Matthew 12 - ASII LAKDAP Bible (BSI)

Asii Niitiitsak Ranaiq Miitu Riikhiito

¹ Kiimaq jaqlo siraütli Jesuq nai ajaqshisetiim ka Niitiitsak ranaiq na tsamrü lam maq wanhiq khum alea wan chato. Ajaq- shisetiim ka ramtsi. Kriikha maq tsangshiq raq akhum lam maq, lamkii wa tsam nyam ka toq raüta jaq na notphaq wanto.

² Shatmaq, Phorisinok raq kra chhi raüta, “Nashiq Thungtri na Asii Niitiitsak ranaiq na tsam nyam ka notphaq mai, apii nguta chongtlo. Shatmaq, ümjaqshisetiim raq ara jamlai wa riihota kra liilaq!” nguta Jesuq ma bom ka nyanto.

³ Kiijiishe, Jesuq raq treto, “Namshiq raq Dawit nai akongtitiim raq tsangshiq ka ramtsi raq ahaü akhing ranaiq na jamlai wa phaqsiq wantaq kra, nashiq Thungtri lakdap wa jangshi ra dongdii min phat man dea sha riilan?

⁴ Apaiq nai akongtitiim ka Shiikeawe sichang tiip mong na nyap wato. Raüta honglu na akuq winsii ka phaqto. Kriika Thungtri na apii nguta chongtlo. Kra winsii ka ramwebi riili phaq sia chang.

⁵ Kiimahali Mosheq Thungtri na ramwebi raq Asii Niitiitsak ranaiqtek na, Shiikeawe Shomjam maq Asii Niitiitsak ranaiq thungtri raü ka jin wantlo nguta chongtlo riimak sha? Shatmaq, kra taü maq dongdii min, tsangshiq ka tiishut mak riitlo nguta chongtlo.

⁶ Ngi chongpha. Ara Shomjam arnam miimin ajong, ümchaü arjaq phanshi ra asi.

⁷ Asii bomtsi na, ‘Ngi riika lungwii tsantsii rüm wanti kra lungwii tiikang. Honglu na nyamse takuq tlaq kriika rariq mang!’ nguta chongtlo ahata. Namshiq raq ara Asii bomtsi liichum ara sap han jiika, nanok jamlai min shutphit makti kriika, tiishutphit man mirhan wa.

⁸ Ara jamkhano chongtiikang, Maiq Se sitlaq kriikata Asii Niitiitsak ranaiq thungtri Rümtiwe.”

Jesuq Raq Ajaq Ama Arki We Tiiheato

⁹ Jesuq ka kriiba maq tiido wan raüta sinagok ashi niishe wawanto.

¹⁰ Kra sinagok na ajaq jaqko ka ama arki we maiq weshi min asi riito. Kiijaq ngati maiq wiijamti raq Jesuq ka ashut phan jaqsham kuqto nguta tiishut hai jiilei nguta tiima wanti maiq asi riito, Krai mren, tsangshiq raq, “Riita Asii Niitiitsak ranaiq na atsi asiti tiiheake jaqsham ka nashiq Thungtri na asi sha?” nguta Jesuq ma waito.

¹¹ Kiijiishe, Jesuq raq treto, “Riita, namshiq phong wa maiq weshi ra skuse ashi ka Asii Niitiitsak ranaiq na khobok tsaühea ashi mong na thap wa raü jiiha? Apaiq ka kiraüta, skuse ka khobok mong kriiwa ado mirki riimak sha?

¹² Riita skuse ashi thaq na maiqse ashi sitlaq kriika amiinu pinthum tsinhea riimak sha! Kriikha maq, nashiq Thungtri na Asii Niitiitsak ranaiq niimin, chamchao litkotti maiqse khrumke jaqsham kriika mimai nguta aming asi.”

¹³ Kra bomlot raütiishe, apaiq raq ajaq ama arki we kiima, “Ümjaq ka tlii laq,” nguta thaüto. Krai mren, apaiq riimin ajaq ka tliisaq riito. Kiimaq, ajaq ka jaqko ahea nüti kiikha tiidoqra heasaq li she heakito.

