Matthew 17 - ASII LAKDAP Bible (BSI)

Jesuq Khumklai

¹ Ratrok jai maq Jesuq raq Petar nai ano Jakob kiimaq Johan kra shea wan raüta hiqlam ashi diiluwiq kiina wawanto. Kiijaq tsangshiq blai laqlaqse li riito.

² Tsangshiq raq apaiq ka liishat liipan niili, Jesuq sham ka aklai riikito. Apaiq theaphi ka rashe kaü ikha chhaihea langlang chhairai wanto. Kiimaq apaiq khum na khu akhea asam thun kriimin maiqmak alirat rashe kii li ikha lüdiidii hea she chhairai wanto.

³ Kiijiishe ajaqshisetiim atsam raq Mosheq nai Elija ka kiijaq saükai chhito. Kiimaq tsangnai ka Jesuq rai bom riichong rea chhito.

⁴ Kra chhi raütiishe, Petar raq nguto, “Tatiwe, nashiq tarü arjaq chakai arka pinthum kiim jonghea! Ümniiraq thapthi haü jiila, ngi raq arjaq baüli tiipsetiim atsam haipha. Ümniirii ashi, Mosheq rii ashi kiimaq Elija rii ashi.”

⁵ Apaiq ka abom rai liipan kiijiiniili, tiidong chhaq maq phongtsok ra wa chhaihea langlang phumlü da ashi deaki raüta, tsangshiq tarü ka pang baiqto. Kiimaq phumda mong wa maiq bom ashi akha taito, “Ahata I tsantsii ran chang I Se. Ngi ka apaiq ma pinthum khoqriiq wan tiikang. Apaiq bom ka tai rong laq!”

⁶ Kra rawang win wa maiq bom kra tai raüta, ajaqshisetiim ka pinthum tsaihü jihü phiipto. Kiimaq tsanghai sitsi ma hiq na bum- rang she weki wito.

⁷ Kiijiishe, Jesuq ka tsangtsam tho na kiraüta, ajaq maq tsangshiq dü na shamto. Kiimaq, “Tiido ronglaq, naqhai rongkiq” nguta bomto.

⁸ Krai mren tsangtsam ka tiido raüta liikiita, maiq ahinti ka jumin ahü she. Jesuq lamlam lishe chap raü chhito.

⁹ Jesuq nai ajaqshisetiim atsam ka pum kriimaq asatkai lam miishe, Jesuq raq tsangtsam ma, “Ümchaü namtsam raq jamlai wa riisham mak maq chhi lan, kriika Maiq Se kra ama wa midong wan shaq wiiwii, maiq ahinti ju miimin naq chong rongkiq,” nguta kiq thangto.

¹⁰ Kra tai raütiishe, ajaqshisetiim raq Jesuq ma, “Riita ikhiijiika Thungtri shrinketi raq Messia ka misaüho shaq na Elija ka sinkhu na misaüho nguta jaram wa chongtla?” nguta waito.

¹¹ “Elija ka ngohea dea kongkhu na misaüho,” nguta Jesuq raq treto. “Kiimaq apaiq raq Shiikeawe sengi thun kra tsan tiichhii je miishe mikheho.

¹² Shatmaq ngi chongpha. Elija ka asaü kaiwi she. Shatmaq mungmaiqse raq apaiq ka juwa sapmak dea riito. Tsangshiq raq apaiq ka shumii laqpii li shiinüm shiinai li haihii wanto. Kiikhiisii hali tsangshiq raq Maiq Se ngutlaq kriimin shiinüm shiinaili mihai hii.”

¹³ Kra chongkuq wan kiitiishe, ajaqshisetiim raq, Jesuq raq Elija nguta chongtlaq kriika Khamlamketi we Johan kra ngo nangnga ngutlo ngutiishe takto.

Jesuq Raq Maiqse Khum Wa Tha Jobaiqto

¹⁴ Jesuq nai ajaqshisetiim ka jangho nong raüta, mungmaiqse phong phana saükikiita, kiijaq maiq weshi ka Jesuq jichong na alakü maq ngasaq riito.

