Mark 6 - ASII LAKDAP Bible (BSI)

Najareth Hiqti Raq Jesuq Taomak

¹ Jesuq ka kiimaq ajaqshisetiim rai ahiq shong chela niishe hali jang wan nongto.

² Apaiq raq Asii Niitiitsak ranaiq na, sinagok maq traho bom chongkuqto. Kiijaq nokmaiqse ka pahea asi riito. Kiimaq tsangshiq tarü raq, apaiq traho bom chongke kra tai raüta kai amao riito. Raüta, tsangshiq liipan na, “Riita apaiq raq ara atinkhan phaqchi pinja ara jambawo saptsin wanta nya? Apaiq ma atinkhan taksma tsantsii arka juro shrinkuq wanta nya? Apaiq raq atinkhan awang chang jaqsham kaiwa arka jamkho shamtla nya?

³ Apaiq arka tsiimwe sitlaq ira riimak sha? Anyung ka Meriq riimak sha? Kiimaq anotiim ka Jakob, Joseph, Judas, kiimaq Simon riimak sha? Kiimaq ashea nyungtiim min ajaq sitlaq riimak sha?” nguta tsangshiq liipan na, shipoq khiq lam miili riibomto. Krai mren, tsangshiq raq apaiq ka akhiismin brorii mak miili she, chuphit nüphit shipoq baiqto.

⁴ Kiijiishe, Jesuq raq tsangshiq ma, “Shammi ka barapti raq shrengtlo. Shatmaq, ahiq shongti nai ata awii raq, kiimaq ajamtitiim riika shümü mak miraq,” nguta chongkuqto.

⁵ Apaiq raq kiijaq atsam blai atsiti dü na jaq maq sham raüta, tiihea kuqtaq kli. Kriithaq na chan raüta awang chang jaqsham ahin ka shamkuq mak dea riito.

⁶ Nokwe raq apaiq ma kam mak kra chhi raüta, apaiq ka kai amao riito. Kiimahali, Jesuq ka kra binjü tro na, maiq hiqshong sitlaq thun kiina wato. Raüta, tsangshiq ma trahokuqto.

Ajaqshisetiim Roqshi ri Wenai Trahokai Tiikito

⁷ Apaiq raq ajaqshisetiim roqshi ri wenai ka, adam na triitam hiato. Raüta, tsangshiq ma, tsak amii tha thun kra jobaiq miitu arang kuqto. Raüta, tsangshiq ka wenai nai maq, trahokai tiikito.

⁸ Apaiq raq tsangshiq ma akha aming kuqto, “Namshiq raq wanhiq khum lam chiirit chiikha miitu, jamlai phan min naqho rongkiq. Akhum lam maq thichang nyeakii lamlamli thiho lanta kironglaq. Lamsea min naqhoho rongkiq. Thongkhiiq min naqwiho rongkiq. Kiimaq khiiqliip na kampho min naq rongho rongkiq.

⁹ Pepen hokpa ka paho ronglaq. Shatmaq, samtong achan ka lamho ra mak. Maiqmii khum na samho tlan kli mihong.”

¹⁰ Kiimahali, apaiq raq tsangshiq ma chongto, “Namshiq ka ümra chelati riiwa tao tlaq, maiqhiq ahin na miwa wan han shaq wiiwii ka, kra namwanti we jam kiijiili sirong laq.

¹¹ Namshiq kitlan chelati raq, namshiq ka tao mak nai namshiq raq traho bom chongkuq tlan kra taimak she la riihaü jiila, namhok phi wa, botkhulai kra jai nü na nyi lanta naübaiq thü lantiishe wawan ronglaq. Kriika tsangshiq ma Shiikeawe manson ka asi lii nguta chongthü she!”

¹² Krai mren, tsangshiq ka hiqshong sitlaq thun kiina kiraüta, nokmaiqse ma, tsangshiq ka ngarai lam phan wa, tsantsii klai chang nguta trahokuqto.

¹³ Tsangshiq raq tsak amii tha pahea, maiq dü wa jobaiqto. Kiimaq atsiti thun pahea khum na olip tsai maq nyat kuq raüta, atsi ka tiihea kuqto.

