Mark 14 - ASII LAKDAP Bible (BSI)

Jesuq Tsea Mat Tanto

¹ Riita kra akhing na Tiichhii Wan Poi nai Pi Maq Shohü Winsii Phaq Poi phaho miika, ranaiq nai lishe asi riito. Kiijaq Ramwe jongbi nai Thungtri shrinketibi raq, Jesuq ka ahukse maq lap raüta, tsea baiq chang nguta mat raü ka shun jam she riito.

² Riita tsangshiq liipan na bom ka akha riichong wanto: “Nashiq raq arka, ara Poi liipan bala kiimung chang ka riimak. Poi liipan na kiimung hai jiila, mungmaiqse rai makjaq kharong riijiiq.”

Bethani Maq Jesuq Han Na Homseng Nyatto

³ Jesuq ka Bethani hiq na rampun tsi wa aheaki we Simon jam na riito. Jesuq ka kiijaq dungsea rea bala na, maiq nyung ashi ka kiijaq wato. Apaiq raq athii tsinhea phan, kiimaq rahea phan homseng tsai ka alabastar tsabum na lam wan raüta wato. Apaiq raq homseng tsai tsabum ka tiibun tlü raüta, Jesuq khupo na nyatto.

⁴ Maiq wiijamti raq kra chhi raüta akhiq riito. Kiimaq tsangshiq liipan na, “Atinkhan miinu atsin phan tsai arka, phiqtiiwii jaram tiiwiihii baiq wa?

⁵ Arka kampho kamsii shitsam thaq na apa pha sha chang wa. Raüta, kra kampho maq miitsan maiqse kra khrum kewan chang wa!” nguta bot trangto. Kiimaq tsangshiq raq kra nyung ka sonto.

⁶ Kiijiishe, Jesuq raq tsangshiq bom ka akha treto, “Namshiq raq apaiq ka jaram wa tiibanbi tlan! Apaiq raq ngi miitu pinthum maiq- lung ngamwii kiimaq athuk atsom pinthum jaqsham ashi shamkuqto.

⁷ Miitsan maiqse ka namshiq rai siruq misi. Kiimaq namshiq raq ümtiikiiwa khrum kewan ro tlan, kiitiikaq mikhrum kuq han. Shatmaq, ngi ka namshiq rai adam na siwan ruq ka simang she.

⁸ Apaiq raq jamlai wa tang tlaq, kra kloto; apaiq raq i khum na ara homseng maq nyat kuqtaq arka, tlu na i ma ara alap miitu, tiije kuqto.

⁹ Kiimaq ngi raq namshiq ma bom poshi chong pha. Taironglaq. Ara Tsütsa Ahea ara mangjong hiq hamli na, ümriibano chongkuqtlaq, kiijaq ümchaü arnyung raq ngi miitu jamlai wa shamkuqtaq armin, apaiq mang ka laqbaiq mak phan maq, chong kuq wan dam ruq she miraq.”

Judas Raq Jesuq Shaphaqto

¹⁰ Kra akhing na ajaqshisetiim roqshi ri wenai phong kiiwa weshi Judas Iskariot kriika, ramwe jongbi phana, Jesuq ka shaphaq kai she kihoto.

¹¹ Tsangshiq raq Judas bom ka tai raüta, tsangshiq ka kai khoqriiq khiq she riito. Kiimaq apaiq ma kampho mikuq i nguta bom ka treto. Kra miiphat she, Judas raq Jesuq ka tsangshiq jaqkhon mong ma shaphaq baiq miitu, akhing ka liishat she riito.

Ajaqshisetiim Rai Tiichhii Wan Poi Dung Siqto

¹² Pi Maq Shohü Winsii Phaq Poi pha wan ranaiq ka Tiichhii Wan Poi na phaq chang sku setiim ta wan akhing ranaiq riito. Kra ranaiq na Jesuq jaqshisetiim raq, “Ümniima Tiichhii Wan Poi Dung ka ümbano mitiijeho hai?” nguta apaiq ma bom ka waito.

¹³ Kiijiishe Jesuq raq ajaqshi se nai ma bom ka akha chongkuq raüta tiikito, “Nam nai ka chela kiina kironglaq. Kiimaq kiijaq namnai raq maiq weshi ka hamlii tak na kham piraü, kra mirhum han. Namnai ka apaiq jai phan phan warong laq.

