Mark 9 - ASII LAKDAP Bible (BSI)

¹ Kiimaq apaiq raq tsangshiq ma chongto, “Ngi chongpha, ümchaü arjaq maiq chapshatti phong arwa, wiijamti riika, Shiikeawe mungtan ka ningkun ajong maq saühotlaq kra chhithü hü maq tsai mak miraq.”

Jesuq Khumklai

² Ratrok sijai, Jesuq raq apaiq rai Petar, Jakob kiimaq Johan ka shea raüta, hiqlam ashi achowiq na wawanto. Kiijaq tsangshiq ka tsangshiq honhon li riito. Tsangshiq raq liishat, rarshra liipan niili, Jesuq khum ka klaisaq li, klai kito.

³ Kiimaq adü wa khea ka, lühea pinthum, rashekii chhaitlaq ikha, chhai raito.

⁴ Kiijiishe, ajaqshisetiim atsam raq Elija nai Mosheq ka dongchhaq asaükai chhito. Kiimaq tsangnai ka Jesuq rai bom riichong rea chhito.

⁵ Kiijiishe, Petar raq Jesuq ma, “Shrinketi we, nashiq arjaq chakai arka, pinthum kiim jonghea! Naitsam raq tiipsetiim atsam mihaikai. Ümniirii ashi, Mosheq rii ashi, kiimaq Elija rii ashi,” nguta bomto.

⁶ Tsangtsam ka pinthum akii anyii raili riito. Kriikha maq, Petar raq jamkhii bom chang wa kiimin sap mak riito.

⁷ Kra liipan bala niili, phumda kaü ashi satsaq raüta, tsangshiq ka nyamsaq li she pang wanto. Kiimaq phumda mong wa, “Arka I Se. Ngi raq apaiq pinthum lungwii tiikang. Apaiq bom ka taironglaq!” nguta maiq bom ashi she saükito.

⁸ Kra tai raüta, tsangtsam raq trosaq raüta liito. Shatmaq, maiq ahin ka jumin chhi mak riito. Tsangshiq rai ka Jesuq lamlam li chhito.

⁹ Tsangshiq ka hiqlam maq asatkai lam miishe, “Ümchaü namtsam raq jamlai wa chhi lan, kriika Maiq Se ka ama wa midong wan shaq wiiwii, maiq ahinti jumiimin naq chong rongkiq,” nguta Jesuq raq tsangtsam ma kiqthang bom chongkuqto.

¹⁰ Tsangtsam raq apaiq aming ka tsan na thüto. Shatmaq, tsangtsam liipan na, “Riita ara, ‘Ama wa dong wan,’ ngutlaq arka, jamlai ngo nang wiinya?” nguta riiwaito.

¹¹ Kiimaq tsangshiq raq, “Riita, Thungtri shrinketibi raq Elija ka sinkhu na misaüho nguta, jaram li wa chong tlii nya?” nguta Jesuq ma waito.

¹² Apaiq raq treto, “Tengto. Elija ka sinkhu na phanrap tiijemeho kitlo. Shatmaq, Asii Bomtsi na Maiq Se ka pinthum mitiichamchao. Raüta maiqse raq apaiq ka ashleq mirbaiq ngutiika jaram wa ngu tla?

¹³ Ngi chongpha. Elija ka asaükai wishe. Kiimaq apaiq miitu Asii Bomtsi na jamkhiiwa waiq thütaq, kra phanphan maiqse raq apaiq ka thophi riiqphi shummii haihii wanto,” nguta chongkuqto.

Jesuq Raq Maiqse Angaqtsi Tiiheato

¹⁴ Tsangshiq ka ajaqshisetiim abiti thun kra phaniishe saühoto. Tsangshiq raq lohokiita, ajaqshisetiim thun tro niika, nokmaiqse phong ka pahea riitam rai lohoto. Kiimaq Thungtri shrinketibi phong wa wiijamti ka tsangshiq rai arkhii rai lohoto.

¹⁵ Nokmaiqse phong raq, Jesuq ka chhi raüta, awang rai she riito. Kiimaq apaiq phana ju trang raüta, apaiq ka taoto.

¹⁶ Jesuq raq ajaqshisetiim ma, “Namshiq ka tsangshiq rai jam lai bom riichong lanto riikhii rai lan?” nguta waito.

¹⁷ Kra tai raüta, maiqphong mong wa weshi raq, treto, “Shrinketi we, ngi raq i se ka ümphana shea wan kang. Apaiq ka nütang tha raq rom wanto. Kriikha maq, abom min bomlot mak.

