Matthew 13 - ASII LAKDAP Bible (BSI)

Tsamlai Wantiwe Shiiton

¹ Kra ranaiq niili Jesuq ka jam maq tiido wanto. Kiimaq thamchum kii nü kiina wawanto. Raüta, apaiq ka kiijaq nga raüta, nokmaiqse ma traho bom chongkuq phahoto.

² Shatmaq nokmaiqse phong ka apaiq tro na pahea thungto. Kriikha miishe, apaiq ka lai mong na ngawato. Kiimaq nokmaiqse ka takii na tiito.

³ Apaiq raq tsangshiq ma apaiq traho bomtsi ka phanrap manphan maq shiiton kuq wan raüta phanchan kuqto. Apaiq raq akha chongkuqto, “Man na maiq weshi ka tsamlai wankai nguta wak na kihoto.

⁴ Apaiq raq tsamlai ka wak na wan wanto. Kiiwa tsamlai wiijam ka wakjam na maiqkhum chang lamjong ali mong na rokto. Kriika wushi kong raq tsun rangli tsunsiq wanto.

⁵ Kiimaq tsamlai wiijam ka longpen kaü raikhü na rokto. Kiijaq hiqngam ka apiseli riito. Hiqngam ka apiseli kha maq tsamlai ka jaqlo liipan niili chamto.

⁶ Shatmaq arang ka hiq na atsaü ka wamak dea riito. Kriikha maq rashe kii kiita tsam cham thun ka wiita rashe kii riishe tiishin chaq baiqto.

⁷ Kiimaq tsamlai wiijam ka kiimko rang babaiqhü ba na rokto. Krai mren kiimko rang ka song wan nong raüta, tsamcham thun ka wiita tiijong lap mak kaqbaiqto.

⁸ Shatmaq tsamlai wiijam ka hiq awin wiq ba na rokto. Krai mren tsam ka aheawiq dong manto. Kiiwa tsamnyam wiijam na, nyamshi niili rai shishi shi dongto. Kiimaq tsamnyam wiijam niika, nyamshi niili rairoqtrok rok dongto. Kiimaq tsamnyam wiijam niika, nyamshi niili rairoqtsam tsam dongmanto.”

⁹ Kiimaq Jesuq raq abom ka akha shatto, “Juwa ni asi, kriiti raq tiitsang tairong laq!”

Bom Shiiton Liichum

¹⁰ Kiijiishe, ajaqshisetiim ka Jesuq tho na tiisot nga raüta akha waito, “Ümniiraq nokmaiqse ma traho bom chongkuq laüjaq, jam nguto shiiton bom miili apa chongkuq tlaü?”

¹¹ Kiijiishe Jesuq raq treto, “Ramungtan sap wan anyan phaqchi apaü raüta athü kra namshiq miika kuqto she. Shatmaq tsangshiq miika tiichhikuq mak dea.

¹² Ara jamkhano chongtlaq ngukla, jurwa Shiikeawe raq ara mangjong hiq na apaiq mungtan tiijong wan anyan phaqchi jaqsham tlaq, kra sap tlaq, kriiti miika kra thaq na chat raüta, apa achan ana she hali mikuq nong. Shatmaq jurwa ara anyan phaqchi bomtsi arka atsan na ahü, kriiti jaq wiika, apaiq raq ralangse sap tlaq kriimin, Shiikeawe raq apaiq jaq wa anyea khoti mirwan.

¹³ Ngi raq namshiq ma shiiton bom maq chongkuq tiikang arka, tsangshiq raq chhi shatshat taü miimin chhi mak mirlaq; kiimaq taishat shat taü miimin taimak; kiimaq takwan mak mirlaq nguta chong kuq tiikang.

¹⁴ Ara chongtiikai krai mren, man na Isaia shammi we raq atiithaithü bomchong kriika ümchaü tsangshiq rilung niishe kupi wanto. Apaiq raq akha chongthüto: ‘Arnok riika taishat shat taü miimin takmak miraq; chhi shatshat taü miimin chhi mak miraq.

¹⁵ Tsangshiq khutsai ka abikai kun she. Tsangshiq ni kiimin alan kai kun she. Kiimaq tsangshiq makpo kiimin achukkai kun she. Kra riimak ngu raü jiika tsangshiq raq michhi wan wa. Tsangshiq ni maq mitai wan wa; tsang khutsai na minyap wa. Raüta tsangshiq ka ngi phana miwa wan wa, kiimaq ngi riimin tsangshiq ngarai ka midii kuq wan ha wa,’ nguta Shiikeawe raq chongtlo.”

