Mark 2 - ASII LAKDAP Bible (BSI)

Jesuq Raq Ahan Amaa Arkiwe Tiiheato

¹ Ranaiq nai tsam jai miishe, Jesuq ka Kaparniam hiq na jang wan nongto. Kiimaq apaiq ka jam na asi nguta tsütsa ka barap na phoito.

² Krai mren, maiq ka kongta hushhu miishe, ama ala she, apaiq phana kirai wanto. Kilam chong na dongdii min maiq siisaq, tuptup she marai wanto. Jesuq ka tsangshiq ma tsütsa ahea traho bom chongke rea riito.

³ Kra liipan niili, maiq weblai raq maiq weshi, ahan ama arki we ka piho raütiishe, Jesuq phana saükito.

⁴ Shatmaq, maiq ka pahea riitsap khat kai kha maq, atsiti we ka Jesuq phana pi wan lotmak dea riito. Kriikha miishe, tsangshiq raq Jesuq ngachang ba tiithi maq, wukhu ka tiipu linto. Raüta, apu miishe atsiti we ka, wiidamsii tam maq, Jesuq khaki niishe tiisatto.

⁵ Tsangshiq kamtsantsii jong kra chhi raüta, Jesuq raq ahan ama arki atsiti we ma, “I se le, ümngarai thun ka diibaiqto she,” nguta bomdamto.

⁶ Kra tairaüta, kiijaq ngadamti Thungtri shrinketi wiijamti raq, tsangshiq tsan mong na,

⁷ “Apaiq raq akhiika jamkho bomtla? Arka Shiikeawe man na, riiqkhiq ashut pinthum bomtlo ahata! Ngarai diiketi we ka Shiikeawe li khata!” nguta tiimato.

⁸ Jesuq raq tsangshiq tsan na jamlai wa tiima tlaq, kra taksaqli she riito. Krai mren, Jesuq raq tsangshiq ma akha waito, “Namtsan mong na akhiika jam nguto tiima tlan?

⁹ Riita, ara atsiti we arnangnga, ‘Ümngarai ka diibaiqto she,’ nguta ngo sha, aje miraq, sha, ‘Tiidolaq, ümdamsii ka pilaq, laüta chaphiiq laüta khumlaq,’ nguta ngowa ajelin miraq?

¹⁰ Ikhiila, ngi raq namshiq ma, Maiq Se riika, mangjong maiqse ngarai diike miitu arang hotlo dea nguta, namshiq ma tiichhi kuqpha na,” nguta tsangshiq rai bomdamto. Krai mren, apaiq raq atsiti we kra akha thaüto,

¹¹ “Ngi chongpha, tiidolaq; ümdamsii ka kom laüta pilaq; laüta ümjam na walaq!”

¹² Krai mren she, nokwe maklii rashra niili, atsiti we ka tiidopot riito. Raüta tlothitli, adamsii ka tsunsaq raüta, ajam na lamlü she wawanto. Kra chhiraütiishe, tsangshiq tarü ka kai amao she riito. Kiimaq, “Nashiq raq atinkhan amao chang jaqsham kla, jangshi min chhimai shaqli!” nguta Shiikeawe kli tiitsamto.

Jesuq Raq Lewi Tsea Wanto

¹³ Jesuq ka Gelili Thamchum kii binjü nü na hali jang wan nongto. Mungmaiqse ka akong ada apaiq bom taikai nguta, apaiq phana kito. Kiimaq apaiq raq tsangshiq ma traho bomtsi chongkuqto.

¹⁴ Kiimaq apaiq ka akhum lam maq, phunta hiti we Lewi, Alphias se ka apaiq phunta hichang abit tiipse na ngaraü lowanto. Jesuq raq apaiq ka chhi raüta, “I jai phan laq,” nguta apaiq ka heato. Krai mren, Lewi riimin tiidopot raüta, Jesuq jai she phan wanto.

¹⁵ Kra jai miishe, Jesuq ka Lewi jam na dungsea riito. Kiijaq phunta hitibi nai ashleq arbaiq, maiq ahinti thun min pahea raq, Jesuq jai ka phan wan damto. Kiimaq tsangshiq phong wa, maiq wiijamti pahea raq, Jesuq nai ajaqshisetiim rai adam na nga raüta, dungsea nga damto.

