Mark 11 - ASII LAKDAP Bible (BSI)

Mungmaiqse Raq Jesuq Jerusalem Maq Taoto

¹ Tsangshiq ka Jerusalem na saüho ma, Bethphej nai Bethani chela kra tho na, Olip Pero Hiqlam niishe saühoto. Kiimaq Jesuq raq ajaqshisetiim wa, wenai ka sinkhu na tiikili raüta,

² akha tsütsa tiichonghoto: “Armaq kongkhu na maiqhiq ashi asi. Kiijaq kiholi ronglaq. Kiijaq saüho han jiila, kumtoq pongse maiq jumin nga mak ashi, tiibanshat michhi hohan. Kra dii wa lanta, ana hewan ronglaq.

³ Ashi ra raq, ‘Jaram wa diiho lan?’ nguta waihaüla, ‘Tati ma ra tlo. Jaqlo jangphat li mijang thüki kai,’ nguta chong rong laq.”

⁴ Krai mren, tsangnai ka kiraüta kumtoq pongse ka lamkii na, jam kilam na tiiban raü chhihoto. Tsangnai raq kra diirea chhi raüta,

⁵ maiq wiijam kiijaq chapti raq, “Kumtoq se ka jaram wa diirat tlan?” nguta tsangnai ma waito.

⁶ Jesuq raq tsangnai ma jamkho tlang kuq taq kra phan phan, tsangnai raq tsangshiq bom ka treto. Kiimaq tsangshiq riimin kumtoq se ka tsangnai ma tiihe wanto.

⁷ Tsangnai raq kumtoq se ka Jesuq phana he wanto. Raüta, kumtoq raikhü na tsangshiq khea ka phii kuqto. Kiijaq Jesuq ka nga raüta Jerusalem na wato.

⁸ Maiq pahea raq tsangshiq dü na asam kheathum kra chhut raüta, Jesuq wachang lam na phii kuqto. Kiimaq wiijam riika, lamkii wa pekü ka wiijaq tam maq lamki raüta, apaiq wachang lam kiina phii kuqto.

⁹ Mungmaiqse Jesuq rai wadamti, apaiq khaki na nai apaiq jai na kongta hushhu maq wawan damtlaqti thun raq, “Shiikeawe li tiitsam ronglaq! Shiikeawe le, Tatiwe mang na kitliiwe kra shiiman kuq laq!

¹⁰ Shiikeawe le, naiti Dawit raq mung lang wantaq ikha, hokham jawanti we saüho tlaq, kriidea shiiman kuq laq! Shiikeawe khushüli dea mijong laq!” nguta Shiikeawe ka tiitsam kamto.

¹¹ Jesuq ka Jerusalem niishe saüto. Raüta, Shomjam wang mong na wato. Shatmaq, kiitiikaq ka rashe acha she kha maq, apaiq ka ajaqshisetiim roqshi ri anai rai Bethani hiq na janghoto.

Jesuq Raq Phupmup Chong Sonto

¹² Kriimaq napjai ranaiq she, tsangshiq ka Bethani maq, Jerusalem- salem na awa rai riito. Jesuq ka aramtsi riito.

¹³ Apaiq raq lamphai na phupmup chong ashi, ajaq nüm wa hea la chhito. Raüta, apaiq ka atsi asi lo nguta, achongji na kito. Shatmaq, liikiita atsi ka ahü. Kra akhing ka phupmup tsichoji ka riimak riito.

¹⁴ Kiijiishe Jesuq raq, “Jurmin ümtsi ka pansiq lumak she miraq!” nguta pechong ka sonto. Kiimaq ajaqshisetiim riimin, apaiq raq pechong sontaq kra taito.

Jesuq Raq Laopanbi Jobaiqto

¹⁵ Tsangshiq ka Jerusalem na saü wan raütiishe, Jesuq ka Shomjam mong na wato. Raüta, kiijaq laopan jatibi, riri thiithiiti thun kra jobaiqto. Apaiq raq kampho chakti chamrii nai haütaü shati hupsam phong chang chamrii thun kra wiita akap atsea, tuwan piiwan tsit baiqto.

¹⁶ Kiimaq apaiq raq Shomjam keathung lam maq huk-ho samho maiq ka jumin tiikhum mak she riito.

¹⁷ Kra raütiishe, apaiq raq, “Asii Bomtsi na Shiikeawe raq, ‘I Jam ka mangjong maiqse tlotli ma, achu jaü chang, Asii Shomjam miraq,’ nguta chongtlo. Shatmaq, namshiq riitiq sha, ahuk arotti thun kra tiibo chang jam miishe tiija baiq holan nya!” nguta nokwe ma chongkuqto.

