Mark 7 - ASII LAKDAP Bible (BSI)

Richüwe Tri

¹ Phorisinok wiijamti nai Jerusalem- lem wa awa Thungtri shrinketibi ka, Jesuq tro na riitam ngato.

² Tsangshiq raq Jesuq jaqshisetiim phong wa, wiijamti raq tsangshiq jaq ka thungtri na chongtlaq kra phanphan hehü, jaq ka apii, ashe miili tsangshiq tü adung ka phaqsea kra chhito. Tsangshiq jaq ashe ngutlaq kriika, Phorisinok raq thungtri chongkuq tlaq kra tiiphan phan hemak nguta ngo nangnga ngutlo.

³ (Jehudi phan ngusaq riika, kiimaq akhek ka Phorisinok riika, tsangshiq ma richü we raq akuq thü jaq hewan thungtri kra tsapkapkap maq langtlo. Tsangshiq jaq ka thungtri na chongtlaq kra phanphan hemak wiiwii, tsangshiq raq lairap ka phaqsiq mak phan.

⁴ Kiimaq kejat wa aphaq asea chang jamlai phan wa lam wan tlaq, kriimin riikhaqli thungtri maq hewan hü miika, nü na thii mak phan. Kiimaq arthaq niimin thung alai, apii chang pahea asi riito; kok, tak, nairai winpin kiimaq changdü kiimaq changdü thun kriika, thungtri maq riikhaqli heraütiitiq langtlo.)

⁵ Kra ningkhan, Phorisinok nai Thungtri shrinketibi raq, “Ümjaqshisetiim raq jam nguto, richü we raq akuq thü Thungtri na chongtlaq kra phanphan, tsangshiq jaq ka hehü, ashe miili, lairap ka phaqsiq wan tla?” nguta Jesuq ma waito.

⁶ Jesuq raq treto, “Isaia shammi we raq namshiq khuthaq na tiithai thütaq kriika, ümchaü hong wato she dea! Apaiq raq namshiq ka mongnam nok nguta chongthüto. Apaiq raq chongto: ‘Shiikeawe raq nguto, Arnok raq ngi ka tsang nü miili shreng tlo. Shatmaq tsangtsan ka ngi rai riimak.

⁷ Tsangshiq raq ngi shomnoq tlaq kriika liip hü. Tsangshiq maiqmii raq athü tri ka, Ngi raq akuq ha tri ikha shrinkuq tlo!’

⁸ Kiimahali Jesuq raq, “Namshiq raq Shiikeawe aming ka no na tsuqbaiq lanta, richü we tri kra lang tlan,” nguta tsangshiq ma nguto.

⁹ Kiimahali, Jesuq raq bom ka akha chongto, “Namshiq ka pinthum khonglaq lanta, maiqmii tri raü tu kra shreng tlan. Lanta, Shiikeawe aming ka no na tsuqbaiq tlan.

¹⁰ Mosheq riika, ‘Namnyung nai namwe ka shreng ronglaq; kiimaq jurwa anyung lo awe lo ma, manson kiqsü, abi bom tlaq, kriiti ka atsea baiq chang,’ nguta aming kuqthüto.

¹¹ Shatmaq, ümchaü namshiq riika, maiq weshi raq, ajaq na jamlai phan wa hupsam asi kiimaq, awe lo anyung lo, ka mikhrum wan lot. Shatmaq, apaiq raq, ‘Arka Shiikeawe ma alu na ake wishe,’ nguta ngu raü jiila,

¹² apaiq raq anyungwe ka khrum kuq mak li she jiimin, apaiq ma jam ashut ahü, nguta shrinkuq tlan.

¹³ Akha, namshiq raq nanok ma tlang kuq tlan tri pahea asi, kra raq Shiikeawe aming ka jintlo. Ara chongtiikang akha, namshiq raq ajiq pahea tlangkuq tlan.”

Maiqse Tsantsii Tiisheti

¹⁴ Kiijiishe Jesuq raq mungmaiqse ka atho na hali hea nong raüta chong kuqto, “Namshiq tarü raq, i bom chong ara tiitsang tairong laq. Lanta tak wan ronglaq.

¹⁵ Maiqse raq tri riikhaqli maq, jaq hehü miili, lairap phaqsiq tlaq, kra riika maiqse tsantsii ka tiishe mak. Shatmaq, maiqse tsan mong na ashe ashi tiima rüm tlaq, kra raq tiina, maiqse tsantsii tiishe tlaq kra.

¹⁶ Juwa ni asi, kriiti raq tiitsang tai ronglaq!”

¹⁷ Apaiq raq mungmaiqse ka baiqthü raüta, jam mong na wawan jai she, ajaqshisetiim raq apaiq ma kra liichum ka tru chongkuq laq nguta waito.

¹⁸ Kiijiishe Jesuq raq tsangshiq ma, “Namtsam armin, mungmaiqse thaq na setsii ka riiman nya? Namtsam riimin tak man sha? Maiqse khum ka anü maq thii tlaq kra riika, tiishe shi mak.