Khamlamketi We Johan Tsaito

¹⁴ Kiimaq, Jesuq raq ümtinkhan wa jaqsham wantaq kra tsa ka, barap binrii niishe nyam wanto. Hokham we Herod riimin arthun tsütsa ka taito. Maiq wiijamti riika, “Apaiq ka Khamlamketi we Johan ira, ama wa powa nongto! Kriikha maq, apaiq raq atinkhan, awang chang jaqshamtlaq ara,” nguta riichongtlo.

¹⁵ Kiimaq, maiq wiijamti raq hali ka, “Apaiq arka Elija,” ngu. Kiimaq maiq ahin wiijamti riika, “Apaiq arka man na richü pat wa shammibi ikha, shammi weshi,” nguta riichongtlo.

¹⁶ Herod raq Jesuq tsa kra tairaüta, “Apaiq arka Khamlamketi we Johan! Ngi raq akhupo tiitap baiqkang we ira. Shatmaq, lumwa hali powa nongto!” nguta bomto.

¹⁷ Herod apaiq raq, Johan ka tlap raüta, jinraü maq tiikha raüta, phaqtek na shaq thüto. Herod raq, ara matkii shong wantaq arka, apaiq raq anochhi nyung Herodias kra rom wantaq, kra kha na tiitsat baiqto. Herodias ka apaiq ma anowe Philip tanyung shatmaq, apaiq raq rom wanto.

¹⁸ Khamlamketi we Johan riika Herod ma, “Ümno chhinyung romho laü kriika, thung na ang mak!” nguta son lili riito.

¹⁹ Arkhana Herodias raq, Khamlamketi we Johan ka kai ngeng siqto. Kiimaq apaiq ka atsea baiq wan ma tan khan wan ruq li riito. Shatmaq, Herod raq liishat kha maq, tsatbaiq wan lot mak dea riito.

²⁰ Herod raq Khamlamketi we Johan ka, mitting maiqse kiimaq kechu maiqse dea ngutiika asap. Krai mren, apaiq ka Johan ma ahaisi ka asi. Kriikha maq, apaiq raq Johan ka phaqtek na, tiiwong kuq shatmaq maq shaq raüta thüto. Apaiq raq Johan traho bomchong kewan kriika tairo tlo. Shatmaq, tai tlaq tek na, atsan mong na kai kotsirak wan lili riitlo.

²¹ Shatmaq ranaiq shi she, Herodias raq atsankhiq tiishi miitu akhing she lapto. Kriika, Herod rawüchhi poi ranaiq. Kra akhing na, Herod raq awokhong na siti, apaiq rai mung rüm damti, asengi ajong alabi, phenlabi wa ajongbi thun, kiimaq Gelili wang wa phukhu welabi thun ma, phaqsea poi jonghea ashi kloto.

²² Kiitiikaq Herodias se, jechakse ka, mungmaiqse man na wiinumto. Ase wiinum kra chhi raüta, Herod nai ajong alabi thun ka kai chochi siqto. Achochi lam maq, hokhamwe raq ase ma, “Ümniiraq jamlai phan wa ro tlaü jaülaq. Ümniiraq ajaü jaü mikuq kang,” nguta ase ma kiqkham kuqto.

²³ Alachong wa paqpaq raüta, ase ma akha nguta kiqkham kuqto, “Atiitum lata ngutiikang, ümniiraq jamlai phan wa ro tlaü jaülaq. Ngi raq mung ka kholiiq jiimin mitiikho kuqkang!” nguta jaqdo jido ase ma chongto.

²⁴ Kiijiishe ase ka anyung phana tlat chhat ju raüta, “Jamlai phan wa mijaüha?” nguta anyung ma waito. “Khamlamketi we Johan khupo kra jaülaq,” nguta anyung raq treto.

²⁵ Krai mren she, ase ka hokham we phana tlothit li jangphat she wanong raüta, “Ngi ma arjaq ümchaü Khamlamketi we Johan khupo ka winpin na kuq laq!” nguta jaüto.

²⁶ Kra tairaüta hokham we tsan ka kai bito. Shatmaq, apaiq raq mungmaiqse man na akiq ka akhamwi she. Kriikha miishe, ase kiq ka tlea lot mak she riito.

