheq Thungtri nai shammibi raq achong kuq wan bomkhupo ka ara aming raünai arjaq siisaq sup watlo.”

Messia Ka Juwa?

⁴¹ Kra jai maq, Phorisinok ka apaiq tho na thungshat li riito. Kiijiishe Jesuq raq tsangshiq ma bom ka akha waito,

⁴² “Namshiq raq Messia ka ju nguto tiima tlan? Apaiq ka juta se wa?” Kiijiishe tsangshiq raq, “Apaiq ka Dawit weraü wa,” nguta bom ka treto.

⁴³ “Riita ikhiijiika Asii Wenyi raq Dawit ma Messia ka ‘Tatiwe’ nguta jaram wa tiingo ta? Dawit apaiq riili akha nguto ahata,

⁴⁴ ‘Tatiwe raq i Tatiwe ma nguto: Ngi raq ümniima chiq se rewe jati thun ka, ümjaq khon na mikuq wan ha shaq wiiwii, ümniika I jaqtsi nü arjaq, mongngam maq ngashat li riilaq.’

⁴⁵ Riita Dawit raq Messia kra nangnga ‘Tatiwe’ nguta hiataq jiika, Messia ka Dawit weraü wa ngutiika jamkho mingu ta?”

⁴⁶ Jesuq raq Phorisinok ma bom waitaq kriika juwe riimin trelot mak dea riito. Kiimaq kra ranaiq miiphat she, maiq wiitarü raq Jesuq ka bomwai thiikho na tiidea la nguta dan mak, ahai she riito.