Mark 5 - ASII LAKDAP Bible (BSI)

Jesuq Raq Tha Raq Arom Wanwe Tiiheato

¹ Jesuq nai ajaqshisetiim ka Gelili Thamchum konü reko na Gerasa binjü niishe saü wato.

² Raüta, Jesuq ka lai maq takii na satkito. Apaiq ka hiq na satkairi li she, kiijaq maiq ma lapchiim longkhong thun sitlaq kra mong wa, adongki maiq weshi rai riihumto. Kriiwe ka tha raq arom wan we riito.

³ Kiimaq apaiq ka, kiijaq sitlaq ma chiim longkhong mong thun niili sitlo. Apaiq hong ka hongbiti. Maiq raq ju riimin raü maq kha raüta thü lot mak. Jinraü maq dongdii min khalot mak.

⁴ Maiq raq jang pahea, ahok ajaq thun ka jinraü maq khato. Shatmaq, jang wranaiqtek, ahok ajaq khachang jinraü ka, apaiq raq pantham panthit li pan baiq tlo. Apaiq ka honghea kha maq, jurmin ranglot mak riito.

⁵ Apaiq ka ranaiq rawa, kra maa lapchiim longkhong mong thun kiijiili, kiimaq rum niili, agi asii wali, khumshkhum maq sitlo. Kiimaq longpo maq ahan ka, tiichhut miijut tiihan siq raütli sitlo.

⁶ Apaiq raq alu miili, Jesuq ka chhito. Raüta, apaiq phana tlat chhat ju raüta, apaiq khaki na kaütsrong na bumtlii maq,

⁷ hong raüta akha siito, “Ratsan Ramong nyang na siti Shiikeawe Se Jesuq le! Ümniiraq ngi ka jamkhii riiho wa dan tlaü?”

⁸ Apaiq raq akha bomtaq arka, Jesuq raq tha ma, (“Tha ümniika arwe khum wa dongho tlo laq!”) nguta jotlaq kriikha maq bomto.

⁹ Kiijiishe, Jesuq raq apaiq ma waito, “Riita, ümmang ka juwa?” Maiqwe raq treto, “I mang ka ‘akong.’ Naishiq ka pahea sitiikai!”

¹⁰ Kiimaq apaiq raq Jesuq ma, akhum wa tha kong kriika, ahin na naq jobaiqkiq dea nguta tiipaiqnea raito.

¹¹ Kra tho na waqkong pahea hiqlam siim na asi riito. Waqkong ka atsam phaq, ahaisea riito.

¹² Thakong raq Jesuq ma, “Naishiq ka waqkong phana waphai. Laita waqkong khum na sam wan phai,” nguta tiipaiq neato.

¹³ Apaiq raq thakong ka, maiq we khum wa tiiwa baiqto. Kiimaq thakong ka waqkong khum niishe shangto. Raüta waqkong ka lü wanto. Waqkong ka hingnai tin riito. Waqkong ka wiikongtam hiqlam siim raqkam maq, ju raüta thamchum mong niishe thap wanto.

¹⁴ Kra chhi raütiishe, waqkong rümtibi ka pintrangto. Raüta chela na nai waq tatinok ma, juraüta kra tsütsa ka rin ra chongkuqto. Kra tsütsa kra tairaüta, thohekai ngutiishe nokwe pahea kiraüta liikito.

¹⁵ Kiimaq tsangshiq ka Jesuq phana kiraüta liiki kiita, tha raq arom wan we kiimin, Jesuq rai adam na, asung atsii tsangrakrak she, khea sam raüta nga raü chhikito. Kra chhi raüta, tsangshiq ka akiinyii rai riito.

¹⁶ Mak maq achhiti raq, kra nokwe kitaq kiima, tha raq arom wan we ka jamkho heakita, kiimaq waqkong ka jamkho kham chum mong na thap wantaq, kra tsütsa ka tiitai chongkuqto.

¹⁷ Kra taiwi raütiishe, tsangshiq raq Jesuq ma, apaiq ka ahin na kiho haü jaq ahea nguta chongkuqto.

¹⁸ Kiimaq Jesuq ka lai na ngawa, adü wan she riito. Kra akhing na, tha raq arom wa heakitiiwe raq, Jesuq ma, “Ngi min ümniirai li wadam pha!” nguta tiipaiq neato.

¹⁹ Shatmaq, Jesuq raq apaiq ka shea wan mak dea riito. Kra rii na, “Ümnyung we phana walaq. Laüta, Tatiwe raq, ümniima ümtinkhan wa mangchan tlaq, kiimaq ümtinkhan wa khrum kuq wan taq kra, tsangshiq ma chongkuq wakiq,” nguta thaüto.

²⁰ Krai mren, apaiq ka Chela Roqshi binjü kiina wawan raütiishe, Jesuq raq apaiq ma ümtinkhan wa mangchan kuqtaq kra tsütsa kriishe chongkuq wanto. Kiimaq nokwe phong wa, apaiq tsütsa kra taiwantibi thun ka kai amao li she riito.

Jairas Se Nai Atsi Nyung

²¹ Jesuq nai ajaqshisetiim ka konü Thamreko na hali jang wan nongto. Thamkii na maiq ka pahea, apaiq tro na thungto.