¹⁴ Lanta, apaiq watlaq jam kiina warong laq. Kiimaq jamchongti we ma, ‘Shrinketi we nga i jaqshisetiim naishiq Tiichhii Wan Poi Dung sia chang khok ka ümbano tiije laü ngu wa?’ nguta bom ka wai ronglaq.

¹⁵ Kra waihan jiila, apaiq raq namnai ma ajam rathong na, khok ajong wiq ashi, phanrap tiihongtha rea je she kra mitiichhi kuq. Kiijaq namnai raq nashiq Poi Dung kra tiijeholi rong laq,” nguta apaiq raq tsangnai ma bom ka chongkuqto.

¹⁶ Krai mren she, ajaqshisenai ka chela na kihoto. Raüta, Jesuq raq chongkuqtaq kiikha riikhaqli dea humkito. Krai mren she, tsangnai raq Tiichhii Wan Poi Dung ka kiijaq tiijeholito.

¹⁷ Rashe ka rajiko niishe, Jesuq ka ajaqshisetiim roqshi ri wenai kra rai, kra jam niishe saühoto.

¹⁸ Raüta tsangshiq ka chamrii niishe ngato. Raüta, dungsea anga lam miishe, Jesuq raq tsangshiq ma akhiishe chongkuqto, “Ngi chongpha. Namtsam phong wa weshi raq ngi mishaphaq han. Apaiq ka ümchaü arjaq ngi rai adam na phaqsea damti we.”

¹⁹ Kra tai raütiishe, ajaqshisetiim ka tsangshiq tsanbi watrang liishe riito. Kiimaq apaiq ma weshi shi maq, “Ümniiraq ngi nang ngo ka riimak ahiq na?” nguta apaiq ma bom ka tiitsang waiwito.

²⁰ Jesuq raq treto, “Kriiwe ka namshiq roqshi ri wenai phong wa miraq. Jurwa ngi rai adam na weashaü tai winpin ashi na, awinsii phu ka tsam raüta miphaq, kriiwe ka miraq.

²¹ Riita Maiq Se riiwe kla, Asii Bomtsi na jamkhii tsai chang ngutiiwa waiq thütaq, kra phan phan dea mitsai wan. Shatmaq, Maiq Se shaphaqti we miika, pinthum phiiptsi chang asi! Apaiq ka anyung puk maq rawii chhiki mak dongdii ngu raü jiikhoti ahea riichang wa!” nguta Jesuq raq tsangshiq ma chongkuqto.

Tatiwe Phaqsea

²² Tsangshiq ka dungsea lam miishe, Jesuq raq winsii phushi ka ajaq na sham raüta, kechutum achu jaüto. Raüta, winsii phu ka tiiphan raüta, ajaqshisetiim ma kelam maq, “Jaü ronglaq; lanta ara phaq ronglaq. Arka i ngam phu,” nguta nguto.

²³ Kiimaq hali, apaiq raq kok ashi ka ajaq na do raüta, Shiikeawe ma kechutum achu jaüto. Raüta, tsangshiq ma kuqto. Kiimaq tsangshiq tarü raq kra kok wa nyangto.

²⁴ Jesuq raq, “Arka i tiijai. Maiq pahea miitu araü kuq. Shiikeawe raq tongshong wantlaq kra ram wan chang, ramkham.

²⁵ Ngi chongpha. Ngi raq ara spiqtai arka nyang nong mang she. Shiikeawe Mungtan na spiqtai anye kra shetiq minyang ha.”

²⁶ Kra lot raütiishe, tsangshiq raq miikhon ashi she shito. Raüta, tsangshiq ka Olip Pero Hiqlam nü niishe kihoto.

Petar Raq Jesuq Tiishaü Tiithaito

²⁷ Jesuq raq tsangshiq ma chongto, “Namshiq tarü raq ngi ka miim baiqthü lanta, apin she mir wan han. Ara jamkhano chongtiikang ngukla, Asii Bomtsi na, ‘Shiikeawe raq sku rümti ka atsea miraq. Kiimaq skuse kong ka wiita apin she mirwan,’ nguta chongtlo.

²⁸ Shatmaq, ngi ka ama wa dong wan jai she, namshiq ma sinkhu na Gelili na miwa kang.”

²⁹ Kiijiishe, Petar raq, “I kongtitiim wiita raq ümniika tiishaü baiq raü jiimin, ngi riikla tiishaü mang!” nguta treto.