¹⁵ Kiimaq Jesuq ma akha tiipaiqneato, “Shiilangwe le, i se ara mangchan laq! I se ka angaq tsi. Atsi dong raüla pe awa na khiim wan man sap mak. Kiimaq tum ajü na thap wan man sap mak pheho tlo.

¹⁶ Ngi raq ümjaqshisetiim phana sheaho kang. Shatmaq tsangshiq raq tiihea kuq lot mak dea riito.”

¹⁷ Kiijiishe, Jesuq raq treto, “Namshiq kamtsantsii ka ahü. Kiimaq namshiq ka ajiq! Ngi raq namshiq chanja ka ümloq cho na saüli wa minin wanha ta? Üm se ka ana iphana shea wan laq!”

¹⁸ Kra ngu raütiishe Jesuq raq abi winji no khum kiiwa dongho laq nguta aming kuqto. Krai mren tha ka no khum wa donghoto. Kiimaq no tha tsi ka heasaq she heakito.

¹⁹ Kiijiishe ajaqshisetiim ka Jesuq phana tsangtsam honhon kiraüta, “Naishiq raq kra tha ka jamkhii riito jobaiq lot mai riikai?” nguta waito.

²⁰ Kiijiishe, “Namshiq kamtsantsii ka akom kha maq,” nguta Jesuq raq tsangshiq bom ka treto. “Ngi raq chongtiikang arka tengteng. Namshiq kamtsantsii ka jücha rai tinse li siraü jiimin, kam lanta ara hiqlam arnang nga, ‘Arba arwa tiikoq wanlaq, laüta ahin niishe kii wan laq’ nguta thaühan jiila, ngohea dea mitiikoq wan. Namshiq raq phanrap miklo lot han!”

²¹ Shatmaq akhnok abi winji arka, amang maq achu jaü raütiitiq mijo baiq lot. Ahin ningkun miika jo baiq lot mak miraq.

Jesuq Raq Apaiq Tsailam Thongshi Ri Chongto

²² Ajaqshisetiim ka wiitarü Gelili hiq na riitam jai she, Jesuq raq tsangshiq ma chongto, “Maiq Se ngutlaq ka maiqjaq khon mong na kebaiq wan akhing she saü wato.

²³ Tsangshiq raq apaiq ka atsea she mirbaiq wan. Shatmaq ranaiqtsam ngo jai maq apaiq ka ama wa atiidong mirwan nong.” Kra tai raüta ajaqshisetiim tsan ka pinthum bito.

Shomjam Phunta

²⁴ Jesuq nai ajaqshisetiim ka Kaparniam chela niishe saühoto. Tsangshiq ka kiijaq sishon bala, Shomjam phunta hitinok ka Petar phana waraüta, “Namshiq shrinketi we raq shomjam phunta ka kuqtlaq sha?” nguta waito.

²⁵ “Üm kuqtlo” nguta Petar raq treto. Kra riibom jai she Petar ka jam mong na nyap wato. Kiijiishe, Petar raq michong shaq niili Jesuq raq waito, “Simon ümniiraq jamkho tiima tlaü? Ara mangjong hiq na honyung hokhambi sitlaq kriima phunta ka ju raq kechang wa? Maiqmii mungti raq kechang sha pongmung maiqse, wansha we raq kechang wa?”

²⁶ Kiijiishe, “Wansha we raq kechang” nguta Petar raq treto. “Ahea. Ikhiijiika nokti we riika phunta ke ra mak.

²⁷ Shatmaq nashiq raq tsangshiq tsan tiibi wan ka romai. Kriikha maq ümniika thamchum kiina kilaüta ngiq ka pun kikiq. Pun pha shaqshaq pun tlaüti nübok ka riip laq. Kiijaq ngiq nübok na kampho sii ashi mihum haü. Kra kampho sii maq nanai la shomjam phunta kerii riikhaqli miraq. Kra lam wan laüta kuqwakiq.”