²² Jairas ka kiijaq sinagok sitlaq kra liiwan damti maiqla weshi. Apaiq ka kiijaq saükito. Apaiq raq Jesuq ka chhi raüta, Jesuq jichong na bumsaq raüta,

²³ atsan tsihea maq, akha tiipaiqnea wanto, “I se jechakse ka tsihea langlang. Ümnaq wara. Laüta adü na jaq maq sham wakiq. Kra riihaü jiila apaiq tsi ka ahea mirki!”

²⁴ Kiijiishe, Jesuq ka apaiq rai wawan damto. Jesuq rai nokmaiqse min pahea, riitsap riikhat wawan damto. Nokmaiqse phong riitsap rai wantlaq kra raq, apaiq ka trotam maq komtlii raüta, kongta hushhu maq wadamto.

²⁵ Kiijaq maiqnyung ashi ka wiiroqshi ri wiinai she, tiijai kaitsi raq chamchao raitlo.

²⁶ Athatsi ka taktot pahea ma tlii wanto. Shatmaq, hea mak dea riito. Atsiiq anyam wiita sumto. Shatmaq, athatsi ka ahea wan rii na, jaqtsi wanwan khoti riito.

²⁷ Apaiq raq, Jesuq riika atsi asiti tiihea kuq tlo nguta, tsütsa taito. Kra tairaüta, apaiq min nokwe rai, Jesuq jai na wa damto.

²⁸ Apaiq raq atsan mong na, “Ngi raq adü na asam kheani se kiijaq, i jaq maq shamlap hajiili, i thatsi arka mihiaki,” nguta tiima wanto.

²⁹ Krai mren, apaiq raq Jesuq khea samtong jong samtlaq kiijaq, thansaq shamto. Krai mren, athatsi ka tiidoqra heakito. Kiimaq apaiq raq akhum na atsi hea wan kra sapto.

³⁰ Jesuq raq akhum wa ningkun kaiho ka hesaq li riito. Kriikha maq, apaiq raq atro na nokmaiqse ka lii raüta, “I khea na juro shamlan?” nguta waito.

³¹ Ajaqshisetiim raq, “Maiqphong achu raq, ümniika trotam maq nyat wan tlaq ahata. Ümdü na shamti ka juwa, kriika jamkho misap i?” nguta treto.

³² Shatmaq, Jesuq riika adü na shamti ka juwa, kra shrira liito.

³³ Maiqnyung raq atsi heakai kra sap raütiishe, ahai tiikhai lam maq, Jesuq khaki na kaütsrong na ngasaq raüta, atsi chamchao wantaq nai atsi hea wantaq kra, Jesuq miishe tiitai chongto.

³⁴ Kiijiishe, Jesuq raq, “I se le! ümniiraq ngi ma kamwan laü kha maq, hea wan laü. Ahea, Ümchaü ka hansang miishe siwakiq. Ümthatsi ka heakito she” nguta chongkuqto.

³⁵ Jesuq ka apaiq rai riibom liipan niili, Jairas jam wa tsütsa chongti ka saükito. Raüta, “Ümse ka ahü she. Shrinketi we min jaram li she wa mitiinüko siq haü?” nguta apaiq ma chongto.

³⁶ Jesuq raq tsangshiq bom ka shili shaqlaq li riito. Kiimaq apaiq ma, “Ümtsaiji ka naq tran kiq. Kamtsantsii li thülaq,” nguta chongkuqto.

³⁷ Kiijiishe, Jesuq raq apaiq rai Petar, kiimaq Jakob, kiimaq ano Johan kra tlea raüta, ajaqshisetiim ahinti ka, apaiq rai jumin tiiwa dam mak she riito.

³⁸ Raüta tsangshiq ka Jairas jam niishe saü wato. Kiijaq Jesuq raq maiqthun ka riitsap riikhat, maaho manyi, agi asii watrang liishe lowanto.

³⁹ Apaiq ka jam mong na waraüta, tsangshiq nangnga, “Namshiq ka jawa kiinyii rai tlan? Jamkho shiri rai tlan? No ka tsai mak. Akon jali tiina!” nguta tsangshiq ma bomto.

⁴⁰ Tsangshiq raq apaiq bom ka tairaüta, anai khoti riito. Kriikha miishe, apaiq raq tsangshiq tarü ka kinphai na tiidong baiqto. Raüta, anyungwe kiimaq ajaqshisetiim wetsam kra shea raüta, no wechang khok na wato.

⁴¹ Apaiq raq no jaq na, ajaq maq shamsaq raüta, “Talitha, kum,” nguta hiato. Kra liichum ka, “Noshii loi, ngi chongpha, tiidolaq!” nguta ngo riito.

⁴² Krai mren, no ka tiidopot she riito. Raüta, akhum ashiim waliishe, tiimeshi hoto. (No ka wiiroqshi ri wiinai maiq riito.) No heakai kra chhi raüta, tsangshiq ka pinthum amaoli she riito.

⁴³ Shatmaq, Jesuq raq tsangshiq ma, kra tsütsa ka ahinti ma tiitai ra mak nguta kiq atsin maq bom ka thang raüta chongkuq wanto. Raüta apaiq raq, “No ma phanshi ra tiiphaq siq ronglaq,” nguta tsangshiq ka thaüto.