³⁰ Kiijiishe Jesuq raq Petar ma chongto, “Ngi chongpha. Athi rawa wu jangnai miwa shaq liipan niili, ümniiraq ngi ka juwa sapmang nguta jangtsam mitiishaü baiq haü.”

³¹ Kiijiishe Petar raq bom ka atsin maq hali, “Ngi ka ümniirai tsaidam chang li jiimin, ümniika tiishaü mang mirha!” nguta Jesuq bom ka treto. Kiimaq ajaqshisetiim ahinti riimin kiikhiisii hali nguto.

Gethsemane Na Jesuq Achu Jaü

³² Tsangshiq ka Gethsemane nguta hiq bashi asi, kiijiishe saüto. Kiimaq, Jesuq raq ajaqshisetiim ma, “Ngi ka achu jaü shon, namtsam ka arjaq nga ronglaq,” nguta bom ka chongkuqto.

³³ Raüta apaiq rai Petar, Jakob kiimaq Johan kra sheaho raüta, tsangshiq ka phanshi kongkhu linlin niishe wato. Apaiq ka chamchao homa nai riiweatsi homa raq, tiimok miichaq she bok wan raüta, atsan among po paq kra tiipanki nam nam she tsi wanto.

³⁴ Kiimaq apaiq raq tsangtsam ma, “I tsan mong na aho ajü tsi homa raq, i tsitsü ara pitlang pitthea she pat wanto. Namtsam ka arjaq nga lanta, achu jaüshat maq kheli rong laq,” nguta chongkuqto.

³⁵ Kra ngu raütiishe, apaiq ka phanshi kongkhu linlin na hali tiisot wawanto. Raüta hiq na bumki tlii raüta, mai tlaq jiika, chamchao walü homa thun kriika, apaiq thaq na saü wan tlaq kiiwa, apaiq ka tiihang kuq wan laq nguta achu jaüto.

³⁶ Apaiq raq akha achu jaüto, “I we, i we le! Ümniiriika phanrap milot haü siisaq. Mai tlaq jiika, ngi raq nyang chang, ara chamchao kok arka, alam riibaiq laq. Shatmaq, kiitiina, ngi raq thapthi wantiikang kra phan phan ka riimak. Shatmaq ümniiraq jamkho thapthi tlaü kra phan phan tiihong laq.”

³⁷ Riita kra achu jaü raütiishe, apaiq ka ajaqshisetiim wetsam phana hali wawan nongto. Shatmaq tsangshiq ka akon makaiq chhiwato. Kiijiishe apaiq raq Petar ma, “Simon, ümniika akon sha? Ümnaq ngi rai, nari shise dongdii min, asam maq ngalot maü sha?” nguta bomto.

³⁸ Kiimaq apaiq raq tsangtsam ma, “Achu jaü shiichaq rong laq. Maitai kho na dea jiiq. Namshiq wenyi riika achu jaüro, shatmaq han-ngam raq tang mak,” nguta chongkuqto.

³⁹ Kra bom thü raüta, apaiq ka thongshi ri hali kiho nongto. Raüta achu jaüto. Kra lak niimin, kongkhu lak na achu jaütaq kra bomtsi maq hali, achu jaü nongto.

⁴⁰ Raüta, apaiq ka ajaqshisetiim phana hali jang wan nongto. Shatmaq, tsangtsam ka akon hali chhiwa nongto. Tsangtsam raq asam maq achu jaü ngalot mak riito. Kiimaq tsangtsam raq apaiq ma bom tre chong chang min ahü she riito.

⁴¹ Apaiq ka achu jaülot raütiishe, tsangtsam phana hali jangtsam she jangwa nong ngo niishe sanha, apaiq raq, “Riita namtsam ka ümchaü min akon sia nai nü tiitsaksea li dea nya? Hongto she! Akhing saü wato she! Lü ronglaq. Maiq Se ka ümchaü ngarai maiqse jaqkhon mong na shaphaq baiqto she.

⁴² Tiido ronglaq. Warong phiishe. Liimanta, ngi shaphaqti we ka saü wato she!” nguta tsangshiq ma chongto.

Jesuq Lapto

⁴³ Jesuq ka ajaqshisetiim rai abom miiqshmiiq liipan niili she, ajaqshisetiim roqshi ri wenai phong wa, Judas Iskariot ka kiijaq saü wato. Apaiq rai maiq ka kongnyung kaüshi shea raü she saü wato. Tsangshiq ka jasai kiimaq kla ta doraq chhaq saü wato. Tsangshiq ka ramwe jongbi nai Thungtri shrinketibi kiimaq welabi raq atiiwa.

