Matthew 16 - ASII LAKDAP Bible (BSI)

Awang Chang Tiichhi Ra

¹ Kra jai maq Phorisinok nai Sadusinok phong wa maiq wiijamti ka Jesuq phana wato. Tsangshiq raq apaiq ka tsangshiq thiikho na tiithap haijaq nguta tiima raüta, Jesuq nangnga apaiq ka Shiikeawe raq ashong maiqse dea jiika, awang chang jaqsham klo raüta tiichhike ra nguta apaiq ka maitaito.

² Shatmaq Jesuq raq akha treto, “Namshiq raq rashe nyap akhing na ra na phum ka liilanta ngutlan, ‘O ra ka akii miraq! Ra na phum ashii dong tlo,’ nguta ngutlan.

³ Kiimahali ranap na, ‘O athi ranaiq ka ra mijun. Ra na phum ka ashii nai anyaq dong tlo,’ nguta ngutlan. Riita namshiq raq ra tho hiq tho kriika ra na phum kra liilantli chonglot tlan. Shatmaq ümchaü akhing na namshiq raq atinkhan amao chang jaqsham kaiwa thun ara chhi lantiimin, rawiichii akhing na jamlai phan she wa misaü wan kriika tak lot man nya!

⁴ Ümchaü pat wa maiq arka abi pinthum. Shiikeawe sap mak! Namshiq raq ngi nangnga amao chang jaqsham tiichhike ra nguta maitai tlan nya? Tiichhi mang! Namshiq ma tiichhike chang amao chang jaqsham kriika shammi we Jona rilung na lea wantaq jaqsham kriili she mitiichhi kuq.” Kra ngo jai, tsangshiq ka kiijaq chap raqraq li baiqthü raüta, apaiq ka ahin niishe wawanto.

Phorisinok Nai Sadusinok Pithob

⁵ Ajaqshisetiim raq alaq raüta konü tham reko na winsii howan mak dea miili wawanto. Kiijaq Jesuq ka asi riito.

⁶ Jesuq raq, “Phorisinok nai Sadusinok pithob asi jo. Namshiq ka hon kamshat maq sirong laq,” nguta tsangshiq ma tsii chongkuqto.

⁷ Kra tai raüta, “Apaiq raq ara ngutlaq arka nashiq raq winsii lamho mai dea riikaita ngutlo,” nguta tsangshiq liipan na riichongto.

⁸ Jesuq raq tsangshiq liipan na riichong ka tai raüta tsangshiq ma waito, “Namshiq liipan na winsii ahü ngutiika jawa riichong rai tlan? Namshiq kamtsantsii ka akhiisiimin ahü ka jaro!

⁹ Namshiq raq ümchaü niitaq tak man li riishat shat sha? Ngi raq winsii phubiingi tiiphan lata maiq hingbiingi ma tiiphaqsiq wan kang ira namshiq tsan na tiitsang man she sha? Nokwe seabung archom han winsii raq tamlii ümchu wa mata?

¹⁰ Kiimaq winsii phu miishi maq maiq hingblai ma tiiphaqsiq wan kang irha? Nokwe seabung archom han winsii raq tamlii ümchu wa mata?

¹¹ Ngi raq namshiq ma winsii miitu chong mang. Kra namshiq raq akhiisiimin tak man ka jaro? Phorisinok nai Sadusinok pithob asi. Kriima namshiq ka maiqmii hon kamshat maq siwan lili ronglaq nguta tsii chongkuq tiikang ahata!”

¹² Kra tiitsang chongkuq kiita shetiq, ajaqshisetiim raq apaiq raq tsangshiq ma pithob maq shiiton chongtaq kriika Phorisinok nai Sadusinok traho bom chong kra nangnga ngutlo ngutiishe takto. Apaiq raq tsangshiq ka winsii sho chang pithob kriima honkam bom ka riimak nguta sapto.

Petar Raq Jesuq Ka Khristo Nguta Phoqto

¹³ Jesuq nai ajaqshisetiim ka Seseria hong na Philipia chela tho na wawanto. Kiijaq saü raüta apaiq raq ajaqshisetiim ma waito, “Mungmaiqse raq Maiq Se ka ju nguto riichongtla?”

¹⁴ Kiijiishe, “Maiq wiijamti riika Khamlamketi we Johan ngu, wiijamti nga hali ka Elija ngu, kiimaq wiijamti nga hali ka Jeremia ngu, kiimaq maiq abiti raq hali ka shammi we,” nguta riichongtlo, nguta tsangshiq raq apaiq bom ka treto.