¹⁶ “Shatmaq namshiq riiwe kla pinthum kopan jonghea! Namshiq mak maq chhi tlan she. Kiimaq nam ni miimin tai tlan she.

¹⁷ Ngi raq chongtiikang arka tengteng. Shiikeawe shammibi pahea raq nai Shiikeawe sengi pahea raq, ümchaü namshiq raq jamlai phan wa chhi tai tlan, arka chhitai hai jaq nguta tsinngin wanto. Shatmaq tsangshiq raq chhi lumak dea riito. Taiwan hai jiilei nguta tsinngin wanto. Shatmaq tai wan lumak dea riito.”

Tsamlai Wanti Shiiton Liichum Chongkuqto

¹⁸ “Ikhla tairong laq. Lanta, ara tsamlai wanti manphan shiiton maq chongkuq wantaq bomtsi liichum ara tak wan ronglaq.

¹⁹ Maiq ümriiti riiwa Ramungtan ka saükito nguta tsütsa ahea bomtsi chongkuq tlaq kra tai tlaq, shatmaq tak mak maq sitlaq, kriiti ka tsamlai lamjong mong na arok kiikha nguta chongtlo. Abi Thawe wa raüta, bomtsi ka tsangshiq tsan mong wa tsunhit lishe tsunsiq tlo.

²⁰ Tsamlai longpen kaü raikhü na roktaq kriika, maiq ümriiti riiwa Shiikeawe bomtsi ka tai raüta chojong chise maq lang tlaq kriiti ka ngutlo.

²¹ Shatmaq bomtsi ka tsangshiq tsan mong na atsaü na shang mak dea. Kriikha maq alu ka kham mak. Krai mren, ümra akhing niiwa, Shiikeawe bomtsi kra miitu maitai chamchao she saü tlaq, kiimaq maiqse raq tsangshiq ka tiichamchao tlaq, kra akhing na tsangshiq raq kamtsantsii ka thaq baiq saq lishe, thaq baiqtlo.

²² Tsamlai kiimko rang babaiqhü ba na arokti kriika, maiq ümriiti riiwa Shiikeawe bomtsi ka tai raüta kamtsantsii ka thü wantlaq. Shatmaq mangjong han-ngam miitu chapa sang ka cham wan raüta kiimaq tsiiq nai nyam ma ranphan tsantsii sang kra cham raüta, tsangshiq kamtsantsii ka tiijong lap mak kaqbaiq tlo. Kriikha miishe tsangshiq kamasham rilung ka atsi ango min ahü miili she mokitlo.

²³ Kiimaq tsamlai hiq win ba na arok kriika, maiq ümriiti riiwa Shiikeawe bomtsi ka tai raüta, atak riiwan tlaq, kriiti ka shiiton tlo. Raüta, kamasham rilung na atsi ango pahea dong man tlo. Raüta tsamnyam nyamshi niili tsamrai ka shishi shi, rairoq trok kiimaq rairoqtsam dong mantlo.”

Bunwong Rü Na Sangcham

²⁴ Jesuq raq tsangshiq ma shiiton manphan bomtsi ashi maq hali phankuq nongto: “Ramungtan ngutlaq ka akha. Bom shiiton maiq weshi raq awak na bunwong lai laihea wiq ka wankito ngu i.

²⁵ Shatmaq rawashi maiq tarü akon shon na, apaiq ma wesang ralii we weshi ka waraüta, kra bunwong wanje rü wakjam kiijaq, maiqchok maiqraq phan sanglai kra wanrat wato. Raüta apaiq ka kiho raü riito.

²⁶ Bunwong ka adong awok choji niishetiq sang kiimin jonglu wan damto.

²⁷ Kra akhing niishe wakchongti we jaqshisetiim ka waraüta tsangtijong we ma waito, ‘Tijong we ümniiraq wak na bunwong lai laiheali wanlaü riimak sha? Riita ara sang ara jambawo chamkita?’

²⁸ Kiijiishe, ‘Arka nashiq ma wesang raliiti raq wan rat wato,’ nguta apaiq raq treto. ‘Riita naishiq raq tsamrü wa sang ka aphai riibaiq phai jo,’ nguta tsangshiq raq waito.

²⁹ ‘Ra mak,’ nguta apaiq raq tsangshiq bom ka treto. ‘Ümchaü ka naqphai rongkiq. Sangphai baiq wan lam maq, bunwong khoti phairat dam jiiq.

