Matthew 21 - ASII LAKDAP Bible (BSI)

Mungmaiqse Raq Jesuq Jerusalem Taoto

¹ Jesuq nai ajaqshisetiim ka Jerusalem na kihoto. Tsangshiq ka Jerusalem na saüho nam nam she riito. Tsangshiq ka Bethphej hiqshong niishe saühoto. Kra hiqshong ka Olip Pero Hiqlam na atei wan. Kiimaq Jesuq raq ajaqshise nai wenai ma bom ka

² akha chongkuq raüta sinkhu na tiikito: “Iniikiijaq kongkhu na maiq hiq shong ashi asi. Kiijaq kironglaq. Namnai ka kra hiqshong kiijaq saükai ri li, kumtoq kaü, ase min akaü tho na tiiban shat kra michhiho han. Kra kumtoq kaü ase kra dii wan lanta, ana heki rongkiq.

³ Kiimaq maiq ashi ra raq bom waihaü jiila, ‘Tati ma ra tlo,’ nguta tre rong laq. Kra ngu han jiila, kriiwe riimin anai wiita tiihe wan saqli miraq.”

⁴ Ara jaqsham hongtha rai wantaq arka shammi we raq riisham bom achongthü kra tiikupi miitu she hongtha wanto. Shammi we raq bom ka akha chongthüto:

⁵ “Jerusalem chela ma chong laq, ‘Liilaq, ümhokham we ka ümphana watlo! Apaiq ka tsan nin woknin we, kumtoq kaü thaq na nga raü watlo, kiimaq kumtoq kaüse thaq na nga raüta watlo.’ ”

⁶ Krai mren, ajaqshi se nai ka kihoto. Raüta jamkho chongkuqtaq kra phan phan klo wanto.

⁷ Raüta kumtoq kaü nai ase ka hewanto. Kiimaq tsangshiq kheathum ka kumtoq kaü nai ase raikhü na phiikuq wanto. Raüta kra thaq na Jesuq ka tiinga wanto.

⁸ Mungmaiqse pahea raq tsangshiq kheathum ka Jesuq walam na phiikuq wanto. Kiimaq maiq wiijamti riika, pechong wa pekü thun ka daq raüta, lam na phiikuq wanto. Arka apaiq ma anato wan.

⁹ Jesuq khaki na nai apaiq jai na mungmaiqse watlaq thun kra raq, “Dawit Se kli tiitsam ronglaq! Shiikeawe le, Tatiwe mang na juwa kitlaq kiima achu shiiman kuqlaq! Shiikeawe li tiitsam ronglaq!” nguta rü riiq trang wanto.

¹⁰ Jesuq ka Jerusalem chela mong niishe saü wan kiita, Jerusalem na siti mungmaiqse thun ka tsangshiq tsanchhii watrang japjap she riito. Krai mren, tsangshiq liipan na arü ariiq watrang liishe, “Arwe ara juwa?” nguta riiwaito.

¹¹ Kiijiishe Jesuq jaiphan wawan damti mungmaiqse kong phong kra raq, “Arka Shiikeawe shammiwe Jesuq, Gelili wang wa Najareth hiq na siti we,” nguta nokwe bom ka treto.

Jesuq Raq Laopanbi Jobaiqto

¹² Jesuq ka Jerusalem chela mong niishe saü wanto. Raüta Shomjam ruk mong niishe wato. Raüta kiijaq wang mong na maiq hup asam shatibi nai ari athiittibi thun kra wiita jobaiqto. Apaiq raq kampho chak chang chamrii thun nai haütaü shati raq, haütaü thü chang nai tsangshiq ngachang ngacho thun kra wiita, akap atsea tsit baiqto.

¹³ Raüta apaiq raq tsangshiq ka, “Asii lakdap na Shiikeawe raq akha chongto, ‘I Shomjam ka achu jaü chang jam miraq.’ Shatmaq namshiq ara shomjam arka ahuk arot kong tiibo chang jam miishe tiija baiqho lan!” nguta sonto.

¹⁴ Kiimaq maiq pahea makchukti nai akü ashiiti thun ka, apaiq phana Shomjam mong na wato. Kiimaq apaiq raq tsangshiq thatsi ka tiihea kuqto.

¹⁵ Shatmaq, Ramwe jongbi nai Thungtri shrinketibi thun ka, apaiq raq awang chang jaqsham kewan kra chhi raüta kiimaq nosere raq Shomjam maq, “Dawit Se kli tiitsam ronglaq!” nguta siitrang wan tlaq kra chhi raüta, tsangshiq ka kai akhiq ariq she riito.

¹⁶ Kra kha miishe, tsangshiq raq Jesuq ma waito, “Riita, ümniiraq ara tsangshiq raq jamlai wa gisii trang rai wantaq arka tai tlaü khata?” Kiijiishe Jesuq raq, “O, arka ngi riimin la taishat na!” nguta tsangshiq bom ka treto. “Riita, namshiq raq asii lakdap na, ‘Ümniiraq nosere nai noshiisetiim ma pinthum athuk atsom tiitsam kam bomtsi ka shrinkuq laü!’ nguta chongtlaq kriika namshiq raq phat man dea sha riilan?” nguta tsangshiq ma waito.

