Matthew 15 - ASII LAKDAP Bible (BSI)

Richü Pat Wa Thungtri

¹ Kra jai maq Jerusalem wa Phorisinok nai Thungtri shrinketibi ka Jesuq phana wato, raüta waito,

² “Ümjaqshisetiim raq richü we raq achong kuqthü thungtri ka lang wan mak, jam nguto jin wan tla? Jam nguto tsangshiq jaq ka thungtri na chongtlaq kiikha riikhaqli maq hemak miili tü adung ka phaqsiq tla!”

³ Kiijiishe Jesuq raq treto, “Riita namshiq raq kiiha, Shiikeawe aming kra jin lanta, namshiq maiqmii raq athü han thungtri kra jaram wa lang tlan?

⁴ Shiikeawe riika, ‘Ümnyung nai ümwe ka shreng laq.’ Kiimaq ‘Jurwa anyung nai awe kra sontam tlaq, kriiti ka atsea baiq ronglaq,’ nguta chongtlo.

⁵ Shatmaq namshiq raq nokwe ma shrinkuq tlan, maiq weshi raq anyung lo awe lo kra khrum kewan miitu apaiq jaq na phanshi ra asi miraq. Shatmaq, apaiq raq, ‘O arka Shiikeawe rii she,’ nguta apaiq nü miishe ngu raüla,

⁶ apaiq raq awe ka shreng mak lishe jiimin, jam shut ahü nguta shrinkuq tlan. Akha shrinkuq lanta, Shiikeawe aming kra jin tlan. Kiimaq namshiq maiqmii raq athü thungtri kra lang tlan.

⁷ Namshiq ka mongnam! Shiikeawe raq Isaia shammiwe lümaq, namshiq thaq na ara bom tiithai chongkuq wantaq arka ümchaü riikhaqli she kuwanto!

⁸ ‘Arnok raq ngi ka nü maq lamlam li shreng tlo, shatmaq tsangtsan mong miika shreng mak.

⁹ Tsangshiq raq ngi shomnoq wan tlaq kriika atuli. Tsangshiq raq maiqse thungtri kra shrinkuq raüta nangnga, ngi raq akuq thungtri shrinkuq tiikai nguta tiima tlo!’ ”

Maiqse Tsantsii Tiisheti

¹⁰ Kra ngu raütiishe, Jesuq raq nokwe ka atho na triitam hiato. Raüta tsangshiq ma akha chong- kuqto, “Ara i bomchong ara tiitsang tairong laq. Lanta namtsan mong na shaq ronglaq!

¹¹ Maiqse raq anü mong na jamlai wa thii wan tlaq kra riika, apaiq ka Shiikeawe man na ashe miika tiija mak. Shatmaq, apaiq raq anübok maq jamlai phan bomtsi wa bom tlaq, kriiraq apaiq ka Shiikeawe man na ashe ma tiija tlo.”

¹² Kra tai raüta ajaqshisetiim ka apaiq phana waraüta, “Ümbom ira tai raüta Phorisinok raq athai riito. Kra ümniiraq asap haü ahiq na?” nguta apaiq ma chongto.

¹³ Kiijiishe, Jesuq raq treto, “Shiikeawe, i We ramungtan na siti we raq chhi jang mak phan petsi chong awea kra apaiq raq wiita arang chong maq aphai mirbaiq wan.”

¹⁴ “Tsangshiq Phorisinok miitu ka namshiq naq brorii rongkiq! Tsangshiq ka maiqse makchuk jaqmiiti kong kra shun shea wanti, makchuk welabi kong. Maiq makchuk weshi raq makchuk weshi kra shun shea raüla, tsangnai anai jongri ka khobok niili midia wan.”

¹⁵ Kiijiishe, “Riita, ümniiraq Phorisinok ma shiiton bomtsi maq chongkuq laü kriika jamlai ngo wa. Kra liichum ka naishiq ma tiikho chongkuq laq,” nguta Petar raq apaiq ma bom ka tiitsang waito.

¹⁶ Kiijiishe, Jesuq raq tsangshiq ma chongkuqto, “Namshiq armin ümchaü niitaq, nanok ahinti thaq na holi ka riiman.

¹⁷ Ara jamlai ngo wa kriimin ümchaü niitaq sapman shaq sha? Maiqse raq anübok maq jamlai phan wa phaqsiq tlaq kriika, awok mong na wawan tlo. Awok mong wiishe ka kinphai na dongki tlo.

¹⁸ Shatmaq maiqse nübok mong wa jamlai phan bomtsi wa dong tlaq, kriika maiqse tsan mong wa dong tlo. Maiqse tsan mong wa dong tlaq bomtsi kra raq maiqse ka Shiikeawe man na ashe ma tiija wan tlo.

¹⁹ Akhek ka maiqse tsan mong maq dong tlaq tiima tsantsii abi rüm tlaq kra kata abi pinthum. Maiqse tsan mong na tiima abi rümtlaq kra riili she, maiqse ka matwe ma tiija tlo, maiqchak maiqse rai sra raüta, sipe ma tiija tlo, kiimaq junshüm riirüm sethoq sepii tiija tlo, ahuk arot ma tiija tlo, arot hakhi ma tiija tlo, maiq chongseati ma tiija tlo.

²⁰ Arthun ara raq kata maiqse ka Shiikeawe man na ashe ma tiija tlaq. Shatmaq tsangshiq raq namshiq nangnga jaq ka thungtri riikhaqli maq hetse wan lili raüta tü, adung ka phaqsiq wan lili riichang nguta chongtlaq kra riika, maiqse ka Shiikeawe man na ashe ma tiija mak.”

