Matthew 19 - ASII LAKDAP Bible (BSI)

Maiqta Shongnga Rilung Bomchong

¹ Jesuq raq arthun trahokuqlot raütiishe, apaiq ka Gelili wang wa Judia wang na Jordan rai reko nü niishe kihoto.

² Mungmaiqse kong phong maiq pahea raq apaiq jai ka phan wanto. Kiimaq tsangshiq phong na maiq atsi asiti thun ümtinkhan wa sitlaq kra, apaiq raq wiita kunkun tiihea kuq wanto.

³ Phorisinok wiijamti ka Jesuq phana waraüta, apaiq ka tsangshiq thiikho na tiithap haijaq nguta tiima raüta, apaiq ma bom ka akha waito, “Riita nashiq Thungtri na awese raq ata-nyung ka asiq areng kha jam min ahüli jiimin amiim baiq milot nguta aming ka asi sha?”

⁴ Kiijiishe Jesuq raq treto, “Namshiq raq Asii lakdap na maiqse Tiiq wanti we raq rapha hiqwa miiphü dongdii, maiqse ka jechak nai maiqwe tiihong raüta klo wanto nguta chongtlaq kra phat wan man dea sha riilan?

⁵ Kiijaq Shiikeawe raq, ‘Arkha maq maiqwe ashi raq anyung nai awe kra baiqthü raüta, ata-nyung rai pum ashi han ashi miishe mitiipum wan; raüta tsangnai ka maiqpum anai ka pumshi miili she mija wan,’ nguta chongtlo.

⁶ Krai mren, tsangnai ka maiqpum anai ka riimak she. Pumshi lishe. Shiikeawe raq jamlai wa adam na romkuq wantaq, kra maiqse raq runbaiq maimak.”

⁷ Kra tai raüta Phorisinok raq Jesuq ma waito, “Ikhiijiika, Mosheq raq atawe raq ata-nyung ma amiim baiq lak waiqkuq raüta shubaiq wan mimai nguta Thungtri ka jaram wa thü wanta?”

⁸ Jesuq raq treto, “Mosheq raq namshiq ma chakmiim aming kuq wantaq kriika, namshiq tsantsii ka tsinhea, atiitsiilot chang riimak kha maq ara aming kuq wanto. Shatmaq rapha hiqwa akhing na, akha ka ahü riito.

⁹ Ara chong wan tlaq krai mren, ngi chongpha, jurwa tsang-nyung ka maiq rai sethoq jaki mak shatmaq miimbaiq tlaq, raüta apaiq raq nyungnye she lam tlaq, kra raüla, apaiq raq maiqchak rai sra sumrai kha tang tlo ngushat she.”

¹⁰ Kra tai raütiishe, ajaqshisetiim raq treto, “Atawe raq ata-nyung ka sumrai tang kha niili mimiim baiqlot chang jiika, maiq lamhü maq siraü jiikhoti ahea miraq.”

¹¹ Kiijiishe Jesuq raq treto, “Ara chong tiikang tri arka tarü pili miitu ka riimak. Shatmaq Shiikeawe raq ju miiwa ara kongphiq ara kuq taq, kriiti riili milang lot.

¹² Maiq raq achak lam mak maq siwan tlaq kriika maiqmii ma akhek phanshi ra rakai kha maq. Maiq wiijam ka anyung pukdong ashoq; kiimaq maiq wiijam ka maiqse raq ashoq atiija baiq; kiimaq maiq wiijam ka Ramungtan jaqsham wan miitu, maiq lam mak maq siwan tlo. Jurwa ara tri lamphan ara lang wan lot tlaq, kriiti raq milang laq.”

Jesuq Raq Nosere Shiimanto

¹³ Kiitiikaq, maiq wiijamti raq nosere ka Jesuq phana shea wanto. Kriika apaiq raq tsangshiq dü na ajaq maq sham raüta, achu mijaü kuq laq nguta shea wanto. Shatmaq ajaqshisetiim raq, maiq nosere shea wanti ka atiiwin ason riito.

¹⁴ Kiijiishe Jesuq raq ajaqshisetiim ma chongto, “Nosere ka ana i phana tiiwa rong laq. Naq tiiwin rongkiq. Ramungtan ka juwa ara nosere akha siwan tlaq kriiti rii.”

¹⁵ Apaiq raq nosere khum na ajaq maq sham raüta achu jaükuqto. Raütiishe apaiq ka kiiwa tiido wanto.