¹⁷ Kiimaq Jesuq raq mungmaiqse phong ka Shomjam niili baiqthü raüta, apaiq ka tiido wanto. Raüta chela tho na Bethani hiqshong kiijaq ajap wa she wawanto.

Jesuq Raq Phupmup Chong Ka Sonto

¹⁸ Kriimaq napjai ranaiq she, ranapchu maq, Jesuq ka Bethani hiq maq Jerusalem na ajang wan nong she, lam na awa rai riito. Apaiq ka aramtsi.

¹⁹ Apaiq raq lamkii na phupmup chong ka ashi chhito. Raüta apaiq ka phupmup chong ji kiijaq atsi asi sham nguta kito. Shatmaq ajaq nüm wa li, atsi ka ahü. Kriikha maq apaiq raq pechong ka, “Ümniika ümtiikiimin tsilu maü she mirhaü!” nguta ason riito. Apaiq raq kra ngori li she, maklii liipan niili phupmup chong ka shinsaq li she tsaikito.

²⁰ Ajaqshisetiim raq kra chhi raüta atiiraili she riito. Kiimaq, “Ara phupmup chong arka tsaisaq li jaro tsaiki tiinya?” nguta waito.

²¹ Kiijiishe Jesuq raq treto, “Ngi raq chong tiikang arka tengteng. Namshiq raq rang ra man maq kamhan jiila, ngi raq phupmup chong ara jamkho tiitsai baiq kang, akhiisii hali namshiq riimin milot han. Ara lamlam li ka riimak. Namshiq riika arthaq niimin, ara hiqlam kaü arma, ‘Tiikoq wan laq. Laüta, sammoktra jü mong na tiingok wan laq’ nguta thaü han jiila, hiqlam kaü ka mikü wan.

²² Namshiq raq Shiikeawe ma riikhaqli maq kam lanta achu jaü han jiila, jamlai phan miitu wa achu jaü tlan, kriika namshiq ma miklo kuq.”

Jesuq Ma Arang Juro Kuqta?

²³ Jesuq ka Shomjam na jangwa nongto. Raüta apaiq ka nokmaiqse ma trahoke rea riito. Kra akhing na ramwe jongbi nai welabi ka apaiq phana waraüta, “Ümniiraq arthun ara sham miitu arang ka ju jaqwo laplaü? Ümniima juro kuqta?” nguta apaiq ma bom ka waito.

²⁴ Kiijiishe, Jesuq raq treto, “Ngi raq namshiq ma bom poshi waipha. Namshiq raq ara tre han jiila, ngi riimin arthun sham miitu, ngi ma arang ka juro kuqta, kra michong kuq kang.

²⁵ Riita Johan ma khamlamke wan miitu arang ka juro kuqta? Shiikeawe raq sha maiqse raq akuq wa?” Kiijiishe tsangshiq liipan na akhiishe riikhiito, “Nashiq raq jamkho mitre rong i? ‘Shiikeawe raq akuq’ nguta ngu hai jiika, apaiq raq, ‘Riita namshiq raq Johan bomchong ma jamto kam man?’ nguta mingu.

²⁶ Shatmaq nashiq raq, ‘Maiq raq akuq,’ nguta ngu hai jiika, mungmaiqse ma hai chang asi; Jamkhano ngukla, mungmaiqse raq Johan ka shammi we nguta asap.”

²⁷ Kriikha maq tsangshiq raq, “Naishiq ha sap mai, Johan ma arang ka ju raq akuq wa,” nguta Jesuq bom ka treto. Kiijiishe, Jesuq riimin, “Ikhiijiika ngi riimin, ju aming mo arthun ara sham tiikang, kriika chong mang,” nguta tsangshiq bom ka treto.

Siphu Wenai Shiiton

²⁸ “Riita ümchaü namshiq raq jamkho mitiima han? Maiq weshi se ka siphu wenai. Awe raq chhikhu we ka, ‘I se loi ümchaü ranaiq spiqtsi ro na jaqsham kikiq,’ nguta thaüto.

²⁹ Shatmaq, ‘Naq, kimang,’ nguta awe kiq ka khiito. Shatmaq heashi sijai niishe, atsan ka klaito. Raüta wak na jaqsham kai kihoto.

³⁰ Kra jai maq, awe raq anoti we miimin kiikhiisii hali bom ka thaü nongto. ‘Shiilang we le mikikang,’ nguta awe bom ka treto. Shatmaq apaiq ka spiqtsi ro na jaqsham kai ka kimak dea.

³¹ Riita ara siphu wenai arwa ümriiti riiwa awe bom chong ka taita?” Kiijiishe, “Aphu we raq,” nguta tsangshiq raq apaiq bom ka treto. Kiijiishe Jesuq raq tsangshiq ma chongto, “Ngi chongpha: phunta hitibi nai mephe nyungtiim thun kra khoti, namshiq ma sinkhu na Shiikeawe mungtan na wawantlo.

