Mark 8 - ASII LAKDAP Bible (BSI)

Maiq Hingbiingi Ma Tiiphaqsiqto

¹ Kiimaq jangshi ri hali nokmaiqse ka pahea, apaiq phana wato. Mungmaiqse jaq na aphaqsea chang ka jam min ahü she chhi raüta, Jesuq raq ajaqshisetiim ka hea raüta chongto,

² “Mungmaiqse ma ngi mangchan tsi. Ümchaü ranaiq tsam she, tsangshiq ka ngi rai haito. Ümchaü tsangshiq jaq na lamsea ka ahü she.

³ Tsangshiq ka amang maq tiiwa ha jiila, lam maq ramtsi raq ahaü mirwan. Tsangshiq phong wa wiijamti ka, lam luhea wachang.”

⁴ Ajaqshisetiim raq apaiq ma, “Riita, ara kumtsaiphii maq, mungmaiqse achu arma tiiphaqsea chang dung ka jambawo mihum rong i?” nguta waito.

⁵ Kiijiishe Jesuq raq, “Namtsam jaq na ümchaü winsii thop ümchuwa asi?” nguta tsangshiq ma waito. “Thop miishi asi,” nguta tsangshiq raq treto.

⁶ Kiijiishe, apaiq raq, “Tarü anga ronglaq,” nguta mungmaiqse ka tiingato. Raüta, apaiq raq winsii thop miishi ka, ajaq na do raüta, Shiikeawe ma kechu tumto. Raüta, winsii ka tiiphanto. Kiimaq ajaqshisetiim ma, winsii ka mungmaiqse ma pheakuq ronglaq nguta kuqto. Krai mren, ajaqshisetiim raq, winsii ka mungmaiqse ma pheakuqto.

⁷ Tsangshiq jaq na ngiq shin phusetiim min asi riito. Jesuq raq kra miitu min, Shiikeawe ma kechu tumto. Raüta, ajaqshisetiim ma kriimin mungmaiqse ma pheakuq ronglaq nguta kuqto.

⁸ Krai mren, nokmaiqse tarü raq phetak chhaq phaqsiqto. Tsangshiq raq seabung winsii bun kra riichom kiita, tamlii miishi mali riito.

⁹ Kiimaq kiijaq mungmaiqse tiiphaqsiqtaq kriika, hingblai tin khan riito. Raütiishe, Jesuq raq mungmaiqse ka tiiwa baiqto.

¹⁰ Kiimaq tlothit li she, apaiq ka ajaqshisetiim rai lai na ngawato. Raüta, Dalmanutha wang nü na wawanto.

Awang Chang Jaqsham Tiichhi Kuq Mak

¹¹ Phorisinok wiijamti ka Jesuq phana wato. Raüta, apaiq rai arkhii she riito. Tsangshiq raq apaiq ka tsangshiq thiikho na tiithapro. Tsangshiq kho na tiithap ma nguta, “Ümniika Shiikeawe jaqshi se dea jiila, awang chang jaqsham laüta tiichhi kuq liina,” nguta apaiq ka thaüto.

¹² Shatmaq, Jesuq raq, atsitsü ka atsaü maq tiijang hea raüta, “Ümchaü pat wa maiqse raq awang chang jaqsham ka jaram wa rit tla? Ngi chongpha, kriika tiichhi kuq mak! Akhnok maiqse miika, tiichhi kuqmak!” nguta tsangshiq bom ka treto.

¹³ Apaiq ka kiiwa ajaqshisetiim rai tiido wanto. Raüta lai na ngawato. Kiimaq konü tham reko niishe wawanto.

Phorisinok Nai Herod Pithob

¹⁴ Ajaqshisetiim raq lamsea rii winsii howan ka alaq riithüto. Tsangshiq jaq na lai niika thopshi laqlaqseli riito.

¹⁵ Jesuq raq tsangshiq ma, “Namshiq ka Phorisinok nai Herod pithob kiima hon kamshat maq sirong liijo,” nguta tsii chongkuqto.

¹⁶ Kra tairaüta, “Apaiq raq ara chongtlaq arka, nashiq raq winsii howan mai dea riikaita chongtlo sham,” nguta tsangshiq liipan na riichongto.

¹⁷ Jesuq raq tsangshiq liipan na riibom ka heraütiishe waito, “Winsii ahü ngutiika jawa riichongrai tlan? Namshiq raq ümchaü niitaq sapman, takman sha? Namshiq khutsai ka ahü sha?

¹⁸ Namshiq mak asi riimak sha? Chhi man sha? Namni asi riimak sha? Taiman sha? Namshiq raq ümchaü niitaq tiitsang man sha?

¹⁹ Ngi raq maiq hingbiingi ma, winsii phubiingi tiiphan kuq kang ira, namtsan na ahü she sha? Namshiq raq seabung winsii bun archom han raq tamlii ümchuwa mataq ira?” “Tamlii roqshi ri anai mali riito,” nguta tsangshiq raq treto.

²⁰ “Kiimaq ngi raq, maiq hingblai ma winsii phu miishi tiiphan kuq kang irha? Seabung bun archom han raq tamlii ümchuwa mataq ira?” nguta Jesuq raq tsangshiq ma waito. “Tamlii miishi mali riito,” nguta tsangshiq raq treto.