Chiithe Maiqse Nai Shiikeawe Tri

¹⁶ Akhing ashi na maiq weshi ka Jesuq phana wato. Raüta Jesuq ma waito, “Shrinketi we ngi raq pattup pat-sa rilung kra lap miitu jamlai phan athuk atsom jaq sham chang wa miraq?”

¹⁷ Kiijiishe, “Ümniiraq ngi ma ahea lamlu ka jaram wa waitlaü?” nguta Jesuq raq treto. “Shiikeawe kli maiqshaq. Ümniiraq rilung lap ro tlaü jiika, aming thun ka lang laq.”

¹⁸ “Jamlai phan aming lang chang wa miraq?” nguta apaiq raq Jesuq ma waito. Kiijiishe Jesuq raq treto, “Maiq naq tsatkiq; maiqchak rai naq srakiq; ahuk naq jakiq; khahü na maiq ma huk naq nyan kiq;

¹⁹ ümnyung nai ümwe ka shreng laq. Kiimaq üm jamthoti chiiti ka ümkhum jamkho lungwii tlaü kiikha lungwii laq.”

²⁰ Kiijiishe, “Ngi raq arthun aming arka wiita lang wan kang she. Arthaq na ngi raq sham chang abi jamlai wa sitla?” nguta norii we raq Jesuq ma waito.

²¹ Kiijiishe Jesuq raq treto, “Ümniika awongsii maiqshaq ashi ma jawan ro tlaü jiika, ümjam na kilaq. Laüta ümtsiiq ümnyam ümchu wa sitlaq kra wiita asha riilaq. Laüta kra kampho ka miitsan miijan maiqsetiim ma pheakuq laq. Kra riihaü jiitiq ümniika mungtan na chiithe ma mija wan haü. Kra laüta ngi phana wara. Kiimaq i jaqshise ma ja laüta, i jai she phan laq.”

²² Noriiwe raq ara tsiichong bomtsi ara tai raüta, apaiq ka kai atsanbi waliishe tiido wanto. Atsan ka jamkhano biwanta ngukla, apaiq ka pinthum chiithe maiqse riito.

²³ Kiijiishe Jesuq raq ajaqshisetiim ma chongto, “Ngi raq chongtiikang arka tengteng; chiithe maiqse ma Ramungtan na wawan ka hahea pinthum.

²⁴ Bliiq kiki chongpha: chiithe maiqse Shiikeawe sengi ma jawan ngutlaq kriika, kumtsong nyamse kaü raq maichhi puse maq lea wan nam miimin aha.”

²⁵ Ajaqshisetiim raq ara tai raüta, tsangshiq ka pinthum awang raili she riito. Kiimaq, “Riita ikhiijiika juli she wa mitiichhii wan lot?” nguta apaiq ma waito.

²⁶ Jesuq raq tsangshiq pha nü na tiqtiq lii raüta, “Maiqse raq maiqmii ka tiichhii wan lot mak. Shatmaq Shiikeawe riika phanrap milot siisaq,” nguta treto.

²⁷ Kiijiishe Petar raq treto, “Riita naishiq ha? Naishiq raq phanrap miimthü laita ümjai she phan wan kai ahata. Naishiq raq jamlai phan wa milap wan hai ta?”

²⁸ Kiijiishe Jesuq raq tsangshiq ma chongto, “Namshiq raq tsan na tiitsang shat maq siwan lili rong laq. Ümra akhing niiwa Mungtan Anye kra saüho tlaq, kra akhing na Maiq Se ka apaiq Hokham ngachang ngacho na nga raüta, achhai anyii maq, mung ka milang wan. Kra akhing na, ümchaü namshiq i jaqshisetiim weroqshi ri wenai sitlan kriimin, maiqmiimii hokham ngachang na nga lanta, ngi rai Israilnok mung maiq phan phan roqshi ri phannai kra milang wan.

²⁹ Kiimaq maiq khumtek raq ngi miitu, maiqmii jam lo, aphu anotiim lo, ashea-nyungtiim lo, anyung nai awe lo, asetiim lo, awak ajam lo miimbaiq thütiiti thun miika, kra thaq niimin apa achan ana, ahing ashi maq mitliip kuq. Kiimaq tsangshiq ma pattup pat-sa rilung kra mikuq.

³⁰ Shatmaq ümchaü maiq pahea juwa ajong nguta siwan thun ka, rawiichii maiqpat anye saüho tlaq akhing na, aran miishe mitiija wan. Kiimaq ümchaü maiq pahea, juwa aran nguta siwan tlaqti ka, rawiichii maiqpat anye saüho tlaq akhing na, ajong miishe mitiija wan.”