³² Ara jamkhano chong tiikang ngukla, Khamlamketi we Johan ka saüho raüta, namshiq ma kechu lam phan kra tiichhikuq wanto. Shatmaq namshiq raq apaiq bomchong ma kam man riilan. Shatmaq phunta hitibi nai mephe nyungtiim riika, apaiq bomchong ma kamto. Namshiq riika ara chhi shat shat taü miimin, namtsii ka klai man dea. Kiimaq Johan bom chong ma kam man dea riilan.

Spiqtsi Ro Akheng Na Shamseati

³³ Jesuq raq abom ka akha hali tiitho chongkuq nongto. “Shiiton ashi ri hali tainong rong laq. Man na maiq weshi raq awak na spiqtsi ro chhito. Raüta, spiqtsi ro ka thep trotam maq ruk thüto. Kiimaq spiqtsi tsai tiikit chang longsha kiimin wat raüta tiihong thüto. Kiimaq spiqtsi ro kra khechang phunrang min longkaü maq haito. Kra thun ka wiita tiihongtha raütiishe, spiqtsi ro ka maiq akheng na shamseati ma shiipkuqto. Raüta apaiq ka mung ashi na wanhiq khumkai kihoto.

³⁴ Spiqtsi mancho akhing she saüto angu niishe, apaiq raq adisetiim ka wakkheng na shamseati phana, akheng tiijaü wa she tiiwato.

³⁵ Shatmaq, wakkheng shamseati nok raq adisetiim ka lap raüta, weshi ka atea riito. Kiimaq weshi ka lap raüta atsea riibaiqto. Kiimaq weshi ka long maq thong raüta tiiqbaiqto.

³⁶ Kra jai maq thongshi ri hali, wakchongti we raq adisetiim ka kongkhu lak na tiiwataq kra nam ma apa lin she hali tiiwa nongto. Shatmaq wakkheng shamseati nok raq, kongkhu lak na wati jamkho haihiitaq, kiikhiisii hali kra thongnai ngoja she atiiwa nong dise kong kriimin haihiito.

³⁷ Atiisup niishe apaiq raq ase kriishe tsangshiq phana tiiwato. Apaiq riika, ‘Ara I se she tiiwa tiikang arkla, tsangshiq raq mishreng she ahiq na,’ nguta tiima raüta tiiwato.

³⁸ Shatmaq akheng shamseati nok raq, ase saüwa kriishe chhi raüta, tsangshiq liipan na bom ka akhiishe riichongto, ‘Ara wakchongti we se she saü wato. Warong ra, apaiq arshe tsatbaiq rong i. Notsam apaiq arshe tsatbaiq hai jiika, awe tachong hupsam ka nashiq rii she miraq!’

³⁹ Krai mren she, tsangshiq raq ase ka laphoto. Raüta phekam na hit ho raüta, apaiq ka tsat baiq kito.”

⁴⁰ “Riita ümchaü wakchongti we ka saüho raü jiika, akheng shamseati nok ka jamkhii she wa mir nya?” nguta Jesuq raq tsangshiq ma bom ka waito.

⁴¹ Kiijiishe tsangshiq raq apaiq bom ka, “Apaiq raq matwetiim ka wiita mijiip baiq. Raüta wak ka akheng riikhaqli akhing na keti maiq ahinti miishe mitiishiip kuq,” nguta treto.

⁴² Kiijiishe Jesuq raq tsangshiq ma waito, “Riita namshiq raq Asii lakdap na akha chong tlaq arka phat man dea sha? ‘Longkaü ashi jamhaiti raq abi nguta ashthoq baiq wan ka, tarü thaq na pinthum akhek longkaü ma jakito. Riita arka Shiikeawe raq atiihong thü ahata; pinthum awang chang ashi!’

⁴³ Arthaq na tiitsuq saq she Jesuq raq tsangshiq ma, “Ara chong tiikang arai mren, ümchaü sanha, Shiikeawe Mungtan ka namshiq jaq wa anyeashe mirho. Raüta mung ahinti, atsi ahea tsingo wantinok miishe midi kuq wan.

⁴⁴ Juwa ara longkaü na tiithaü wan tlaq, kriiti ka bunlak mibun wan; kiimaq ju dü niiwa ara longkaü ara dea jiiq, kriiti ka botkhulai ma mitiija baiq wan.”

⁴⁵ Ramwe jongbi nai Phorisinok raq ara Jesuq raq shiiton manphan chongkuq wantaq ara tai raüta, tsangshiq shiitontlo ngutiishe takto.

⁴⁶ Kriikha maq, tsangshiq raq apaiq ka alap ma tanto. Shatmaq tsangshiq ka mungmaiqse ma ahai. Jamkhano ngukla Jehudinok mungmaiqse raq Jesuq ka shammiwe nguta langtlo.