Mark 15 - ASII LAKDAP Bible (BSI)

Jesuq Ka Pilat Rung Na Tiichapto

¹ Ranap chu miili ramwe jongbi ka taülaükhiq maq welabi nai Thungtri shrinketibi, kiimaq Jehudinok Rung Jong phowebi thun kunli rai, ngongthun ngato. Raüta, tsangshiq raq kha ka tiihong phoje she thüto. Raütiishe, tsangshiq raq Jesuq ka jinraü kharü maq kha raüta, Pilat rung niishe hithoto. Raüta, Pilat jaq niishe kiinong kuq baiqto.

² Kiijiishe Pilat raq Jesuq ma, “Riita, ümniika Jehudinok hokham we dea sha?” nguta waito. Kiijiishe, “Ümniiraq ngutlaü kata,” nguta Jesuq raq Pilat bom ka treto.

³ Kiijiishe Pilat rung maq, Ramwe jongbi raq Jesuq ma kha nyan bom ka pahea chongto.

⁴ Tsangshiq raq apaiq ma kha nyan tlaq bom thun kra tai raütiishe, “Riita, tsangshiq raq ümdü na kha atin khan nyan tlaq ara miitu, ümniiraq tsangshiq kiq khii, üm bom chong chang ka ahü sha? Tsangshiq raq ümdü na atin khan kha nyan tlaq kra ümniiraq taimaü sha!” nguta Pilat raq Jesuq ma waito.

⁵ Shatmaq, Jesuq raq tsangshiq bom ka, poshi min tre mak riito. Kra chhi raüta, Pilat ka kai awang riito.

Pilat Raq Jesuq Tsea Baiq Kha Tanto

⁶ Pilat raq Tiichhii Wan Poitek akhing na, Jehudinok mungmaiqse raq, maiq phaqtek mong na ashaq shumwi sitlaq kra phong wa, ümriiti wa tiidong kuq laq nguta jaü tlaq, kriiti tiidongke jaqsham ka angam acham she.

⁷ Ara chongtiikai akhing bala min, maiq weshi ka mungshuk wantibi rai lom dam raüta, matwe ma jawan kha na alap, phaqtek mong na asi riito. Apaiq mang ka Barabas.

⁸ Kiitiikaq mungmaiqse ka Pilat jamkea na thung raüta, apaiq raq mungmaiqse ma rahin jaq akhing na, jamkho shumwi kong phong kriiwa, weshi tiidong kuq tlaq kiikhiisii hali, tiidongke nong raa nguta jaüto.

⁹ Kra kha maq, apaiq raq tsangshiq ma, “Riita, ümchaü min ngi raq, namshiq mungmaiqse ma Jehudinok hokham we nguta chongtlan, kriisha mitiidong kuq ha?” nguta waito.

¹⁰ Apaiq raq tsangshiq ma, ara bom ara jamkhano waitaq ngukla, ramwe jongbi raq Jesuq ka lap raüta, apaiq rung na kuq wataq kriika, tsangshiq makshu tsi ma lapkuqto nguta apaiq raq asap kun she.

¹¹ Shatmaq, ramwe jongbi raq, mungmaiqse ma, Jesuq la na Barabas kra tiidongke raa, nguta jaü ronglaq nguta, mungmaiqse ma raikao ka atatke kun she riito.

¹² Kiijiishe Pilat raq mungmaiqse ma jangshi ri hali, “Riita, ngi raq Jehudinok hokham we ka jamkhii she wa mirha?” nguta wai nongto.

¹³ Kiijiishe tsangshiq ka agilülü, “Apaiq ka pumsongkham na tübaiq laq!” nguta hali hengsiqo.

¹⁴ Kiijiishe hali, “Riita, apaiq raq jamlai phan mat akha wa tangta?” nguta Pilat raq mungmaiqse ma bom ka wainongto. Shatmaq, tsangshiq ka, “Apaiq ka pumsongkham na tübaiq laq!” nguta khoti jagi wan wan she gitrangto.

¹⁵ Kra chhi raütiishe, Pilat raq mungmaiqse tsan ka tiiheake ma nguta, Barabas ka tsangshiq miishe tiidong kuqto. Raüta, Jesuq ka phenlanok ma chunpo-nyam chongwai miishe, bunlak buncha tiitsatto. Raütiishetiq, pumsongkham na tübaiq kai miitu aming kuqto.

Roman Phenlanok Raq Jesuq Slailiito

¹⁶ Phenlabi raq Jesuq ka Wanghupti we jamkea, wang mong niishe shea wanto. Raüta tsangshiq betelion kongti phenlabi abi thun kiimin she wiita adam na triitam heato.

