Mark 12 - ASII LAKDAP Bible (BSI)

Spiq Ro Akheng Na Shamseati

¹ Kiitiikaq Jesuq raq tsangshiq ma manphan shiiton maq chongkuqto: “Man na maiq weshi raq spiqtsi ro chhito. Raüta, kra spiqtsi ro ka trotam maq rukto. Kiimaq spiqtsi tsai tiikitchang longtham min ashi wat raüta tiihong thüto. Kiimaq wak khechang riirin min ashi hai thüto. Raüta spiqtsi ro ka maiq akheng na shamseati ma tiishiipto. Raüta apaiq ka maiqmung ahin na wanhiq khum kai kihoto.

² Spiq tsi pansea cho akhing niishe wakchongti we raq adise ashi ka tiiki raüta, akheng na shamtinok jaq wa wak kheng tiijaü kito.

³ Shatmaq, wakshiipti nok raq adise ka alap riito. Raüta atea riito. Kiimaq wakkheng min kuq mak, apaiq ka jaqmii miili tiijang baiqto.

⁴ Kra riikiita, atati we raq adise ashi hali tiiki nongto. Kriimin wakshiipti nok raq akhu na bukto. Raüta shum jong miise shummii raüta hali, apaiq ka jaqmii miili tiijang baiq nongto.

⁵ Kiijiishe atati we raq adise ashi hali tiiki nongto. Shatmaq, tsangshiq raq adise ka atsea she riibaiqto. Kiimaq kra niq riri sii hali, adisetiim ahin pahea atiiki thun kriimin, wiijam ka ninta tsatto. Kiimaq wiijam ka atsea riibaiqto.

⁶ Riita atiisup niishe sanha, apaiq tsan ran chang aseshaq kli she tiichongto. Krai mren, atiisup niishe, apaiq raq ase kriishe wakshiipti nok phana tiikito. Apaiq raq atsan mong na akhiishe tiima wanto, ‘Ngi raq tiima kla, tsangshiq raq i se shaq she tiiki tiikang arka, mishreng she ahiq,’ nguta tiimato.

⁷ Shatmaq, wakshiiptinok raq ase kriishe chhi raüta, tsangshiq liipan na, ‘Ai, ara atati we se she saükito. Lo, no-tsam warong ra! Nashiq raq apaiq arshe tsatbaiq rong i! Ase arshe tsatbaiq hai jiika, apaiq rii tachong hupsam thun ka nashiq rii she miraq!’ ngutiishe bom ka riichongto.

⁸ Krai mren, tsangshiq raq apaiq ka lap ho raüta tsat baiqto. Raüta apaiq ma ka wakphe niishe dobaiq kito.”

⁹ Kra chongkuq raütiishe, Jesuq raq tsangshiq ma bom ka akhiishe waito, “Riita spiqro tati we riika, jamlai she wa mirnya? Apaiq ka kiraüta wakshiiptinok ka wiita mijiip baiqki. Raüta, spiqro ka nanok maiq ahinti miishe mishiip kuq thü.

¹⁰ Riita namshiq raq Asii bomtsi na ara chongtlaq arka phat tlan ahiq na. Arjaq akha chongtlo: ‘Jamhaiti raq abi nguta ashthoq baiq longkaü kriika, tarü thaq na ara pinthum longkaü miishe jakito.

¹¹ Arka Tatiwe raq aklo: Arka tsomhea pinthum ashi!’ ”

¹² Kra manphan kra tairaütiishe, Jehudinok welabi raq, Jesuq raq tsangshiq kra shiitonto ngutiishe takto. Krai mren, tsangshiq raq apaiq ka alap chang nguta tanto. Shatmaq, tsangshiq ka mungmaiqse ma ahai riito. Kriikha maq tsangshiq ka apaiq tho wa ahin niishe tiido wanto.

Phuntake Miitu Bom Riiwai

¹³ Phorisinok raq nai Herod sengibi raq, tsangshiq phong wa, maiq wiijamti ka, Jesuq phana tiikito. Kriika tsangshiq thiikho na, Jesuq ka tiithap haijaq nguta tiikito.

¹⁴ Tsangshiq ka Jesuq phana kiraüta, apaiq ma bom ka akha waito, “Shrinketi we, naishiq raq asap hai, ümniiraq tengtlaq bomtsi ka maklii ashi maq chongkuq tlaü. Ümniiraq maiq ka asham na lii laüta, tseatsiiq maü. Kiqshi maq tri laüta, Shiikeawe bomtsi ka chongkuq tlaü. Riita ikhla, ara chong liita, nashiq raq Roman Hokham we ma phunta kewan arka, nashiq Thungtri na ajiq sha alam wa? Arka nashiq Thungtri na ang tlaq sha ang mak wa?”

