Mark 10 - ASII LAKDAP Bible (BSI)

Armiim Tri Tsiichong

¹ Kriimiishe, Jesuq ka kra hiqshong wa tiido wan raüta, Judia wang na Jordan raire nü na kihoto. Nokmaiqse ka apaiq phana pahea, konta hushhu maq hali riitsap wan nongto. Kiimaq apaiq raq tsangshiq ma, rahin jaq akhing na ikha, Shiikeawe bomtsi shrinkuqto.

² Phorisinok wiijamti ka Jesuq phana waraüta, apaiq ka tsangshiq thiikho na tiithap haijaq nguta, bom ka akha waito, “Chongliita, nashiq Thungtri na, chakmiim thungtri ka asi shea ahü wa?”

³ Kiijiishe Jesuq raq tsangshiq ma hali wainongto, “Mosheq raq namshiq ma jamlai thungtri wa kuqta?”

⁴ Tsangshiq raq treto, “Mosheq riika, awese raq tsang-nyung ma amiim baiq lak waiqkuq raüta miimbaiq aming kuqto.”

⁵ Kiijiishe Jesuq raq treto, “Mosheq raq namshiq ma ara tri raü waiqkuq thütaq arka, namshiq tsantsii ka tsinhea, atiitsii lot chang riimak ngo kha maq, ara waiqkuq thüto.

⁶ Shatmaq, ümsmaq ra nai hiq tiiq wantaq akhing niika, ‘Shiikeawe raq tsangshiq ka maiqwe nai jechak tiiq wanto,’ nguta Asii bomtsi na chongtlo.

⁷ ‘Kiimaq arkha miishe, maiqwe raq anyung nai awe ka baiqthü raüta, achak rai pumshi hanshi mishong wan.

⁸ Kiimaq tsangnai sinyungwe ka pumshi miishe mija wan.’ Ara chongtlaq arkha maq, maiq ka ata she ngu raüla, tsangnai ka pum nai ka riimak she, pumshi lishe.

⁹ Ara chongtiikai arkha maq, Shiikeawe raq maiq ka ata awii she nguta aromkuq kriika, maiqse raq triiphea baiq maimak.”

¹⁰ Tsangshiq ka jam na jang wan nong jai she, ajaqshisetiim raq Jesuq ma ara bomtsi ka tiitsang waito.

¹¹ Apaiq raq tsangshiq ma akha tiitsang chongkuqto, “Jurwa achak miim raüta, nyungnye lamho tlaq, kriika tsang-nyung shummii ma, maiqchak rai sra kai ngarai tang tlo.

¹² Kiikhiisii hali, ata-nyung raq awese ka miim raüta, wenye ma wawan tlaq kriimin, sethoq ja ngarai tang tlo.”

Jesuq Raq Nosere Shiimanto

¹³ Maiq wiijamti raq nosere ka Jesuq phana shea wanto, apaiq raq tsangshiq dü na ajaq maq sham raüta achu mishman kuqlaq nguta. Shatmaq, ajaqshisetiim raq nosere shea wanti ka atiiwin sonto.

¹⁴ Jesuq raq kra chhi raüta, tsangshiq ma akhiq riito. Kiimaq ajaqshisetiim ka akha sonto, “Nosere ka ana i phana tiiwa rong laq, naq tiiwin rongkiq. Ara nosere akha siti miitu, Shiikeawe Mungtan ka sitlo.

¹⁵ Ngi chongpha, tai ronglaq, jurwa ara nosere akha ja raüta, Shiikeawe Mungtan ka tao mak, kriiti ka ümtiikiimin Shiikeawe Mungtan na saülot mak miraq.”

¹⁶ Kra ngu raütiishe, Jesuq raq nosere ka awopum na do raüta, ajaq maq nosere khumtek dü na sham raüta, achu shiiman kuqto.

Chiithe Maiqse Nai Ramungtan Rilung

¹⁷ Kiimaq Jesuq nai ajaqshisetiim ka tiido wan raüta awa rai, lam niishe riito. Kiijaq maiq weshi ka tlat chhat ju raüta, Jesuq khaki na, kaütsrong na ngasaq raüta, “Ahea Shrinketi we, ngi raq pattup rilung lap miitu jamlai jaqsham chang wa miraq?” nguta apaiq ma waito.

¹⁸ Kiijiishe Jesuq raq treto, “Ümniiraq ngi nangnga ahea ngutiika naq ngukiq. Shiikeawe lamlamli ahea.

¹⁹ Ümniiraq Mosheq raq akuqthü thungtri aming thun ka asap haü. Kiijaq akha chongtlo: ‘Mat we ma naq jakiq; sipeja ngarai naqtangkiq; ahuk naqjakiq; khühü na maiq ma kha naq nyankiq; maiq ka naq laokiq; ümnyung nai ümwe ka shreng laq!’ ”

²⁰ Kriiwe raq treto, “Shrinketi we ngi raq nose miiphü, arthun aming ara wiita lang kang she.”