⁴⁴ Matwe raq, rewebi ma bomhuk ka kongkhu na akha achongke wishe riito: “Ngi raq ümriiti theaphi niiwa lungwii riimei wan nü maq mishup kang, kriiwe ka namshiq raq rittlan we kra ngushat. Kriiwe ka lap lanta, kharü maq kha raü, hitho ronglaq.”

⁴⁵ Krai mren she, Judas ka saüwa saq raütli, Jesuq tho na chapsaq riito. Raüta, “Shrinketi we le!” nguta bom wanto. Raütiishe, apaiq raq Jesuq theaphi na anü maq shupsaq shupto.

⁴⁶ Krai mren she, tsangshiq raq Jesuq ka lap hoto. Raüta raü maq khato.

⁴⁷ Shatmaq, kiijaq chaptlaq phong wa maiq weshi raq, ajasai ka chathit raüta, Ramwe Ajong Pinthum we dise nilok kra tiidearok soq baiqto.

⁴⁸ Kra chhi raütiishe, Jesuq raq tsangshiq nangnga nguto, “Namshiq raq ngi lap wa ka, thiimeaq daku we lap wa ikha, jasai nai klata do raq chhaq maq warai ngo min sha rarai ta?

⁴⁹ Ngi ka wranaiqshe, namshiq rai Shomjam na trahoke siwan kang riimak sha. Riita namshiq raq ngi ka kiiwa jamto lap man riilan. Shatmaq ümchaü arka, Asii Bomtsi na achongthü bomtsi kra tiihong tha chang she dongdii.”

⁵⁰ Kiijiishe, ajaqshisetiim thun ka, apaiq ka kiijaq miimbaiq thü raütiishe, pongpin riipin she pintrangto.

⁵¹ Kiijaq norii we weshi ka, adü na raihi-nairai khea lamlam se ka sam raüta, Jesuq jai ka trü phan hoto. Tsangshiq raq apaiq kiimin alap danto.

⁵² Shatmaq, apaiq ka adü wa khea ka chhut baiqthü tlii raütiishe, raiqhü ma miishe, tsaihü jihü she paü wanto.

Jesuq Ka Jehudinok Rung Na Tiichapto

⁵³ Kra raütiishe, tsangshiq raq Jesuq ka Ramwe Ajong Pinthum we jam niishe sheahoto. Kiijaq ramwe jongbi, welabi, kiimaq Thungtri shrinketibi thun ka athung kun she riito.

⁵⁴ Petar ka Jesuq jai na, jailu maq, phanho raüta, Ramwe Ajong Pinthum we jam, rukmong kiijaq saüli wawanto. Raüta kiijaq Shomjam khetibi hokranok rai wawo adam na nga damto.

⁵⁵ Ramwe jongbi nai Jehudinok Rungjong Phowebi raq, Jesuq ka atsea baiq ma nguta, apaiq shutphit kha raü kra ritto. Shatmaq, tsangshiq raq apaiq dii na jamkha min hum mak riito.

⁵⁶ Kiijaq rung na, maiq arot hakhibi thun pahea ka chap raüta, Jesuq ma kha ka pahea nyanto. Shatmaq, tsangshiq bom ka kuwa mak siisaq riito.

⁵⁷ Kiijiishe, maiq arot hakhi kewantibi ka rung na chap raüta, Jesuq ma kha ka akhiishe nyanto:

⁵⁸ “Mungtubi le. Naishiq raq apaiq bom ka akha taikai. Apaiq raq akha nguto, ‘Ngi raq ara maiqse raq jaq maq ahai Shomjam ara run baiq lata, ranaiqtsam jai maq, maiqse raq jaq maq hai lot mak chang phan, Shomjam ashi she mihaiha,’ ” nguta Jesuq ma kha ka nyanto.

⁵⁹ Shatmaq, tsangshiq raq kra kha nyan wantaq bomtsi kra dongdii min, kodang koda li riito. Tsang shiq bom ka tiikulot mak riito.

⁶⁰ Kiijiishe, Ramwe Ajong Pinthum we ka tsangshiq tarü man na chapto. Raüta, Jesuq ma bom ka akhiishe waito, “Riita, tsangshiq raq ümniima ara kha nyan tlaq ara miitu, ümkiq khii chang ka ahü sha?”