¹⁵ Kiijiishe, “Riita namshiq riiha? Namshiq raq ngi ka ju nguto tiima tlan?” nguta apaiq raq ajaqshisetiim ma hali wainongto.

¹⁶ Kiijiishe Simon Petar raq treto, “Ümniika atra Shiikeawe Se Messia.”

¹⁷ Kiijiishe, Jesuq raq, “Kechu jonghea, Johan se Simon le!” nguta treto. “Riita ara tengtlaq bomtsi chongtlaü arka ümniima maiqse raq achongkuq ka riimak. Shatmaq i We ramungtan na siti we raq ümniima tingsang atiichhi arkuq.

¹⁸ Kriikha maq, ümchaü ngi raq ümniima chongtiikang; ümniika Petar. Ümniika longkaü she. Kiimaq ara longkaü arthaq na, ngi raq i phungtu ka mishong wan ha. Kiimaq ara phungtu shong tiikang arka atsai ningkun raq dongdii min tiimeshi lot mak miraq.

¹⁹ Ngi raq ümniima ramungtan kilü dichang sapi tu kra mikuq kang. Ümniiraq ara mangjong hiq maq jamlai phan miiwa atangta riitlaü, kra miika ramungtan miimin atangta mirbaiq. Kiimaq ümniiraq ara mangjong hiq maq jamlai phan miiwa lam ka adi riikuq tlaü, kra miika ramungtan miimin kilü ka adi mirkuq.”

²⁰ Kiimaq Jesuq raq ajaqshisetiim ma, apaiq ka Messia dea nguta maiq ahinti jumiimin chong ra mak nguta kiq atsin maq thangto.

Apaiq Chamchao Raüta Tsai Wan Lam Chongto

²¹ Kra akhing miiphat she Jesuq raq ajaqshisetiim ma linham linhok chongkuqto, “Ngi ka Jerusalem na saü ra dongdii. Kiimaq welabi, ramwe jongbi kiimaq Thungtri shrinketibi jaq na pinthum chamchao wan chang miraq. Tsangshiq raq ngi ka atsea mirbaiq. Shatmaq ranaiq tsam jai maq Shiikeawe raq ngi ka ama wa atiijang mirwan nong.”

²² Kra tai raüta Petar raq Jesuq ka kinphai na sheaho raüta sonto, “Tatiwe, Shiikeawe raq khekuq shat mirlaq! Ara chongtlaü thun arka ümdü na jamkhii riita jiimin tiisaü wan ra mak!”

²³ Kiijiishe Jesuq raq Petar pha nü na trosaq lii raüta Petar ka sonto, “I tho wa tiijin tlo laq Thawe! Ümniiraq ngi tiibanbi tlaü. Ümniiraq jamlai wa tiima tlaü kriika maiqse tiima, Shiikeawe raq tiima tlaq kra riimak.”

²⁴ Kiijiishe Jesuq raq ajaqshisetiim ma chongto, “Jurwa i jai phan wan ro tlaq, kriiti raq maiqmii khum ka alaq riibaiq raa.

²⁵ Ara jamkhano chongtiikang ngukla jurwa maiqmii rilung kra tiihang wan hajaq nguta tiima tlaq, kriiti raq maiqmii rilung ka atiimo mirbaiq. Shatmaq jurwa maiqmii rilung ka ngi miitu tiimo baiq wan tlaq, kriiti raq maiqmii rilung ka mihum wan.

²⁶ Maiq weshi raq mangjong tlotli ka lap wan raü jiimin, apaiq tsitsü ka tiimo baiq raü jiika jamlai liip wa misi? Ahü, jamliip min ahü! Apaiq tsitsü ka thongshi lapkai nong miitu jamlai min kuqwanlot mak she miraq.

²⁷ Jamkhano ngukla Maiq Se ka Awe khushü ngao kra ho raüta, apaiq rasetiim rai saüho ma akhing ka ajeli she. Kiimaq kiitiikaq apaiq maiq loweatek ma apaiq raq jaq shamtaq kra khankhan poksi mikuq.

²⁸ Ngi raq namshiq ma chongtiikang arka tengteng. Ümchaü namshiq sitlan phong arwa maiq wiijamti raq Maiq Se ka mangjong maiqse kunli langkai Hokham jakai akai rai chhi mak wiiwii tsai mak miraq.”