Mark 16 - ASII LAKDAP Bible (BSI)

Jesuq Amaa Wa Dong Wanto

¹ Asii Niitiitsak ranaiq ka thum jai she, Magdala hiqti nyung Meriq, Jakob ma anyung Meriq, kiimaq Salomi tsangtsam raq, maiq maa na nyat chang ahom wiq phan tsai kra, Jesuq ma na nyat kai ma nguta tiije ri raüta thüto.

² Chepat ranap niishe, ranap chu maq rashe dong na, tsangtsam ka malap chang longsha kiina kito.

^3-4 Tsangtsam ka lam na akai lam maq, “Natsam ma maakho kilü longkaü irka juro midi kuq nya?” nguta tsangtsam liipan na riibomto (longkaü ka ajong wiq riito). Riita, tsangtsam ka maakho kiijaq saüki raüta liikiita, longkaü kilü ka dibaiq raüta, atiikü baiq reawi she chhihoto.

⁵ Krai mren, tsangtsam ka longsha makho mong na nyap wa raüta liito. Kiijaq tsangshiq raq norii we ashi, samtong jong alü wiq kaü sam raüta, jaqtsi nü na nga raü chhi hoto. Kra chhi raütiishe, tsangshiq ka kai awang riito.

⁶ Kiijiishe, “Namtsam ka naq hai rongkiq,” nguta apaiq raq nguto. Kiimaq apaiq raq, “Ngi raq asap ha, namtsam riika, Najareth hiqti we Jesuq pumsongkham na tübaiqtaq kra rittlan. Apaiq ka arjaq ahü. Ama wa dong wanto she! Liimanta, tsangshiq raq ama ka arjaq athü wa.

⁷ Riita, ümchaü min, namtsam ka walanta, ajaqshisetiim ma, Petar miitaq nong na ara tsütsa ara chongwa rongkiq: ‘Apaiq ka namshiq ma sinkhu na, Gelili na wawan litlo. Kiijaq namshiq ka apaiq rai mirhum han. Arka apaiq raq namshiq ma chongkuqtaq kra phanphan miraq.’”

⁸ Krai mren, tsangtsam ka makho maq tlatchhat jutrangto. Tsangtsam ka achapa, kiimaq ahai lam maq jangto. Tsangtsam ka ahai kha maq, kra tsütsa ka maiq ahinti ju miimin chong mak dea riito.

Jesuq Makdala Hiqti Meriq Pha Na Dongkito

⁹ Jesuq ka ama wa dong wan raüta, chepat ranaiq ranap chu maq, Magdala hiqti nyung Meriq, apaiq raq tha kaü miishi jobaiqtaq nyung pha na dongkito.

¹⁰ Kra nyung ka waraüta, kra tsütsa ka Jesuq kongtitiim miishe chongto. Tsangshiq ka maaho manyi chhi wanto.

¹¹ Kiimaq tsangshiq raq Jesuq ka atra, kiimaq apaiq rai riihumto nguta chongkuq kiijiimin, tsangshiq raq apaiq bom miika lam kam mak riito.

Jesuq Ka Asengi Wenai Pha Na Dongkito

¹² Arjai miishe, Jesuq ka tsangshiq phong wa wenai pha na, phanshi pong linlin maq, tsangnai ka hiqshong na awarai lam na dongki raüta riihumkito.

¹³ Krai mren, tsangnai ka lam maq jangho nong raüta, tsangshiq kongti ahinti ma kra tsütsa ka tiitai chongkuq kito. Shatmaq, tsangshiq raq tsangnai bomchong miika kam mak riito.

Jesuq Roqshi Ri Weshi Pha Na Dongkito

¹⁴ Atiisup niishe, Jesuq ka ajaqshisetiim roqshi ri weshi pha na, tsangshiq dungsea rea liipan na dongkito. Tsangshiq raq apaiq ka ama wa atra she dong wanto nguta kammak kha na, kiimaq nanok raq apaiq ka atra chhi kai nguta tsütsa chongkuqtaq kriima kammak maq, tsangshiq tsan ka wanshakshak li tiitsin wan kha na, apaiq raq tsangshiq ka ason rea riito.

¹⁵ Apaiq raq tsangshiq ma aming ka akha kuqto, “Namshiq ka mangjong tlotli na kironglaq. Lanta, Tsütsa Ahea kra mangjong maiqse tlotli ma chongkuq kirongkiq.

¹⁶ Jurwa Tsütsa Ahea kiima kamwan tlaq, raüta kham lam wan tlaq, kriiti ka mitiichhii wan. Jurwa Tsütsa Ahea kiima kamwan mak, kriiti ma kha mitiiho.

¹⁷ Kamwan tlaqti thun ma, awang chang jaqsham miitu ningkun mikuq. Tsangshiq raq, i mang na tha mijo baiq; tsangshiq ka pongnok pongta phan bom maq mibom.

¹⁸ Kiimaq ümkhiimiiwa, tsangshiq raq paü ka jaq maq shamrat raü min, kiimaq achok araq phan phaqsiq rat raü min, tsangshiq khum na taimak miraq. Tsangshiq raq maiq atsi asiti dü na jaq maq sham raüta achu mijaü kuq. Raüla, atsiti thun kra mihiaki.”

Jesuq Ka Ramungtan Na Wawanto

¹⁹ Tati Jesuq ka tsangshiq rai riibom lot jai she, apaiq ka Shiikeawe raq ramungtan niishe shea wanto. Raüta, Shiikeawe ma jaqtsi nü niishe ngato.

²⁰ Kiimaq ajaqshisetiim ka maiqhiq barap binrii na kiraüta tra hokuqto. Kiimaq Tatiwe raq tsangshiq ma awang chang jaqsham miitu ningkun kuqto. Kiimaq kra ningkun lümaq, tsangshiq ka Shiikeawe jaqshisetiim dea nguta hakhi tiichhi kuqto. Amen.