¹⁴ Kriikha miishe, kiijaq nga damti Phorisinok ka ahin na tiidorang she wawanto. Raüta Jesuq kra tsea baiq wan miitu mat-sü tsasü she hong wanto.

Jesuq Ka Shiikeawe Jaqshise

¹⁵ Jesuq raq apaiq tsea miitu matkii she süriitlo nguta tai raüta, apaiq ka kriiba wa ahin niishe tiido wawanto. Kiimaq nokmaiqse kong phong pahea raq apaiq jai ka phan wanto. Apaiq raq tsangshiq phong wa maiq atsi asiti thun ümchuwa sitaq kra wiita kunkun tiihea kuqto.

¹⁶ Kiimaq apaiq raq tsangshiq ma apaiq tsütsa ka maiq ahinti ma naq tiitai rongkiq nguta aming kuqto.

¹⁷ Apaiq raq arthun kaphap jaqsham wantaq arka Shiikeawe raq shammi we Isaia lümaq atiithaithü bom chong kra tiikupi miitu she hongtha wanto.

¹⁸ “Arwe ahata I jaqshise, ngi raq atsea wan ha. Apaiq ka ngi raq kai tlungwii tiikang, kiimaq ngi ka apaiq ma pinthum khoqriiq tiikang. Ngi raq apaiq ma i Wenyi mithü kuq ha. Kiimaq ngi raq kiq tiidea tiikang kra, apaiq raq Pongnok phan tlotli ma, ngi raq tingting jaqsham tiikang kra michong phan kuq wan.

¹⁹ Apaiq ka maiq rai min riikhii lea mak miraq. Kiimaq chiiheawea wea na khum raüta gisii mak miraq.

²⁰ Apaiq raq wepuq weseti ka tiihai miichhai siakaq mak miraq, Kiimaq jehin noreti ka nanshan mak miraq. Apaiq raq tengteng Shiikeawe tri lam phan na mangjong maiqse kra mishpuq lot shaq wiiwii shiichaq wan ruq miraq.

²¹ Kiimaq Pongnok phan maiqse tlotli raq apaiq ma mikam wan.”

Jesuq Ka Beljebul Luwe Nguta Shrato

²² Kra akhing na maiq wiijamti raq abi winji raq akaq, maiq weshi ka amak min achuk kiimaq anü min atang we kra, Jesuq phana shea wanto. Jesuq raq kriiwe thatsi ka tiihea kuqto. Krai mren apaiq ka abom she dongto, kiimaq amakpo kiimin piiqkito.

²³ Jesuq raq awang chang jaqsham wantaq kra chhi raüta, nokmaiqse phong ka kai wangto. Tsangshiq liipan na, “Apaiq arka Dawit Se wa riita nya?” nguta riiwaiso riibomto.

²⁴ Shatmaq, Jesuq raq abi winji raq akaq atsi we kra tiihea kuqto nguta tairaüta, Phorisinok riika, “Apaiq raq ara tsak amii tha jobaiq wantlaq arka Tha Lüwa We Beljebul ningkun maq jobaiqtlo,” nguta treto.

²⁵ Tsangshiq raq jamlai wa tiima tlaq kra heraüta, Jesuq raq tsangshiq ma akha chongto, “Ümra mungti wa maiqmii nai maiqmii liipan na riilong riiliiq maq sitlaq, kra mung ka alu ka tsing mak she ngushat. Kiimahali, ümra chelati wa lo, juta jamti wa tatso wawoli sitlaq, kra ta ka athen she mirki ngushat.

²⁶ Kiimaq, kiikhiisii hali Thawe hokhambi liipan niimin, nokshi raq nokshi rai wesang ralii jaraüta riilong liiq tlaq jiika, Thawe mungtan ka thenkito she ngushat!