³⁰ Bunwong nai sang ka adam niili midong man wan laq. Ajut choji niishetiq ngi raq bunwong hanti ma sang ka kongkhu na tiiphai lata, ate maq wa na mitiichaq baiq wan ha. Kiimaq bunwong ka tiijut wan lata tsamtiip na tum mong niishe mithü wan ha.’ ”

Jüchalai Maq Shiiton

³¹ Kiimahali Jesuq raq tsangshiq ma shiiton ashi maq hali chongkuq nongto: “Ramungtan ngutlaq arka akha. Bom shiiton maiq weshi raq jücha raise raishi ka tsun raüta wak na wankito ngu i.

³² Riita ara jücha lai arka wiitarü thaq na rairanse lai phan pinthum. Shatmaq ümtiikiishe wa acham ka jonglu wan tlaq, kra jücha chong ka sangchong wiitarü thaq na chong jong pinthum she jongkitlo. Kriikha maq, kra chong nyiim tsung mong na wushi riimin achü she hai wantlo.”

Pi Maq Shiiton

³³ Kiimahali Jesuq raq tsangshiq ma shiiton ashi maq hali chongkuq nongto: “Ramungtan ngutlaq arka akha. Bom shiiton ngu i, maiq nyungshi raq, wong tok roqblai ka chung raüta, pi maq tiijali shoq tlaq ikha kata.”

Shiiton Maq Jaram Wa Chongkuqta?

³⁴ Jesuq raq ramungtan rilung lamphan wan bomtsi thun arka mungmaiqse ma shiiton manphan maq siisaq chongphan kuqto. Apaiq raq tsangshiq ma ümchuwa bomtsi chongkuqtaq kriika, shiiton bomtsi maq siisaq chongkuq wanto.

³⁵ Apaiq raq chongkuq wantaq arka, shammi we bomchong kra tiikupi ma nguta chongkuqto. Shammi we raq akha nguta tiithai chongthüto, “Ngi raq tsangshiq ma shiiton bomtsi maq michong kuq ha; ngi raq tsangshiq ma rapha hiqwa miiphü, apaü raüta athü wan bomtsi kra michong kuq ha.”

Bunwong Rü Na Sangcham Liichum Chongkuqto

³⁶ Jesuq ka mungphong thungrai tlaq kra baiq thü raüta, ajam niishe wawanto. Raüta, tapmong na ngawato. Kiijiishe, ajaqshisetiim ka apaiq phana waraüta, “Bunwong rü na sang nguta shiiton chong laü liichum ka naishiq ma chongkuq laq,” nguta apaiq ma bom ka tiitsang waito.

³⁷ Kiijiishe Jesuq raq akha treto, “Tsamlai ahea jangkaiti we ka Maiq Se kra nang ngutlo.

³⁸ Wak ngutlaq kriika mangjong hiq ara nangnga ngutlo. Tsam lai ahea kriika Shiikeawe sengi maiqse sitlaq kra. Sang ngutlaq kriika Thawe rii maiqse mangjong hiq na sitlaq kra chongtlo.

³⁹ Kiimaq sanglai wanwati we wesang ngutlaq kriika thawe kra nangnga ngutlo. Tsamhan akhing ngutlaq kriika phangthum akhing kra nangnga ngutlo. Kiimaq tsamhantibi ngutlaq kriika rasetiim kra nangnga chongtlo.

⁴⁰ Sang ka jamkho riichom raüta wa na chaq baiq wantaq, kiikhiisii hali phangthum akhing ranaiq na Thawe rii maiqse ümchu wa siwan tlaq kra, riichom raüta wa na michaq baiq wan.

⁴¹ Kra akhing na Maiq Se raq apaiq rasetiim ka mitiiki. Raüta rasetiim raq Shiikeawe man na maiqse thungtii wan tlaq kra phong mong wa, maiq ümriiti riiwa nanok ka Shiikeawe wokhong wa, lamjiq nü na sheahotaq, kiimaq tsangshiq maiqmii kiimin lamjiq nü na kihowitaqti thun kra wiita adam na mirchom wan.

⁴² Raüta rasetiim raq tsangshiq thun ka walü henghea nyai rai tlaq kra mong kiiniishe mitiidea chaq baiq wan. Kiijaq tsangshiq ka rongchit wichit, aho asii watrang liishe, walü mong na mikhiim phaq wan.

⁴³ Kra akhing na Shiikeawe sengibi thun ka tsangshiq ma Awe Shiikeawe mungtan na rashe kaü ikha, achhai anyii watrang liishe mishong nga wan. Juwa ni asi, kriiti raq tiitsang tai rong laq!”

Longseng Sha Shiiton

⁴⁴ “Ramungtan ngutlaq ka akha: Maiq weshi raq wak jam na longseng po kaü ashi humratto. Kra hum raüta, apaiq raq kra samhea wiq maq apang raüta thüto. Raütiishe apaiq ka chochikhiq ajam na waraüta, ajam kun wa tachong wiira hupsam ümchuwa sitlaq kra sha raüta, kra kampho maq kra wak dam kriishe riwanto.”