¹⁹ Anü maq thii tlaq kriika, atsan mong niika wamak. Shatmaq, awok na waraüta, kiiwa kinphai na kiho tlo.” (Jesuq raq ara bomtsi chongkuqtaq arka, aphaq asea chang ümchuwa sitlaq kriika, apii chang ka ahü nguta ngo riito.)

²⁰ Kiimaq apaiq raq, “Maiqse tsan mong wa dong tlaq kra raq, maiqse tsantsii tiishe shitlo.

²¹ Maiqse tsan mong na sethoq ja, abi tiima, ahuk ja, maiqtsea maiqta tiima,

²² maiqchak rai sra, sükha tsii, kiimaq ahin abi tiima tsantsii rümtlaq thun kra; laopha tsii, raweahü hon aja, makshu rashe tsii, maiq chongsea, ashkong tsii, kiimaq ngila sang jasha rong arai siwan tlaq kra;

²³ arthun chong kai abi hon atsii ahata, maiqse tsan mong wa adong. Kiimaq maiqse tsan mong wa, arthun tiima tsantsii dong tlaq, ara raq tiina, apaiq tsan tsii ka tiishe shitlaq,” nguta tsangshiq ma tsii ka chongkuqto.

Pongnok Phan Nyung Se Tsi Tiiheato

²⁴ Kra miishe Jesuq ka tiido wanto. Raüta, Tajar chela tho binjü niishe wawanto. Apaiq ka maiq jam ashi na dü wato. Kiimaq apaiq ka kiijaq asi nguta maiq ahinti ma tho tiihe romak riito. Shatmaq, apaiq ka tiipaü lot mak.

²⁵ Krai mren, maiqnyung ashi, ase ka tha raq arom wan atsi riito. Kra nyung raq, Jesuq ka kiijaq saü wato nguta tho heraüta, apaiq phana tlothit li saükito. Raüta, ajichong na bumtlii riito.

²⁶ Kra nyung ka Pongnok phan nyung riito. Apaiq ka Siria mung wa Phonesia wang na siti riito. Apaiq raq, Jesuq ma ase khum wa tha ka jokuq liidea nguta tiipaiqnea siqto.

²⁷ Shatmaq, Jesuq raq, “Nosere dung pin ka hi kong ma ümkha akuq no. Nosere ma kongkhu tiiphaq sia chang,” nguta apaiq bom ka treto.

²⁸ Kiijiishe kra nyung raq hali, “Shiilang we, hi kong riimin la nosere seaphan hiq na atiiwii wa tsunsiq tlaq,” nguta Jesuq bom ka treto.

²⁹ Kiijiishe, “Ahea, ikhla. Ümchaü ka ümjam niishe jang wakiq. Ümse khum wa tha ka donghoto she jo!” nguta Jesuq kra nyung bom ka treto.

³⁰ Krai mren, apaiq ka ajam niishe jang wanto. Kiimaq ase ka changdü na awe lowanto. Ase khum wa tha ka akaiho kun she lowanto.

Jesuq Raq Nütang Nibii We Tiiheato

³¹ Kra raütiishe, Jesuq ka Tajar chela binjü ka baiqthü raüta, Sidon hong lam maq kihoto. Raüta, Chela Roqshi hong binjü maq, Gelili Thamchum hong nü niishe wawanto.

³² Kiijaq maiq wiijamti raq, atsiti weshi anü min atang kiimaq ani min abii we kra, Jesuq phana shea wanto. Kiimaq tsangshiq raq, Jesuq nangnga, kriiwe dü na ajaq maq shamlaq nguta, tiipaiqneato.

³³ Kiijiishe, Jesuq raq apaiq ka nokmaiqse phong wa, pongba na apaiq honhonse sheahoto. Raüta, ajaqshi maq, anibok na shamto. Kiimaq atho maq atili na nyat kuqto.

³⁴ Raütiishe, Jesuq raq ra nü na liito. Kiimaq atsaü wiq maq, atsitsü ka tlea hanto. Raüta, kriiwe ma, “Iphatha,” nguta thaüto. Kra liichum ka, “Linbaiq liishe!” nguta ngo riito.

³⁵ Krai mren, atsi ka tiidoqra heasaq li she heakito. Ani bii nai anü tang kra heakito. Krai mren, apaiq ka abom asa waliishe riito.

³⁶ Raütiishe, Jesuq raq nokmaiqse ma, kra tsütsa ka naq riichong rongkiq nguta kiq ka athang riito. Shatmaq, apaiq raq tiiwin kiita khoti miina, apa tsaki wan wan khoti riito.

³⁷ Krai mren, kra tsütsa taiwanti bi tarü ka, pinthum amao riiwanto. “Apaiq riika jaqsham ahea, awang chang siisaq shamtlo!” nguta rin ra wanto. “Apaiq raq nitangti nai nütangti thun dea min wiita she tiihea kuqtlo!” ngutiishe tsaki wanto.