Matthew 20 - ASII LAKDAP Bible (BSI)

Spiqtsiro Na Ningchangti

¹ “Ramungtan ngukla, bom ka akha. Mangjong maiqse kunli Shiikeawe sengi ma jawan ngutlaq ka akha. Maiq weshi ka apaiq spiqtsiro na jaq tiisham ma maiq ningchangti ritkai ranap chu maq kihoto.

² Raüta apaiq raq ranaiq shi ningchang jaq maq ka kamsii ashi ashi mikuq i nguta maiq ningchang wati krai athii ka miitangto. Raüta ningchang wati maiq ka apaiq spiqtsiro na ningchangkai tiikito.

³ Apaiq ka ranap nari tiikaü na hali kejat thung na kinongto. Kiijaq maiq wiijamti ka ahai sia chhihoto.

⁴ Kra chhi raüta, apaiq raq tsangshiq kiimin hali, ‘Namshiq min i spiqtsiro na ningchang sham wa rongkiq. Ngi raq namshiq ma jaq maq ka aheawiq mikuq kang,’ nguta thaüto.

⁵ Krai mren, tsangshiq ka ningchang kai spiqtsiro na kihoto. Kiimahali apaiq ka ranaiq nari roqshi ri anai niimin, kiimaq raji nari tsam niimin hali maiq ningchangti ka spiqtsiro na tiiki nongto.

⁶ Kiimaq hali raji nari biingi tin khan niishe, apaiq ka kejat thung na hali kinongto. Kiijaq maiq wiijam ka achap raq raq hali chhiki nongto. Kra chhi raüta, apaiq raq tsangshiq ma, ‘Riita namshiq ka ranaiq minru akha jam chiimsam wa?’ nguta waito.

⁷ ‘Naishiq ara jurmin ningchang ma chong mak ahata,’ nguta tsangshiq raq apaiq bom ka treto. ‘Ahea, ikhiijiila, namshiq min i wak na ningchang shamwa rongkiq,’ nguta apaiq raq tsangshiq kiimin thaüto.”

⁸ “Raji niishe wakchongti we raq achere we kiima akha thaüto, ‘Maiq ningchangti thun ka tarü triichom hea laq. Laüta maiq ümriiti wa rajiko rashe acha wan niishe tiikikai, kriiti ma jaq maq ka kuq phaho laüta, maiq ranap na jaqsham phahoti kriima tsangshiq jaq maq kra pheakuq laq.’

⁹ Krai mren, maiq ümriiti wa raji nari biingi maq sham pha wanti kriima, jaq maq ka kamsii achhuq chhuq phea kuqto.

¹⁰ Kriikha maq, maiq ranap apha shaqshaq na kaitibi raq tiima ka, tsangshiq riikla jaq maq ka apa lin milap rong i sham nguta, jaq maq jaü lam maq tiimato. Shatmaq tsangshiq miimin kamsii siichhuqchhuq li kuqto.

¹¹ Tsangshiq raq wakchongti we jaq wa tsangshiq jaq maq kra jaülot raütiishe, waktati we kra chongsea she, akha ngutiishe botnyan trangto.

¹² ‘Ara rajiko na shamti thun ara riika nari shili jaq shamto. Shatmaq, naishiq ka ranaiq minru chumtsi shekii wiita nin laita jaqsham wankai. Shatmaq ümniiraq tsangshiq jaq maq kiimin naishiq jaqmaq krai mren siili ka jamkho kuq laü?’ nguta apaiq ma waito.

¹³ “Kiijiishe, waktati we raq ningchang jaqsham wanti phong kiiwa weshi ma, ‘Phuno we le tailaq. Ngi raq ümniika lao mang. Ümniili ngi rai ranaiq ningchang ka kamsii ashi ashi li mijaü i nguta miitang kai ihata!

¹⁴ Ümjaq maq kampho kra lam wan laüta, ümjam na walaq. Ngi raq atiisup na sham wati ma ümchu wa kuqkang, kiichu sii hali ümniimiimin kewan rotiikang.

¹⁵ Ngi raq i kampho arka, ngi raq aroro na shaphaq lot mang sha? Shea ngi raq nanok ma jaq chii jichii maq phong tsoktsok kewan kra chhi laüta, ümkhun nü sha tsi rai tla?’ ”

¹⁶ Kiimaq Jesuq raq bom ka akhiishe shat wanto, “Ara chongtiikang arai mren, maiq juwa ümchaü aran nguta sitlaq, kriiti ka ajong ma mitiija. Kiimaq juwa ümchaü aran nguta sitlaq, kriiti ka ajong ma mitiija. Kiimaq juwa ajong kriiti ka aran ma mitiija.”