⁶¹ Shatmaq, Jesuq raq tsangshiq bom ka poshi dongdii min tre mak, kaiqshakli riito. Kiijiishe, Ramwe Ajong Pinthum we raq, Jesuq ma bom ka akhiishe hali wai nongto, “Riita ümniika shiiman Shiikeawe Se Khristo dea sha?”

⁶² Kiijiishe Jesuq raq, “Üm,” nguta apaiq bom ka treto. Raüta apaiq raq, “Riita ümchaü sanha namshiq wiitarü raq Maiq Se ka, Ajong Shiikeawe ma jaqtsi nü na nga raü she michhi han. Kiimaq apaiq ka phum thaq na nga raüta, mangjong hiq na akairai she michhi han!”

⁶³ Kra tai raütiishe, Ramwe Ajong Pinthum we raq, adü na asam samtong jong ka, ajaq maq chaihea she riito. Raüta, “Nashiq ma jamlai hakhi she wa ra tla!

⁶⁴ Apaiq raq Shiikeawe man na, riikhiq pinthum ashut she bomtlo. Arka namshiq mungtubi raq tai lan she kata. Riita, ümchaü min, namshiq raq tri ka jamkha toqtan chang ngutiishe wa tiima tlan?” ngutiishe phowebi ma waito. Kiijiishe, tsangshiq tarü raq, apaiq ka tiishutto. Krai mren, apaiq ka atsai chang nguta kha ka tanto.

⁶⁵ Raütiishe, tsangshiq phong wa maiq wiijamti raq, Jesuq ka tho ariiq maq phong tsoktsok she thosiq wanto. Kiimaq amak ka khea maq jobto. Raüta, jaqtham maq thaüto. Raüta, “Ümnaq jaqtham maq thaüti ka juwa, chong liita!” nguta slailii siqto. Kiimaq hokranok raq, apaiq ka hitho raüta, atheaphi na siiqsiiq tsatto.

Petar Raq Jesuq Tiishaüto

⁶⁶ Petar ka jamkea sonruk mong niili riito. Kiijaq Ramwe Ajong Pinthum we jaqshisetiim jechaksere phong wa nyungshi ka Petar tho na kito.

⁶⁷ Raüta, apaiq raq Petar ka wa worea chhito. Kiimaq apaiq pha nü na tiitsang liirat raütiishe, “Ümniimin la Najareth hiqti Jesuq rai kongshi siti we,” nguta bom ka apaiq ma nyanto.

⁶⁸ Shatmaq, Petar raq, “Ngi ka jam min sapmang, ümniiraq ngutlaü ka, ngi raq akhiismin sap mang,” nguta apaiq bom ka treto. Raüta, apaiq ka jam ruk phai lam nü kiiniishe tiisot kihoto. Apaiq raq kra ngori li she wu ka wato.

⁶⁹ Kiimahali jaqshise jechakse kriiraq, apaiq ka chhi nong raüta, kiijaq chapti bi nokwe man na, thongshi hali, “Notsam, arwe armin tsangshiq kongti we raq!” nguta tüsaiq saiq she hali bom ka tiitsato.

⁷⁰ Shatmaq, Petar raq apaiq bom ka akhii hali riinongto. Kriimaq heashi sinong raüta hali, maiq kiijaq chapti bi raq, “Ümniika Jesuq kongti phong wa riimak ngutiika naq rotkiq. Jamkhano ngukla, ümniikiimin Gelili wang na siti sii,” nguta Petar ka tiichop nongto.

⁷¹ Kiijiishe, “Ngi raq atiitum lata chongtiikang. Ngi raq chongtiikang arka tengteng! Ngi raq arot chongtiikang jiika, Shiikeawe riitiq mishin! Namshiq raq chongtlan we kriika juwa, ngi raq asap min mang!” nguta Petar raq tsangshiq bom ka khü nongto.

⁷² Kra riibom rai tlaq bala liipan niili she, wu ka jangnai she wa nongto. Kiimaq, “Wu jangnai miwa shaq niili, ümniiraq ngi ka juwa, sapmang nguta jangtsam mitiishaü baiq haü,” nguta Jesuq raq Petar apaiq ma achong kuq bomtsi kriishe, atsan na tiidosaq she tiidoto. Krai mren apaiq ka ahosi ninlot mak she kha maq aho riito.