Mark 4 - ASII LAKDAP Bible (BSI)

Tsamlai Wantiwe Shiiton

¹ Kiimahali Jesuq raq Gelili Thamchum kii maq trahokuq nongto. Mungmaiqse ka apaiq tro na pahea thungto. Kriikha maq, apaiq ka lai ashi na ngato. Lai ka kham mong na kiimaq mungmaiqse ka takii na thungto.

² Apaiq raq tsangshiq ma tengteng bomtsi pahea ka, shiiton manphan setiim maq chong kuqto. Apaiq raq tsangshiq ma akha chongkuqto:

³ “Taironglaq! Akhing ashi na, maiq weshi ka awak na tsamlai wankai kito.

⁴ Apaiq raq tsamlai wanwan tlaq kiiwa, wiijam ka lam na rokto. Kriika wushi raq tsunsiqto.

⁵ Wiijam ka longrong hea wea na rokto. Kiijaq hiqngam ka apise li riito. Kriikha maq, tsamlai ka jaqloli chamto.

⁶ Shatmaq, tsamrang ka hiqmong na atsaü wamak dea riito. Kriikha maq, rakii raq tsamcham thun ka chaq baiqto. Krai mren tsamcham ka wiita tsaikito.

⁷ Tsamlai wiijam ka shukrü chongkam mong na rokto. Kra ariikam chong wa, shukcham setiim ka pong wan nongto. Raüta tsamcham ka, tiijong lap mak maq, sang raq kaqbaiqto. Raüta tsam ka dong man kimak miili she mokito.

⁸ Shatmaq, tsamlai wiijam ka hiqngam ngam ba na chato. Kriiti ka aheawiq maq cham raüta, jonglu wanto. Krai mren, tsamnyam nyamshi wiili tsamrai ka rairoqtsam, wiijam na rairoqtrok, kiimaq wiijam na rairoqshishi she dong man wanto.”

⁹ Raütiishe, Jesuq raq abom ka akha shatto, “Juwa ni asi, kriiti raq tiitsang tai ronglaq!”

Bom Shiiton Liichum

¹⁰ Jesuq ka apaiq honhon niishe, ara bom shiiton taiti phong wa, maiq wiijamti ka Jesuq jaqshisetiim roqshi ri wenai krai apaiq phana wato. Raüta kra, bom shiiton liichum ka tsangshiq ma chongkuq laq nguta, apaiq ma waito.

¹¹ Jesuq raq treto, “Shiikeawe mungtan bomtsi apaü raüta athü ka namshiq raq sap wan miitu tiichhi kuqto she. Shatmaq, maiq ahinti, Shiikeawe wura maq mitiiham wan shaqtibi miika, kra tengteng bomtsi ka, shiiton bomtsi setiim manphan miili chongkuqtlo.

¹² Arka, asii bomtsi na akha chongthüje dongdii, ‘Tsangshiq raq mak maq chhi shatshat taü miimin, chhi mak miraq; tsangshiq raq taishat shat taü miimin, tak lot mak miraq. Tsangshiq raq tak raü jiika, tsangshiq tsantsii miklai wa; kiimaq Shiikeawe raq tsangshiq ngarai ka midii kuq wa.’ ”

Tsamlai Wanti We Shiiton Liichum Chongto

¹³ Kra phanke jai she, Jesuq raq tsangshiq ma akha waito, “Namshiq raq ara bom shiiton liichum arka tak man dea sha? Ikhiijiila, ahin bom shiiton liichum ka jamkho mitak han?

¹⁴ Tsamlai wanti we ngutlaq arka, Shiikeawe bomtsi chongketi we.

¹⁵ Maiq wiijam ka tsamlai lamjong na arok kiikha, tsangshiq raq Shiikeawe bomtsi ka tairili, Thawe ka waraüta, tsangshiq tsan mong wa, Shiikeawe bomtsi kra tsunsiq tlo.

¹⁶ Maiq wiijam ka tsamlai longrong na arok ikha, Shiikeawe bomtsi ka tairili, chochikhiq maq tao tlo.

¹⁷ Shatmaq, tsangshiq tsan mong na atsaü shang mak dea. Kriikha maq, alu tsing mak. Tsangshiq raq Shiikeawe bomtsi ma kamwan kha na, chamchao litkot akhing she saü raüla, Shiikeawe ma kamwan tsii ka athaq she riibaiq tlo.

¹⁸ Maiq wiijam ka tsamlai shukrükam chong na arok ikha. Arti riika bomtsi ka tai wanto.

¹⁹ Shatmaq, mangjong han-ngam miitu chapa, tsiiq anyam ma ranphan, kiimaq laihin phanrap phanrii miitu ranphan tsii riili she bomtsi ka, tsangshiq tsan mong na tiicham mak, nyaho tlo. Kiimaq tiitsi ngo mak she tiimo baiq tlo.

²⁰ Shatmaq, maiq wiijam ka tsamlai hiq ngam na arok ikha. Tsangshiq raq bomtsi ka taitlo. Raüta langtlo. Kiimaq atsi ango riiwan tlo. Wiijam raq rairoqtsam, wiijam raq rairoqtrok kiimaq wiijam raq rairoqshi shi she tsi ngo tlo.”

