Mark 13 - ASII LAKDAP Bible (BSI)

Shomjam Mitiithenbaiq Nguta Chongto

¹ Jesuq ka Shomjam maq atiido wan awa wan she kiijaq, ajaqshisetiim phong wa weshi raq, “Shrinketi we le, lii maüta! Ara Shomjam jong hai chang longpen kaü thun arka kai tsomhea. Kiimaq Shomjam arka pinthum maiqlung ngamwii, alüsea chang, saphea pinthum!” nguta Jesuq ma chongto.

² Kiijiishe, Jesuq raq apaiq bom ka treto, “Namshiq riika ara jamjong kaü tsom wa kriili dea chhi tlan nya? Ngi chongpha. Ara jam kaü arka wiita she mitiibun baiq. Raüta, ara jamkaü ara hai chang longkaü thun kra dongdii min hiq maq hutse wiita mirun baiq. Jam riikom kriimin ahü she miraq.”

Mungbrak Nai Chamchao

³ Jesuq ka Shomjam maq kha riire na, Olip Pero Hiqlam na anga riito. Kra bala kiijaq Petar, Jakob, Johan kiimaq Andru ka tsangshiq honhonse li, apaiq phana wato.

⁴ Raüta, tsangshiq raq, “Riita, ara chongtlaü mra pin jonghea akhing aten arka, ümtiiko misaüho nya? Kiimaq kra mra pinho akhing ka saüho tlo she dea nguta, maji binriim bomchong tiiji shi kriika jamlai phan mo mitiichhi kuq,” nguta apaiq ma bom ka tiitsang waito.

⁵ Kiijiishe, Jesuq raq tsangshiq ma bom ka akhiishe chongkuqto, “Honkam shat maq shongnga rong laq. Namshiq ka maiq ma naq tlao rongkiq.

⁶ Maiq pahea, i mang shaphaq raüta misaüho kiiphan. Kiimaq tsangshiq raq, ‘Ngi ahata Khristo!’ nguta mitiitsaki kiiphan. Raüta, tsangshiq raq maiqse pahea, lamjiq nü na mishun sheaho.

⁷ Kiimaq ümtiikiiwa, ara chongtiikai chiqdong redong, reriikhat tsütsa arka aje niishe nai maiq bin alu na tsütsa kra mitai han, kra tai han jiila, namshiq ka tsaiji naq tran rongkiq. Kiikha mung brak shaq mra pin wan kriika, saü chang she dongdii miraq. Shatmaq, kra mra pin tlaq kra miili ka, Phangthum ranaiq ka saüki mak.

⁸ Mangjong hiq na siti maiq mung thun kra liipan na arkhat mirwan. Hokhambi nai hokhambi liipan na, weshi raq weshi ka mikhat. Mungkang tlotli na, hiqjong mimu. Kiimaq maiq mung barap se na song aram pahea she midong. Arthun mra pin tlaq arka, nowüchhi tsi phaho ikha miraq.”

⁹ “Arkha maq, namshiq ka honkamshat maq shongnga rong laq. Namshiq ka maiq raq alap miwan kiiphan. Raüta, rung na mihit wan. Namshiq ka sinagok maq atea miraq. Namshiq ka mung welabi nai hokhambi man na, i mang miitu rung na mitiichap. Tsangshiq rung phong na, namshiq raq Tsütsa Ahea kra michong kuq han.

¹⁰ Kiimaq, phangthum ranaiq kra misaü shaq na, Tsütsa Ahea arka mangjong maiqse wiita ma mitiitai kuq wan. Kra jai miishetiq phangthum ranaiq akhing kra misaü.

¹¹ Kiimaq ümtiikiiwa namshiq ka, maiq raq lap raüta, rung na tiichap wantlaq, kra akhing na, namshiq raq maiq bom ka jamkhii tre chang wa miraq nguta, kongkhu na naq chapa rongkiq. Rung maq maiqse raq namshiq ma bom wai tlaq kra akhing na, Asii Wenyi raq tsangshiq bom ka jamkhii tre chang wa kra namshiq ma achong mirkuq. Kra phanphan namshiq raq tsangshiq bom ka mitre han.

¹² Maiqse raq maiqmii phu ano kra atsea baiq miitu atlap mirkuq. Awetiim raq asetiim ka milap kuq. Asetiim raq awetiim ka mingeng. Raüta, milap kuq. Raüta, atsea mirbaiq.

¹³ Wiitarü raq, namshiq ka ngi miitu mingeng. Shatmaq, jurwa atiithum na saüli nin wan ruq maq ngi ma kam wan tlaq, kriiti ka mitiichhii wan.”

Phiiptsi Chang Matdong

¹⁴ “Namshiq raq, ‘Shomjam Tiishechang Maiqphai Asi Sumla Kaü,’ ashi ka apaiq chapchang riimak ba kiijaq chap raü she michhihan.” (Aphatti ma: Ara liichum arka jamlai ngo wa chongtlaq kra riikhaqli tak rong laq!) “Kra chhanghang akhing ranaiq she la saüwa raüla, kra akhing na juwa Judia wang na siti, kriiti ka kin kiina tiipaü juwan chang miraq.

¹⁵ Kiimaq juwa wukhu na bala charai jiiq, kriiti ka tapmong wa hupsam phanshi ra lam wan latiitiq chiimjin mijuha nguta, tap mong na nyap wa ra mak she.

¹⁶ Kiimaq juwa wak na, jaqthiq rü na charai jiiq, kriiti riimin, ajam na wa raüta akhea thum ka lamsam wan latiitiq mijuha nguta, jam na wa ra mak she.