Sengpo Shiiton

⁴⁵ “Kiimahali Ramungtan ngutlaq ka akha: Maiq laopan weshi raq sengpo ara phan ka humha jaq nguta kai konchon ritsiq wanto. Weshi raq sengpo araa phan ka humha jaq nguta kai konchon ritsiq wanto.

⁴⁶ Krai mren, apaiq raq ümra akhing niiwa rahea phan sengpo ashi kra hum jiiq, raüla apaiq ka ajam na jang wan nong raüta, atsiiq anyam ka wiita asha miraq. Raüta kra sha kampho maq ara chongtiikai rahea phan sengpo kriishe miri.”

Chiiq Maq Shiiton

⁴⁷ “Kiimahali Ramungtan ngutlaq ka akha: Ngiq khupti raq tsangshiq chiiq jong kaü kriimaq thamchum kaü mong na khup raüta, phanrap phanrii ngiq ka chiiq mong na tiinyap wanto.

⁴⁸ Raüta tsangshiq chiiq ka ngiq raq mato she angu tinkhan na, ngiq ka wiichiiq tam maq takii niishe mihit wan. Raüta tsangshiq ka adam na minga. Raüta tsangshiq liipan na saqseng riiphea phaq wan lam maq, ngiq heahea phan thun kriika tsangshiq thongkhiiq mong na mithü wan. Kiimaq abi ati asea chang phan riimak kriika pong na tsea raüta abaiq rea li she miraq.

⁴⁹ Ara chongtiikai akhiisii hali phangthum akhing ranaiq niimin miraq. Rasetiim ka kiraüta kechu maiqse phong mong kiiwa, ngarai maiqse thun ka wiita adam na mirchom wan.

⁵⁰ Raüta tsangshiq ka walü tum kaü henghea nyai rai tlaq kra mong niishe wiita mitiidea chaq baiq wan. Kiijaq tsangshiq ka arong awi chitwa trang liishe mihoq phaq trang wan.”

Tri Nye Nai Tri Chü

⁵¹ “Namshiq raq arthun manphan chongkuq tiikang arka tak tlan sha?” nguta Jesuq raq ajaqshisetiim ma waito. “O tak wan tiikai” nguta tsangshiq raq apaiq bom ka treto.

⁵² Kiijiishe Jesuq raq treto, “Ikhiijiika Thungtri shrinketi phong wa, juwa Ramungtan na asengi ma tiija wan tlaq, kriiti ka maiq laopan weshi raq, apaiq jamkun mong na atsiiq anyam tum totlaq kra, tsiiq chü nai tsii nye thun kra lam raüta, damjong na raüphong tlaq ikhiishe chiithe jong she mija wan.”

Najareth Hiqti Raq Jesuq Taomak

⁵³ Jesuq raq arthun shiiton manphan ara chongkuq lot raüta sanha, apaiq ka kriiba wa atiido she riiwanto.

⁵⁴ Raüta apaiq sichang Najareth chela niishe wawanto. Kiimaq apaiq raq kiijaq sinagok na tra hokuq wanto. Kiimaq apaiq traho bomchong taiwanti thun tarü ka kai amao riito. Kriikha maq tsangshiq raq, “Apaiq raq atin khan anyan phaqchi arka jambawo saptsin wan ta nya?” nguta tsangshiq liipan na riibomto. “Kiimaq apaiq raq atin khan awang chang jaqshamtlaq arka jamkho shamtla nya?

⁵⁵ Riita apaiq arka tsiimwe irse riimak sha? Meriq ka anyung riimak sha? Jakob nai Joseph, Simon kiimaq Judas ka apaiq ma anotiim riimak sha?

⁵⁶ Kiimaq anotiim, ashea-nyungtiim thun armin arjaq nashiq hiqshong na sitlaq riimak sha? Riita ikhiijiika apaiq raq atinkhan anyan phaqchi pinja arka jambawo tsin wanta?” nguta bomwito.

⁵⁷ Kra bomtaq krai mren, tsangshiq raq apaiq ka khüphit nüphit li she shipoq baiqto. Kiijiishe Jesuq raq tsangshiq ma chongkuqto, “Shiikeawe shammi ka maiq barapti raq shreng wan tlo. Shatmaq apaiq maiqmii hiqshongti nai apaiq jamtitiim riika shreng mak.”

⁵⁸ Tsangshiq raq apaiq ma kam mak kriikha maq, apaiq raq kiijaq awang chang jaqsham min apa sham mak dea riito.