Matthew 18 - ASII LAKDAP Bible (BSI)

Juwa Ajong Pinthum?

¹ Kriimaq heashi sijai na ajaqshisetiim ka Jesuq phana waraüta waito, “Ramungtan na juwa ajong pinthum?”

² Kiijiishe Jesuq raq nonose ashi ka hea raüta, tsangshiq khaki na tiichapto.

³ Raüta akha nguto, “Ngi raq chongtiikang arka tengteng. Namshiq ka ara nonose akha klai wan man wiiwii Ramungtan ümtiikiimin saü man mirhan.

⁴ Ara nonose akha juwa aranse ma jawan lot tlaqti, kriiti ka Shiikeawe sengi phong na ajong pinthum mija wan.

⁵ Kiimaq jurwa i mang na ara nonose akha siwanti maiqse kra tao wan tlaq, kriiti riika ngi tao wan tlo ngushat.”

Ngarai Na Tiidea Chang Maitai

⁶ “Ara nonosetiim raq kamwantlaq akha, ngi ma kamwanti maiqse phong wa, ashi ra raq weshi ra kamtsantsii kra tiichhan baiq raüla, kriiwe ka apaiq dangkong na longkaü jonghea ashi paq kuq raüta, sammoktra chum mong na tiidea baiq kai riiwe ka ahea miraq.

⁷ Ara mangjong hiq na mangjong maiqse ma phiiptsi chang ka pahea asi. Maiqse ma apaiq kamasham lam kriiwa tiidea baiq chang maitai ka pahea sitlo! Akha abi maitai arka misi dongdii. Shatmaq juwe lümo maiqse ka apaiq kamasham lamphan kriiwa tiichhan baiq tlaq, kriiti miika pinthum phiiptsi chang!”

⁸ “Arkha maq, ümjaq lo ümhok lo raq, üm kamtsantsii kra tiijam kiiphaü la, achum li riibaiq laq! Hoknai wiita kiimaq jaqnai wiita maq wamungtan na dea wan nam ma khoti, hokko ma nai, jaqko ma li jiimin, pattup pat-sa rilung lap wan raüta siwan riiwe ka ahea miraq.

⁹ Kiimaq üm makpo raq üm kamtsantsii kra tiijam kiiphaü la, alatli riibaiq laq! Maknai wiita maq wamungtan na dea wan nam ma khoti, makko ma li jiimin pattup pat-sa rilung lap wan raüta siwan riiwe ka ahea miraq.”

Amo Arki Skuse Shiiton

¹⁰ “Liirong laq. Namshiq raq ara atsak adoksetiim nosere ara naq tsaihai rongkiq. Ngi chongpha. Tsangshiq kheti rasetiim ka ramungtan na i We tro maq ranaiqtek khe tlo.

¹¹ Jamkhano ngukla Maiq Se kriika maiqse amo arki thun kra chhii kai nguta kito.”

¹² “Namshiq raq jamkho tiima tlan, maiq weshi jaq na skuse kong ka shishi miraq. Kiiwa ashi ka amii mirki. Raüla, apaiq ka roqtiikaüri tiikaü ka hiqlam siim na atsam phaq baiqthü raüta, amii arkise kra ritkai mikiho.

¹³ Ngi chongpha, atati we ka roqtiikaüri tiikaü hiqlam siim na haiseati kra thaq na, amii arki skuse humtaq kra ma pinthum mikhoqriiq siq.

¹⁴ Ikiikhiisii hali nam We ramungtan na siti we riimin ara atsak adokse kong phong wa ashi kra dongdii min tiimo baiq romak.”

Phunaino Ashut Kloti

¹⁵ “Üm phuno we raq ümniima ashut klo kiiphaü la ümniika apaiq phana kilaüta riihum laq. Laüta, apaiq raq jamlai phan no shuttaq kra achong riikuq laq. Kriika namnai honhon liipan niili riichong ronglaq. Apaiq raq ümbom kra tai raüla, namnai liipan na kiq ram lan she ngushat.

¹⁶ Shatmaq apaiq raq shut mang dea nguta khiilataq she hongho raü ka, phungmaiqse phunaino wa ashi lo anai lo sheaho laüta, apaiq phana jangshi ri hali riihumki nongkiq. Arka Asii lakdap na, ‘Ashut aweatek kra hakhi anai raq riimak la atsam raq shutto dea nguta bom ka tiiku wan chang,’ nguta chongtlaq kra phan phan tri ka tiihong chang.

¹⁷ Shatmaq, apaiq raq tsangshiq bom kiimin taimak she ngiimki raüla, apaiq mra ka phungtuti miishe tiitai laq. Shatmaq, apaiq raq phungtuti bom kriimin taimak she ngiimki raüla, apaiq ka thatsang maiqse ikhli she lo, ngarai raq alan kaiwi she ngutiishe liirong laq.”

Lam Tangta Nai Lam Dike

¹⁸ “Ara chong tiikang arai mren, ngi raq namshiq tarü ma chong pha. Namshiq raq ara mangjong hiq maq jamlai phan miiwa lam ka atangta riitlan; kra phan miika, ramungtan miimin atangta miraq. Kiimaq namshiq raq jamlai phan miiwa lam ka adi riikuq tlan, kra miika ramungtan miimin lam ka adi mirkuq.”