¹⁸ Ramwe jongbi nai Thungtri shrinketibi raq ara jaqsham wantaq kra tsütsa ka taito. Raüta, tsangshiq raq apaiq ka atsea baiq ma nguta tsangshiq raq lamlu she ritto. Mungmaiqse ka apaiq traho bomchongke kra tairaüta kai amao riito. Kriikha maq, tsangshiq ka ahai she riito.

¹⁹ Raji niishe, Jesuq nai ajaqshisetiim ka Jerusalem wa ahin na hali wawan nongto.

Shiikeawe Ma Kam Ronglaq

²⁰ Anap ranap niishe, tsangshiq ka lam na awa lam maq, phupmup chong ka chhito. Kra chong ka atsii maq riita achong ji na saüli atsai kaiwi she riito.

²¹ Petar raq phupmup chong ka jaro tsaikita, kra sapshat kha maq, Jesuq ma chongto, “Liilaq, Shrinketi we, ümniiraq sonlaü phupmup chong ka tsaikito she!”

²² Jesuq raq tsangshiq ma chongto, “Shiikeawe miili kam ronglaq.

²³ Ngi chongpha, tiitsang taironglaq. Jurwa kamtsantsii pharang rang maq, ara hiqlam kaü ara nangnga, tiikoq wan laq, laüta sammoktra jü mong na kü wan laq nguta thaü tlaq, kiimaq atsan mong na tsan nai thümak, shatmaq apaiq raq jamlai chongtlaq kra mihongwa nguta kamtlaq, raüla, apaiq miitu miklokuq.

²⁴ Arkha maq, ngi raq ümniima chong tiikang: Ümtiikiiwa ümniiraq phanshi ra miitu achu jaütlaü, kra ümniiraq lapkang she nguta kamlaq, krai mren ümniiraq jamlai wa jaülaü kra milap haü.

²⁵ Kiimaq ümtiikiiwa, namshiq raq achu jaütlan na, tsan na kongti weshi ra rai tsan riibi asi nguta tiido kiiphan la, kra mra ka adü riibaiq ronglaq. Kra riihan jiitiq, üm We Shiikeawe, ramungtan na siti riimin ümngarai thun ka midii kuq.

²⁶ Ümniiraq nanok kongti mra ka diikuq maü jiila, ramungtan na siti üm We riimin üm ngarai ka diikuq mak miraq.”

Jesuq Arang

²⁷ Tsangshiq ka Jerusalem na hali saüho nongto. Raüta, Jesuq ka Shomjam mong na akhum sia riito. Kiijiishe, ramwe jongbi, Thungtri shrinketibi, kiimaq welabi phong wa wiijamti ka apaiq phana kito.

²⁸ Raüta apaiq ma bom ka akha waito, “Ümniiraq arthun ara klo miitu, arang ka jamwo lap laü? Ümniima arang ka juro kuqta?”

²⁹ Kiijiishe Jesuq raq tsangshiq bom ka treto, “Ngi raq namshiq ma bom poshi waipha. Namshiq raq i bom ara tre han jiila, ngi riimin arthun sham wan miitu, arang ka juro kuqta, kra michong kuqkang.

³⁰ Riita, ngi ma chongrong liita: Khamlamketi we Johan ma, khamlamke arang ka juro kuqta? Shiikeawe riisha? Sha maiqse raq akuq wa?”

³¹ Kiijiishe tsangshiq liipan na akhiishe riikhiito, “Riita nashiq raq jamkho mingu rong i? Nashiq raq Shiikeawe arang maq nguta trehai jiila, apaiq raq nashiq ma, ‘Riita namshiq raq Johan bomchong ma jamto kam man’ nguta mingu.

³² Shatmaq nashiq raq, ‘Maiqse arang maq,’ ngu hai jiila…” (Tsangshiq ka mungmaiqse ma ahai kata. Jamkhano ngukla, Khamlamketi we Johan ka, shammi nguta mung maiqse raq sapshat.)

³³ Kriikha miishe, tsangshiq raq, “Naishiq riiha sapmai,” ngutiishe Jesuq bom ka treto. Kiijiishe Jesuq raq, “Ikhiijiika, ngi riimin, arthun ara ju arang mo sham tiikang, kriika chongkuq mang,” ngutiishe tsangshiq bom ka treto.