²⁷ Namshiq raq ngi ma, ngi raq Tha jobaiq tiikang arka Beljebul ningkun maq jobaiq tiikang nguta huk nyan tlan. Ahea na, riita ngi raq Tha ka Beljebul ningkun maq jobaiq tiikang jiika, namshiq sengibi ma tha jobaiq miitu ningkun ka jurshe wa kuq tla? Namsengibi jaqsham kra riili, namshiq ka ajiq dea bom tlan nguta tiishut tlo!

²⁸ Riimak! Beljebul raq riimak. Shatmaq Shiikeawe Wenyi ningkun maq, ngi raq tha ka jobaiq tiikang. Riita ara jaqsham tiikang ara riili she, Shiikeawe Mungtan ka namshiq khuthaq na saükito she dea nguta hakhi kuq tlo.”

²⁹ “Maiq weshi raq, maiq kuila weshi sitlaq kriika, apaiq jam mong na nyap wa raüta, apaiq ka kongkhu lapho raüta kharü maq khabaiq hü miika, apaiq jamkun mong wa tachong wiira hupsam thun sitlaq kriika jamkho mirunho lot? Apaiq kra kongkhu khabaiq chang miraq. Apaiq khabaiq jai shetiq, ajamkun wa tachong hupsam thun kra mirun wanlot.

³⁰ “Juwa ngi rai pong mak, kriiti ka ngi ngengti. Jurwa ngi rai adam maq maiqse ka Shiikeawe wokhong na shun shea wan dam mak, kriiti raq maiqse ka alu na khoti jobaiq wan tlo ngushat.

³¹ Arkha maq ngi raq chongtiikang. Maiqse raq ahin ngarai jamlai wa tang tlaq kra nai tsangshiq nübok maq ajiq jamlai wa bomtlaq kriika adii baiqke wan mimai. Shatmaq, jurwa Asii Wenyi ma riikhiq ashut bomtlaq, kra ngarai ka ümchaü pat niimin kiimaq jai na pattup pat-sa pat saühotlaq kiijiimin diikuq wan lot mak miraq.

³² Jurwa Maiq Se ma ngengseng kiqshut tlaq, kra ngarai ka adiike mimai. Shatmaq jurwa Asii Wenyi ma ngengseng kiq shuttlaq, kriika ümchaü pat niimin kiimaq jai na pattup pat-sa saüho tlaq akhing niimin diikuq lot mak miraq.

Pechong Nai Atsi Maq Shiiton

³³ “Petsi ka tsihea phan pansea ma jiila, achong kiimin chonghea phan riichang. Achong ka abi phan jiika, atsi kiimin abi miraq. Petsi chong ka chonghea phan sha chongbi phan wa kriika, atsi kriimaq tiisap kitlo.

³⁴ Namshiq ka paüsang nyiqla kong! Namtsan mong na anyaq rüm wan tlanti raq, bomhea ka jamba wa hum lanto mibom han? Maiqse tsan mong na jamlai phan wa sitlaq, kriili apaiq raq anübok maq mibom.

³⁵ Tsantsii asii rümti we riika, abom asa min aheawiq bom tlo. Maiq abi we riika, atsan tsii kiimin abi rüm tlo. Kra phan phan, abom asa kiimin abi ati li bom tlo.”

³⁶ “Ngi raq chongtiikang arka tengteng. Phangthum Khapho Ranaiq na maiq khumtek raq maiqmii nübok maq ümchuwa shiiton hü maq bomtaq, kra bomtsi awea, apaiq raq bom tre chang miraq.

³⁷ Namshiq maiqmii bomtsi kriili kappe ma tiija raüta, Shiikeawe raq namshiq ka ashut maiqse sha, tingting maiqse wa kriishe mipho kuq.”

Amao Chang Klo Ra Nguta Shiichutto

³⁸ Kiitiikaq Thungtri shrinketi wiijamti raq nai Phorisinok raq Jesuq ma, “Shrinketi we, ümniirai ka Shiikeawe asi dea nguta, naishiq ma amao chang jaqsham laüta tiichhike wan ra tlo,” nguta kai shiichut siqto.