¹⁷ Raütiishe, tsangshiq raq kheashii samtong jong kaü ashi ka, Jesuq ma tiisam kuqto. Kiimaq shuk raü ka, wiishuktam maq lamki raüta, khuphok ashi ma haito. Kra khuphok ka Jesuq khupo niishe tiiphok kuqto.

¹⁸ Raütiishe, tsangshiq raq apaiq ka, “Jehudinok Hokham we le, rilung alu maq silaq!” ngutiishe, slaislii, shummii shaq shaq miishe, apaiq ka noqsiqto.

¹⁹ Raütiishe, tsangshiq raq akhupo na pekü maq, riisong riili she buksiqto. Kiimaq adü na tho ariiq maq phong tsoktsok she, thosiqto. Kiimaq tsangshiq ka lakü na ngahihi raüta, apaiq ka noqsiqto.

²⁰ Tsangshiq raq apaiq ka akha slailiisiq lot raütiishe, apaiq dü na atiisam, kheashii samtong jong kaü kra, achhut she riibaiqto. Raüta, apaiq khea kriishe hali tiisam kuq nongto. Raütiishe, tsangshiq raq apaiq ka pumsongkham na tübaiq kai miitu she, chela phai niishe sheahoto.

Jesuq Ka Pumsongkham Na Tübaiqto

²¹ Tsangshiq ka Jesuq pumsongkham na tübaiq kai, lam na akai rai riito. Kra akhing na Sairini mung wa Jerusalem chela na wa nguta awa, maiq weshi Simon nguta kra rai riihumto. Apaiq ma ase nai mang ka Alekjendar nai Ruphas riito. Phenlanok raq, Jesuq pumsongkham tipi ka apaiq ma, ningkun miishe tiipi hoto.

²² Raüta tsangshiq raq Jesuq ka Golgotha nguta hiq bashi asi, kiiniishe sheahoto. Kra liichum ka “Maiq Khurii Ba,” nguta ngo.

²³ Kiijaq tsangshiq raq Jesuq ma che ka marq nguta tsiq phanshi rai shot raüta kuqto. Shatmaq, Jesuq raq nyang mak dea riito.

²⁴ Kra raütiishe, phenlanok raq, apaiq ka pumsongkham niishe tübaiqto. Raütiishe, tsangshiq raq, apaiq dü wa khea alam kriika, lang lii raüta, lang raq thaü tlaq, kra phan phan, tsangshiq liipan na riiphea phaqo.

²⁵ Tsangshiq raq apaiq pumsongkham na tübaiq wantaq akhing ka ranap nari tiikaü riito.

²⁶ Apaiq ma kha nyantaq kha raü ka: “Ahata Jehudinok Hokham we,” nguta waiq thüto.

²⁷ Kiimaq tsangshiq raq thiimeaq tekti wenai kiimin, Jesuq ma jaqtsi nü na ashi, kiimaq jaqpha nü na ashi, pumsongkham na tübaiq damto.

²⁸ Arka Asii Bomtsi na, “Nokwe raq apaiq ka mat-saü tsasebi rai pop damto,” nguta chongtlaq kra bomtsi kra tiiku miitu hong wanto.

²⁹ Kra akhing na mungmaiqse ka kra lam maq akhum ashiim wantibi riimin, alea wan lam maq, tsangshiq ka tokbai laqlaq raüta, “Aha! ümniisha Shomjam ka runbaiq laüta, ranaiqtsam liipan niili mihai ha nguta ngoti we ira!

³⁰ Riita, ümchaü min, ümniika ara pumsongkham arwa satki kiq na. Laüta, ümkhum ka tiichhii liina!” nguta Jesuq ka slailiisiqto.

³¹ Kiikhiisii hali, ramwe jongbi nai Thungtri shrinketibi riimin, Jesuq ka slailiisiqto. Tsangshiq liipan na, “Apaiq raq nanok ka tiichhii kuqto. Shatmaq, apaiq khum ka tiichhii phaqtsü mak nya.

³² Ija, ümchaü nashiq raq liirong i shaq na. Khristo, Israilnok hokham we kriika, ümchaü pumsongkham wa misat ki liina. Kra satki raütiq, nashiq raq apaiq ma mikam rong i!” nguta tsangshiq raq apaiq ka slailiisiqto. Kiimaq apaiq rai, maiq wenai pumsongkham na atü baiq dam, kra riimin, Jesuq ka slailiito.