²¹ Kiijiishe Jesuq raq apaiq phanü na, mangchan lam maq lii raüta apaiq ma akha chongkuqto, “Ümniiraq phanshi jaqsham chang dea asi shaq li. Ümniika ümjam na jangkikiq. Laüta tachong tsiiq anyam ka wiita asha riilaq. Laüta, kra kampho ka miitsan maiqse ma pheakuq laq. Akha riihaü jiila, ümniika ramungtan na chiithe ma mija haü. Kra laüta, i phana wara. Laüta i jaqshi se miishe jawan laq.”

²² Ara Jesuq bomtsi kra tai raüta sanha, kriiwe mun ka tiijuk ram she riito. Kiimaq apaiq ka atsanbi wa rashra she, munjuk mijuk she tiido wawanto. Apaiq ka chiithe we kha maq atsiiq ma tsantsi hea.

²³ Kiijiishe, Jesuq raq ajaqshisetiim pha nü na lii raüta nguto, “Chiithe maiqse ma, Shiikeawe Mungtan nyap wan ka pinthum hahea!”

²⁴ Ara tai raüta, ajaqshisetiim ka akiinyii she riito. Shatmaq, Jesuq raq tsangshiq ma akha chongkuqto, “I setiim le, Shiikeawe Mungtan na nyap wa ka hahea pinthum!

²⁵ Kumtsong ka maichhi khu maq lealot mak. Hahea. Shatmaq, kra thaq niimin chiithe maiqse ma, Shiikeawe Mungtan na nyap wan ka hahea pinthum.”

²⁶ Ara tai raüta, ajaqshisetiim ka pinthum wangto. Kiimaq tsangshiq liipan na, “Riita ümkhiiti li she wa mitiichhii lot nya?” nguta bom ka riiwaito.

²⁷ Kiijiishe Jesuq raq tsangshiq pha nü na lii raüta akha chongkuqto, “Arka maiqse raq lot chang ka riimak. Shatmaq, Shiikeawe miika jam min harai mak. Shiikeawe riika phanrap milot siisaq.”

²⁸ Kiijiishe, Petar raq treto, “Liilaq, naishiq raq phanrap miimthü laita, ümjai phan wan kai.”

²⁹ Kiijiishe Jesuq raq tsangshiq ma akha chongkuqto, “Kriika tengto. Ngi chongpha. Jurwa ajam lo, aphu anotiim lo, ashea nyungtiim lo, anyung lo nai awe lo, asetiim lo, kiimaq awak thung lo, ngi miitu, kiimaq ara Asii tsütsa ara chongke jaqsham miitu baiqthü tlaqti riika,

³⁰ ara mangjong hiq amiili, achu shiiman pahea milap. Apaiq raq aroq ashi maq pat raüta, ajam, aphu ano, ashea nyungtiim, anyungtiim, asetiim kiimaq wak thung jan dam pahea milap. Kiimaq achamchao thun min mirhum. Kiimaq mungtan saüho tlaq akhing na, apaiq raq pattup rilung milap wan.

³¹ Shatmaq, ümchaü maiq pahea juwa sinkhu na watiikai nguta tiima tlaq, kriiti ka aran ma mija wan. Kiimaq juwa jai na watiikai nguta tiima tlaq, kriiti ka ajong ma mija wan.”

Thongtsam She Apaiq Tsailam Chongto

³² Jesuq nai ajaqshisetiim ka Jerusalem na kairai, lam niishe riito. Jesuq ka ajaqshisetiim khaki na lamshea kito. Tsangshiq ka tsanchhii wa hun shiihun she riito. Kiimaq tsangshiq jai na khumti, nokmaiqse kong kiimin tsangshiq hai tiisishat she riito. Kiijiishe Jesuq raq ajaqshisetiim roqshi ri anai kra pong ba na sheaho raüta, tsangshiq ma thongshi ri hali apaiq dü na tiisaü wan tlaq chamchao homa kra tsangshiq ma tiitai chongkuq nongto.

³³ Apaiq raq tsangshiq ma akha chongkuqto, “Tai ronglaq, nashiq ka Jerusalem na kitiikai. Kiijaq Maiq Se ka ramwe jongbi nai Thungtri shrinketibi jaqkhon mong niishe mishaphaq baiq. Tsangshiq raq apaiq ka atsea baiq chang nguta matkii misü. Raüta, Pongnok phan maiqse jaqkhon mong na misha phaq baiq.

³⁴ Tsangshiq raq apaiq ka mihaihii. Adü na tho maq mitho. Jinponyam chongwai maq mitsat. Raüta apaiq ka atsea mirbaiq. Shatmaq, ranaiqtsam jai maq, apaiq ka ama wa adong mirwan nong.”