²¹ “Riita, ümchaü niitaq namshiq riika takman shaq li sha?” nguta apaiq raq tsangshiq ma bom ka waito.

Makchuk We Bethsaida Maq Tiiheato

²² Tsangshiq ka Bethsaida hiqshong na saü wanto. Kiijaq maiq wiijamti raq makchuk we ashi ka Jesuq phana shea wanto. Kiimaq Jesuq ma adü na jaq maq shamlaq nguta tiipaiqneato.

²³ Jesuq raq amii we ka ajaq maq hit raüta, chiiphai na sheahoto. Raüta amii we mak na tho maq tho raüta, Jesuq raq ajaq maq amak na shamto kata. Raüta waito, “Phanshi ra chhi tlaü sha?”

²⁴ Kriiwe raq lii raüta, “Maiq ka chhitiikang. Shatmaq, tsangshiq ka pero ikha khumtlo,” nguta treto.

²⁵ Kiijiishe Jesuq raq ajaq maq, amak na hali sham nongto. Kra lak na amii we riika, tsangrakrak miishe liito. Kiimaq amak ka khangriirii she hea wanto. Kiimaq apaiq raq phanrap ka khangriiriihea she chhi wanto.

²⁶ Jesuq raq apaiq ma, “Hiqshong na naq jang wakiq she liijo,” nguta chongkuq raüta, apaiq ka ajam niishe tiiwa baiqto.

Petar Raq Jesuq Ka Khristo Nguta Phoqto

²⁷ Kra lot jai she, Jesuq nai ajaqshisetiim ka Sisiria hong na Philipia chela tho na, maiqhiq shong thun sitlaq kiiniishe wawanto. Awa lam maq, apaiq raq tsangshiq ma, “Chongrong liita, mungmaiqse raq ngi ka ju nguto ngu tla?” nguta tsangshiq ma waito.

²⁸ Tsangshiq raq, “Wiijamti riika, Khamlamketi we Johan nguta ngutlo. Kiimaq wiijam ngiika, Elija ngutlo. Kiimaq wiijamti riika, Shiikeawe shammibi phong wa weshi powato nguta riichongtlo,” nguta apaiq bom ka treto.

²⁹ Apaiq raq hali tsangshiq ma wainongto, “Riita, namshiq riiha? Namshiq raq ngi ka, ju nguto tiima tlan?” Kiijiishe, Petar raq, “Ümniika Khristo,” nguta treto.

³⁰ Kiijiishe Jesuq raq, “Ngi ka Khristo nguta ju miimin naq chong rongkiq,” nguta tsangshiq ma kiq thang bom chongkuqto.

Apaiq Chamchao Nai Apaiq Tsai Chongto

³¹ Kiijiishe, Jesuq raq ajaqshisetiim ma tsii ka akhiishe chongkuq hoto: “Maiq Se ka pinthum chamchao ra dongdii. Kiimaq welabi, ramwe jongbi, kiimaq Thungtri shrinketibi raq apaiq ka mitiishaü baiq. Apaiq ka atsea mirbaiq. Shatmaq, ranaiqtsam jai maq apaiq ka adong mirwan nong.”

³² Apaiq raq tsangshiq ma, ara bomtsi arka khangriri hea maq chongkuqto. Kra tairaüta, Petar raq apaiq ka pongba na sheaho raüta sonto.

³³ Shatmaq, Jesuq raq ajaqshisetiim phanü na lii raüta, “Soitan, ümniika i tho arwa tiijin tlo laq. Ümniiraq tiima tlaü ka Shiikeawe nü wa riimak. Kriika maiqse tiima kata!” nguta Petar ka siato.

³⁴ Kra raütiishe, Jesuq raq mungmaiqse nai ajaqshisetiim ka apaiq tho niishe hiato. Raüta tsangshiq ma akha chongkuqto, “Jurwa i jai phan wan tiima tlaq, apaiq raq maiqmii rilung ka alaq baiq ra tlo. Raüta, apaiq pumsongkham ka pishat maq, i jai phan phan wawan ra tlo.

³⁵ Jurwa atsitsü ka tiichhii tiima tlaq, kriiti raq apaiq rilung ka atiimo mirbaiq. Shatmaq, jurwa apaiq rilung ka i jai phan miitu nai Tsütsa Ahea ara chongke miitu, tiimo baiq tlaq, kriiti raq apaiq rilung ka mitiichhii.

³⁶ Maiq ashi raq mangjong hiq tlotli ka lap raü jiimin, apaiq rilung ka tiimo baiq raü jiika, apaiq ma jamlai liip wa misi? Jamliip min ahü!

³⁷ Apaiq raq arilung ka thongshi lapki lot mak she.

³⁸ Ümchaü pat ara sethoq sepii ja pat, kiimaq abi ngarai lamphan pat. Riita, akha pat abi akhing na, jurwa ngi ma kam ma ajiasi riiwan tlaq, kiimaq, i bom chong ara nanok ma chongke miitu ajiasi riitlaq, kriiti miika, ümtiikiiwa Maiq Se ka, Awe khushü liliim ngao jonghea kra ho raüta, asii rasetiim rai she saüho tlaq, kra akhing na, apaiq raq kriiwe ka atiishaü mirbaiq.”