Jesuq Langpit

³³ Kra ranaiq, shethung shekham akhing maq phaho raüta, konta tsam na saüli, kra mung thun hamli na ranyaq wanto.

³⁴ Raji nari tsam akhing saüto angu niishe, Jesuq ka tiihong raüta, “Eloi, Eloi, lema sabakthani?” nguta siito. Kra liichum ka, “I Shiikeawe le, i Shiikeawe le, ümniiraq ngi ka jam nguto miimbaiq laü?” nguta ngo riito.

³⁵ Kra tai raüta pumsongkham tho na chapti bi, maiq phong kiiwa, maiq wiijamti raq, “Tairong laq, apaiq raq Elija ka apaiq khrumke miitu hea tlo!” nguta bomto.

³⁶ Kiijiishe, tsangshiq phong wa, maiq weshi ka tlat chhat ju raüta, kham tiishup chang naitan phu kra, tamshi tsun raüta, thiinin phan che na tsamto. Raüta, pekü na tsom raüta, Jesuq nükhü kiijaq tiinap sap na, apaiq raq mishup nyang laq nguta kuqto. Kra tiinyang lam maq, “Kherong i sha ta! Elija raq apaiq ka ara pumsongkham arwa hiq na tiisat kai miki sha kimak wa!” nguta apaiq raq slailiito.

³⁷ Kra jai maq, Jesuq raq tiihong raüta siito. Raüta alang ka pitto.

³⁸ Apaiq lang pit ri li she, Jerusalem Shomjam na khok rai chang khetuk khea achan kriika, ra nü maq phaho raüta, hiq na saüli, khonai ma tiikholiiq, tiichai kito.

³⁹ Kiimaq, kiijaq pumsongkham khaki na chapshat, Roman phenlabi siihiip jong we raq, Jesuq lang ka jamkho pit wantaq, kra kunli chhito. Kra chhi raüta, “Ai, arwe arkla, Shiikeawe Se dea!” nguta apaiq ka bomto.

⁴⁰ Kiimaq, Jechakre wiijamti min asi riito. Tsangshiq riika alu maq chap raüta liito. Kra tsangshiq phong kiiwiika arthun ara riito. Makdala hiqti nyung Meriq, kiimaq anolinti we Jakob nai Joseph ma anyung Meriq. Kiimaq Salomi ri riito.

⁴¹ Tsangshiq ka Jesuq jai phanti. Tsangshiq raq apaiq jai phan phaho ka Gelili wang miiphü phanho raüta, Jesuq rai Jerusalem na akidam. Tsangshiq ka Jesuq jaqsham na khrumke damti. Kiimaq Jesuq jai phan wanti, jechakre maiq ahinti thun kriimin kiijaq asi riito.

Jesuq Malap

^42-43 Kra ranaiq, rajiko niishe, Arimithia chelati Joseph ka Jerusalem na saü wato. Apaiq ka Jehudinok Rung Jong wa wela ashi riito. Kiimaq apaiq ka Shiikeawe Mungtan saüho kra kheshat maq sii we ashi riito. Kra ranaiq ka Poi Tiije wan ranaiq akhing. (Kriika Asii Niitiitsak ranaiq maq naiqkhu ranaiq). Kriikha maq, Joseph ka hai mak maq, Pilat phana waraüta, Jesuq ma kra jaüto.

⁴⁴ Pilat raq Jesuq ka tsaikito she nguta tai raüta, awang riito. Apaiq raq phentujong we kra hea raüta, Jesuq ka tsaiki li maq, akhing ka ashaqpuq she sha, nguta bom ka tiishangrii waito.

⁴⁵ Pilat raq phentu jong we nü wa, tsütsa ka tai raütiishe, Joseph ma Jesuq ma kra saiqsam miitu she aming kuqto.

⁴⁶ Raüta, Joseph raq raihi-nairai kheathum ka ashi rito. Kiimaq, Jesuq ma ka pumsongkham wa tiisat lamto. Raütiishe, ama ka bannin kheathum kiimaq jop raütiishe, raqkam na longkaü jonghea kiijaq, maiq ma lap kai miitu, longsha awat thü kiijaq, Jesuq ma ka saiqsamto. Raüta makho kilü kriika, long pen kaü jonghea ashi kra tiikü hit raüta, shaq baiq thüto.

⁴⁷ Kra akhing na Magdala hiqti nyung Meriq nai Joseph ma anyung Meriq raq, Jesuq malap saiqsamtaq kriika liishat riito. Kiimaq ama ka ümbano laptaq, kriimin chhi shat riito.