Matthew 14 - ASII LAKDAP Bible (BSI)

Khamlamketiwe Johan Tsatto

¹ Kiitin choji Gelili wang langti we Herod riika, Jesuq raq jaqsham wan tlaq kra nai traho kuqtlaq tsütsa kra taito.

² Kra tai raüta, apaiq raq, “Apaiq arka Khamlamketi we Johan, ama wa apo wan nong,” nguta, ajaq khong na siti ajong alabi ma chongkuqto. “Kriikha miitiina apaiq khum na atinkhan awang chang jaqsham miitu ningkun asi rüm tlaq ara.”

³ Herod tsan na akha tiima taq kriika, apaiq raq kongkhu ji na Johan ka lap raüta kharü maq kha raüta phaqtek mong na shaq thüto. Apaiq raq Johan phaqtek na shaq wantaq kriika, apaiq raq ano Philip tanyung Herodias kra romphaqtaq kra kha lümaq shaqto.

⁴ Kriikha na kongkhuji na Khamlamketi we Johan raq, “Ümniiraq ümno chhi-nyung Herodias rom wan laü kriika, thungtri na hong mak!” nguta Herod ma tsii chongke apaiq ka sonto.

⁵ Kriikha na Herod raq apaiq ka atsea baiq nguta tanto. Shatmaq apaiq ka Jehudinok mungmaiqse ma hai kha maq, Johan ka tiitsat mak dea tsaqkito. Ara jamkhano ngutiikai ngukla, Jehudinok mungmaiqse raq, Johan ka Shiikeawe shammi we dea nguta kai shrengtlo.

⁶ Shatmaq Herod rawüchhi poi akhing ranaiq na, Herodias se jechakse ka poi lomdamti, maiq ajong ala mungtu shiilangbi thungtii rai tlaq kra man na wiinumto. Apaiq wiinum kra chhi raüta, Herod ka kai chochito.

⁷ Krai mren, nokwe man na, achochisi tsi ma, Herod raq, “I se le, ümniiraq jamlai phan wa ro tlaü, kra jaü laq, ngi raq atiitum lata chongtiikang, ngi riika mikuq kang dongdii!” nguta ase ma tiitum tiita raüta kiq kham kuqto.

⁸ Krai mren, anyung kiq maq, ase raq, apaiq jaq wa, “Khamlamketi we Johan khupo ka ümchaü arjaq winpin na ngi ma kuqlaq!” nguta jaüto.

⁹ Kra tai raüta hokham we ka atsan bito. Shatmaq welabi nai wanwe thung tlaq kra man na, akiq akhamke rea wishe kha maq, ase raq jaütaq kra lamke wa miitu, phenlabi ma aming tatto.

¹⁰ Krai mren, apaiq raq Johan ka phaqtek mong wa tiisebaiqto. Kiimaq akhupo ka tiitap wato.

¹¹ Raüta Johan khupo ka winpin na tiichiim raüta ase jaq niishe kuqto. Ase raq kra dowan raüta anyung jaq niishe tlü kuq wato.

¹² Kra tai raüta, Johan jaqshisetiim ka kiraüta, phaqtek mong wa ama ka lamkito. Raüta saiqsamto. Kiimaq tsangshiq ka Jesuq phana wa raüta, kra tsütsa ka tiitai wato.

Maiq Hingbiingi Ma Tiiphaqsiqto

¹³ Jesuq raq Johan tsütsa kra tairaüta, apaiq ka ajaqshisetiim rai lai ashi maq, kriiba wa tiido wanto. Raüta maiq akaiq kaiq ba niishe wawanto. Shatmaq mungmaiqse raq Jesuq wawan tho kra heraüta, tsangshiq ka maiqmii chela thun maq dong wan rang raüta, apaiq jai ka takii lam maq phan wanto.

¹⁴ Jesuq ka lai maq satki raüta, mungmaiqse phong pahea riiphong rai tlaq kra chhito. Kiimaq apaiq raq tsangshiq kra chhi raüta, atsan mong na tsangshiq miitu pinthum mangchan tsito. Kiimaq apaiq raq tsangshiq phong wa maiq atsi asiti thun sitlaq kra tiihea kuq wanto.

¹⁵ Kra raji ajaqshisetiim ka apaiq phana waraüta chongto, “Ümchaü ka raji she. Kiimaq arba arka rum- nyangkhi. Mungmaiqse ka atiiwa she riibaiq laq. Tsangshiq ka arbinjü na maiqhiq shong sitlaq thun kiina wa raüta, tü adung she mirit phaqsiq wan laq.”

¹⁶ “Tsangshiq ka kiina wawan ngori sha. Namshiq raq khoti tsangshiq ma phanshi ra tiiphaqsiq rong laq!” nguta Jesuq raq treto.

¹⁷ Kiijiishe, “Nashiq jaq niika winsii phu biingi kiimaq ngiq shin phuse nai anai kra lamlam se li,” nguta tsangshiq raq treto.

¹⁸ Kiijiishe, “Ikhiijiika kra thun ka ana i phana lam wan rong liita,” nguta Jesuq raq tsangshiq ka thaüto.