Lem Ka Atiinii Miitu

²¹ Kiimaq Jesuq raq tsangshiq ma chongto, “Lem ka tlü raüta, taükok maq juro pang tla? lo, changdü takiq na juro totla? Lem ka ato chang na mito riimak sha?

²² Apaü raüta jamlai wa thütaq, kriika riirali she miraq. Kiimaq apang raüta jamlai wa thütaq, kriimin rashra she miraq.

²³ Juwa ni asi, kriiti raq tiitsang tai ronglaq!”

²⁴ Apaiq raq tsangshiq ma hali chongto, “Ara i bomchong ara samhea tiitsang tairong laq! Namshiq raq nanok ka jamkho shintlan, kra tri maq Shiikeawe raq namshiq min mishin. Sha, kra thaq na atsin lin miishe namshiq ka mishin kiiphan.

²⁵ Ju jaq niiwa phanshi ra asi, kriiti miika atiitsuq mirkuq. Shatmaq, ju jaq niiwa ahü, kriiti jaq wiika chonkhi laqli se rüm tlaq kiimin alam mirho.”

Tsamcham Jong Wan Maq Shiitonto

²⁶ Jesuq raq akha chongto, “Shiikeawe Mungtan ngutlaq ka akha. Maiq weshi raq awak na tsamlai ka wankito.

²⁷ Raüta, apaiq ka rawa na akon miraq. Ranaiq niika minshiiq miraq. Apaiq ka akha ajaqsham na morai shonli, tsam lai ka cham wantlo. Raüta tsamcham ka jonglu wan tlo. Shatmaq, apaiq raq kriika, jamkho jonglu wan tlaq, kriika sapki mak.

²⁸ Wak wa hiq riili, tsam lai ka tiicham tlo. Raüta tiijong luwan tlo. Raüta, atsi ango kra tiidong man tlo. Apha na acham miraq. Kra miitiq adong awok mirwan. Kra miishe tsam ka mantlo.

²⁹ Tsam ka kun li she man raüla, wakchongti we raq ningshao maq hanki tlo.

Jücha Lai Maq Shiiton

³⁰ Kiimaq Jesuq raq waito, “Ramungtan ngutlaq kriika jamlai mo mishton i?”

³¹ “Arka akha. Jücha lai kra mangjong hiq na aran pinthum. Maiq weshi raq, kra awak na miwanki ngu i.

³² Raüla, jaqlo liipan niili kra acham mirwan. Raüta kra jücha cham ka mijong wan. Kra jong wan raüla, wiitarü thaq na chong jong wiq she mijong wan. Akü ako thun min, ajong jong wiq she miraq. Kra chong tsung mong na, wushisetiim riimin achü she mihai.”

³³ Jesuq raq nokmaiqse ma trahoke lam maq, akha manphan setiim pahea maq shiiton raü raüta, tsütsa ahea kra chong kuq lili riitlo. Tsangshiq raq taklot tlaq khankhan, chongkuqto.

³⁴ Apaiq raq tsangshiq ma tra hokuq wantlaq akhing na, akha shiiton manphan setiim maq siisaq chong kuqto. Shatmaq, ajaqshisetiim rai tsangshiq honhon sitlaq liipan niika, tsangshiq ma kra shiiton wantaq liichum thun kra tru chongkuq tlo.

Jesuq Raq Rathaiq Tiitsaqto

³⁵ Kra ranaiq rajiko niishe, Jesuq raq ajaqshisetiim ma, “Nashiq ka konü thamreko niishe warong i” nguta chongto.

³⁶ Krai mren, tsangshiq raq nokmaiqse phong ka baiqthü raüta, Jesuq ngatlaq lai kiijaq ajaqshisetiim min düwa raüta, apaiq rai kongshi maq lai ka jiiq wanto. Kiijaq apaiq rai lai ahin min asi riito.

³⁷ Tiihanghiiq miili she, rathaiq rahai henghea saü wanto. Rathaiq heng wa raq, khamtso blun wan ka henghea she riito. Khamtso dong tlaq kriiraq, lai mong niishe bok wanto. Raüta, lai kiimin kham raq mawan nam nam she riito. Kham marai wan kha maq, lai ka kham mong na misang wan ngo chang chang ikhiishe riito.

³⁸ Jesuq ka laimai shok na, atok ka khudea na tiiwesaq raüta akon riito. Ajaqshisetiim raq apaiq ka tiisam lam maq, “Shrinketi we, ümtsan chhii mak sha. Nashiq jü na thap wan kai ahata?” nguta chongto.

³⁹ Krai mren, Jesuq ka tiidopot raüta rathaiq ma, “Kaiq laq!” nguta aming kuqto. Kiimaq khamtso miimin “Sang laq!” nguta aming kuqto. Krai mren, rathaiq wa ka tsaqsaq she tsaqkito. Kiimaq tiikaiqshak sanglili she riito.

⁴⁰ Raütiishe, Jesuq raq ajaqshisetiim ma nguto, “Namshiq ka jam nguta hairai wa? Namshiq raq ümchaü niitaq ngi ma kamtsantsii ka thü man sha?”

⁴¹ Shatmaq, tsangshiq ka pinthum akii anyii rai li riito. Kiimaq tsangshiq liipan na, “Riita, arwe arka ngohea dea ju wiinya, rathaiq rahai wa raq nai khamtso blun wa raq dongdii min, apaiq aming tai tlaq ara!” nguta riibomto.