¹⁵ Shatmaq, Jesuq raq tsangshiq thiikho thu tlaq kra achhi kha maq, tsangshiq bom ka akhiishe treto, “Namshiq raq ngi ka, namshiq thiikho na jaram tiithap wa tan tlan? Kampho siishi ka lam wan liita, lii i.”

¹⁶ Krai mren, tsangshiq raq apaiq ma kampho siishi ka lamkuqto. Kiimaq, apaiq raq tsangshiq ma, “Riita, ara kamsii na sumla nai maiq mang waitaq arka, ju sumla wa kiimaq ju mang wa?” nguta waito. Kiijiishe tsangshiq raq, “Roman Hokham we,” nguta treto.

¹⁷ Kiijiishe Jesuq raq, “Ikhiijiika, Roman Hokham we la ka apaiq ma kuq rong liina. Kiimaq Shiikeawe la ka, Shiikeawe ma kuq rong liina,” ngutiishe Jesuq raq tsangshiq bom ka treto. Kiimaq Jesuq bomtre kra tai raüta, tsangshiq ka kai amao riito.

Amaa Wa Dong Wan

¹⁸ Kra akhing na maiq ka ama wa midong wan nguta kamasham bomtsi chongtlaq kriima kamwan makti, Sadusinok phong wa maiq wiijamti ka Jesuq phana kito.

¹⁹ Raüta tsangshiq raq apaiq ma bom ka akha waito. “Shrinketi we, Mosheq raq nashiq Thungtri na, ‘Maiq weshi ka achak lamjai ase mihum shaq na tsaiki raüla, mantinyung ka wulum we ma ma, aphu ano raq rom wan chang miraq. Kiimaq tsangnai setiim ka wulum we ma setiim ma mija wan,’ nguta waiqthüto.

²⁰ Riita man na, maiq tashi asi riito. Tsangshiq ka siphu wemiishi riito. Chhikhu we raq achak ka lamto. Shatmaq, laihü miili apaiq ka tsaikito.

²¹ Aphu jong kra tsaijai she, wulum we ma jai thongti we raq, anyi-chhi-nyung ka rom wanto. Shatmaq, apaiq kiimin laihü lahü miili tsaiki nongto. Kra jai miishe, wetsam ngoja we, nojam we riishe anyi-chhi nyung ka rom wan nong raütiimin, kiikhiisii hali, laihü lahü miili tsaiki nongto.

²² Kra jai maq anotiim weblai kra riimin, weshi shi maq, tsangnyi-chhi-nyung ka rom wanto. Shatmaq, tsangshiq siphu wemiishi wiita ka, laihü lahü miili siisaq tsai wanto. Atiisup niishe, jechak nyung kriishe tsaikito.

²³ Riita, ikhiijiila, phangthum akhing na, maiq ama wa dong wan tlaq ranaiq na, arnyung arka, ümriiti we tanyung miishe wa mija nya?” nguta waito. “Ara jamkhano wai tiikai ngukla, tsangshiq siphu wemiishi raq apaiq ka rom wanto.”

²⁴ Kiijiishe, Jesuq raq tsangshiq bom ka treto, “Namshiq ka ajiq pinthum! Jamlai wa jiqtlan kriika sap tlan sha? Namshiq raq Asii lakdam na chongtlaq bomtsi nai Shiikeawe ningkun ka sapman.

²⁵ Ara jamkhano chongtiikang ngukla, maiqse ka ama wa dong wan jai she ka, mungtan wa rasetiim ikhli she misi. Arlam nai arwa ngutiimin ahü she.

²⁶ Riita, maiqse ka ama wa tiidong wan lam bomtsi chongtlaq kra rii we ka, Mosheq raq awaiq thü lakdap na, sangphii rü ka wa na alü rai nguta chongtlaq lakjaq ba kra, namshiq raq phat man sha riitlan? Phat tlan. Kiijaq Shiikeawe raq Mosheq ma, ‘Ngi ka Abraham Shiikeawe, Isak Shiikeawe kiimaq Jakob Shiikeawe,’ nguta chongtlo.

²⁷ Apaiq ka maiq atra sitlaqti Shiikeawe. Maiq amati Shiikeawe ka riimak. Namshiq Sadusinok ka ajiq bintang bom tlan!” nguta Jesuq raq tsangshiq ma chongkuqto.

Aming Ajong Pinthum

²⁸ Thungtri shrinketi weshi ka kiijaq asi riito. Apaiq raq tsangshiq riibom ka taito. Jesuq raq Sadusinok ma bom ka aheawiq maq tre kra chhi raüta, apaiq riimin Jesuq ma bom poshi waila nguta, Jesuq phana kito. Raüta apaiq raq, “Aming raütu wa, ümriiti aming wa tarü thaq na akhek pinthum?” nguta Jesuq ma waito.