Maiqnyung Ashi Kamtsantsii

²¹ Kra jai maq Jesuq ka kiiwa tiido wan raüta Tajar nai Sidon chela binjü thotho niishe wawanto.

²² Kiijiishe, kra hong na siti Kanan nok phan jechak nyung ashi ka Jesuq phana kiraüta, “Dawit Se loi, ngi ara mangchan laq! I se jechak se ka tsak raq rom wanto. Apaiq ka pinthum atsi chamchao rai tlo,” nguta tiipaiqnea hoq kito.

²³ Shatmaq Jesuq raq apaiq bom ka tre mak dea riito. Kiijiishe ajaqshisetiim ka waraüta, “Arnyung ara ahin na tiiwa baiq laq! Apaiq ka nashiq jai phan shiiphan maq maiqshak maiqshaq paq laq rat hoto!” nguta chongto.

²⁴ Kiijiishe Jesuq raq treto, “Ngi arka Israilnok phan wa skuse kong amii arki ikha sitlaqti kra thun miituli atiiki.”

²⁵ Kra tai raüta maiq nyung ka Jesuq jichong na bumsaq raütiishe, “Shiilangwe le, ngi ara khrum kuqlaq dea!” nguta noho tin she tiipaiqnea hoqhoto.

²⁶ Kiijiishe Jesuq raq treto, “Nosere dung ka hi kong ma raüke ka thek mak.”

²⁷ “Kra chongtlaü kriika tengto shiilangwe le,” nguta treto. “Shatmaq hi kong riimin la atijong we sia phan hiq na atrok kriika tsun siqtlo!”

²⁸ Kiijiishe Jesuq raq apaiq ma akha treto, “Ümnaq ara kamasham na ajong nyung ashi! Ümniiraq jamlai wa jaütlaü kriika mikuq she.” Krai mren kra akhing niili she ase thatsi ka heasaq she heakito.

Jesuq Raq Maiq Atsiti Pahea Tiiheato

²⁹ Jesuq ka kiimaq tiido wan raüta Gelili thamchum kii binjü nünü kiiniishe wawanto. Raüta apaiq ka hiqlam ashi na ngawato.

³⁰ Kiijiishe maiq kong ka pahea pahea apaiq phana wato. Tsangshiq raq maiq atsi asiti hokkü, makchuk, akü ashii, nütang kiimaq phan phan thup atha tsisiti maiq pahea kra shea wan raüta, Jesuq jichong na phong kuq wanto. Kiimaq Jesuq raq tsangshiq tarü tsisi thun kra wiita chhintsii kuqto.

³¹ Mungmaiqse raq maiq nütangti thun ka abom asa wa liishe, akü ashiiti thun ka nyea dang dang hea shamhea shamjü she, ahok doqshdoqti thun ka akhum ashiim waliishe, makchuk jaqmiiti thun ka tsangmakpo ka rashe kaü chhai wa ikhiishe tiihea kuq wantaq kra chhi raüta pinthum amaoli she riiwanto. Kiimaq tsangshiq raq Israilnok Shiikeawe ka pinthum tiitsam kam wanto.

Maiq Hingblai Ma Tiiphaqsiqto

³² Kiimaq Jesuq raq ajaqshisetiim ka atho na hea raüta chongto, “Ara mungmaiqse kong arma ngi mangchan tsi. Tsangshiq ka ngi rai ümchaü ranaiqtsam she thungtii tlo. Kiimaq ümchaü tsangshiq jaq na aphaq asea chang jam min ahü she. Ngi raq tsangshiq ka akha amang miili ka tiiwa lot mang. Tsangshiq ka jam na walam maq ramtsi raq apit mirwan.”

³³ Kiijiishe, ajaqshisetiim raq, “Riita nashiq raq ara kumtsaiphii maq maiq achu kong arma tiiphaq sia wan chang tü adung ka jambawo mihum rong i?” nguta apaiq ma waito.

³⁴ Kiijiishe, “Namtsam jaq na winsii ka ümchuwa asi?” nguta Jesuq raq tsangshiq ma waito. Kiijiishe, “Phu miishi asi. Kiimaq ngi phusetiim min phanshi asi,” nguta tsangshiq raq treto.

³⁵ Kiijiishe, Jesuq raq mungmaiqse kong kiima, “Namshiq ka hiq na nga rong laq,” nguta thaüto.

³⁶ Kra raütiishe apaiq raq winsii phu miishe nai ngiq shin phusetiim ka ajaq na sham raüta, Shiikeawe ma kechu tumto. Raüta tiiphanto. Raütiishe, ajaqshisetiim ma kuqto. Ajaqshisetiim riishe mungmaiqse ma phea kuqto.

³⁷ Krai mren, tsangshiq tarü raq wok phetak chhaq phaq siqto. Mungmaiqse raq phaqsea tum jai she ajaqshisetiim raq seabung atiichong ka riichom kiita tamlii miishi mato.

³⁸ Kra tiiphaq- sitaq mungmaiqse kong ka, jechak nosere ka weahü maq, maiqwere li dongdii hingblai riito.

³⁹ Phaqsealot jai she, Jesuq raq mungmaiqse kong ka tsangshiq jam niishe tiiwa baiqto. Kiimaq apaiq ka lai ashi na nga raüta Magadan hiq shong nü niishe wawanto.