Matthew 10 - ASII LAKDAP Bible (BSI)

Jesuq Raq Akiimwetiim Shiikapto

¹ Jesuq raq ajaqshisetiim roqshi ri wenai kra adam na heato. Raüta tsangshiq ma abi shotsai winji thun kra jobaiq kai miitu kiimaq phanrap phanrii thuptsi thatsi sitlaq thun kra tiiheake wan miitu arang kuqto.

² Kiimwebi roqshi ri wenai shong wantaq mang thun ka ara riito: Apha shaqshaq we mang ka Simon, (Apaiq ka Petar ngutiimin ngutlo). Kiimaq apaiq ma anowe ka Andru. Kiimaq Jebedi we senai Jakob nai anowe Johan.

³ Kiimaq Philip nai Bartholomi. Kiimaq Thomas nai Phunta hiti we Mothiq. Kiimaq Alphias se Jakob nai Thadeas.

⁴ Kiimahali maiqmii phan ma tsan tiitsiti we Simon kiimaq Jesuq shaphaqti we Judas Iskariot ri riito.

Roqshi Ri Wenai Ka Trahokai Tiikito

⁵ Ara roqshi ri wenai arma akha tsii chongkuq raüta trahokai tiikito, “Namshiq ka Pongmung maiqse hiqshong na nai Samarianok chela thun niika naqki rongkiq.

⁶ Shatmaq namshiq ka amii arki skuse kong Israilnok phan kra phaniili kirong laq.

⁷ Kirong laq. Lanta, ‘Ramungtan ka aje niishe!’ traho kirongkiq.

⁸ Lanta, atsiti thun ka chhintsii kuq wan rong laq; kiimaq atsai arkiti thun ka ama wa tiijang kuq wan ronglaq. Thupbi thati ashong ashai tsisiti thun kra tiihea kuq rong laq. Kiimaq tsak amii tha thun kra jobaiq ronglaq. Namshiq raq ara ningkun ara phe maq alap han, krai mren namshiq riimin nanok ma phe maq jaq ka shamkuqki rongkiq.

⁹ Namshiq raq lam khoraki ma nguta kampho ka naq rongho rongkiq.

¹⁰ Wanhiq khum lam maq wiho chang thongkhiiq kiimin wiho ra mak. Samtong achan, hokpa achan kiimin rongho ra mak. Kiimaq nyeakii achan kiimin thiho ramak. Minshiiqti raq jaq maq ka lap phaq sia ra dongdii.”

¹¹ “Namshiq ka maiqhiq chela ashi na, lo maiqhiq shong ashi niiwa saüho han jiila, kra hiqshong kiijaq warong laq. Lanta, namshiq tao wanti wandü jam kra rit wan lili rong laq. Lanta, kra hiqshong maq maiqhiq ahin na mitiido wan han shaq wiiwii, maiqmii wanti ta jam kiijiili sirong laq.

¹² Namshiq ka ümtiikiiwa namshiq tao wanti wandü jam na düwan tlan, adü wan lam maq, nam wanti ta ma, ‘Namshiq ma hansang mirlaq,’ nguta ram ramkuq rong laq.

¹³ Namwanti ta raq, namshiq ka ahea wiq maq tao wan kiiphan jiila, namshiq raq ramram shiiman kuq lan kriika, kriita jamkun na misi laq. Shatmaq tsangshiq raq namshiq ka tao mak raüla, namshiq raq ramram kuq tlan achu shiiman ka, ajang li riiho nong rong laq.

¹⁴ Kiimahali, juta jamti riiwa namshiq ka tao wan mak, lo ümriiti chela riiwa namshiq ka tao wan mak riijiiq, lo namshiq raq achongkuq wan han traho bomtsi kra tai wan romak riijiiq, kra riihaü jiila, namshiq raq kriiti miika, jainong shung thü tlii riirong laq. Kiimaq namshiq hok wa botkhulai kra dongdii min, jai nü na anaü riibaiq thü rong laq.