²⁹ Kiijiishe Jesuq raq treto, “Tarü thaq na akhek aming ka ara: ‘Israilnok le, tairong laq! Namshiq Tati Shiikeawe kli wiitarü thaq na Tati.

³⁰ Namshiq Tati Shiikeawe ka tsan, tsaiji, khutsai kiimaq ningkun wiita kuq lanta lungwii lili ronglaq.’

³¹ Kiimaq aming anai akhek ka ara: ‘Ümniiraq ümkhum ka jamkho lungwii tlaü, kiikhiisii hali, ümjam thoti chiiti kiimin lungwii laq.’ Ara aming anai ara tlea raüta, ahin akhek aming ka ahü she,” nguta Jesuq raq apaiq bom ka treto.

³² Kiijiishe Thungtri shrinketi we raq treto, “Shrinketi we, tengto! Chongtlaü ka tengto dea. Tatiwe kli nashiq Shiikeawe. Apaiq tlea raüta ahin Shiikeawe ka ahü she dea.

³³ Kiimaq maiqse raq Shiikeawe ka tsan nai khutsai wiita kuq raüta, kiimaq ningkun wiita kuq raüta lungwii lili riichang dea. Kiimaq apaiq raq maiqmii jamthoti ka maiqmii khum lungwii tlaq kiikhiisii hali lungwii chang dea. Ara aming anai lang wan ka Shiikeawe ma nyamse nai laihin honglu kuq tiikai kriithaq na athii atsin pinthum.”

³⁴ Jesuq raq abom tre atengwiq kra chhi raüta, “Ümniika Ramungtan na saüwa nam nam she,” nguta nguto. Arjai miishe ka jurmin Jesuq ma bomwai ka khumak she riito.

Khristo Ka Juwa?

³⁵ Jesuq raq Shomjam maq nokwe ma trahoke lam maq, “Thungtri shrinketibi raq Khristo ka Dawit saüse lai wa mipo nguta chongkuq tlaq kriika, jamlai bomtsi na seng raüto chong kuqtla?

³⁶ Asii Wenyi raq rom raüta, Dawit apaiq riili akha chongtlo, ‘Tatiwe raq i Tatiwe ma nguto: Ngi raq ümjaqti thun ka, ümjaq khon mong na mikuq wanha shaq wiiwii, ümniika i jaqtsi nü na ngachang arjaq ngashat li ngalaq.’

³⁷ Riita, Dawit apaiq riili, Khristo kra nangnga, ‘Tatiwe,’ nguta ngutaq jiika, Khristo ka, Dawit saüse phan ngutiika jamkho mingu?” Mungmaiqse pahea raq Jesuq traho bom chongke kra chochikhiq maq taisiqto.

Jesuq Raq Thungtri Shrinketibi Shrato

³⁸ Apaiq raq tsangshiq ma trahoke lam maq akha tsii chongkuqto, “Thungtri shrinketibi hon aja abi rüm tlaq kriima namshiq ka honkamshat maq sirong laq. Tsangshiq ka shiilang miirii maq tiimiikhiiq raüta, wiitarü raq tsangshiq kiidea mishreng laq nguta, kejat thung na tiichan miine khumsiqtlo.

³⁹ Tsangshiq raq sinagok na nai poi akhing na, shiilangbi ngachang kiijaq ngawa kli rittlo.

⁴⁰ Tsangshiq riika manti-nyungre tsiiqchong nyamchong kra nyeaho kham ma, rakhütsiri maq shetangtang achu jaü kuqtlo. Shiikeawe raq tsangshiq ka achong lot mai she mitiichamchao wan.”

Jaqchii Maq Akuq Honglu

⁴¹ Jesuq ka Jerusalem Shomjam na honglu kewa chang tek tho na nga raü riito. Apaiq ka maiq raq kampho honglu kuqtlaq kra liito. Chiithe maiqse pahea raq, kampho pahea honglu thütlaq kra shri ra liito.

⁴² Kiitiikaq manti-nyung ashi, miitsan pinthum kra riimin, nairai poisa anai, poisa nye roqnai rii honglu kra thüto.

⁴³ Kra chhi raüta, apaiq raq ajaqshisetiim ka apaiq tho na triitam hea raüta akha chongkuqto, “Ngi chongpha. Ara miitsan nyung raq honglu tek na thü wantaq arka, nanok ahinti raq honglu athü wan kra thaq na, apa pinthum thüto.

⁴⁴ Ara jamkhano chongtiikang ngukla, nanok ahinti thun riika, maiqmii win naü rii li kuqto. Shatmaq, ara miitsan nyung riika, chonkhi laqli se, apaiq ma tsiiqchong nyamchong athü, apaiq tsitsü paq chang raüpaq kriishe kuqto.”