¹⁶ Kiijaq, Phorisinok wa Thungtri shrinketibi raq, Jesuq ka ashleq arbaiq nai phunta hitinok rai, adam na nga raüta dungsea kra chhi raüta, ajaqshisetiim ma, “Apaiq ka akhnok anun phan maiqsetiim rai, adam na nga raüta takshi pinshi miika jam nguto phaqsiq wan dam tla? Arka ashut klotlo!” nguta bom ka waito.

¹⁷ Jesuq raq tsangshiq bom ka tai raütiishe, “Juwa hansang, kriiti miika taktot ka ra mak. Shatmaq, juwa atsi asi sitlaq, kriiti ma taktot ka ra tlo. Ngi ka asii maiqse heakai akiha ka riimak. Shatmaq, ngarai maiqse heakai nguta akiha,” nguta tsangshiq bom ka treto.

Amang Maq Achu Jaü Bom Shrinkuqto

¹⁸ Akhing ashi na Khamlamketi we Johan jaqshisetiim nai Phorisinok ka amang maq achu jaü wan akhing lamto. Kra akhing na maiq wiijamti ka Jesuq phana kiraüta bom ka akha waito, “Khamlamketi we Johan jaqshisetiim nai Phorisinok riika, amang maq achu jaü akhing lam tlo. Shatmaq, ümjaqshisetiim raq miina, lang mak?”

¹⁹ Kiijiishe Jesuq raq treto, “Maiqlam poi lomdamti, wanwe ka ram ma tiihaü raütli tiiwa chang ngutiika thung asi sha? Ahü! Rohunti we ka tsangshiq rai ngashat wiiwii, ramtsi miika tiitsai mak.

²⁰ Shatmaq, akhing ashi misaü wan, tsangshiq phong wa maiqlamti we ka, ahin niishe mishea wan. Kiijiishe, tsangshiq ka amang maq siraüta achu jaü chang miraq.

²¹ “Kiimahali, jurmin khea nye phu maq, samtong chü pu kriika tiidiim chhang mak. Kheanye phu atiidiim chhang kriika achon mirki. Raüta, samtong chüti pu kra khoti mitiijong chairat.

²² Kiimahali, jurmin spiqtai anye ka, ngamkhü chü tsabum niika thiimak. Kiikha thii raüka, spiqtai anye kra awürai raüta, ngamkhü chü tsabum kriika, atiichai mirki. Raüta, spiqtai ka wiita awii li she mirki. Kriikha maq, spiqtai nye kriika, ngamkhü nye tsabum na thii raüta thü ra tlo.”

Asii Niitiitsak Ranaiq Tri Miitu Riikhiito

²³ Asii Niitiitsak ranaiq na, Jesuq ka bunwong manrü lam maq alea wan wato. Ajaqshisetiim raq akhum lam maq, bunwong nyam ka toq raüta, awong ka jaqphi na notphaq wanto.

²⁴ Kra chhi raüta, Phorisinok raq Jesuq nangnga, “Liilaq, ümsengi raq nashiq Thungtri ka jin wan tlo. Asii Niitiitsak ranaiq niika, akha jaqsham wan ka maimak!” nguta bomto.

²⁵ Kiijiishe Jesuq raq treto, “Dawit ka ranaiqshi aramtsi hea bala akhing na, jamlai wa phaqsiqta, kra namshiq raq jangshi ra min phat man dea sha riilan? Apaiq nai akongtibi ka ramtsi hea, apit riito.

²⁶ Kriikha maq, apaiq ka Shiikeawe jam mong na nyap wa raüta, Shiikeawe ma alu na akuq winsii kra jaüphaqto. Kra akhing na Abiathar ka Ramwe Jong pinthum jaqsham wanti riito. Nashiq Thungtri maq, kra winsii ka ramwebi raq phaqsea chang li. Ahinti raq phaqsea ka maimak. Shatmaq, Dawit raq phaqto. Kiimaq akongtibi miimin kuqto.”

²⁷ Kra ngu raütiishe, Jesuq raq abom ka akha shatto, “Asii Niitiitsak ranaiq kriika maiqse ma hansang maq siwan miitu atiihong kuq. Maiqse sitlaq kriika Asii Niitiitsak ranaiq miitu ka riimak.

²⁸ Riita ara chongtiikang arai mren, Maiq Se ka ara Asii Niitiitsak ranaiq miimin Tati!”