²⁷ Krai mren she, apaiq raq phenla weshi ma, Khamlamketi we Johan khupo chum wa miitu aming she kuqto. Krai mren, phenlawe ka phaqtek mong na wa raüta, Khamlamketi we Johan khupo ka tap wato.

²⁸ Raüta, winpin na dowan raüta, jechakse jaq na kuq wato. Kiijiishe ase raq anyung ma hali tlü kuqto.

²⁹ Johan jaqshisetiim raq, ara tsütsa ka tairaüta, ama ka pikito. Raüta saiq samto.

Maiq Hingbiingi Pat Ma Tiiphaqsiqto

³⁰ Akiimwetiim ka traho wanhiq khumrii maq jangwa raütiishe, Jesuq rai riihumto. Kiimaq tsangshiq raq trahokuq wantaq nai shrinkuq wantaq thun tsütsa kra apaiq ma tiitai chong kuqto.

³¹ Maiq ka pahea, riitsap riikhat akiti aki, awati awa ningkhan, Jesuq nai ajaqshisetiim raq dung min phaqsiq lap mak riito. Kriikha miishe, apaiq raq ajaqshisetiim ma, “Nashiq ka nashiq honhon se, maiq akaiqkaiq ba na kiho rongpha. Laita, kiijaq namshiq min niitiitsak nga ronglaq,” nguta chongto.

³² Krai mren, tsangshiq ka lai ashi maq, maiq akaiqkaiq ba na wawan nguta wawanto.

³³ Shatmaq, maiq pahea raq, tsangshiq wawan ka chhito. Kiimaq, tsangshiq ka juwa kra sapto. Kra ningkhan, mungmaiqse raq maiqmii chela rap maq, Jesuq nai ajaqshisetiim ma sinkhu na, takii lam maq juraüta, Jesuq nai ajaqshisetiim wachang hiq ba nü kiiniishe saüho lito.

³⁴ Jesuq ka lai maq satki raüta, mungmaiqse pahea riiphong rai tlaq kra chhito. Apaiq raq tsangshiq ka arümti ahü skuse kong ikha chhi raüta, tsangshiq miitu atsan mong na, kai mangchan tsito. Kra ningkhan, apaiq raq tsangshiq ma phanrap tengteng bomtsi kra shrinkuqto.

³⁵ Rashe cha wan kiita, ajaqshisetiim raq apaiq ma, “Rashe ka acha she. Nashiq tiichang hiqba arka rum ahata.

³⁶ Mungmaiqse ka atiiwa she riilaq. Tsangshiq ka wakram aje aje kiijaq nai hiqshong ajeje thun kiina wa raüta, dung mirit phaqsiq wanlaq” nguta chongto.

³⁷ “Namtsam riiriiwe khoti miina, tsangshiq ma phanshi ra tiiphaqsiq rong liina,” nguta Jesuq raq tsangshiq bom ka treto. Tsangshiq raq, “Riita, maiq achu kong arma tiiphaq sia wan miitu ka jamwo mihumki rong i? Tsangshiq ma tiiphaq sia miitu ka, naishiq raq kamsii shinai maq winsii rihai jiitiq, tsangshiq tarü khamli chhaq miraq,” nguta apaiq ma bom ka waito.

³⁸ Kiijiishe, Jesuq raq tsangshiq ma, “Namtsam jaq na winsii ümchu thop wa asi, liiwa rongkiq ta” nguta thaüto. Tsangshiq raq lüwa raüta, “Winsii phubiingi, kiimaq ngiq shin anai asi,” nguta apaiq ma chongto.

³⁹ Jesuq raq ajaqshisetiim ma, nokmaiqse ka alen alen na, sangphii thaq na tiinga ronglaq nguta thaüto.

⁴⁰ Krai mren, nokmaiqse ka, shishi shi maq nai roqbiingingi maq, alen alen na tiinga wanto.