¹⁸ Atsi adong bala ka, tha raq no ka hiq na tiikü miilii liiq baiqtlo. Raüla, anü maq atho wum she dong tlo. Kiimaq arong awi tiichit watrang liishe bumki tlo. Kiimaq ahan ka wiipumtam, pepan ikhiishe tsindang lakok laki tlo. Ngi raq ümjaqshisetiim ma, tha ka jokuq ronglaq nguta, tiipaiqnea kang. Shatmaq, tsangshiq raq jokuqlot mak riito!”

¹⁹ Jesuq raq tsangshiq ma nguto, “Namshiq ara kamtsantsii thü man! Ngi ka namshiq raili siwan ruq sha misi ha? Ngi raq namshiq tiinan shan kriika jam riim mo minin ha? No ka ana shea wan laq!”

²⁰ Kiijiishe, tsangshiq raq no ka Jesuq phana shea wanto. No khum wa tha raq, Jesuq ka chhi raüta, no ka mok wan saq li hiq na riwantlii akap atsea, anü maq atho wum dong wa liishe phehoto.

²¹ Kra chhi raüta Jesuq raq, “No ara ümtincho phü atsi wa?” nguta awe ma waito. Awe raq, “Noseji miiphü,” nguta treto.

²² “Apaiq ka jang pahea tha raq wa na liiqbaiq raüta, nai kham na liiq baiq raüta, atsea baiq tanto. Ümniiraq lot haü jiika, naishiq ara mangchan kuq phiidea!” nguta tiipaiqneato.

²³ Jesuq raq treto, “Tengto, ümniiraq Shiikeawe ma kam haü jiila! Ümniiraq kam haü jiila, phanrap milot haü!”

²⁴ Kiijiishe, awe raq tresaq, “Ngi kamtiikang. Shatmaq ajom. I kamtsantsii ara tiijong kuqlaq!” nguta Jesuq bom ka treto.

²⁵ Jesuq raq maiqphong ka, tsangshiq tho niishe riitsap rai wan chhito. Kriikha maq, “Ümnaq nibii nai nütang tha. Ara no khum arwa dongho tlo laq. Ümniika ümtiikiimin ara no khum na jangwa nong maimak she!” nguta apaiq raq tha ka jobaiqto.

²⁶ Krai mren, tha ka agilülü sii raito. Kiimaq no ka tiimalaq bok wanto. Raüta, no khum wa donghoto. No ka ama ikhiishe hiq na bumkito. Kra chhi raüta tarü raq, “Tsaikito she!” nguta bomto.

²⁷ Shatmaq, Jesuq raq no ka ajaq maq sham raüta tiichapto. Krai mren, no ka chapto.

²⁸ Jesuq ka jam mong na wawan jai she, tsangshiq laqlaq na, ajaqshisetiim raq, “Naishiq raq tha ka jamkhii riito jobaiq lot mai riikai?” nguta apaiq ma waito.

²⁹ Jesuq raq, “Akhnok tha arka, achu jaü ningkun miitiq jobaiq chang. Laihin ningkun maq tang chang ka riimak,” nguta apaiq raq treto.

Apaiq Tsai Lam Thongshi Ri Chongto

³⁰ Jesuq nai ajaqshisetiim ka kiimaq tiido wan raüta, Gelili wang lam maq wawanto. Jesuq raq apaiq ümbano sitlaq kra jumiimin tiihe romak riito.

³¹ Jamkhano ngukla, apaiq raq ajaqshisetiim ma tsii chongke chang riito. Apaiq raq tsangshiq ma chongto, “Maiq Se ka maiqjaq mong na mikuq baiq. Tsangshiq raq apaiq ka atsea mirbaiq. Shatmaq, apaiq ka ranaiqtsam jai maq, adong mirwan nong.”

³² Shatmaq, tsangshiq raq ara tsiichong kuq wantaq kriika taklot mak dea riito. Kiimaq bom ka apaiq ma tiitsang wainong miimin khumak ahai riito.

Juwa Ajong Pinthum?

³³ Tsangshiq ka Kaparniam niishe saüto. Kiimaq tapmong na ngawa raütiishe, Jesuq raq ajaqshisetiim ma waito, “Namshiq ka lam maq jamlai riichong lanto riikhii rai wan lan?”