Jakob Nai Johan Raq Wela Ngachang Jaüto

³⁵ Kiitiikaq Jebedise Jakob nai Johan ka Jesuq phana waraüta, “Shrinketi we, ümniiraq nainai ma phanshi jaq shamkuq laq,” nguta jaüto.

³⁶ “Jamlai wa?” nguta Jesuq raq tsangnai ma waito.

³⁷ Tsangnai raq treto, “Ümniika ümtiikiiwa Hokham Ajong ma ja laüta mangjong hiq ka milang haü, kra akhing na ümniirai, nainai siphu armin, ashi jaqtsi na, ashi jaq pha na tiinga haü jaq ahea nguta tiima tiikai.”

³⁸ Kiijiishe Jesuq raq, “Namnai riika jamlai wa jaütlan kra sapman. Ngi raq nyang chang chamchao kok ka, namnai riimin minyang lot han sha? Kiimaq ngi raq chamchao wa maq kham lam tiikang, kra wa maq namnai riimin kham ka milam lot han sha?” nguta tsangnai bom ka treto.

³⁹ Kiijiishe “Milot hai” nguta tsangnai raq treto. Jesuq raq tsangnai ma hali chongto, “Kra ngutlan ka tengto. Ngi raq nyang tiikang chamchao kok ka, namnai riimin minyang han. Kiimaq ngi raq lam tiikang kiikhiisii, kham min milam han.

⁴⁰ Shatmaq, ngi rai jaqtsi na nai jaqpha na, ju nga chang wa kra, tsea miitu arang ka i jaq na ahü. Arka, Shiikeawe raq ümriiti ma kechang ngutiiwa tiije wantaq, kriiti miili mikuq.”

⁴¹ Kra bom ka, ajaqshisetiim roqshi kra riishe tai raüta, tsangshiq ka Jakob nai Johan ma akhiq riito.

⁴² Kriikha maq, Jesuq raq tsangshiq tarü ka adam na triitam hea raüta, tsii ka akha chongkuqto, “Namshiq raq asap han. Mangjong hiq na thatsang maiqse thaq na welabi riika, asengi thaq na arang ho tlo. Kiimaq asengi ka jaqkhon mong na rümtlo.

⁴³ Shatmaq, namshiq liipan niika, akha sichang ka riimak. Namshiq phong wa, juwa ajong ma jaro tiima tlan, kriiti ka tarü jaqshise ma ja ra tlo.

⁴⁴ Kiimaq namshiq phong wa, juwa tarü thaq na chhikhu ma ja ro tlan, kriiti ka tarü dise ma ja ra tlo.

⁴⁵ Ara jamkhano chongtiikang ngukla, ara mangjong hiq na Maiq Se saüki taq arka, mangjong maiqse raq apaiq ka mishli lii laq nguta aki riimak. Shatmaq, apaiq ka maiqse shiililii kai, kiimaq apaiq miisaq kra kuq raüta, mangjong maiqse kra dokda kai nguta kito.”

Makchuk We Bartimeas Tiiheato

⁴⁶ Jesuq ka Jeriko niishe saüto. Apaiq rai ajaqshisetiim kiimaq nokmaiqse phong pahea ka lam na awa rai she riito. Tsangshiq walam na poraki we ashi, amak min achuk we ka anga raü riito. Apaiq mang ka Bartimeas. Apaiq ma awe mang ka Timeas.

⁴⁷ Apaiq raq Najarethti Jesuq ka watlo nguta tai raüta, “Dawit Se, Jesuq loi! Ngi ara mangchan laq!” nguta agilülü siihoto.

⁴⁸ Maiq pahea raq apaiq ka asea raüta tiitsaqto. Shatmaq, apaiq ka ajong maq, “Dawit Se loi! Ngi ara mangchan laq!” nguta, jagi wan wan khoti siihoto.

⁴⁹ Kiijiishe Jesuq ka achap raüta, “Apaiq ka ana hea laq” nguta thaüto. Krai mren tsangshiq raq makchuk we ma, “Tsaiji tiijong laq! Tiidolaq. Apaiq raq ümnaq hea tlo,” nguta chongkuqto.

⁵⁰ Krai mren, apaiq raq akhea thum ka chhutjok raüta, tiidopot riito. Raüta, adoq haha, Jesuq phana wato.

⁵¹ Kiijiishe “Ümniiraq jamlai phan jaüro wa?” nguta Jesuq raq apaiq ma waito. “O Shrinketi we le, i mak ara tiipiiq kuqlaq. Ngi raq achhi nong rotiikang,” nguta makchuk we raq treto.

⁵² Kiijiishe “Walaq, ümkam tsantsii maq heaki laü she,” nguta Jesuq raq apaiq ka thaüto. Kiimaq, amak ka tiidoqra heakisaq she, heakito. Kiimaq, apaiq raq phanrap aheawiq she chhito. Kiimaq apaiq raq, Jesuq jai she phan wanto.