³⁹ Shatmaq, kra tai raüta Jesuq raq, “Namshiq ümchaü pat wa maiq arka abi pinthum. Kiimaq ra weahü maiq!” nguta tsangshiq bom ka treto. “Namshiq raq ngi nangnga Shiikeawe ka ngi rai asi dea nguta amao chang jaqsham maq tiichhike wan ra nguta khettot wan tlan nya? Shamkuq mang! Ngi riika amao chang jaqsham maq tiichhikuq mang! Namshiq ma amao chang jaqsham ashi tiichhike chang sitlaq kriika, shammiwe Jona rilung na lea wanta kriili she mitiichhi kuq.

⁴⁰ Jona ka ngiq wok mong na awa watsam anaiq naiqtsam siwantaq kiikhiisii hali, Maiq Se kiimin anaiq naiqtsam awa watsam hiqmong nyang na misi.

⁴¹ Phangthum Khapho Ranaiq na Ninewi mungti ka chap raüta, namshiq kra mishra. Jamkhano ngukla, tsangshiq ka Jona traho bomchong tai raüta, tsangshiq ngarai kra tiidii wanto. Shatmaq, ümchaü ngi raq namshiq ma chongpha. Ümchaü arjaq namshiq makki na juwa sitlaq kriika Jona nam ma ajong!

⁴² Phangthum Khapho Ranaiq na Sheba Hokham Nyung ka chap raüta, namshiq she mishra wan. Jamkhano ngukla, apaiq ka tsangmung lam luhea maq wa raüta Solomon taksma tsii chong bomtsi kra taiwa nguta wato. Riita ngi raq chongtiikang arka tengteng. Ümchaü arjaq namshiq makki na juwa sitlaq kriika Solomon taksma nyan thaq na ajong!”

Abi Winji Ka Ajang Riiwa Nong Tlo

⁴³ “Ümtiikiiwa abi winji ka maiq weshi ra khum wa jobaiq tlaq, apaiq ka khuhü khamhü binjü na achap anga chang ritkai nguta kiho tlo. Shatmaq apaiq raq asi anga chang ka hum mak she raüla,

⁴⁴ atsan mong na akha tiibot tlo, ‘Ngi ka i jam jamchü niili khoti mijang wa nongha.’ Krai mren apaiq ka jang wan nong raüta, ajam ka shaqmii, siirai rai hea, chhii rea je she michhi wa.

⁴⁵ Krai mren, apaiq ka kiho nong raüta, apaiq thaq na bihea abi winji miishi kriishe sheaki raüta, kriiwe khum na she mishang. Kra thun ka shang wa jai she ka, kriiwe rilung ka aphaji na kra nam ma diikiq tiidearok she miraq. Archong kai chang min ahü she miraq. Ara chongtiikang akhiisii hali, ümchaü pat wa Shiikeawe ngengti maiqse rilung kiimin mithenki.”

Jesuq Ma Anyung Nai Anotiim

⁴⁶ Jesuq ka nokwe rai kra riibom rai liipan kiijaq niili, anyung nai anohiitiim ka kiijaq saükito. Tsangshiq kra jamkea na chap raüta nanok ma apaiq rai riihum chang nguta chongto.

⁴⁷ Krai mren nokwe phong wa maiq weshi raq, “Liilaq, ümnyung nai ümnohiitiim ka ümniirai riihumkai aki, kinphai na chap raitlo,” nguta Jesuq maq tiitai chongto.

⁴⁸ Kiijiishe Jesuq raq treto, “Ngi ma anyung ka juwa? Ngi ma i notiim ka ju wa?”

⁴⁹ Kra ngu raütiishe, apaiq raq ajaqshisetiim phanü na tiichhi raütiishe akha nguto, “Liimanta! Arthun ahata ngi ma anyung kiimaq ngi ma anotiim!

⁵⁰ Jurwa i We ramungtan na sitiwe raq achong bomtsi kra tai tlaq, kriiti kata ngi ma i no, i sheanyung kiimaq i nyung.”