¹⁹ “Kiimaq arthaq niimin abiri chongkuq pha. Ümtiikiiwa namshiq phong wa maiq wenai raq kiqshi maq ri lanta, phanshi ra miitu achu mijaü han, kra jaü tlan kra i We ramungtan na siti we raq namshiq ma mitre kuq.

²⁰ Ara jamkhano chongtiikang ngukla, ümbano i mang na maiq ka wenai lo wetsam lo nga tlaq, kiijaq tsangshiq rai ngi min lom damshat mirha.”

Kongti Mra Diikuq Mak Jaqshise Shiiton

²¹ Kiijiishe Petar raq Jesuq ma waito, “Tatiwe, riita i phuno we raq ngi ma ashut klo ruqruq raü jiika, ngi raq apaiq mra ka ümchu jang na saüli diike chang wa miraq? Jang miishi niitaq sha?”

²² Kiijiishe, Jesuq raq treto, “Riimak. Jang miishi na saüli li ka riimak. Shatmaq jangroq miishi ri jang miishi na saüli, ümniiraq apaiq mra ka diikuqlaq.

²³ Ara jamkhano ngukla, Ramungtan ngutlaq kriika akha miraq. Man na hokham weshi raq, asenginok raq, apaiq kampho lakshii ka jamkhiiwa liiko wan tlaq, kra konchon wan akhing ashi tiihongto. Raüta apaiq riishe weawea kra konchon lii wanto.

²⁴ Apaiq raq kra konchon phaho raü niili, ajaqtaki na siti ajongbi raq, asengi siihiip weshi raq apaiq kampho ka wanshi thiitham kha hoti we kra, apaiq tho niishe shea wanto. Raüta tiichap wanto.

²⁵ Kra ajong we jaq na hokham we ma thiitham kechang kampho ka ahü riito. Kriikha maq, hokham we raq, khahoti we ka thiitham kha na, achak ase wiijam tam, awak ajam wiita hutjok di ma shabaiq ra tlo ngutiishe aming kuqto.

²⁶ Kiijiishe ajong we ka hokham we jichong na bumki tlii raüta, ‘O chaü le, ngi ma jipi rahiq dea kham kuq kaq. Ngi raq thiitham ka wiita dea mitham kuq kang!’ ngutiishe tiipaiqnea hoq hoto.

²⁷ Kra tiipaiqnea hoqsii raiho kiitiishe, hokham we ka apaiq ma mangchan tsito. Krai mren siihiip we thiitham kha kra, apaiq raq adii she riibaiqto.”

²⁸ “Kra jai maq apaiq ka hokham we jam maq wawanto. Raüta, hokham we sengi, apaiq kongtibi phong kiiwa maiq rai riihumto. Kriiwe raq apaiq ma kampho hingnai kechang thiitham asi riito. Apaiq ka arewe rai she riihum raüta sanha, apaiq raq arewe ka atokkun maq lapho tlii raüta, hiq na tiithaü hihi miishe, ‘I thiitham ira kuqlaq!’ nguta arewe ka wathiq se maq asitin she shiitep wanto.

²⁹ Arewe ka apaiq khaki na hiq na bumtlii raüta, ‘O kongtiwe le, ngi ma rahiq jipi dea kham kuqlaq. Ngi raq ümthiitham ka wiita dea mitham kuqkang!’ nguta nohotin she apaiq ma tiipaiqnea wanto.

³⁰ Shatmaq apaiq raq arewe bom ka taimak riito. Kiimaq apaiq raq arewe ka thiitham kha ka midok kuq wan shaq wiiwii, phaqtek mong niishe shaq baiqto.

³¹ Kra chhi raütiishe, kongti ahinti thun ka kai tsanbi taqtaq she jonjü siq wanto. Kiimaq tsangshiq ka hokham we phana waraüta, kra akongti we haihii taq bom kriishe hokham we chongto.

³² Krai mren she, hokham we raq kriiwe ka apaiq phaniishe tiihea kito. Raüta, ‘Ümnaq ara thiihü dise ashi!’ nguta hok wanto. ‘Ümnaq tiipaiqnea rai laü kriikha maq, ngi raq ümkha ka jonghea shatmaq, ngi raq adii riibaiq wan kang.

³³ Ngi raq ümniima jamkho mangchan tiichhi kuq wan kang, kiikhiisii hali, ümniiriimin ümkongti we ma mangchan tiichhike wan haü chang kata,’ nguta khiq hoto.

³⁴ Hokham we ka kai khiqto. Krai mren, apaiq raq kra luqkhap jong we ka, apaiq thiitham kra thamkuq lot mak wiiwii, phaqtek mong niili she shaq baiq ronglaq” nguta aming kuqto.

³⁵ Kra chongkuq raütiishe, Jesuq raq bom ka akhiishe shatto, “Ngi raq chongpha. Namshiq tarü loweatek raq, namphuno we mra ka namtsan mong maq diikuq man wiiwii, ara chong tiikang akhiisii hali, i We ramungtan na siti we riimin, namshiq kha ka mipho.”