³⁴ Shatmaq, tsangshiq raq abom ka trelot mak dea riito. Jamkhano ngukla, tsangshiq liipan na, juwa ajong pinthum nguta lam maq riichong raüta, riikhii rai wanto.

³⁵ Jesuq ka anga raüta, ajaqshisetiim roqshi ri wenai ka apaiq tho na triitam heato. Raüta chongkuqto, “Juwa maiqla pinthum ma jawan ro tlaq, kriiti ka tarü thaq, aran pinthum ma jaraa tlo. Kiimaq tarü jaqshi ma jawan ra tlo.”

³⁶ Kra ngu raütiishe, apaiq raq nonose ashi ka tsangshiq tarü khaki na tiichapto. Raüta, apaiq raq no ka pom raüta, tsangshiq ma chongto,

³⁷ “Jurwa ara nonosetiim phong arwa ashi i mang na tao tlaq, kriika ngi tao tlo ngushat. Kiimaq jurwa, ngi tao tlaq, kriika ngi tiikaiti we kra tao ma taitlo.”

Namshiq Ngeng Makti Ka Namkongti

³⁸ Johan raq apaiq ma chongto, “Shrinketi we, naishiq raq maiq weshi ka ümmang maq maiqdü wa tha jobaiq rea chhi kai. Naishiq raq apaiq ka atiiwin riikai. Jamkhano ngukla, apaiq ka nashiq phung wa riimak!”

³⁹ Jesuq raq tsangshiq ma treto, “Apaiq ka naq tiiwin rongkiq. Jamkhano ngukla, jurwa i mang maq awang chang jaqsham tlaq, kriika ngi ma abi ka bom mak miraq.

⁴⁰ Jurwa nashiq ngeng mak, kriika nashiq kongti.

⁴¹ Ngi chong pha tiitsang tai ronglaq. Jurwa namshiq ka i sengi nguta, khamsang kokshi tsümkuq tlaq, kriiti raq dongdii min, apaiq rii poksi ka milap.”

Maiq Ngarai Na Tiideati Ma Tsii Chong

⁴² “Kiimaq ara ngi ma kamtlaq nosere phong arwa, jurwa weshi kamtsantsii kra tiichhan baiq tlaq, kriiti ka, adangkong na longkaü jonghea ashi paq kuq raüta, apaiq ka sammoktra jü mong na tiidea baiq raüta, tsai kai riiwe khoti ahea miraq.

⁴³ Riita, ara chongtiikai arai mren, ümjaq jaqko raq ümkam tsantsii kra tiichhan baiq kiiphaü la, atap khoti riibaiq laq! Jaqnai wiita maq, wamungtan na pattup pat-sa matki mak phan wa na khiim wan nam miika, jaqko miili jiimin, ramungtan na atra siwan riiwe ka ahea.

⁴⁴ Kiijaq, ‘tsangshiq phaqti ajong phong ka ümtiikiimin tsaimak phan, kiimaq tsangshiq khiimtlaq wa kiimin ümtiikiimin matki mak phan.’

⁴⁵ Kiimaq ümhokpe raq, ümkam tsantsii ka tiichhan baiq kiiphaü la, ümhok hokko kriika atap li riibaiq laq! Hoknai wiita maq, wamungtan na dea wan nam miika, hokko miili jiimin, ramungtan na atra siwa ka ahea.

⁴⁶ Kiijaq, ‘tsangshiq phaqti ajong phong ka ümtiikiimin tsaimak phan, kiimaq tsangshiq khiimtlaq wa kiimin ümtiikiimin mat mak phan.’

⁴⁷ Kiimaq, ümmak po raq, ümkam tsantsii ka tiichhan baiq kiiphaü la, alat li riibaiq laq! Maknai wiita maq, wamungtan na dea wan nam miika, makko miili jiimin, ramungtan na atra siwan ka ahea.

⁴⁸ Wamungtan niika ‘tsangshiq ngam phaq wanti ajong phong ka pattup tsai mak phan. Kiimaq tsangshiq khiim chang walü ka, pattup pat-sa matki mak phan, nyai ruq li miraq.’ ”

⁴⁹ “Alu ngamrea ka shum maq tiisii tlaq ikha, maiqse angu tarü ka, wa maq tiikhiim raüta michen wan.”

⁵⁰ “Shum ka asum. Shatmaq, asum she khoiki raüka, thongshi hali shum ma jamkho mitiija nong?” “Namshiq liipan na, riilung riiwii shum maq tiisum lanta, shongnga rong laq. Kiimaq namshiq khu asang maq sirong laq.”