¹⁷ Kra mung mra pin chhanghang jonghea bala ka, jechakre juwa wiihü wiihan sitlaq, kiimaq noshii nyungre sitlaq, tsangshiq miika nü maq achonglot mai chang chamchao jonghea akhing miraq!

¹⁸ Ara chong tiikai mung- maiqse ma chiq pin repin chhanghang ranaiq akhing arka, tangwa rajun cho ji na cha mak chang miitu Shiikeawe jaq wa achu li jaü ronglaq!

¹⁹ Kra chamchao akhing saü tlaq kriika, Shiikeawe raq ra nai hiq tiiq wanli maq, ümchaü niitaq ara mangjong hiq na chamchao sitlaq kiima thapthi wan chang siika riimak. Kiimaq rawiichii niimin akha redong ka ahü she miraq.

²⁰ Shatmaq, Tatiwe raq kra chamchao rahiq ka atiitoq riikuqto. Tiitoq kuq mak ngu raü jiika, maiqlai min tiichong mak she khata miraq. Shiikeawe raq apaiq raq atsea wan, asengi kra tiihang kewan miitu, ara chongtlaq chamchao rahiq akhing arka atiitoq kewan wishe.

²¹ “Arkha maq, kra akhing na, maiq ashi ra raq namshiq ma, ‘Liilaq, Khristo ka arshe ahata!’, lo ‘Liilaq, apaiq ka i niikiijaq kata!’ nguta chong raü jiimin, namshiq raq naq lamkam rongkiq.

²² Ara jamkhano chongtiikang ngukla, kra akhing na, arot akiq Khristobi nai arot akiq shammibi ka pahea midong wan. Raüta, tsangshiq raq awang chang nai taklot mai chang jaqsham pahea miklo wan. Raüta, tsangshiq raq lot raü jiila, Shiikeawe raq atsea wan asengi phong maiqse sitlaq kiiwiimin milao lii wan.

²³ Arkha maq, namshiq ka honkamshat maq shongnga ronglaq! Ngi raq namshiq ma kra akhing misaü shaq na chongkuq tiipha ara tai rong laq.”

Maiq Se Saükai Akhing

²⁴ “Kra mungbrak shaq jai niishe, rashe kaü ka li mak she miraq. Rathup ranyaq she misaü wan. Jipi kiimin limak she miraq.

²⁵ Ra wa raiqsaiq thun kiimin rawang win kiiwa adea she mirwan. Kiimaq rawang win na sitlaq ningkun thun kiimin wiita tsangshiq khum lam kiiwa ahin niishe mitsuq baiq wan.

²⁶ Kra akhing na Maiq Se ka ningkun ajong ho raüta kiimaq apaiq khushü jonghea kra ho raüta ali aliim wahea liishe phum thaq na akai rai she michhi han.

²⁷ Kra akhing na apaiq raq rasetiim ka tiiki raüta mangjong hiq barap se na siti Shiikeawe raq atsea wan maiqse angu thun wiita kra mirchom hea wan.”

Phupmup Chong Wa Tsii Lamchang Bomtsi

²⁸ “Namshiq raq phupmup chong wa tsii lam chang bomtsi asi jo. Namshiq raq phupmup chong na, akü ako thun na, ajaq anye she nüm pha wan chhihan jiila, O ümchaü ka raju akhing she saü wanto nguta sap tlan.

²⁹ Kra niq riri sii hali, namshiq raq ara mungbrak akhing she chhipha han jiila, phangthum akhing rahiq jipi kriika saü rai wanto she dea nguta sap rong laq.

³⁰ Namshiq tsan na samhea wiq shaq ronglaq. Ümchaü atra siti thun arwa tarü ka mitsai shaq liipan niili, ara chongtiikang mra pin jin akhing ranaiq kra misaü wan.

³¹ Ra nai hiq ka athen mirki. Shatmaq ara, i bomchong arka ümtiikiimin poiki mak phan.”

Phangthum Akhing Saükai Sap Mak

³² “Riita ara chong tiikang ranaiq akhing saükai arka jurmin sapmak miraq. Kra akhing ka rasetiim riimin sapmak. Kiimaq Maiq Se apaiq raq dongdii min sapmak. Kra akhing saükai ka Awe raq lamlam li saptlo.

³³ Kra ranaiq akhing saükai kriika namshiq raq sapman. Kriikha maq, namshiq ka honkam shat maq, kheshat lanta siwan lili ronglaq.

³⁴ Arka, maiq weshi raq, apaiq ka wanhiq na kaiho ma, ajaqshisetiim khumtek ma, jam jaqsham ka pheakuq thü tlaq ikha. Raüta, apaiq raq kilü khetiwe miimin, jam ka samhea khe liijo nguta chongthü raüta, apaiq ka wanhiq na kihotlaq ikha.

³⁵ Kiikha hali, namshiq riimin, kheshat maq siwan lili ronglaq. Ara jamkhano chongtiikang ngukla, jamchongti we kriika, ümtincho wa saüki tla, kriika namshiq raq sapman. Apaiq ka raji na mosaü kai miraq. Ra wa thung na mosaü kai miraq. Riimak la, wushu wuwa ho na mosaükai miraq. Riimakla, ranap rashe dong na mosaükai miraq.

³⁶ Apaiq ka tiihanghiiq maq saüki raüla, apaiq raq namshiq ka akon sia loho mak chang miitu, namshiq ka honkam shat maq si ronglaq.

³⁷ Namshiq ma ngi raq ara tsii chongkuq tiikang arka, namshiq tarü tlotli miitu chongkuq tiikang. Namshiq tarü raq kheshat maq si rong laq!”