¹⁵ Ngi raq chongtii- kang arka tengteng. Liirong laq, Phangthum Khapho Ranaiq na Shiikeawe raq kra chelati thun thaq na, Sodom chelati nai Gommora chelati miika, phanshi mangchan apa linlin mitiichhi kuq wan!”

Kiimwebi Ka Maiq Raq Mitiichamchao

¹⁶ “Tairong laq! Ngi raq namshiq ka ara mangjong hiq na skuse kong ka shephong mong na tiikai ikha tiiki tiikang. Namshiq ka paü se ikha tsii lamshatmaq si ronglaq. Kiimaq haütaü ikha tsan ninse maq si ronglaq.

¹⁷ Honkamshat rong laq. Namshiq ka maiq raq shumraü kharü maq mikha. Raüta rung na mitiichap wan. Kiimaq tsangshiq raq namshiq ka sinagok thun maq sintsang maq mitsat.

¹⁸ Namshiq ka i sengi kha maq wanghuptibi nai hokhambi rung na mitiichap. Kriika namshiq raq tsangshiq ma nai tsangshiq sengibi ma kiimaq Pongnok phan ma Tsütsa Ahea kra chongke wan miitu.

¹⁹ Ümtiikiiwa namshiq ka rung na tiichap wantlaq, kra akhing na tsangshiq bom ka jamkhii tre chang wa miraq nguta tiima lanta akhiismin naq chapa rongkiq. Kra akhing na namshiq khum tiichhii miitu jamlai bom chong chang wa miraq, kriika Shiikeawe raq namshiq ma achong mirkuq.

²⁰ Jamkhano akha chongtiikang ngukla, namshiq raq bom tre chongkuq tlan bomtsi kriika, namshiq nübok wa adong bomtsi ka riimak. Shatmaq kriika nam We bomtsi Asii Wenyi raq namshiq nübok maq mibom.”

²¹ “Maiq wiijamti raq maiqmii phu ano thun kiimin rung na mihit thüki. Raüta mitiitsat baiq. Kiimaq, kiikhiisii hali awetiim riimin asetiim ka mitiitsat baiq. Kiimaq asetiim riimin anyungwe ka ngeng raüta mitiitsat baiq.

²² Maiq wiitarü raq namshiq ka i mang na makshu rashe mingeng. Shatmaq jurwa atiithum ranaiq na saüli nin wan tlaq, kriiti kli mitiichhii.

²³ Namshiq ka chela ashi maq tiicham chao kiiphan jiila, chela ashi na juho lili ronglaq. Ngi chongpha. Namshiq raq traho bom chongke ka Israil mung chela thun lotli na michong kuq lot han shaq niili Maiq Se kriishe misaüho.”

²⁴ “Lak shrinti ka lak shrinketi we thaq na ajong ka riimak; dise ka atijong we thaq na ajong ka riimak.

²⁵ Kriikha maq chong mang ka ashrinti we pumkhü kra sam raüta siwan miitu chochi khiq maq si chang li. Kiimaq dise riika atijong we pumkhü kra sam raüta sichang. Jamtati we nang santla Tha Mungtu we nguta slailii tlaq jiika, apaiq jamti thun thaq niika kra thaq niimin tiinanpot naolaq mang abi miishe mimang wan!”

Shiikeawe Miili Hailaq

²⁶ “Ara chongtiikang arkha maq, namshiq ka maiqse ma naqhaikiq. Ümchaü jamlai wa apang raüta thüshan wantlaq, kriika alin she mirbaiq. Kiimaq ümchaü ümchu wa apaü ashan raüta thü wantlaq, kra thun ka wiita ra na tiiphong raü rashra she mitiichhi kuq.

²⁷ Ngi raq ümchaü namshiq ma jamlai bom wa kaiq shakshak maq chongkuq tiikang, arka namshiq raq ranaiq shethungpii na chap lanta, maiqse ma chongkuq ronglaq. Ngi raq ümchaü namshiq ma jamlai bom wa, tapmong nyang maq chongkuq tiikang arka, namshiq raq rinkinku maq chap lantiishe chiiriim lanta chongke chang miraq.