⁴¹ Raütiishe, Jesuq raq winsii biingi nai ngi shin anai ka, ajaq na shamto. Raüta, ra nü na lii raüta, Shiikeawe ma kechu tumto. Raüta, apaiq raq winsii ka tiiphan raüta, ajaqshisetiim lümaq nokmaiqse ma tiiphea kuqto. Kiimaq apaiq raq ngiq shin phu nai kiimin tiiphan raüta, tsangshiq maq tiiphea kuqto.

⁴² Krai mren, nokwe tarü raq, phetak chhaq she phaqsiqto.

⁴³ Ajaqshisetiim raq, mungmaiqse raq phaqsea jai she, abung winsii nai ngiq shin atiichong thun kra riichom kiita, tamlii roqshi ri anai mali riito.

⁴⁴ Kiijaq phaqseati maiqwere lili dongdii ka hingbiingi riito.

Jesuq Gelili Thamchum Na Khumto

⁴⁵ Kiimaq tlothit li she, Jesuq raq ajaqshisetiim ka lai na tiingato. Raüta, apaiq ma sinkhu na, Thamreko na Bethsaida hiq maq khewan li ronglaq nguta thaüto. Kiimaq apaiq raq mungmaiqse ka jam na tiiwa baiqto.

⁴⁶ Mungmaiqse tiiwa lot jai she, apaiq ka hiqlam ashi na achu jaüwa wawanto.

⁴⁷ Raji ranyaq niishe, tsangshiq ka lai maq Thamchum mong tiithi niishe saü wanto. Shatmaq, Jesuq ka apaiq honhon reko na miwa shaqli riito.

⁴⁸ Kiimaq Jesuq raq ajaqshisetiim ka, tsangshiq walam nü maq rahai henghea hairai wan kha maq, lai jiiq wan ka ngila ngu raü she, samthukii na riiwiiq raq maq, shiikut rai tlaq kra chhito. Kra chhi raüta, apaiq ka ranap, rawii tsuprup tsupriiq niishe, kham thaq maq khum raüta, tsangshiq phana wato. Apaiq raq tsangshiq ka ashüp wan ngo chang chang ikha wato.

⁴⁹ Shatmaq, tsangshiq raq apaiq ka khamthaq na awarai chhito. Kra chhi raüta, “Ara maji!” nguta tsangshiq tsan na tiimato. Kiimaq tsangshiq haisi tsi ma asii rai she riito.

⁵⁰ Tsangshiq raq apaiq ka chhi raüta kai phiip raq tsaito. Shatmaq, Jesuq raq tsangshiq rai bomsaq, “Naqhai rongkiq. Ngi tiina!” nguta bomdamto.

⁵¹ Raüta, apaiq ka tsangshiq rai lai na ngawa damto. Kiimaq rahai kiimin sangsaq she tsaqkito. Kra chhi raüta, ajaqshisetiim ka pinthum amao riito.

⁵² Kriika tsangshiq raq, maiq hingbiingi ma tiiphaq siq wantaq kra, liichum ka takmak dea kha maq maoto. Tsangshiq raq tak wan hai jaq nguta, tsan tiitsi mak kha maq, tsangkhutsai na nyap mak dea riito.

Genesareth Hiq Maq Atsiti Tiiheato

⁵³ Tsangshiq ka thamchum jin wan lot raütiishe, Genesareth hiq niishe saü wato. Kiijaq tsang- shiq lai ka toq thüto.

⁵⁴ Tsangshiq ka lai maq satkai ri li she, nokmaiqse raq, Jesuq ka tiitsang saqli she riito.

⁵⁵ Krai mren, tsangshiq ka kra hong na siti, hiqshong rap na juwito. Raüta, atsiti thun ka, Jesuq ümriibano saü wan tlaq, kiijaq apaiq phana, wiidamsii tam maq piho raüta sheahoto.

⁵⁶ Krai mren, Jesuq ka hiqshong thun na, chela thun na, kiimaq wakram thun na wato. Apaiq ümbano saü wantlaq kiijaq, nokmaiqse raq, atsiti thun kriika, kejat tang chang ba na sheahoto. Raüta, apaiq nangnga akheani se na jiimin tiisham laq, nguta tiipaiqneato. Kiimaq atsiti ümchuro, apaiq raq samtlaq samtong jong ni na, jaq maq sham laptaq, kriiti thun ka wiita tiihea kuqto.