¹⁹ Raütiishe, apaiq raq mungmaiqse thun ka sangphii rü thaq kiina tiingato. Raütiishe apaiq raq winsii phubiingi nai ngiq shin phu nai ka ajaq na shamto. Raüta ra nü na liito. Kiimaq Shiikeawe ma kechu tumto. Raütiishe apaiq raq winsii ka tiiphanto. Raüta ajaqshisetiim ma kuqto. Ajaqshisetiim riishe nokwe ma pheakuqto.

²⁰ Krai mren, maiq wiitarü raq wok phetak chhaq phaqsiqto. Nokwe raq phaqsea lot jai she, ajaqshisetiim raq seabung atiichong kra riichom kiita, tamlii roqshi ri anai tuptup mato.

²¹ Kra nokmaiqse tiiphaqsiq wantaq phong wa jechakre nai nosere thun ka weahü maq, maiqwere lamlam li, maiq ka hingbiingi tin khan riito.

Jesuq Kham Thaq Na Khumto

²² Kra lot jai maq, Jesuq raq ajaqshisetiim ka lai ashi maq apaiq ma kongkhu na, konü thamreko na tiiwalito. Raüta apaiq raq mungmaiqse thun kiimin tsangshiq hiqshong niishe tiiwabaiqto.

²³ Apaiq raq mungmaiqse kra tiiwa baiq jai she, apaiq ka apaiq honhonse hiqlam ashi na achu jaü wa wawanto. Rajiko niishe min, Jesuq ka kiijaq apaiq honhonse li riito.

²⁴ Kiimaq kra akhing na lai ka, thamchum mong jam kiina aluwiq niishe saü wanto. Rahai henghea hairai wan raüta, rahai raq khamtso ka tiiblun wanto. Kra khamtso blun hengwa kra raq, lai ka tsangshiq wachang khaki nü na tiiwa mak maq, athok lulu she tiikap wan nam nam she, thaü baiq wanto.

²⁵ Kiimaq rawüho, ranap nari tsam nai nari trok liipan niishe, Jesuq ka ajaqshisetiim phana thamchum mong thaq maq khum wan raüta wato.

²⁶ Kiimaq tsangshiq ka apaiq thamchum mong thaq na awarai kra chhi raüta, tsangshiq ka phiip raq tsaito. Kiimaq tsangshiq haisi tsi ma, “Liirong laq ara maji kaü watlo!” nguta kiinyii siitrangto.

²⁷ Kiijiishe, tsangshiq bom ka tresaq, “Tsaiji tiijong ronglaq! Naqhai rongkiq. Ngi ahata,” nguta Jesuq raq tsangshiq rai riibom damto.

²⁸ Kiijiishe Petar raq atsaiji ka tiijong saq raüta, “Tatiwe ümniidea jiila ngi ka ümnaq phana kham thaq maq khumho lata kai miitu ngi ma aming kuqlaq,” nguta treto.

²⁹ Kiijiishe, Jesuq raq, “Kira,” nguta thaüto. Krai mren, Petar ka lai mong wa kham thaq na satkisaq raüta, Jesuq pha nü na kham thaq maq khum wanto.

³⁰ Shatmaq apaiq raq rahai henghea hairai wan tlaq kra chhi raüta, apaiq ka ahai riito. Krai mren, apaiq ka kham mong niishe sang rai wanto. Kiijiishe, apaiq ka, “Tatiwe loi, ngi thap wan kang, ngi ara chhii laq!” ngutiishe gito.

³¹ Kiijiishe, Jesuq raq ajaq maq Petar ka hitjoq lapto, raüta, “Ümkam tsantsii ka jaro ranrai tla! Ümniiraq ngi ma kamtsantsii thü wan ka, tsanko tsanki ka jamkho thü tlaü?” nguta sonto.

³² Raüta tsangnai wiita lai mong niishe ngawato. Kiimaq rahai hengwa kiimin, asang she riikito.

³³ Kiijiishe lai mong na ngati ajaqshisetiim thun raq Jesuq ka, “Tengto, ümniika Shiikeawe Se dea!” ngutiishe shomnoqto.

Atsiti Genesareth Hiq Maq Tiiheato

³⁴ Kiimaq tsangshiq ka thamchum jin wan raütiishe, konü thamreko na Genesareth hiq kiiniishe saü wanto.

³⁵ Kiimaq nokmaiqse raq Jesuq saü wato nguta sapto. Krai mren, tsangshiq raq hiqshong tro na siti ma, atsi asiti ka shea wan miitu bom tiiso wanto. Krai mren, hiqshong maiqse raq atsi asiti thun wiita ka Jesuq phana shea wanto.

³⁶ Kiimaq tsangshiq raq Jesuq nangnga atsi asiti thun tarü ma apaiq raq samtlaq samtong jong kaü nise kiijiili jiimin, thansaq tiisham laq nguta tiipaiq neato. Krai mren, maiq ümchu riiwa apaiq kheani na jaq maq than sham wantaq, kriiti ma tsangshiq thatsi ka wiita tiihea kuq wanto.