²⁸ Maiqse riika han-ngam khum kli mitsat lot; shatmaq wenyi ka tsatlot mak she. Tsangshiq miika naqhai rongkiq. Shatmaq han-ngam nai asak tsitsü kra wamungtan na tiikai lotti we Shiikeawe miili haisong tsantsii ka rüm lanta siwan lili ronglaq.

²⁹ Poisa shii ashi maq wuraichaqse ka anai milap han. Shatmaq kra santla üm We raq kiq tiideahü wiiwii, tsangshiq lang ka mopit pit mak phan.

³⁰ Riita kriimaq thi miika namshiq rilung thii ka tsinhea rahea. Shiikeawe raq namshiq khupo na namkhubin thun kiimin wiita weaje maq sitlo.

³¹ Ara chongtiikang arkha maq, namshiq ka maiqse ma naqhai rongkiq. Shiikeawe maklii na wushi kong ümchuwa siwan tlaq kra thaq na namshiq rilung ka rahea.”

Reraüshi Sha Rewe Wa?

³² “Jurwa nokwe man na apaiq ka i sengi nguta tantan maq siwan tlaq, kriiti miitu ka ngi riimin i We man na, ramungtan maq Phangthum Khapho Ranaiq kholam kholiiq hakhi mikuq wan ha.

³³ Shatmaq jurwa apaiq ka i sengi riimak nguta nokwe man na ngi ka tiishaü baiq wan tlaq, Phangthum Khapho Ranaiq ramungtan maq, i We man na, ngi riimin, kriiti ka atiishaü mirbaiq wan ha.”

Ashram Kai Riimak Atriiphea Kai Kikang

³⁴ “Ngi ka mangjong hiq na maiqshram kai kito nguta naq tiima rongkiq. Riimak. Ngi ka maiq triiphea kai kikang.

³⁵ Ngi ka asetiim ka awetiim rai, jechaksetiim ka anyungtiim rai triingeng kai kikang. Kiimaq anam- nyungtiim ka anyai-chhitiim rai triingeng kai kikang.

³⁶ Maiqse ma wesang ralii jawanti ka apaiq maiqmii jamkun mong wiili midong.

³⁷ “Jurwa anyung nai awe ka ngi thaq na chan raüta lungwii tlaq, kriiti ka i jaqshise ma jawan lot mak. Kiimaq jurwa ase maiqwe se lo jechakse lo ka ngi thaq na chan raüta lungwii wan tlaq, kriiti ka i jaqshise ma jawan lot mak.

³⁸ Kiimaq jurwa maiqmii pumsongkham ka pishat maq i jai phanphan wamak, kriiti ka i jaqshise ma jawan lot mak.

³⁹ Jurwa maiqmii rilung ka tiihang wan la nguta tiima wan tlaq, kriiti raq maiqmii rilung ka atiimo mirbaiq. Shatmaq jurwa maiqmii rilung ka ngi miitu tiimo baiq tlaq, kriiti raq maiqmii rilung ka milap wan.

Shiikeawe Raq Poksi Mikuq

⁴⁰ “Jurwa namshiq tao tlaq kriika ngi tao wan tlo. Kiimaq jurwa ngi tao tlaq, kriika ngi tiikaiti we kra tao tlo.

⁴¹ Jurwa Shiikeawe shammi tao tlaq, kriiti raq shammi we rii wa, kongphiq milap. Jurwa Shiikeawe aming langti tao tlaq, kriiti raq maiqshaq we rii wa poksi milap dam.

⁴² Ngi chongpha. Jurwa ara i jaqshisetiim phong arwa aran pinthum se kiima khamsang kokshise lamlam li tsümkuq raü jiimin, kriiti riimin maiqmii rii poksi ka milap dongdii.”