Jesuq Raq Apaiq Tsai Lam Thongtsam She Chongto

¹⁷ Jesuq ka Jerusalem na walam maq ajaqshisetiim roqshi ri wenai ka pong ba na, tsangshiq honhonse sheaho raüta akhum lam maq chongkuqto.

¹⁸ “Taironglaq, nashiq ka Jerusalem na watiikai. Kiijaq Maiq Se ka ramwe jongbi nai Thungtri shrinketibi ma mishaphaq baiq. Tsangshiq raq apaiq ka atsea chang nguta matkii misü wan.

¹⁹ Raüta tsangshiq raq Pongmung maiqse jaq mong na mihit kuq baiq. Tsangshiq raq apaiq ka mihaihii. Chunpo-nyam chongwai maq mitsat. Raüta pumsongkham na mitübaiq. Shatmaq ranaiqtsam jai maq, apaiq ka ama wa adong mirwan nong.”

Anyung Ashi Raq Jaüjaü Bom

²⁰ Kiitiikaq Jebedi tanyung ka ase maiqwe senai kra sheaho raüta, Jesuq phana wato. Raüta Jesuq khaki na bum raüta khrum jaüjaü bom apaiq ma chongto.

²¹ Kiijiishe, Jesuq raq, “Ümniima jamlai phan wa ra tla?” nguta kra nyung ma waito. Apaiq raq treto, “Ümtiikiiwa ümniika Hokham ma jatlaü, kra akhing na i se nai arka jaqtsi na weshi, jaqpha na weshi mitiinga wan ha nguta kiqkham kuqlaq.”

²² Kiijiishe, “Namnai raq jamlai wa jaü tlan kra sap man. Ngi raq nyang chang chamchao kok kra, namnai raq minyang wan lot han sha?” nguta Jesuq raq ase nai kiima waito. “Nainai raq minyang wanlot hai,” nguta tsangnai raq treto.

²³ Kiijiishe, “Tengto, namnai raq i kok wa minyang wan lot han. Shatmaq ngi rai jaqtsi na nai jaqpha na tiinga miitu aming ka, i jaq na ahü. Arka i We raq ju rii wa thü tlaq, kriiti rii li miraq,” nguta Jesuq raq tsangnai bom ka treto.

²⁴ Kra bomtsi ka ajaqshisetiim roqshi raq tai raütiishe, tsangshiq ka tsangnai ma akhiq she riito.

²⁵ Kiijiishe Jesuq raq tsangshiq wiitarü ka adam na hea raüta tsii ka akha chongkuqto. “Namshiq raq asap han, thatsang maiqse hokhambi riika, tsangsengi ka jaqkhon mong na thü wan tlo.

²⁶ Shatmaq, namshiq liipan niika, akha siwan ka maimak. Namtsam liipan wa juwa ajong ma jawan ro tlan, kriiti ka tarü jaqshise ma ja wan ra tlo.

²⁷ Kiimaq namshiq liipan wa, juwa asheati ma jawan ro tlan, kriiti ka namshiq dise ma ja wan ra tlo.

²⁸ Maiq Se saükitaq kriika, maiq raq apaiq ka mishiili lii laq nguta aki riimak. Shatmaq maiqse shiililii kai kito. Kiimaq maiqse pahea khupi kai miitu kito. Akhiisii hali, namshiq min sichang.”

Jesuq Raq Makchuk Wenai Tiiheato

²⁹ Jesuq nai ajaqshisetiim ka Jeriko chela maq atiido wan she riito kata. Jesuq jai ka mungmaiqse pahea raq phan wanto.

³⁰ Maiq makchuk wenai ka lamkii na nga raq raq riito. Tsangnai raq Jesuq lea wan tho kra heto. Krai mren, tsangnai raq, “Dawit Se loi! Nainai ara mangchan laq!” nguta gitrang wanto.

³¹ Maiqkong raq tsangnai ka ason riito. Kiimaq kaiq rong laq nguta atiitsaq riito. Shatmaq tsangnai raq tiihong wan wan she, “Dawit Se loi! Nainai ara mangchan laq” nguta siitrang wanto.

³² Kiijiishe Jesuq ka achap riito. Raüta makchuk wenai kiima, “Nam- nai ma jamlai phan wa ra tla?” nguta waito.

³³ Kiijiishe tsangnai raq, “Shiilangwe le, nainai mak ara tiipiiq kuqlaq!” nguta treto.

³⁴ Jesuq ka tsangnai ma mangchan tsito. Kiimaq tsangnai mak na jaq maq shamto. Krai mren tsangnai mak ka tiidoqra she heakito. Kiimaq tsangnai riimin Jesuq jai she phan wan damto.